#انت_قلبي٣
________
الحلقة ٥١
فيروز : مقالكيش رايح فين؟
مليكة : قال رايح يشوف شغله.
فيروز : شغل ايه هو مش مفروض واخد اجازة النهاردا؟!
مليكة : مش عارفه يا طنط.
فيروز : مالك يا حبييتي؟
مليكة : معدتي تعباني شويه.
فيروز : طب ادخلي استريحي أنا هقعد هنا استناهم اشوفهم راحوا فين.
مليكة : لأ هقعد مع حضرتك هنا.
_________
في منزل عُمر.
ياسمينا : طب اشرب الليمون ده هيهدي أعصابك.
سيف بصوت مخنوق من البكاء : مش قادر يا ياسمين.
ياسمينا : طب لما أنت تعيط مفروض انا اعمل ايه متوجعش قلبي ياسيف أكتر ما هو موجوع.
سيف : بابا يا ياسمين.
ياسمينا : هيخف ويبقى كويس متعملش زي العيال الصغيرة بقى.
سيف : أنا ماما وحشتني قوي.
ياسمينا : يوووه بقى أنت مصمم تخليني اعيط ليه؟
بتبكي ياسمينا..
سيف : لما عرفت ان بابا تعبان معرفتش اروح فين وارتمي في حضن مين؟
ياسمينا : كنت تروح لمراتك ومتجليش يا سيف.
سيف : بقى كده...طيب.
ياسمينا : رايح فين؟
سيف : همشي يا ياسمين.
ياسمينا : استنى أنا متلخبطه مش عارفه بقول ايه أنت متأكد من نتيجة التحليل دي ولا يمكن دي نتيجة تحليل حد تاني.
سيف : إذا كان الدكتور بنفسه اللي قال لي إن بابا كان عنده واتكلم معاه وعرفه حالته بالظبط وطلب منه ياخد باله من نفسه عقبال ما يخلص الإجراءات اللي على أساسها هياخد العلاج.
ياسمينا : بتكلم على التحليل نفسه يا سيف يكون فيه لخبطه في الأسماء ولا حاجه.
سيف : لا دا فعلا تحليل بابا مشوفتهوش اصلا تعبان ازاي؟
ياسمينا : شوفته.
سيف : أنا تايه مش عارف اعمل ايه حاسس إن الدنيا الواسعة دي فجأة كده اضيقت قدامي مش لاقي مكان فيها حتى أصرخ عاوز اقول له بابا خليك معانا أنا
من غيره مش هعرف اعيش تعبت من فراق أمي ومش هقدر على فراق حد تاني.
ياسمينا : ليه بتقول كده يا سيف في علاج يا حبيبي هياخده ويخف ويبقى كويس.
سيف : طب ما هي ماما كانت بتاخد علاج وعملت عمليات كتير وبرضه راحت وسابتنا.
ياسمينا : ليه اليأس دا يا سيف ادعيله يا حبيبي.
سيف : بدعيله يا ياسمين طول الطريق وأنا جاي كنت بدعي لبابا وماما.
ياسمينا : طب اقعد رايح فين؟
سيف : همشي أنا من الصبح بره البيت مفيش غير روحت غيرت هدومي وجيتلك.
ياسمينا : طب روح استريح ومتتكلمش مع بابا في أي حاجه دلوقت.
سيف : تصبحي على خير.
ياسمينا : وأنت من أهله.
____________
في شقة عمار.
عمار : ليه لما سألتك عن مامته في الأول قولتي معرفش عنها حاجه وبعدين اكتشف إنك عارفه إنها توفت.
ملك : فيه يا عمار أنت شاغل دماغك بالموضوع دا ليه؟
عمار : أنا بس مندهش ليه كدبتي يا ملك هو انتي لو قولتي الحقيقة هيكون فيها حاجه غلط؟
ملك : أنت عاوز ايه دلوقت؟
عمار : مش عاوز حاجه.
ملك : يعني هي دي المواساة بتاعتك يا عمار؟!
عمار : اواسيكي وانتي اصلا مخبيه عليه.
ملك : هو ايه اللي مخبيه عليك دي؟!
اوك متشكره قوي على مشاعرك الطيبة وعزاءك ليه.
عمار : تصبحي على خير.
__________
في فيلا مراد.
هشام : يعني عاوزه ايه دلوقت يا أمل؟
أمل : مش عاوزه حاجه.
هشام : انتي ليه مصممه تعمليها أزمة في حياتنا ما عاوز يتجوز يتفضل هو أنا منعته؟
أمل : امنعه يا هشام.
هشام : ابنك مبقاش صغير البيه كبر وبقى راجل بدليل إنه عاوز يتجوز دي أول حاجه فكر يعملها لما شنبه خط في وشه الرجوله اللي بدأت ملامحها تظهر عليه معلمتوش إنه يتحمل المسؤلية وإنه يحترم باباه ومامته كان بيكلمني بكل بجاحه كأنه له حاجه عندي وطبعا متفطم على الكلام ده.
أمل : وهتسيب ابننا يضيع يا هشام؟
هشام : هيرجع يا أمل متقلقيش.
أمل : هيرجع ازاي قولي؟ أنت عمال تديني في مسكنات وخلاص أنا عاوزه اعرف ابني هيرجع ازاي؟
هشام : طب اعملك ايه دلوقت اروح اجيبه غصب عنه يعني سبيه هو لما يزهق مش هيلاقي حته تانية يروحها غير هنا.
أمل بتبكي.
هشام : يوووه بقى اعملك ايه دلوقت؟
أمل : قلبي واكلني على ابني يا هشام.
بيطبطب عليها : متقلقيش أنا مش هسيبه يضيع بس خليه يتعلم الدرس كويس علشان هيستفيد من ده بعدين.
أمل : في حاجه بتتعمل مينفعش نصلحها يا هشام
لو اتجوز وجاب طفل وحصلت مشاكل ورجعلنا ابننا هيفضل هو اللي تعبان علشان سايب حته منه بعيد عنه.
هشام : ايه الخيال العلمي دا يا أمل؟!
أمل : مش خيال يا هشام صدقني في حاجه فعلا خصوصا الجواز مشاكله بيدفع تمنها أطراف تانية ماأخدتش اصلا قرار في الحوار ده.
هشام : فاهم بس لو عندك حل قوليلي عليه.
أمل : وأنا لو عندي حل كنت قعدت كده.
هشام : خلاص يبقى ننام وبكرة تتحل.
__________
في شقة كمال ونادين.
مليكة : كنت فين يا سيف وقاعد كده ليه؟
سيف مردش.
مليكة : سيف أنا بكلمك.
سيف بانفعال : عاوزه ايه مليون مرة أقولك لما أكون مضايق متكلمنيش خالص.
مليكة : وأنا هعرف منين إنك مضايق أنت مقولتيش وبعدين أنت بتزعقلي ليه لو حد غاصبك على العيشه معايا قولي لكن متعاملنيش بالطريقة دي.
سيف : ممكن تسبيني لوحدي.
مليكة : حاضر خليك لوحدك.
وخرجت مليكة قعدت في الصالة بتفكر تلم هدومها وتمشي بتبكي ومش عارفه هي عملت ايه علشان سيف يعاملها بالاسلوب ده.
مليكة : لو مشيت اخواته هيقولوا إني قليلة الأصل وسيبته في الظروف دي
بس أنا بجد مش قادرة تعبت.
باب الشقة يتفتح مليكة تمسح دموعها.
كمال بابتسامة : سلام عليكم.
مليكة : وعليكم السلام.
كمال : ايه يا مليكة قاعدة لوحدك ليه؟
سيف يخرج بسرعة من جوه : بابا حضرتك كنت فين؟ قلقتنا عليك.
كمال : أنا كويس ياسيف كنت فين بقى كنت عند ماما.
سيف : ماما!!
كمال : ايوه وحشتني روحت ازورها.
مليكة : تعيش وتفتكر يا عمي.
كمال : ايه اللي بقى اللى مصحيكم لحد دلوقت؟
مليكة : أنا داخله أنام تصبح على خير.
كمال : وانتي من أهل الخير.
سيف بيقعد..
كمال : مش هتدخل تنام يا سيف؟
سيف : شويه كده يا بابا.
كمال : مالك يا ابني في حاجه حصلت؟
اوعى تكون متخانق مع مراتك.
سيف : بابا كنت عاوز اتكلم معاك في موضوع كده.
كمال : موضوع ايه ده؟
سيف : ممكن نتكلم جوه في اوضتك؟
كمال : ماشي.. تعالى.
____________
أنت تقرأ
أنت قلبي الجزء الثالث
Werewolf(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
