أنت قلبي الجزء الثالث

الحلقة ٥٤

#انت_قلبي٣
_________
الحلقة ٥٤

نورهان : هههههههههههه
زينة : بتضحكي على ايه يا عمتو؟
نورهان : مش عاوزاني اضحك كمان؟!
زينة : كنت غبيه صح؟
نورهان : مش لما أعرف الأول انتي اتصرفتي معاه ليه بالاسلوب ده؟
زينة : مش عارفه اتفاجئت أو حسيته جرئ إنه يطلب طلب زي ده أو إن الموضوع اصلا عمره ما خطر على بالي؟؟
نورهان : يعني مفكرتيش كده ولا كده؟
زينة : مش فاهمه.. اه تقصدي يعني إني أفكر ارد عليه واقوله موافقة ولا لأ؟ بس هو اصلا مدنيش فرصة.
نورهان : هو ولا انتي اللي قومتي انتفضتي كأنه قالك حاجه غلط؟
زينة : ما هو أنا أول مرة ولد يقولي بحبك.
نورهان : هههههههههههه
زينة : هنقضيها ضحك بقى شوفي ليه حل علشان مش عارفه هقابله تاني في النادي ازاي أنا كده ممكن مروحش خالص طول الاجازة وأفضل قاعدة في البيت.
نورهان : مش للدرجة دي بقى متكبريش الموضوع
ولا كأنك سمعتي حاجه.
زينة : ازاي بس يا عمتو؟
نورهان : ايه هتفكري؟
زينة : أفكر في ايه؟
نورهان : هتفكري في ايه يعني؟!
أكيد في الموضوع اللي بنتكلم فيه.
زينة : هي مامي مالها؟
نورهان : توهي توهي.
زينة : لا بجد مامي بقالها فترة كده ساكته وبتقعد لوحدها مش عاوزه تتكلم معانا وكل حاجه متلخبطه في البيت بسبب الحوار ده.
نورهان : يعني مش عارفه اللي عمله مراد اخوكي؟
زينة : عارفه طبعا بس هو اختار طريقة محدش أجبره على حاجه.
__________

رغد : ممكن اعرف مالك بقى احوالك كده مش عجباني حتى امبارح اللي هو مفروض يعني يكون اسعد يوم في حياتنا كنت مضايق ومتعصب بعد ما اخواتك مشيوا أنا قادرة احس باللي أنت حاسس بيه دلوقت لمة الأهل طبعا مهمة بس مكانتش صدمة بالنسبة ليك فمتخلنيش احس بالندم.
مراد : تندمي إنك ارتبطي بيه؟!
رغد : لأ اندم إني مصبرتش لحد ما تقدر تقنع اهلك بيه.
مراد : المشكلة مفكيش انتي بالتحديد بابي عاوزني اشتغل واجتهد وبعدين اطلب إننا اتجوز فأنا قررت اشتغل بعيد خالص عنه واكون نفسي علشان نتجوز وبكده مش محتاج اخد موافقة حد في قرار زي ده.
رغد : مش هتندم يا مراد؟
مراد : لأ.
رغد : متأكد؟
مراد : في ايه يا رغد ما قولتلك لأ مش هندم.
_______
في البلد في منزل العمدة.
صباح : ما قولنا الناس دي معندهاش أصل وأولهم مرات اخوكي إلا قولي لي يا نرمين هي دي يا اختي تبقى الجوازة الكام للمحروس اللي كنتي متجوزاه؟
كوثر : هههههههههههه
ما بلاش احراج بقى يا صباح.
نرمين : وهُحرج من ايه؟!
لو تكون الجوازة الميه ايه علاقتي أنا بيه؟
كوثر : أصل قولنا الكلام دا قبل كده وانتي مصدقتيش هي اللي تتشك اللي اسمها هنادي دي عاوزه ايه بتشيل المسؤلية عن اخوها ما كل واحد يشيل شيلته يا حبيبتي وهو أولى بـ ابنه وإن كانت عاوزه تريحه تاخده عندها.
نرمين : تاخده عندها دا ايه وبعدين دا ابني أنا.
صباح : وابنه هو كمان مش يروح يتجوز ويتبسط ويسيبلك الواد انتي تربيه هو صحيح البنت اللي متجوزها صغيرة في السن؟
كوثر : هههههههههههه بيقولوا عندها حاجه وعشرين.
صباح : علشان كده طلقك يا اختي.
نرمين : احنا منفصلناش للسبب ده؟
كوثر : امال كان ايه السبب؟
نرمين : حاجه متخصش حد.
صباح : طول عمرك براويه يا نرمين يا أختي ملكيش عزيز.
نرمين : زيكم كده بالظبط؟
كوثر : قومي بينا نمشي يا صباح.
نرمين : ليه ما انتو قاعدين.
صباح : لا يا أختي الوقت اتأخر فوتك بعافية يلا يا كوثر.
________
في فيلا آسر.
سهر : حلو اللون دا قوي أنا بحبه.
علي : طب ايه رأيك في اللون ده؟
سهر : لا كئيب مبحبوش دا لو عاوز رأيي يعني.
علي : رُقية عاجبها اللون ده وبتقول نفس الكلام علي اللون اللي اخترته.
سهر : هههههههه إنه كئيب يعني؟ ما هي معاها حق فعلا كئيب.
علي : ما تشاركنا يا بابي وتقول رأيك في ألوان الشقة بتاعتي.
آسر سرحان ومش منتبه لكلامهم.
سهر : آسر علي بيكلمك.
علي : بابي واضح دماغه مشغوله شويه هه هقوم انام بقى تصبحو على خير.
يطلع علي اوضته علشان ينام.
سهر : آسر... آسر
حبيبي أنت روحت فين؟
آسر : هاه يا سهر كنتي بتقولي حاجه؟
سهر : بقول حاجه !!
ايه يا حبيبي سرحان في ايه؟
آسر : هاه لا ولا حاجه.
سهر : طب مش هتطلع تنام؟
آسر : هطلع حاضر.
سهر : حاضر ايه !!
عاوز تنام ولا لأ؟
آسر : هنام يا سهر حاضر.
سهر : لاااا أنت غريب قوي الليله حاجه حصلت ولا ايه؟
آسر : لا يا حبيبتي مفيش حاجه.
سهر : طيب أنا هطلع أنام.
آسر : اوك أنا كمان هطلع أنام.