أنت قلبي الجزء الثالث

الحلقة ٥٧

#انت_قلبي٣
_________
الحلقة ٥٧
سهر نازله جري من فوق تقابل أمل على السلم.
أمل : سهر حبيبتي شدي حيلك.
سهر : متشكره يا أمل.
أمل : هي ياسمين فوق؟
سهر : قصدك ياسمين مرات هشام ابنك؟
ايوه فوق.
أمل : طيب انتي مروحه؟
سهر : ايوه.
أمل : معاكي العربية؟
سهر : لأ هاخد تاكس.
أمل : طب استني هوصلك.
سهر : لأ ملوش لزوم مش عاوزه اتعبك.
أمل : استني بس مفيش تعب ولا حاجه أنا نازله معاكي.
علي طالع السلم وبيقرب منهم.
سهر : علي!!
علي : ازيك يا طنط أمل؟
أمل : تمام يا علي متشكره
على سؤالك.
علي : بابي قال لي اجي لحضرتك علشان اوصلك البيت.
سهر : هروح لوحدي روح أنت أقف جنب بابي.
أمل : خليه يوصلك ولا انزل اوصلك أنا؟
سهر : لا اطلعي انتي يا أمل.
أمل : ماشي.. سلام.
وطلعت أمل فوق.
علي : ايه مش هتروحي؟
سهر بتنهيدة : انت وباباك دماغكم ناشفة محسسني اني لسه عيله صغيرة.
علي : طبعاً.
سهر : نعم!!
علي : صغيرة سنًا كبيرة مقامًا طبعًا.
سهر : لحقت نفسك.
علي : طب مش يلا بينا؟
سهر : هات ايدك.
علي : يا سلام بس كده اتفضلي.
________
أمل تسلم على سلمى ومرات باباها وتعزيهم وتقعد جنب ياسمين.
ياسمين : تشربي قهوة ولا شاي يا طنط؟
أمل : لا دا ولا دا مش قادرة اشرب حاجه.
ياسمين : مينفعش لازم تشربي حاجه.
أمل : يا بنتي اقعدي رايحه فين بقولك مش هشرب حاجه اقعدي استريحي بقى.
ياسمين بتقعد : ليلى خرجت من المستشفى؟
أمل : لأ هتخرج بكره قطعت قلبي عماله تعيط مش عاوزة تخرج غير وابنها معاها غُلبنا نفهمها إن مينفعش مش عاوزة تقتنع بتقول خلاص خليني قاعدة هنا.
ياسمين : يا حبيبتي هي بس كانت عاوزة تاخده في حضنها بس هنعمل ايه
بكره يخرج بالسلامة وتشبع منه بعد اذنك يا طنط ثواني وجايه.
أمل : اتفضلي.
تقوم ياسمين تسلم على والدتها اللي كانت داخله من باب الشقة.
علا : ازيك يا ياسمين؟
ياسمين : أنا بخير يا ماما اتفضلي.
تقرب علا تسلم على سلمى ومرات باباها وتعزيهم وتقعد جنب أمل بعد ما تسلم عليها.
_________
في المستشفى.
داليا : مين اللي توفى بتقول؟
مجدي : جد ياسمين مرات هشام.
داليا : اه ما هي سهر قالت لي.
مجدي : عزيت آسر واعتذرت ليه إني مش هقدر اجي العزا دلوقت.
داليا : ما هو عارف الظروف.
مجدي : بتصل بهشام مبيردش.
داليا : تلاقيه هناك واقف معاهم في العزا وعامل التليفون سايلنت.
مجدي : اه ممكن.. هتروحي بقى الليلة.
داليا : لا مش هينفع هفضل معاك هنا.
مجدي : هتفضلي معايا هنا تعملي ايه بس يا داليا
مينفعش الولاد يباتوا لوحدهم في الشقة هيبقى لا أنا ولا انتي كمان.
داليا : هما مش صغيرين يا مجدي.
مجدي : يا حبيبتي ابوس ايدك مينفعش.
داليا بتبكي : عاوزني اسيب مامتك هنا لوحدها؟!
مجدي : هي مش لوحدها وبعدين هتعملي لها ايه قولي لي.
داليا : يعني لما تفوق تقوم ما تلاقنيش جنبها؟!
مجدي : بس هي تفوق يا داليا.
داليا : هتفوق يا حبيبي وتخرج بالسلامة اتفائل خير.
مجدي : ادعيلها يا داليا هي بتحبك.
داليا : وأنا كمان بحبها دي أمي وونسي في البيت.
مجدي ايده على وجهه وبيبكي.
داليا بتطبطب عليه : مجدي علشان خاطري امسك أعصابك شويه.
بيمسح دموعه : حاضر.
_________
في شقة حازم.
ندى : يا خيبتك يا بنت عمي.. انتي غبيه ولا بتستعبطي ولا حكايتك ايه فهميني؟!
فريدة : وليه الغلط دا بقى
احترمي نفسك.
ندى : يا بنتي انتي عاوزه تقول لك ايه تاني علشان تفهمي إن حضرتها حاطه عينها على جوزك وانتي زي الهبله سمعتي كلامه وروحتي تطمني على البنت اللي هي أصلا خارجه من المستشفى كويسه وانتي كنتي معاها ومسبتهمش لوحدهم لا انتي ولا جوزك ايه لازمة الدلع ده أمها مسلطاها بدليل إنها كانت عاوزه الدكتور هو اللي يروح يشوفها مش حضرتك لكن هو كان بيتهرب منهم لما قال لك انتي تروحي.
فريدة : هو أنا اخلص من سارة تطلعي سمر.
ندى : سمر ايه يا حبيبتي لو البنت كان مقدور عليها جوزك مش هيبص لعيله من دور عياله عندها ستاشر سنة مش للدرجة دي يعني المشكلة في أمها يا هبله.
فريدة : لمي لسانك يا ندى وكريم مش ساذج للدرجة دي.
ندى : اه يا حبيبتي مش ساذج معاكي حق بس في أسلوب وطريقة لجر الرجل بتخلي الراجل العاقل ده يحب ويتجوز عادي لو حتى كان بيموت في التراب اللي بتمشي عليه مراته.
فريدة : ما هو أنا حاسه من طريقتها برضه بس بقول كريم مستحيل يبصلها طب ما يبصلي أنا أولى.
ندى : قومي امشي يا فريدة علشان حرقتي دمي.
فريدة : بعد الشر عليكي يا نونه ما تلايميها مع حازم بقى.
ندى : ييييييه بقولك ايه يا فريدة أنا هقطع علاقتي بيكي بسبب اخوكي ده.
فريدة : لأ خلاص انسي اللي قولته ومتتعصبيش بقى علشان صحتك مش ناقصه هيه.
ندى : ولما انتي عارفه كده بتفتحي معايا الموضوع دا ليه؟
فريدة : ما قولنا خلاص بقى.
ندى : طب قومي روحي بيتك بقى.
فريدة : ماشي بس متزعليش.
ندى : مش زعلانه وعلشان خاطري حافظي على بيتك وخلي بالك من جوزك.
فريدة : حاضر.. سلام.
ندى : مع السلامة.
__________
في شقة والد (إياد).
سلمى : لا سمعتك وانتي بتقولي للي شغاله عندك اقفلي الباب كويس متخليش حد يدخل ودا بعد ما قولت لك تعبانه وهدخل ارتاح جوه وكأن الشقة دي مش بتاعت بابا.
مرات الأب : اللي يسمعك كده
يقول إنك كنتي نايمه تحت رجله وهو بيموت مش جيتي زيك زي الأغراب وكأنه مش ابوكي.
سلمى : مش حضرتك اللي مقسياه علينا بعد ما اخدتيه من بيته وأولاده.
مرات الأب : ومامتك بقى
هي اللي قالت لك الكلام ده؟!
سلمى : لو سمحتي متجيش سيرة ماما خالص
سامعه؟
عماد (الأخ غير الشقيق)
كان داخل من بره : أظن عيب قوي كده يا سلمى.
إياد : فيه ايه يا سلمى صوتك واصل لغاية تحت.
سلمى : أنت متكلمنيش خالص فاهم؟
عمار : انتي جرا لك ايه دا وقته؟!
سلمى : شوف مرات باباك بتعمل ايه مانعه أي حد يدخل جوه.
عمار : ملناش فيه يلا بينا ننزل.
سلمى : بقى كده طيب أنا هنزل لوحدي.
إياد وعمار ينزلوا بعدها.
________
في فيلا آسر.
جاي من بره هو والولاد يلمحوا سهر نايمه في الريسبشن و التليفزيون شغال.
يقفله آسر و يشاور للولاد يطلعوا اوضهم ويقرب من سهر يحاول يصحيها بهدوء.
سهر تقوم بفزع..
سهر : آسر !
آسر : ايه اللي منيمك هنا هاتي ايدك يلا نطلع ننام فوق.
سهر : طيب.
آسر : سهر متناميش قومي معايا يلا.
سهر : حاضر.
تقوم وهي لسه نايمه فكانت هتوقع يلحقها آسر ويشدها من ايدها ويسندها.
آسر : انتي مالك كده مش قادرة توقفي ليه؟
سهر بصوت ناعس : هقف اهوه حاضر.
يسندها ويطلعوا فوق.