#انت_قلبي٣
__________
الحلقة ١٤٤
بعد شوية.
سهر بتفتح لعلي اللي جه بسرعة أول ما مجدي كلمه.
علي : بابي عامل ايه؟
سهر بحزن : الدكتور عنده فوق.
علي : ومجدي فين؟
سهر : فوق مش عاوزني معاهم.
قعدت سهر ونظر لها علي وبعدها طلع جري على فوق.
في غرفة آسر.
مجدي : يعني بابي كويس يا دكتور؟
الدكتور : كويس مفيهوش أي حاجه.
آسر : أنا قولتهم إني كويس صمموا يتصلوا بيك ويقلقوك.
الدكتور : أهو جيت اطمنت.. ممكن كوباية مياه يا مجدي؟
مجدي قرب يفتح التلاجة.
آسر : هات من تحت.
نظر مجدي بدهشه لإن التلاجه فيها مياه ينزل ليه تحت.
آسر : علشان تقولهم يعملوا فنجان قهوة للدكتور..
خرج مجدي اللي قابل علي.
مجدي : استنى متدخلش دلوقت.
علي : ليه؟
مجدي : هقولك بعدين.
ونزل مجدي تحت وعلي واقف أمام الباب مش فاهم حاجه لكن مجدي فهم إن الدكتور عاوز يتكلم مع والدة على انفراد وطلب مياه علشان يخرج مجدي من الغرفة.
الدكتور (هو صديق لـ آسر من زمان) : أنت مفيش فايدة فيك أبدًا.. مية مرة أقولك خلي بالك من صحتك بلاش الانفعال الزايد عن حده ده خُد الأمور ببساطة.
آسر : صدقني بحاول.
الدكتور : بتحاول ايه بس
إذا كان ضغطك عالي ونبضات قلبك سريعه وجيت لاقيتك مش قادر تاخد نفسك دا غير إنك لا ملتزم في أكلك ولا بتتبع التعليمات اللي بقولك عليها بتشتغل كام ساعة في يوم يا آسر؟
آسر : على حسب الظروف يعني ممكن أرجع على عشرة كده أو اتأخر شويه.
الدكتور : من عشرة لعشرة يعني اتناشر ساعة وطبعًا طول الوقت ده أكل من بره وقهوة كتير مجهود ذهني عالي وناسي نفسك وناسي إن عندك بيت وأولاد محتاجينك لا وقتها الشغل هينفعك وهما اللي هيدفعوا تمن استهتارك واهمالك في صحتك ده.
آسر : خلاص بقى متكبرش الموضوع ما أنا بقيت كويس اهو.
الدكتور : أنا بنصحك علشان خايف عليك خلي بالك من صحتك أنا خرجت المدام علشان مكانتش قادرة تتمالك اعصابها وابنك واقف هيموت من الخوف عليك يا ابني خاف عليهم بقى أنت مبتحبهمش ولا ايه؟
آسر : أنا مليش غيرهم في الدنيا.
الدكتور : خلاص خُد بالك من صحتك بقى وافتكرهم وقت ما تكون ناوي تدوس على صحتك وتهمل فيها بالشكل ده.
آسر : حاضر.
الباب يخبط.
آسر : ادخل.
يدخل مجدي ومعاه علي اللي يقرب بسرعة يطمن على والدة.
علي : بابي أنت كويس؟
الدكتور : بابي كويس بس عاوز يتشد عليه شويه علشان يبطل اللي بيعمله في نفسه وفي صحته.
علي : ازيك يا دكتور معلش دخلت كده على طول.
الدكتور : لا ولا يهمك أنا تمام خلي بابي بقى يسمع الكلام هو عارف أنا قولت له ايه.
علي : حاضر.
مجدي : اتفضل حضرتك القهوة.
الدكتور : متشكر..
ونظر لـ آسر.
الدكتور : القهوة دي ليه أنا ماشي.
نظر له آسر بابتسامة.
الدكتور : تخف قهوة مش فطار غدا عشا لازم تحبس بيهم وطبعاً مصدع بتاخد فنجان زهقان تشربلك واحد كمان لما تكون متعصب وتعبان مفيش مانع اتنين تلاته لحد ما تهدا.. دا اسمه لعب عيال احترم نفسك وخلي بالك من صحتك.
آسر : ما خلاص بقى من وقت ما دخلت وأنت نازل سلخ فيه.
الدكتور : انفعال ونرفزه على كل كبيرة وصغيرة ممنوع.. طنش تعرف تطنش؟
علي : الناس اللي واخده الحياه ببساطه هما اللي مستريحين.
الدكتور : ما هو ميبقاش مدمن وغايب عن الدنيا أربعة وعشرين ساعة ولا دريان بنفسه ولا باللي حواليه واقول مستريح!
علي : أكيد مقصدش الناس دي أقصد الناس اللي مش أي حاجه بتعصبها وتضايقها.
آسر : هو فاهم بس معرفش ماله الليله شكل مجدي كلمه وهو نايم.
الدكتور : ولو كنت في الطريق ومسافر هرجع تاني واجيلك.
آسر بابتسامة : حبيبي متشكر دا العشم برضو.
الدكتور : أنا ماشي بقى تصبح على خير.
آسر : وأنت من أهله.
مجدي : طيب يا دكتور مفيش أدوية ولا أي حاجه؟
الدكتور : أدوية لـ ايه بالظبط هو أنا لازم أكتب روشته قد كده؟!
باباك عنده الأدوية بتاعته ياخدها بس في مواعيدها ويلتزم بالأكل الصحي وشرب قهوة كتير تاني ومليون يا آسر ممنوع
مرتين في اليوم دا اللي ممكن اسمح لك بيه وفنجان صغير وياريت تخف كده من التوتر وضغط الشغل ده وتسافر تقضي شهر عسل وتغير جو.
ويغمز الدكتور لـ آسر.
آسر : ما خلاص بقى اتفضل روح علشان تنام.
الدكتور نظر للولاد اللي كانوا واقفين محرجين.
الدكتور بيضحك : طيب سلام بقى.
وخرج الدكتور ونزل معاه مجدي.
علي : بابي حضرتك كويس؟
آسر : أنا كويس يا حبيبي متقلقش.
تخبط سهر وتدخل : آسر الدكتور قال لك ايه؟
آسر بابتسامة : تعالي يا سهر متخافيش أنا كويس.
_____________
الصبح في جنينة فيلا كريم.
زين : وبعدين بقى في القطة دي انتي ناويه تقيمي عندنا هنا ولا ايه؟
جميلة خارجه من جوه جري : سيبها يا زين.
زين : اسيبها دا ايه هي بتاعتنا؟!
في خبط على البوابة.
زين : اهو صحابها جم علشان ياخدوها.
يفتح زين البوابة كان أخو ميرا الصغير.
زين : عاوز القطة صح؟
الولد الصغير : هي عندكم؟
زين لجميلة : هاتي القطة.
جميلة تعطيه القطة.
الولد : متشكر.
زين : معلش يعني لو مفيهاش إساءة أدب تقفلوا الباب على القطة دي علشان مش كل شويه تنطلنا هنا.
الولد اضايق : حاضر.
قفل زين البوابة.
فريدة جايه ناحيتهم : كنت فاتح البوابة لمين؟
زين : دا الواد ابن جيرانا الجداد دول قطتهم جات عندنا وجه ياخدها.
جميلة : مامي أنا عاوزه قطة.
فريدة : قطة ايه انتي عارفه أنا بقرف منهم.
جميلة : ليه دي القطط حلوة قوي ونضيفه أنا اللي هعملها كل حاجه متقلقيش.
فريدة : قطة ايه وبتاع ايه بس يا جميلة أنا مقدرش أعيش مع أي حيوان في بيت واحد.
زين : هههههههههههه
فريدة : بتضحك على ايه؟
يلا علشان تفطروا وتغسلوا أيديكم الأول.
جميلة وهي زعلان : حاضر.
أنت تقرأ
أنت قلبي الجزء الثالث
Werewolf(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
