#انت_قلبي٣
_________
الحلقة ٨٤
في منزل عُمر.
مليكة : يا حبيبي دا صغنن قوي.
فريدة : هههههههههههه يوسف كان صغنن كده تعالى شوف البيبي يا يوسف.
نادين : فريدة خُدي بالك علشان يوسف شقي.
مليكة : أنا هاخد بالي منه
معلش أصل خاوت دماغي أنا وسيف من ساعة ما عرف إننا جايين للبيبي
عاوز اشوف البيبي يا مامي عاوز اشوف البيبي.
فريدة : يا حبيبي تعالى يا يوسف.
تشده كنده : تعالى شوف اخويا بس قول لمامتك تجيبلك بيبي.
فريدة : هههههههههههه بس يا كوكي تعالى يا سيف.
مليكة : تعالي انتي بقى يا كوكي هو في حد مسلطك على يوسف؟!
فريدة : هههههههههههه هي زي ما بتسمع اللي أكبر منها بيقول الكلام ده.
سيف يخبط على الباب : ادخل ولا في حد كاشف شعره؟!
فريدة : هههههههههههه تعالى يا خالو.
سيف : ازيك يا فريدة ازيك يا نادين؟
فريدة : تمام اتفضل ادخل.
نادين : أنا بخير يا سيف.
سيف : طول عمرها بنت اختي دي مؤدبة هههههههه
نادين : اه.. هو أنت قعدت مع ماما بره وقلبتك عليه أنت كمان ولا ايه؟
سيف : بتقولي ايه مش فاهم؟!
مليكة : طيب بعد اذنكم.
فريدة : رايحه فين يا مليكة اقعدي.
مليكة : معلش هطلع اقعد مع طنط ياسمين بره.
وخرجت مليكة من الغرفة.
سيف : فيه ايه يا نادين مالك ايه الكلام اللي بتقوليه ده ماما قلبتك عليه وكلام غريب كده مش فاهمه.
نادين : يعني صاحبك مش كلمك يشتكيلك مني؟
سيف : لا حمزة لا كلمني ولا قابلته اصلا فيه ايه بقى؟
نادين : ماما سخنته عليه
وقال ايه حضرته زعلان وبيقولي بتكلمي مامتك بأسلوب وحش وكمان مامتي وبصراحه كده أنا بدأت اقلق منك والموضوع دا هيأثر على علاقتنا ببعض دا لو مكانش مأثر من زمان يعني.
سيف : اه وبعدين؟
نادين : قولتله عاوز ايه من الأخر يعني امشي واسيبلك البيت يمكن أعصابك تستريح لاقيت رده اللي هو انتي حرة
قومت لميت هدومي ولبست بنتي وكلمت بابا جه اخدني.
سيف : مجنونة.
نادين : متغلطش.
سيف : اولا انتي اللي دخلتيني في الحوار اللي أنا أصلا مكونتش اعرفه مش قابله كلامي متكلمنيش خالص تاني حاجه بقى ايوه انتي غلاطه ولسانك طويل واتوقع منك أي حاجه مع إني معرفش عملتي ايه مع مامتك وحماتك بس مصدق اللي مامتك هتقوله.
نادين : خلاص يبقى شرفت ونورت.
فريدة : نادين عيب كده.
نادين : اسكتي انتي كمان بيقولي اتوقع منك أي حاجه وعاوزاني اسكت.
سيف : على فكرة كلامك ملوش أي أهمية عندي أنا في بيت اختي وجوز أختي اما انتي بقى فميتردش عليكي.. سلام.
وقام سيف خرج قعد معاهم بره.
______
في الصيدلية.
علاء : ايه اللي حصل لكل دا بس يا ندى؟
ندى : حاجة كريم اهيه ابقى ادهاله.
علاء : استني بس يا ندى الكلام أخد وعطا مش قفش كده أنا مفهمتش حاجه ليه نازله بالحاجة دي دلوقت هي مش مفروض حاجة بنتك يعني هي لو اخده القرار ده تسلمه الحاجة اللي بتقولي بتاعته دي في ايده مش انتي؟
ندى : خلاص لو دي المشكلة يا علاء اخليها بكره تسلمهاله بنفسها.
علاء : ايه اللي حصل يا ندى أنا من ساعة ما قعدتي وأنا عمال أسألك السؤال ده مدتنيش جملة مفيدة.
ندى : اللي حصل إن بنتي مش هتبقى سبب مشاكلكم يا علاء.
علاء : تالا!
وهي ايه علاقتها بمشاكلنا وبعدين مشاكل ايه دي مش فاهم؟
ندى : مشاكلك أنت وشهد أنا الصبح شوفتها واخده شنطة هدومه وخارجه من الشقة سألتها مالك في حاجه ولا ايه فكرت مامتها تعبانه قالت لأ هي رايحه تقعد هناك واللي فهمته إن بنتي سبب مشكلة حاصله عندكم في البيت ايه هي بقى معرفش.
علاء :"اه فهمت.. طيب خُدي الحاجة دي معاكي دلوقت وبعدين نبقى نتكلم.
ندى : علاء مش عاوزه أنا ولا بنتي نتسبب في مشاكل لحد.
علاء : مفيش مشاكل ولا حاجه اسمعي الكلام وخُدي الحاجة دي يلا.
ندى : كده الموضوع متحلش.
علاء : هيتحل اطمني يلا بقى تصبحي على خير.
_________
في التليفون 📞
تالا بتبكي : معرفش.
كريم : يعني ايه مامتك مقالتش ايه سبب القرار الغريب ده وانتي ايه ملكيش رأي خالص كده؟!
تالا : أنا اتكلمت مع ماما كتير وحاولت افهم ايه اللي حصل مفهمتش حاجه..
كانت ندى بتفتح باب الشقة.
تالا : طب مع السلامة بقى علشان ماما جات.
كريم : طيب هكلمك الصبح اعرف منك ايه الجديد وانتي لازم متوافقيش على اللي بيحصل دا أنا هكلم بابا يكلم مامتك وجدك علشان مينفعش يتعمل معانا كده
احنا مش صغيرين علشان يوافقوا ويجوا كده بدون مقدمات يفركشوا كأن رأينا دا مش مهم.
تالا تهمس في التليفون : بقولك اقفل ماما جات.
كريم : طيب تصبحي على خير.
تالا : وأنت من أهله.
قفلت تالا ونظرت لمامتها.
ندى : فيه ايه مالك؟
تالا عينها من الحاجة اللي نزلت بيها ندى ورجعت بيها تاني بابتسامة : مفيش يا ماما.
ندى : طيب ادخلي نامي تصبحي على خير.
تالا بفرحه : وحضرتك من أهل الخير.
بعتت رسالة لكريم قالتله فيها.
ماما رجعت بالشبكة بتاعتي تاني تفتكر لاقت باباك تحت ولا حصل ايه؟
رد كريم برسالة : معرفش بس دا إلى حد ما يطمنا إن مفيش حاجه حصلت لحد دلوقت يعني احنا لسه مخطوبين وحتى لو مامتك رجعت الحاجة وبابا قبلها أنا هاخدها تاني واجي أخبط على بابكم ادهالك.
ندى : تالا اقفلي الموبايل دا وادخلي نامي.
تالا : حاضر يا ماما.
مع السلامة دلوقت بقى
وابقى اسأل باباك اتأكد منه.
كريم : حاضر.. سلام.
_____________
أنت تقرأ
أنت قلبي الجزء الثالث
Werewolf(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
