أنت قلبي الجزء الثالث

الجزء الرابع /الحلقة ١٠

#أنت_قلبي٤
___________
الحلقة ١٠

في فيلا آسر.
ياسمين : يعني معرفتيش مين الراجل ده ولا حتى قريب في الشبه من حد تعرفيه؟
مليكة بحزن : لأ.
ملك : اشربي العصير يا ياسمين.
ياسمين : تسلم ايدك يا حبيبتي .
ملك : مليكة كُلي ولا اشربي أي حاجه مينفعش كده.
مليكة : مش قادرة يا ملك.
ياسمين : معلش يا مليكة بس فعلا يا حبيبتي مينفعش كده لازم تاخدي بالك من صحتك.
مليكة : صحتي!
ياسمين : اتفاءلي خير يا مليكة.
مليكة : هو بابي راح فين يا ملك؟
ملك : معرفش.. بس سمعته وهو نازل كان بيكلم سيف وبيقوله يستناه في المكان اللي متفقين عليه.
مليكة : مامي فين؟
ملك : بتتكلم في التليفون مع طنط أمل أصل زينة تعبت ومجدي اخدها للدكتور.
ياسمين : بجد!
ملك : اه هو دا اللي اتقالي.
ياسمين : معلش يا مليكة هكلم طنط أمل بس أطمن على زينة.
مليكة : اتفضلي يا ياسمين.
خرجت ياسمين تتكلم في البلكونة.

نزل سيف جري وخطف حلا من أمام العربيات وفضل حاضنها وهو بيبكي والبنت مش فاهمه في ايه بس حست بالأمان لما شافت باباها نزل آسر هو كمان وبيتلفت يمين وشمال يدور على فارس
اللي مش شايفه.
حلا : جدو.
وبتشاور على آسر.
اخدها آسر في حضنه وكان سيف متعلق فيها.
آسر : خُدها وأركب العربية يا سيف.
سيف : هو الراجل دا فين؟
آسر : معرفش.

في العربية.
سيف واخد حلا في حضنه وفرحان وعمال يُقبل ايدها وخدها ورأسها.
سيف وبيمسح دموعه : عارفه يا حلا مامي هتفرح قوي لما تشوفك.
حلا : مامي.. اروح لمامي.
آسر قاعد بيفكر ومش فاهم ازاي البنت رجعت لوحدها وفارس ليه مجاش علشان ياخد الفلوس.
كان الضابط اللي اتفق مع آسر إنهم هيتقابلوا هنا بعد ما ماجد بعتله العنوان اللي هيتقابلوا فيه بيخبط الضابط على زجاج العربية
وآسر كان نسيه أصلا
بينزل آسر يتكلم معاه.
الضابط : ازاي يعني مجاش؟
آسر : معرفش هي البنت جات من الناحية دي لكن أنا مشوفتوش أخر حاجه بعتلها.
وكان آسر بيفتح الشات اللي كان ما بينه وبين ماجد (اللي كان عامل نفسه فارس).
آسر : كتبلي اني انزل من العربية وارفع ايدي علشان يشوفني.
الضابط : طب معلش هتيجوا معانا علشان نخلص شوية إجراءات كده وهنحتاج الموبايل بتاع حضرتك.
آسر : قوي قوي اتفضل.
كان سيف بيتصل بمليكة.
آسر : بلاش تكلم مليكة دلوقت علشان لسه هنروح على القسم وهتقعد مستنيه وقلقانه ومش عارفين هنرجع البيت امتى.
سيف : تمام مش هتصل خلاص.
وبيحضن حلا وهو فرحان : وحشتيني قوي يا حلا.. جعانه مش كده؟
حلا : مامي.. اروح لمامي.
آسر : حاضر يا حبيبتي هنعمل مشوار صغير وبعد كده نروح لمامي تطمن عليكي وتاخدك في حضنها انتي وحشتينا ويوسف كمان وحشتيه وعاوز يلعب معاكي.
حلا : يوسف.
سيف : يوسف بيحبك قوي وعاوز يشوفك.
حلا : اروح لمامي ويوسف.
سيف : حاضر بس نعمل مشوار صغير كده زي ما قال جدو وبعد كده نروح البيت عند جدو علشان تشوفي مامي.. معلش يا عمي ممكن توقف هنا هنزل بس اشتري لحلا حاجه تاكلها.
آسر : تمام.. اديني ركنت
استنى واخدها فين سيبها.
سيف : لا مش هقدر خليها معايا.
آسر بابتسامة : طيب خلي بالك منها.
ينزل سيف وهو حاضن حلا ويدخلوا جوه.
سيف : شاوري على كل حاجه بتحبيها.
حلا : يوسف.
سيف بابتسامة : عاوزه تشتري ليوسف كمان؟
طيب يلا نشتري ليكي وليوسف.