أنت قلبي الجزء الثالث

الحلقة ٣١

#انت_قلبي٣
__________
الحلقة ٣١

في شقة كمال ونادين.
كمال يخبط على الباب.
كمال : سيف.. سيف مش رايح الشغل النهاردا ولا ايه؟
ميردش سيف فيدخل كمال يطمن عليه.
كمال : سيف.. سيف.
سيف يتقلب بصوت ناعس : مليكة سبيني نايم شويه.
كمال : سيف أنا بابا.
سيف : بابا!
كمال : ايه مش رايح الشغل النهاردا؟
سيف : لا هقوم اهوه.
كمال : لو تعبان ريح و بلاش تنزل النهاردا.
سيف : لا انا كويس.
كمال : عملت ايه امبارح؟
سيف بتنهيده : ولا حاجه.
كمال : ايه مروحتش؟
سيف : روحت و منزلتش حتى تكلمني.
كمال : معلش روح تاني وراضيها بكلمتين وهاتها معاك.
سيف : لأ أنا مش رايح تاني.
كمال : ليه؟
سيف : تيجي بقى لوحدها.
كمال : ولو مجاتش؟
سيف : خلاص خليها عندها طالما مستريحه هناك.
كمال : سيف انت مش شايف نفسك غلطان؟
سيف : ولو حتى غلطت يا بابا متسبش البيت نقعد نتفاهم مع بعض.
كمال : مين اللي ساب البيت قبل التاني؟
سيف : أنا نزلت قبلها بس نزلت روحت اشغل وانا راجع في دماغي اني اصالحها.
كمال : ومصالحتهاش قبل ما تنزل ليه؟
سيف : سيبتها تهدا شويه لو فضلت قاعد كانت المشكلة كبرت اكتر.
كمال : بس اللي حصل إن نزولك قبلها هو اللي كبر المشكلة.
سيف : هي مبتحاولش تعدي واقفه على الواحدة وبعدين بتقولي بابي هيحاسبك دي كلمة تقولها يا بابا هو انا عيل صغير هتخوفني.
كمال : يبقى أكيد عملت حاجه خلتها تقولك حاجه زي دي ما هو البنت متتحاماش في والدها إلا لما متحسش بالأمان مع جوزها
ليه وصلتها تقولك كده؟
سيف : قولتلها الباب يفوت جمل.
كمال : حلو قوي وعاوزها تقعد بقى تعمل ايه وكمان تنزل وتسيبها ايه كنت عاوز ترجع تلاقيها قاعدة مستنياك؟!
سيف : بابا أنا....
يقاطعه كمال : ايه زهقان تعبان حاسس إن الجواز مسؤلية وانت مش قدها؟
خلاص مكونتش تتجوز.
سيف ': الموضوع مش كده يا بابا كل اللي فيها إني بمر بظروف ماديه يعني ومزنوق شويه.
كمال : تمام هي ذنبها ايه؟
سيف : تستحملني يا بابا.
كمال : ايوه تستحمل ظروفك المادية لكن تستحمل عصبيتك وقلة احترامك ليها ازاي قولي؟
سيف : أنا مبحترمهاش يا بابا؟!
كمال : ايه هتنكر امال اللي بتحكيه دا ايه؟
سيف : يعني حضرتك عمرك ما اتنرفزت على ماما ولا كل واحدة جوزها يضايق شويه تسيب البيت وتمشي.
كمال : سيف متضحكش على نفسك انت ومليكة متخانقين مع بعض قبلها صح؟
سيف : صح.
كمال : طيب ما سألتش نفسك هي ليه مخرجتش وقتها؟
لا استنى هجاوب انا
علشان ببساطه المرادي حضرتك طردتها.
سيف : أنا!
كمال : أنت يا ابني بتنسى انت قولت ايه
مش قولت الباب يفوت جمل انت عاوز يكون ايه رد الفعل الطبيعي على الكلام ده؟!
سيف : طيب أنا روحت لحد عندها منزلتش وقالت لمامتها تقولي إنها محتاجه تستريح كام يوم
للدرجادي كارهه حياتها معايا.
كمال : شوف ايه السبب وانت مش هتتعجب كده سيبها كام وابقى روح اتكلم معاها واتفاهموا مع بعض يلا قوم ألبس لو نازل الشغل.
سيف : حاضر.
___________
في شقة كريم.
كريم بصوت ناعس : الساعة كام يا فريدة؟
فريدة : تسعة.
كريم يقوم بسرعة : يا خبر ازاي تسبيني نايم لحد دلوقت؟!
فريدة : أنا كمان راحت عليه نومه لسه قايمه من عشر دقايق بس لاقيت الولاد نزلوا لكن جميلة طبعا نايمه جوه.
يقعد كريم على طرف السرير عقبال ما يفوق.
قعدت فريدة بتنهيدة.
كريم : مالك يا فريدة؟
فريدة : مفيش.
كريم : لأ فيه هو أنا مش عارفك ولا ايه؟
فريدة : حازم وحشني قوي.
نظر كريم لها بدهشه.
فريدة : قابلته امبارح بس مقدرتش اكلمه.
كريم : ليه كلميه عادي.
فريدة : بعد اللي عمله؟!
كريم : معلش انتو في النهاية اخوات.
فريدة : طب وانت؟
كريم : أنا ايه؟
فريدة : مش هتكون زعلان؟
كريم : لا طبعا وهزعل من ايه انتو اخوات انا اه زعلان بس دي حاجه تانية انتي ملكيش علاقة بيها.
فريدة : ازاي يا كريم وهو زعلك ده ملوش أي قيمه بالنسبالي علشان ارجع اكلمه زي زمان؟
كريم : ايوه علشان انا علاقتي بيه غيرك على العموم براحتك بس الأفضل انك تكلميه حتى لو من جواكي مش مسامحه مع الوقت هتنسي.
فريدة : طب ليه انت مش قادر تنسى؟
كريم : كل اللي فيها إننا مبنتقابلش وهو ولا مرة جه اعتذر.
فريدة : هو بيحاول يكلمني بس انا طبعا من جوايا مش قادرة اتعامل معاه.
كريم : معلش حاولي تتعاملي معاه عادي خصوصا في الظروف دي.
فريدة : صعبان عليه نفسي قوي منه وفي نفس الوقت صعبان هو عليه.
كريم : فاهم احساسك ده
بس معلش لو قادرة تسامحي سامحي وخلاص.
فريدة ' رايح فين؟
كريم : هقوم بقى اخد شاور علشان اصحصح وانزل اشوف شغلي.
فريدة : اوك هحضر الفطار عقبال ما تخلص.
كريم : زين امتحاناته امتى؟
فريدة : الشهر الجاي.
كريم : ايوه عارف كام في الشهر؟
__________