أنت قلبي الجزء الثالث

الحلقة ١٢٦

#انت_قلبي٣
__________
الحلقة ١٢٦

في شقة كمال ونادين.
يوسف متشعلق في اوكرة باب غرفة جده.
مليكة : يوسف تعالى هنا.
يوسف مجاش ولسه متشعلق في الاوكرة.
قامت مليكة اخدته من ايده : أنا مش بكلمك مبتسمعش الكلام ليه بابي قال لك ايه؟
يوسف : مدخلش جوه.
مليكة : يبقى تفضل قاعد جنبي هنا متتحركش.
يوسف : بس أنا مدخلتش جوه.. هقوم اشرب.
مليكة : خليك قاعد أنا هجيبلك المياه لحد عندك.
بيقوم يوسف جري يفتح الباب.
مليكة : يا أخي قولتلك تقعد.
هدى تدخل بسرعة : بابا عامل ايه؟
مليكة : الدكتور عنده جوه.
هدى تخبط وتدخل.
مليكة : اقعد بقى تعبتني.
يوسف : ايش معنى عمتو هدى دخلت عند جدو؟
مليكة : ملكش دعوة هتقعد ولا..
يوسف : هقعد حاضل.
مليكة : قولنا ايه؟
يوسف : حاضر يا مامي بقى..
مليكة بتتألم : متخبطش برجلك وجعتني.

التفت سيف أول ما الباب اتفتح.. ادخلي يا هدى.
هدى : سيف بابا عامل ايه؟
كان الدكتور لسه بيكشف.
سيف : ممكن تهدي لحد ما الدكتور يخلص شغله.
هدى : حاضر.

في التليفون.. 📞
مليكة : لا يا مامي مش جايه.
سهر : ليه يا حبيبتي حصل حاجة؟
مليكة : اه.. عمو كمال تعب وكلمنا الدكتور وهو عنده جوه.
سهر : يا خبر.. ألف سلامة عليه ابقي طمنيني يا مليكة وأنا لما بابي يجي من الشركة هنيجي نطمن عليه.
مليكة : حاضر يا مامي بس الدكتور يخرج ويطمنا هكلم حضرتك على طول.

في غرفة كمال ونادين.
الدكتور : بوادر جلطه لو متلحقتش ممكن تسبب في تدهور الحالة أكتر من كده.
سيف : طب ايه العمل يا دكتور بابا محتاج عناية مركزة؟
الدكتور : لأ العناية المركزة مبنلجأش ليها غير في الحالات اللي بيكون فيها المريض فاقد الوعي تمامًا وفي مشاكل في التنفس
لكن بابا صحيح مش واعي بشكل كامل لكن تمام بالعلاج هيتحسن أهم حاجة ميتسابش لوحده يعني ممكن اتنين أو تلاتة يبدلوا مع بعض وتقعدوا تتكلموا معاه كتير بس من غير ضغط عاوزين الذاكرة تفضل شغاله.
هدى : حاضر يا دكتور.
الدكتور : العلاج ده ينتظم عليه.
سيف : بس هو بياخد علاج تاني علشان..
يقاطعه الدكتور : تمام ما أنا عارف ده والاتنين ما بيتعارضوش مع بعض.
سيف : تمام يا دكتور.. شكرًا لحضرتك.
الدكتور : على ايه دا شغلي..
بيخرج الدكتور وبيوصله سيف لحد باب الشقة.
مليكة : هاه يا سيف عمي عامل ايه؟
سيف : كويس يا مليكة.. عامله أكل؟
مليكة : اه.. اجيبلك جعان؟
سيف : لأ دا علشان بابا
لو  مطبختيش انزل اجيب من تحت.
مليكة : لأ أنا عملت أكل قولت أكيد طنط ياسمين وكلهم يعني هيجو.
سيف يطبطب عليها ويدخل جوه عند والده.
يوسف : بابي.
مليكة : عاوز ايه؟
يوسف : عاوز ادخل عند جدو.
مليكة : خبط قبل ما تدخل واستأذن من بابي لو قال لك لأ ارجع على طول.
يوسف : حاضر.
دخلت مليكة تجهز صنية أكل تدخلها لكمال قام سيف اخد الأكل منها.
يوسف قاعد جنب جدو.
يوسف : بص بقى يا جدو أنا هحكيلك حدوته زي ما كنت بتحكيلي.
هدى : سيف نزل يوسف من عند بابا.
سيف : خليه يا هدى.
هدى : علشان ميضايقهوش.
كمال يشاور لهدى.
هدى تقرب منه : نعم يا بابا.
كمال بابتسامة يطبطب على يوسف في إشارة إنها تسيب يوسف جنبه.
هدى وهي مدمعه : حاضر يا بابا خليك يا يوسف جنب جدو.
التفت سيف لاقى مليكة واقفه.
سيف : اقعدي استريحي يا مليكة.
بيقرب الكرسي منها علشان تقعد.
لسه بتقعد كان جرس الباب بيرن بتقوم مرة تانية.
سيف شاورلها : خليكي قاعدة هفتح أنا الباب.
_______
في فيلا مراد.
رباب داخله بالعصير يقوم مجدي ياخد منها الصنيه وتخرج فيقرب من زينة يعطيها الكوباية بتاعتها.
مجدي : اتفضلي.
زينة : متشكره.
مجدي : لو تعبانه ممكن تطلعي تستريحي في اوضتك أنا هقعد مع مراد شويه وهمشي.
زينة : لأ مش عاوز اطلع اوضتي أنا زهقت من القعدة فوق عاوزه اتمشى في الجنينه.
مجدي : بس مش هينفع علشان رجلك لو يتفع اسندك كنت سنتدك ومشيتك بره شويه.
زينة نظرت له ومردتش.
مجدي يقعد جنبها لكن سايب مسافة ما بينهم : اقولك على حاجة.
رفعت راسها ونظرت ليه.
مجدي : أنا من اول ما شوفت الواد ده وحاجة جوايا كده خلتني مش مستريح ليه.
زينة : وأنا كمان عمري ما استريحت ليه.
مجدي : هو ازاي ده يبقى أخو ليلى بنت عمتك؟!
زينة : أخوها من الأب.
مجدي : وهو بقى بعد السنين دي كلها جاي يوصل صلة الرحم اللي بينهم بإنه يتعدى على بيت خالها وبنت خالها.
زينة : مجدي لو سمحت أنا مش عاوزه افتكر حاجة.
مجدي : حاضر أنا آسف.
مراد يدخل ويسلم على مجدي.
مراد لزينة : عامله ايه دلوقت؟
زينة : كويسه بس شيل ايدك دي من على كتفي بيوجعني.
مراد بيمزح معاها علشان يخفف عنها : هههههههههههه بس ايه رأيك يا مجدي في خطيبتك خبطة الواد خبطه على دماغه خلته مش داري بالدنيا.
مجدي : دا أقل واجب.
مراد : أنت شايف اللي قدامك دي مش تبان ضعيفه كده بس وقت الجد بتبقى ولا بطل العالم في المصارعة.
مجدي ينظر لها ويبتسم.
زينة : يا عم اسكت بقى أنا عضمي مفشفش.
مراد يخبطها على كتفها : مفشفش بس شديد.
زينة بتصرخ : آآآآه.
يقوم مجدي بسرعة : أنت عملت فيها ايه؟
مراد : معملتش حاجة أنت مش قاعد معانا.
زينة وهي متعصبه : بس بقى متلمسنيش أنا مش مستحمله.
أمل : ايه فيه ايه؟
ونظرت لزينة اللي كانت بتتألم : ايه يا حبيبتي مالك؟
زينة : مامي ابعدي مراد عني متخلهوش يلمسني عمال يخبطني في كتفي وأنا عضمي مش مستحمل.
أمل : يعني أعمل فيك ايه مش شايف اختك تعبانه ازاي؟!
مراد : خلاص أنا آسف.. تعالى يا مجدي نتمشى بره شويه..
أمل : أنت مالك ومال مجدي سيبه في حاله.
مجدي : خلينا قاعدين هنا.
مراد : اوك.. وادي قاعدة.
زينة : بس بعيد عني لو سمحت.
مراد : هههههههههههه حاضر.
_______
في الاوتيل.
فريدة خارجه وهي بتجفف شعرها كان كريم قاعد على السرير بيخلص شغل على اللاب توب.
فريدة بدهشه : أنت بتعمل ايه يا كريم؟
كريم : ايه يا حبيبتي مش قولتي داخله تاخدي شاور؟
فريدة : اه ودا معناه إنك تنتهز الفرصة وتخلص الشغل بتاعك ايه مبتضيعش وقت للدرجة دي.
قفل كريم اللاب توب بعد حفظ الشغل اللي كان بيعمله.
كريم : ما اخدتش من وقتك ولا دقيقة كده كويس؟
فريدة : خلاص يا كريم براحتك.
وقعدت تسرح شعرها.
كريم واقف جنبها : بقولك ايه يا فريدة.
فريدة : نعم.
كريم : بما إن بكرة يعني أخر يوم لينا فننام بدري علشان نصحى بدري وناخد اليوم كده من أوله علشان لما نرجع متقوليش ملحقتش استمتع بالرحلة.
فريدة : عين العقل يا حبيبي.
كريم : بقولك ايه انتي مش جعانه؟
فريدة : في ايه يا كريم ايه حكايتك بقيت بتجوع بسرعة اليومين دول.
كريم : هههههههههههه
انتي في ايه مالك وماله لما أكل؟
فريدة : هو الحقيقة أنت مبتاكلش كتير في كل وجبة لكن عدد الوجبات اللي بتاكلها في اليوم كتير.
كريم : حبيبتي احنا يومين اجازة فيها ايه لما ناكل ونستمتع بوقتنا هطلب أكل تاكلي معايا؟
فريدة : على حسب هتاكل ايه.
كريم : طالبه معايا سمك اطلبلك معايا؟
فريدة بدهشه : سمك بالليل يا كريم؟!
كريم : ما هو يا حبيبتي ميعرفش إننا بالليل خلاص طلع من المياه ومات.
فريدة : هاهاها دي نكته بقى؟!
كريم : ايه مش عاجبك؟
فريدة : أنت يا حبيبي ملكش في الهزار خليك بشخصيتك الحقيقة متحاولش علشان مش هتعرف.
كريم : هههههههههههه شكرًا على نصايحك الغاليه يا غاليه.
فريدة : العفو دا من بعض ما عندكم اطلبلي معاك سمك.
كريم : هههههههههههه
فريدة : مالك يا حبيبي بتضحك على ايه؟
كريم : حد ياكل سمك بالليل يا فريدة؟
فريدة : اه أنا وأنت.
كريم : خلاص نطلب سمك.
فريدة : خليهم يجيبوا معاه بصل أخضر وجرجير.
كريم : بصل.. ايه؟!
فريدة : خلاص بلاش أخضر خليه أحمر.
كريم : بتهزري بصل ايه بالليل؟!
فريدة : يعني هي جات على البصل.. خلاص بلاش.
كريم : تمام هطلبلك بصل بس تشوفي اوضة تانية بقى تنامي فيها.
فريدة : هتندم يا كيمو.
كريم : هههههههههههه لا مقدرش تنامي بعيد عني
بس بلاش فكرة البصل دي.
فريدة : بلاش أنا أصلا مكونتش متأكدة يعني إني عاوزه أكله بس قولت السمك ميحلاش إلا بيه.
كريم : لا هو ميحلاش إلا بيكي هطلبلك زيي بالظبط.
فريدة وهي راكنه بـ ايدها على كتف كريم.
فريدة : كريم.
كريم كان لسه بيتصل يطلب الأكل : نعم يا حبيبتي.
فريدة : هو مينفعش نقضي هنا شهرين تلاته كده؟
كريم : وماله يا حبيبتي اقفل المستشفى واجيب الولاد بالمرة يقعدوا معانا هنا.
فريدة : ياريت.
كريم : بس علشان هطلب الأكل.
فريدة : اتفضل.
_________
في شقة كمال ونادين.
سيف بيسحب الكنبه ويدخلها جوه في اوضة والدة وياسمينا بتساعده.
سيف : بتعملي ايه يا ياسمين؟
ياسمينا : بساعدك يا سيف.
سيف : ماشي بس ابعدي علشان رجلك متتعورش.
ياسمينا : ماشي.
وبيقرب سيف الكنبه من السرير وبيقعد.
كانت هدى داخله بالبطانية والمخده.
سيف : بتعملي ايه يا هدى؟
هدى : هنام أنا هنا وأنت ادخل نام في اوضتك.
ياسمينا : مش هينفع علشان سيف هو اللي هيساعد بابا يقوم يدخل الحمام انتي مش هتقدري.
هدى : وقتها هبقى اصحيه.
سيف : هدى روحي خُدي الحاجة اللي انتي جايه بيها دي وروحي نامي.
هدى : لأ.
وتحدف البطانية والمخده على الكنبه.
سيف : هدى مش وقت اللي بتعمليه ده ياريت تروحي تنامي في اوضتك انتي مش هتعرفي تعملي حاجة لبابا وعلى كلامك هتصحيني يبقى وفري على نفسك من الأول كده وادخلي تنامي.
هدى : ملكش فيه يا سيف
ولو مصمم تنام هنا يبقى ملكش دعوة بيه بقى أنا كمان هنام هنا.
ياسمينا : هنا فين بس يا هدى ما انتي شايفه الأوضة بابا نايم على سرير وسيف شد الكنبه لحد هنا علشان ينام عليها انتي بقى هتنامي فين؟
وفجأة يسمعوا صوت مليكة وهي بتصرخ يجري سيف وتلحقه هدى وياسمينا.
يوسف : ايه فيه ايه؟!
مليكة ايدها على ضهرها وايد على بطنها وبتتألم.
يوسف واقف على السرير وبيبكي من الخوف : مكانش قصدي يا بابي.
سيف بيقرب منه : مكانش قصدك ايه أنت عملت ايه في مامتك؟
مليكة : خلاص يا سيف محلصش حاجة.
سيف : انطق عملت ايه؟
ياسمينا : بالراحة يا سيف الواد خايف منك.
سيف : مش هعملك حاجة بس قول الحقيقة ومتكدبش مليكة متبصلوش خليه يتكلم.
مليكة : حاضر.
يوسف وهو بيفرك في ايده من الخوف والتوتر : مامي عاوزاني أنام وأنا قولتلها مش عاوز أنام دلوقت وهي مصممه.
يوسف : وبعدين حصل ايه؟
يوسف : وبعدين قومت كده وبعمل برجلي مش قصدي خالص يا بابي راحت رجلي خبطت مامي في بطنها.
يوسف : بقى كنت بتعمل برجلك كده فجات في بطن مامتك من غير ما تقصد صح؟!
يوسف : صح مش كده يا مامي؟
نظرت مليكة ليه ومردتش.
سيف : طب انزل.
مليكة : سيبه ينام معايا.
سيف : لأ مش هينام هنا.
يوسف : خلاص هنام مع جدو.
سيف : ولا مع جدك كمان انزل.
ياسمينا : تعالى يا يوسف نام معايا جوه.
يوسف بيبكي : لأ هنام مع جدو.
سيف : اسمع الكلام وروح نام مع عمتك.
مليكة : خليه ينام معايا.
سيف : ولما يخبطك وانتي نايمه بقى ابقى اعمل ايه أنا؟
مليكة : مش هيحصل حاجة متخافش.
سيف : انزل بقولك.
يوسف : طيب هنزل بس هنام مع جدو.
ونزل يوسف جري خرج من اوضة سيف دخل اوضة كمال وبسرعة نام جنبه وغطى نفسه.
هدى : قوم يا يوسف ابعد عن جدك علشان تعبان.
يوسف : لا هنام هنا جنب جدو.
هدى : انزل بقولك.
يدخل سيف ياخد يوسف من جنب جده ويوسف بيبكي وبيخبط برجله في سيف.
كان هيضربه لولا ياسمينا جات واخدته من ايده.
سيف : بقى كنت بتخبط كده برجلك ومش قاصد قام جات في بطن مامتك ولا قاصد تعمل كده؟!
ياسمينا : خلاص يا سيف سيبه هاخده ينام معايا.
سيف : أنا بقى هخليك تنسى الدلع دا خالص.
كمال بيفتح عينه وبينادي :  سيف.
سيف يقرب من والدة : نعم يا بابا عاوز حاجة يا حبيبي؟
بيشاور كمال على يوسف : عاوز سيف.
هدى : بس دا يوسف يا بابا ابن سيف اللي واقف جنبك.
سيف : أنت عارفني أنا مين؟
كمال بيشاور وبيفكر مش متذكر الاسم لكن الشخص اللي قدامه عارف إنه شافه كتير قبل كده.
بيشاور على ياسمينا.
كمال : نادين.. نادين.
ياسمينا بتقرب من كمال : نعم يا بابا.
هدى بتقرب من والدها : مش عارفني أنا مين يا بابا؟
كمال : نهى.. انتي نهى.
هدى تُقبل يده : تعيش وتفتكر بكره تخف وتعرفنا كلنا.
بيشاور كمال مرة تانية على يوسف وينادي عليه بـ اسم سيف.
يوسف يقرب من كمال : نعم يا جدو.
بيمرر كمال يده على وجه يوسف وبابتسامة : مش هتبطل شقاوة يا سيف
ماما تعبانه ومش عايزة صوت.
يوسف : أنا يوسف يا جدو.
__________
في فيلا مراد.
هشام : يعني يا عم فتحي يقعد يسألك كل الأسئلة دي عن بنتي وانتي متاخدش بالك خالص ولا حتى تحاول تقولي؟!
عم فتحي : يا دكتور وأنا اعرف منين بس إن هيعمل العمله المنيله دي وهو أنا برضو لما لاقيته بيسأل كتير عن الست زينة مردتش عليه علشان أفهمه إن ميصحش يسأل ويدخل نفسه في اللي ملوش فيه.
هشام : وانتي يا رباب ازاي تدخليه هنا وكمان تسيبي باب الفيلا مفتوح
احنا طول عمرنا بنقفله أول ما بندخل أو نخرج.
رباب : يا دكتور هشام هو دخل بالحاجة قال يعني بيساعد وأنا قولت له ابقى اقفل الباب وراك وأنت خارج أنا معرفش خالص إنه بيخطط لحاجة زي دي وبعدين أنا لما حسيت بحركة بره وأنا في المطبخ خرجت ملقتش حاجة واتأكدت إن الباب مقفول بس معرفش إنه جوه وطلع فوق كمان.
هشام : ياريت ناخد بالنا بعد كده مفيش حد غريب يجي ويدخل وأنا مش موجود.
عم فتحي ورباب : حاضر يا دكتور.
هشام : اتفضل أنت يا عم فتحي.
عم فتحي : تصبح على خير يا دكتور.
هشام : وأنت من أهله
رباب معلش اعملي لي فنجان قهوة وطلعيه ليه فوق في اوضة زينة.
رباب : حاضر.