#انت_قلبي٣
__________
الحلقة ١٤٠
في المستشفى.
الدكتور بيكشف وبعدها يسأل فريدة.
فريدة : مدام فريدة انتي مش واخده بالك من صحتك.
فريدة : ازاي يا دكتور؟
كريم : المدام عندها سكر
التحاليل معاك يا دكتور.
الدكتور : ما أنا عارف الورم اللي في رجلها ده ملوش علاقة بالكسر اللي كان موجود دا من مضاعفات السكر لازم تتابعي عند الدكتور بتاعتك وهو اللي هيقولك تظبطي السكر بتاعك واحتمال ينصحك تلبسي حذاء طبي علشان الدورة الدموية توصل لكل مكان
لإن عدم تدفقها بشكل منتظم بيعمل دا تروم في القدم والأطراف.
كريم : متشكر يا دكتور.
الدكتور : العفو يا دكتور كريم كمان حاولي تجففي بين صوابع رجلك كويس ومتميش من غير شراب.
فريدة : حاضر.
الدكتور : دا مش تخصصي وأكيد الدكتور بتاعك هيقولك نصايح كتير وهيفدك أكتر.
كريم : تمام بعد إذنك..
الدكتور : اتفضل.
كريم يسند فريدة
ويخرجوا من عند دكتور العظام.
فريدة : هو كلام الدكتور دا معناه إني تعبانه قوي
يا كريم؟
كريم : هنروح للدكتور اللي بتابعي عنده ونشوف هيقول ايه ثواني اشوفه موجود في العيادة ولا جه المستشفى.
فريدة : طب اقعد بقى.
كريم : تعالي في المكتب عندي.
ياخدها المكتب وتقعد فريدة تستريح.
يكلم الدكتور في التليفون يعرف منه إنه مسافر وراجع بكرة الصبح.
فريدة : خلاص اروح بقى.
كريم : حاضر ثواني.
فريدة : هتخلص حاجه خاصه بالشغل؟
كريم : خمسه يا فريدة وراجعلك.
فريدة : طب متتأخرش.
كريم : حاضر.
خرج يكلم دكتور زميله وبيسأله عن دكتور كويس ياخد فريدة تكشف عنده.
جاله اتصال استأذن ووقف يتكلم بعيد شويه.
في التليفون.. 📞
كريم : ألو..
ياسر : دكتور كريم حضرتك في المستشفى؟
كريم : اه في حاجه ولا ايه؟
ياسر : معلش بس هاخد من وقت حضرتك دقيقتين
بس في المكتب عندك.. ممكن؟
كريم : بس أنا خمس دقايق ومش هكون في المستشفى.
ياسر : معلش هما بس دقيقتين.. ممكن؟
كريم : أنت فين؟
ياسر : بركن العربية وطالع.
كريم بتنهيدة : طيب.
ياسر : مش هعطلك.
كريم : خلاص ماشي اتفضل.
ويقفل كريم مع ياسر.
كريم وهو مضايق : أنا كنت ناقصك أنت كمان؟
بيدخل المكتب.
فريدة : خلاص يا كريم؟
كريم : معلش يا حبيبتي ممكن تريحي على الكنبه دي هشد الستاره علشان تاخدي راحتك.
فريدة : ليه هو في حد جاي؟
كريم : في واحد مصمم يقابلني معرفش عاوز ايه
نامي بس كده.
بتنام فريدة ويحط تحت دماغها مخده.
كريم : تمام كده مستريحه؟
فريدة : اه بس قلقانه.
كريم : متقلقيش هاخدك للدكتور وهو هيطمنا.. هشدلك الستاره بقى.
فريدة : ماشي.
كريم : أطلب لك حاجه تشربيها؟
فريدة : لأ مش عاوزه حاجه.
الباب يخبط.
كريم : هيمشي على طول متقلقيش.
فريدة : طيب.
كريم بيقعد على كرسي المكتب : اتفضل.
ياسر بيدخل : سلام عليكم.
كريم : وعليكم السلام.
ياسر : مش هعطلك زي ما قولتلك.
كريم : ياريت تدخل في الموضوع على طول علشان مستعجل.
ياسر : ماشي.. الموضوع بإختصار إن في يوم كده وأنا قاعد في شقتي واحد خبط عليه قومت أفتح لاقيته راجل يبان يعني إنه محترم وشكله شغال في مكان كويس.
كريم : مش فاهم.
ياسر : ما أنا جايلك في الكلام اهو.
كريم : اتفضل كمل.
ياسر : عرفني بنفسه وقال لي إنه جاي من طرف واحد يهمه الموضوع بتاعي دا قوي.
كريم : اللي هو وفاة زوجتك صح؟
ياسر : صح يا دكتور هو عرف الموضوع عن طريق حد هنا في المستشفى وقال كان في قصة كده في المستشفى وبتاع أنا قولت له ولا قصة ولا حاجه الناس كانت كويسه معانا ومحصلش حاجه قال له أنت هتقول إنه حصل والمقابل طبعا كان مغري بالنسبة ليه علشان كده قبلت.
كريم : وايه اللي خلاك تغير رأيك دلوقت؟
ياسر : مبقتش مستريح للموضوع ضميري واجعني وبقول يمكن لو قولت لك اسمه تعرفه هو الراجل اللي جه اتفق معايا غلط في مرة وقال اسمه كده وبعدين توه بس أنا فاكر الاسم كويس.
كريم : اسمه ايه؟
ياسر : مدحت.. اسمه مدحت يا دكتور.
كريم : مدحت!
ياسر : معرفش إذا كنت تعرفه ولا لأ بس واضح إنه بيحبك قوي أنت وشريكك لإن الراجل اللي تبعه كان دايمًا بيقول أسماءكم أنا كده عملت اللي عليه وقولت اللي عندي سلام.
كريم : استنى هنا.
ياسر : نعم.
كريم : يعني مفيش قضية ولا تحقيق ولا حتى محامي؟
ياسر : لا مفيش أنا مش عاوز حاجه وهتنازل عن كل حاجه بس قصادها إنك متقولش حاجه للبوليس من اللي قولتهالك
أما الراجل ده لو تعرفه يبقى تتصافوا مع بعض بس بعيد عني وأنا عارف إنك لو قولت هعمل كده فعلا هتبقى قد كلامك.
كريم : هفكر وأرد عليك ومتقلقش مش هعمل حاجه قبلها.
ياسر : تمام وأنا واثق فيك.. سلام.
وفتح ياسر باب المكتب وخرج.
بيشد كريم الستاره وبيسند فريدة : يلا يا فريدة.
فريدة : ايه اللي أنا سمعته ده؟
كريم : بعدين بعدين المهم أطمن عليكي الأول هاتي ايدك.
___________
في البلد.
كاميليا : لازم تاكلي يا هنادي مينفعش اللي بتعمليه في نفسك ده.
هنادي : مش قادرة أحط حاجه في بؤي قولتلك.
كاميليا : تعالي يا مريم يمكن مامتك تاكل من ايدك.
هنادي : واني يعني مستنيه حد يأكلني يا كاميليا النفس اللي بتاكل.
كاميليا : هنعمل ايه يعني هنموت نفسنا من الجوع هو الحزن بالأكل كمان يا هنادي يا حبيبتي علشان صحتك.
هنادي : مريم فين اخوكي؟
مريم : قاعد بره يا ماما.
هنادي : طب قوليله ماما عايزاك.
مريم : حاضر.. مازن.. مارن تعالى كلم ماما.
مازن : نعم يا ماما في حاجه؟
هنادي : أنت مش هتروح الجامعة أنت وأختك؟
مريم : لأ أنا مش هروح الاسبوع ده.
هنادي : ازاي يعني مينفعش طبعاً اطلع يا مازن غير هدومك وروح أنت وأختك وأنا بكرة ولا بعده هحصلكم.
نظرت كاميليا لهنادي بدهشه.
هنادي : هقعد هنا أعمل إيه اني هبقى اجي تاني أزور أمي.
صفيه جايه وسامعه كلام هنادي مع ولادها.
صفيه : هتمشي يا هنادي؟!
هنادي : مش النهاردا يا خالتي مازن ومريم بس هيروحوا علشان عندهم محاضرات ومذاكرة مش عاوزه حاجه تعطلهم خُد بالك من أختك يا مازن.
مازن : حاضر.
خرجت مريم معاه.
مريم : أنت هتسمع كلام ماما وتروح صحيح؟
مازن : بصراحة أنا مش مستريح هنا انتي شايفه المكان ضيق ويدوب على قد صحاب البيت نروح نقعد في بيتنا محدش هيجي يعزي الناس جات امبارح.
مريم : بس هنسيب ماما لوحدها وعماتك تفتكر هيسيبوها في حالها.
مازن بيفكر.
مريم : لو هنمشي يبقى ماما تيجي معانا منسبهاش لوحدها.
مازن : عندك حق.
دخل مازن لمامته.
مازن : ماما ما تيجي معانا محدش جاي يعزي هتقعدي تعملي إيه؟
هنادي : ازاي بس يا ابني اروح معاكم النهاردا؟
كاميليا : طالما عاوزه ولادك يروحوا هناك يبقى تروحي معاهم ميروحوش لوحدهم يا هنادي.
صفيه : احنا عاوزينك تقعدي معانا يا بنتي بس طالما انتي خايفه على ولادك ومذاكرتهم يبقى تروحي معاهم زي ما كاميليا قالت.
كاميليا : قومي البسي يا هنادي وروحي مع ولادك.
_________
في فيلا كريم.
فريدة : نفس الكلام اللي قاله الدكتور في المستشفى دا من مضاعفات السكر ومعرفش الأوعية الدموية فيها ايه وتلبسي شراب وجزمة طبية وممشيش حافيه واظبط السكر واخد بالي من أكلي واخد الأدوية في مواعيدها ونصايح مبتنتهيش.
ندى : ما هو كله لمصلحتك يا فريدة خُدي بالك من صحتك علشان خاطري بقى.
فريدة : أنا خربت مبقتش نافعه يا ندى.
ندى : هههههههههههه
فريدة : بتضحكي!
ندى : معلش يا فريدة مقدرتش أمسك نفسي.
فريدة : ليه يا أختي بقول نكت؟!
المهم صفيتي كده وسامحتي خطيب بنتك ولا لسه زعلانه؟
ندى : مخبيش عليكي يعني لسه زعلانه بس أهو طالما خاف على زعلنا واعتذر ووعد إن دا مش هيتكرر تاني فخلاص بقى بس لازم أفضل عامله نفسي زعلانه شويه كده علشان مينساش اللي حصل بسرعة كده.
فريدة : قلبك أبيض يا ندى.
ندى : دا مفيهوش أبيض واسود يا فريدة انتي فاهمه كل حاجه.
فريدة : فاهمه بس كريم متربي كويس.
ندى : والشيطان يا حبيبتي نعمل فيه ايه؟
فريدة بغضب تزعق في جميلة : ايه الخط اللي يقرف ده؟!
ندى : بالراحة ايه سرينة عربية نقل!
اهدي شوية.
فريدة : انتي مش شايفه خطها عامل ازاي؟!
ندى : وخطك وانتي قدها كان نقش فراخ دي بنتك خطها أحسن من خطك.
جميلة : هههههههههههه
فريدة :"ندى!
مش قدام البنت.
ندى : ليه يا أختي مش قدامها هنكدب يعني ولا هنكدب ولا يهمك يا جيجي بكرة خطك يبقى أحسن من خط مامتك وريني كده بتعملي ايه.
جميلة : بحلل الكلمات.
ندى : شاطرة وبتعرفي تحللي الحرف اللي عليه شدة؟
جميلة : اه الحرف اللي عليه شدة بننطقه حرفين الحرف الأول ساكن والحرف التاني بحركة الحرف اما فتحه أو كسرة أو ضمه.
ندى :"شاطرة يا جيجي
ما بنتك شاطرة أهوه بطلي بقى عصبيتك دي.
فريدة : غصب عني يا ندى.
ندى : معلش أنا عارفه
عاوزه حاجه بقى؟
فريدة : اقعدي يا ندى رايحه فين؟
ندى : هروح بقى.. سلام يا جيجي.
جميلة بتكتب : مع السلامة.
فريدة : انزلي مع طنط ندى علشان تفتحي الباب.
جميلة : حاضر.
________
في شركة مراد.
هشام : مدحت مين؟!
كريم : أنا مرضتش أضغط عليه في الكلام وسيبته يتكلم براحته علشان يقول اللي عنده بس الحكاية واضحه هيكون مدحت مين غير اللي نعرفه؟
هشام : معقول توصل بيه
الوقاحه للدرجة دي؟!
كريم : مبقتش استغرب أي حاجه دلوقت كل حاجه بقت متوقعه.
هشام : طب وايه اللي قلبهم على بعض مش كانوا حبايب وفي اتفاق ما بينهم؟
كريم : أكيد اختلفوا على الاتعاب.
هشام : طب وهو عاوز ايه دلوقت؟
كريم : متكلمش في فلوس بيقول إن ضميرة واجعه.
هشام : كان فين ضميره وهو بيتفق معاه على اللعبة الدنيئه دي؟!
كريم : احنا اللي يهمنا دلوقت إننا عرفنا مين اللي زق ياسر دا علينا وهو قال إنه هيتنازل عن القضية بشرط احنا منتكلمش خالص ولا نجيب سيرته.
هشام : تقصد نعدي الموضوع ومنتكلمش مع مدحت ده ولا نواجهه؟
كريم : اللي يهمنا إن ياسر هيتنازل ويعتذر طبعاً ويأكد إن مفيش خطأ من عندنا أما مدحت ده لو عاوز تواجهه يبقى الموضوع محتاج تفكير علشان نشوف هنعمل ايه معاه.
هشام : تمام.. ايه رايح فين؟
كريم : أنا من الصبح بره البيت وعاوز اروح استريح.
هشام : كده.. طيب مع السلامة.
__________
في التليفون... 📞
سهر : أنت هنا بجد.. مش في البلد يعني؟
مازن : رجعنا من ساعة كده.
سهر : مامتك عامله ايه؟
مازن : كويسه...هتعمل ايه يعني؟
اديها بتحاول تتأقلم مع الوضع الجديد.
سهر : خليك جنبها يا مازن حاول تخفف عنها فراق الأم برضو مش حاجه سهله.
مازن : أكيد.
سهر : على فكرة أنا روحت العزا امبارح مع مامي وبابي وعمار اخويا.
مازن : معلش ماأخدتش بالي أنا اه شوفت باباكي وعمار.
سهر : لا ولا يهمك أنت كنت في ايه ولا في ايه بس سلمت على طنط ومريم وكان في ستات كتير في البيت.
مازن : اه أهل البلد كلهم جم يعزوا.
سهر : خلاص هسيبك علشان تستريح أكيد راجع تعبان.
مازن :"بصراحه تعبان قوي ونفسي أنام بس ياريت أعرف أنام.
سهر : ليه مش هتعرف تنام؟
مازن : ماما بتفضل صاحيه طول الليل وبيصعب عليه أنام واسيبها لوحدها.
سهر : معلش حاول تخليها تنام كده مش كويس على صحتها.
مازن : بقول لها الكلام ده بتقولي حاضر هنام وهي نص ساعة تقوم مفزوعه تبص حواليها كأنها بتدور على حاجه ضايعه منها وتنادي على تيته.
سهر وهي مدمعه : فترة وهتعدي الفراق في الأول بيكون صعب بس لما الإنسان بتعود عليه خلاص بيحاول يتعايش بقى ويتأقلم مع حياته الجديدة.
مازن : تصبحي على خير.
سهر : وأنت من أهله
حاول تنام.
مازن بابتسامة : حاضر...سلام.
سهر : مع السلامة.
__________
في فيلا مراد.
هشام : امال مراد فين يا أمل؟
أمل : مراد فوق في اوضته ليه عاوزه في حاجه؟
هشام : لا أبدًا بسأل يعني أصل ملمحتش عربيته راكنه بره ولا أنا اللي ماأخدتش بالي ولا ايه؟
أمل : واضح إنك مجهد وتعبان من الشغل اطلع استريح.
هشام : ليه انتي مش هتطلع تنامي؟
أمل : هكلم بس هنادي أطمن عليها أصلها رجعت شقتها.
هشام : طيب متسهريش خلصي المكالمة واطلعي على طول.
أمل : حاضر.
بتتصل أمل بهنادي مبتردش.
أمل : شكلها نامت.. أما أطلع أنام أنا كمان.
أنت تقرأ
أنت قلبي الجزء الثالث
Werewolf(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
