أنت قلبي الجزء الثالث

الحلقة ١٦٢

#انت_قلبي٣
_________
الحلقة ١٦٢

هنادي : والدكتورة قالت لك ايه؟
مريم : قالت لي انتي جايه تهزري دي لو ولادة حقيقي مكنتيش جايه كده ماشيه عادي مش كل اما تحسي بوجع تيجي تجري الولادة الحقيقية مش كده خالص.
هنادي : معقوله قالت لك كده؟!
مريم : دي خوفتني أكتر يا ماما هي الولادة بتبقى صعبة قوي كده؟!
هنادي : لا يا حبيبتي مش صعبه ولا حاجه ادعي كتير يا مريم إنك تقومي بالسلامة.
مريم : ادعيلي يا ماما أصل خايفه قوي وكلام الدكتور كمان خلاني اتوتر أكتر مراد قال لي لو أخر دكتور في البلد مش هخليكي تولدي عندها علشان مفروض تطمنك
أصل خرجت من عندها وأنا مش شايفه قدامي من كتر العياط اللي عيطه هناك.
هنادي : يا حبيبتي
لا طبعاً متولديش عندها جوزك عنده حق.
مريم : هتقعدي تتغدي معانا مراد زمانه جاي.
هنادي : لأ أنا هروح واجيلك بالليل اقعد معاكي شويه.
مريم : مراد هيزعل قال لي خلي مامتك تقعد لحد ما اجي ولا تكوني نازله البلد تعزي؟
هنادي : لأ اروح فين بس يا بنتي أنا من بعد وفاة أمي مروحتش ولا ناويه اروح دلوقت ولو روحت هيبقى صد رد أزور اللي لينا في المقابر واجي على طول.
مريم : اصلا لو روحتي تعزي عمتي كوثر وبناتها وولاد عمتي صباح مش هيفوتوا الفرصه دي وأنا عارف اللي في دماغهم.
هنادي : أنا ميهمنيش حد بس بلاش اروح هعزي عمتك نرمين هنا وخلاص.
مريم : احسن برضو اقعدي بقى ولا مش عاوزه تقعدي مع مراد ولا ايه؟
هنادي : لا أبدًا يا بنتي علشان بس ياخد راحته هيرجع تعبان هقعد اعمل ايه بقى.
مريم : لا هو مش هيجي تعبان ولا حاجه هو اصلا مكانش عاوز ينزل الشغل ولا بكرة كمان وباباه لما عرف إني تعبانه قاله خليك متجيش بس أنا اللي اتحايلت عليه ينزل واهو لو في حاجه هتصل بيه هيجي على طول.
هنادي : ماشي هقعد أسلم وامشي على طول.
مريم : على فكرة مفروض يعني تباتي معايا اليومين دول.
هنادي : ابات كمان!
مريم : امال لما أولد مش هتباتي معايا كمان؟!
___________
في منزل عُمر.
ياسمينا : خمس دقايق والأكل يكون جاهز.
عُمر : طب تعالي يا ياسمين اقعدي استريحي.
ياسمينا : هلم الغسيل بس علشان بقاله يومين على الحبل والجو حر زي ما أنت عارف.
نادين : أنا هاجي المه يا ماما.
ياسمينا : لا خليكي مستريحه.
نادين : وايه اللي هيتعبني في لم الغسيل بس.
ودخلت نادين البلكونة لمت الغسيل وقاعدة بتطبقه.
عُمر : محبتيش الولاد معاكي ليه يا نادين؟
نادين : سيبتهم مع حماتي تبقى تيجي بقى يا بابا أنت وماما يوم الجُمعة تتعشو معانا.
ياسمينا نظرت لعُمر.
عُمر : وماله يا بنتي نيجي.
نادين : قولتي ايه يا ماما؟
ياسمينا : قولت ايه في ايه؟
نادين : تيجي يوم الجُمعة مع بابا تتعشو معانا وكلمت فريدة كمان قالت إنها جايه مع جوزها.
ياسمينا : طيب.
نادين : يعني هتيجي؟
ياسمينا : ماشي هنشوف.
عُمر : أنا عن نفسي جاي.
نظرت ياسمينا لعُمر وسكتت مردتش.
_________
في البلد.
كوثر : اه يا حبيبتي يا أختي انتي اللي كنتي مونساني وواخدين بحس بعض مين هيجيلي يخبط عليه يقولي أنا جايه اقعد
معاكي علشان زهقانه.
نرمين : كفاية بقى يا كوثر.
كوثر : طبعاً وانتي يعني هتحزني على أختك محدش فارق معاكي اصلا يا نرمين.
نرمين : معلش انتي عندك قلب واحنا معندناش.
بنت صباح : خاله نرمين معلش بقى احنا اصلا مكناش بنشوفك غير كل فين وفين.
نرمين : نعم يعني ايه المطلوب مني دلوقت؟
بنت كوثر : خالتي ماتت مقهورة على أرض وبيت ستي اللي سرقتهم اللي متتسماش.
نرمين : محدش سرق حاجه وإن كان حد ضحك عليكي وقالك كلام غير ده يبقى يثبت وبعدين هو ده وقته نتكلم في المواضيع دي؟!
بنت صباح : ومش وقته ليه يا خالتي ولا اكمن الحاجه مخرجتش بره وراحت لـ أخت جوزك.
نرمين : ياريت تحاسبي على كلامي أنا عامله حساب الظرف اللي احنا فيه وبعدين بدل ما عمالين تجيبوا في سيرة الأحياء والأموات ادعوا لـ أمكم يلا يا طارق.
كوثر : رايحه فين يا نرمين؟
نرمين : هبات في بيت ابويا يا كوثر عاوزه حاجه؟
كوثر : لا عاوزه سلامتك.