أنت قلبي الجزء الثالث

الحلقة ٦٥

#انت_قلبي٣
_________
الحلقة ٦٥

كريم نايم يقوم على صوت على فريدة وهي بتعيط.
كريم : فيه ايه يا فريدة مالك؟
فريدة : مفيش.
كريم يشغل نور الابجورة : مفيش ايه احنا مش كنا كويسين دلوقت حصل ايه قولي لي؟
فريدة : مفيش يا كريم قولت لك.
كريم : كابوس صح شوفتي كابوس؟
فريدة : حاجه زي كده؟
كريم : يعني ايه حاجه زي كده؟
فريدة : نام يا كريم بقى.
كريم : أنام ازاي وانتي هاريه نفسك من العياط كده.
قرب اخدها في حضنه وبيطبطب عليها.
فريدة : بتحبني صح يا كريم؟
كريم : مش هرد علشان السؤال دا بيستفزني.
فريدة : وأنا كمان بحبك.
يُقبل ايدها : طب قولي لي مالك؟
فريدة : كنت مضايقه شويه بس خلاص بعد ما قومت طبطبت عليه وضحكت في وشي نسيت كل حاجه.
كريم : طب كنتي مضايقه من ايه؟
فريدة : أفكار كده بتيجي في دماغي.
كريم : مش من حقي اعرفها؟
فريدة : تعالى ننام احسن مش عاوزه افتكر حاجه تعكنن عليه.
كريم : ولو إني مش فاهم حاجه بس حاضر هسمع كلامك.
يقفل النور وينام تقرب فريدة فياخدها في حضنه وينام.
_________
في غرفة هشام وأمل.
هشام : ايه كنتي عاوزاني اعمل ايه يا أمل؟
أمل : خلاص يا هشام متعملش حاجه.
هشام : معملش حاجه!
لا كويس قوي.. زي حضرتك كده لما اكتفيتي بطرده.
أمل : كنت عاوزني اعمل ايه امسكه اضربه يا هشام؟!
هشام : ما أنا طول عمري بقول لك سكوتك في مواقف كتير كانت محتاجه شدة ومقاومة هو اللي وصلنا للوضع ده.

كلام هشام فتح جرح أمل اللي كانت بتحاول تنساه حتى لو مكانش يقصد اللي جه في دماغها أول ما سمعت الكلام دا منه
فصرخت في وجهه وهي منهاره وتبكي : ما تبس بقى كفاية اللي أنا فيه أنتو بتحاسبوني على ايه
كل واحد عاوز يدبحني وكأني أنا المجرمه.
هشام شعر إن الكلام جه على جرح أمل فحاول يهديها ويطيب خاطرها بكلمتين لكن أمل كانت خلاص جرحها بينزف ومفيش حاجه قادرة توقفه.
قامت وخارجه من الغرفة لحقها هشام وحاول يرجعها.
أمل : لو مخرجتش من الأوضة دي في اللحظة دي هموت سيبني بقى.
مكانش قدام هشام حل تاني غير إنه يسيبها تخرج علشان كمان صوتهم ميعلاش والولاد يسمعوهم.

خرجت أمل مالقيتش اوضة أأمن من اوضة مراد (الأب).
دخلت وحدفت نفسها على السرير وهي منهاره وبتبكي لحد ما غلبها النوم فنامت مكانها.
__________
الصبح في منزل عُمر.
فريدة : علشان خاطري يا ماما زودي كمان.
ياسمينا : يا بنتي هتعملي ايه بكل ده انتي هتفرقي على أهل المنطقة؟!
عُمر خارج من جوه : هاتيلها اللي هي عاوزاه يا ياسمين.
ياسمينا : أنت عارف هي عاوزه ايه؟
عُمر : برضه هاتيلها اللي هي عاوزاه.
فريدة : وغسالة اطباق كمان يا ماما علشان خاطري.
ياسمينا : سمعت بنتك قالت ايه وبعدين تعالى هنا قولي أنت فاكر أنا جيبت معايا ايه لما جينا نتجوز؟
عُمر : مش فاكر بس الصراحه مامتك كانت مجهزاكي احسن جهاز.
تغمز له ياسمينا.
عُمر : ايه اكدب يعني؟!
فريدة : شوفتي يا ماما يعني تيته جهزتك احسن جهاز ومستخسره فيه تمانية كمان.
عُمر : تمانية ايه؟
ياسمينا : تمن دست من كل حاجه دا غير اللي جيبته ووقتها سألتها يا فريدة هتحتاجي حاجه تاني قالت خلاص كده يا ماما دي نادين جنبك نسمه.
فريدة : نادين متجوزه من زمان يا ماما.
ياسمينا : ليه على اساس إنها متجوزه من العصر الحجري روحي شوفي اللبن زمانه غرق البوتاجاز.
فريدة : لا متقلقيش مهديه عليه النار.
ودخلت فريدة المطبخ.
ياسمينا : عماله اغمز لك وانت مفيش فايدة
مامتك كانت مجهزاكي احسن جهاز اديك طمعت بنتك.
عُمر : هاتيلها اللي هي عاوزاه.
ياسمينا : هو انت مفيش على لسانك غير هاتيلها اللي هي عاوزاه حاضر يا عُمر هجبلها اللي هي عاوزاه كله حتى لو خلتك على الحديدة يا حبيبي.
عُمر : مش مهم اهو كله ليهم.
ياسمينا : امسك ايدك شويه احنا مش عارفين بكره فيه ايه.
عُمر : واهو كله عندك يا ياسمين.
ياسمينا : ما هو أنت عمال تقولي هاتي اللي هي عاوزاه واحنا قربنا نشطب يا حبيبي متنساش إننا كل اللي عملناه في حياتنا حتة البيت ده وتعليم وجهاز البنات.
عُمر : طب ما كده كويس.
ياسمينا : طيب ولو حد فينا تعب يا عُمر؟ المعاش اللي هاخده مش هيعمل حاجه.
عُمر : ايه دا يا ياسمين وأنا روحت فين وبعدين ما أنا طول عمري بقول لك متحطيش حاجه في البيت انتي اللي مش بتسمعي الكلام.
ياسمينا : هو أنا بقولك كده علشان تقولي الكلمتين دول يا عُمر نهايته بقى هنزل أنا وفريدة نشتري الحاجات اللي باقيه علشان ارتاح بقى.
عُمر : طيب.
فريدة : اللبن يا ماما.
ياسمينا : طب هاتي كوباية ليه وكوباية لباباكي
ولا مش هتعرفي؟!
فريدة : هعرف طبعًا مالك بس يا ست الكل؟
اهو بكره امشي واريحك.
ياسمينا وهي مدمعه : تريحيني!
نظر عُمر لياسمينا وبعدها نظر لفريدة.
فريدة : فيه ايه يا جماعة أنا مش ماشيه دلوقت قاعدة حبه كمان متقلقوش اتفضل يا سي بابا اتفضلي يا ماما.
عُمر : تسلم ايدك يا فراولة.
فريدة : هههههههههههه طنط فريدة بتقول محدش يقول فراولة دي لغيري.
ياسمينا : صحيح فريدة طول عمرها بيتقالها يا فراولة بس أنا بقى سميتك على اسمها ودلعتك على دلعها.
عُمر : وهتبقى حماة بنتك
ههههههههههههه
فريدة : طنط فريدة دي حتة سكره بحبها قوي.
ياسمينا : يا خوفي منك تخلينا نخسر بعض بسببك.
فريدة : هههههههههههه
لا يا ماما متقلقيش بنتك نسمه ما انتي عارفاني.
ياسمينا : ما هو علشان عارفاكي بقول كده.
_________
في فيلا مراد.. على السفرة.
نورهان : اوعى يا هشام تكون اتخانقت مع أمل.
سكت هشام ومردش.
نورهان : هو دا اللي جه في دماغها وقتها أنت عارف أمل لا بتحب الصوت العالي ولا المشاكل وطرده كفاية تلاقيه خرج دمه محروق.
هشام : هو أنا لما اعرفها ازاي تاخد حقها ابقى غلطان يا نور؟
نورهان : لأ طبعًا مش غلطان بس بتختلف على حسب الاسلوب أنت اوقات بتكون شديد قوي دا أنا بترعب منك
هشام : ياريتني كنت شديد في تربيتي للواد ده مكانش عمل اللي عمله.
نورهان : هتاخده فعلا وتروح للراجل ده؟
هشام : ايوه ولو اني مكونتش عاوز ادخل عنده بس مضطر واهو تكون رسالة ليه ياريت يفهمها علشان يحل عننا بقى.
مراد : صباح الخير..
نورهان : صباح النور.
مراد لهشام : مش يلا بينا زي ما حضرتك قولت؟
هشام : شويه لما افطر واشرب القهوة.
مراد : خلاص هطلع أنام شويه ولما حضرتك تخلص ابقى نادي عليه ولا ابعتلي حد.
نورهان تمسكه من ايده وبهمس : اقعد وبلاش استفزاز لباباك علشان هو على اخره.
مراد : ليه هو أنا عملت ايه؟
نورهان : طب اقعد افطر وانا هفهمك كل حاجه.
هشام : أنا طالع اشوف مامي علشان تعبانه.
نورهان : هي أمل صحيح تعبانه يا هشام؟
هشام : اه شويه.
مراد : طب ما ناخدها للدكتور.
هشام : هطلع اشوفها الأول.
طلع هشام فوق.
مراد : مش هتقولي لي بقى فيه ايه
وايه اللي حصل امبارح مخلي بابي ومامي في الحاله دي؟
ومراد عمال يفكر ويكلم نفسه : ممكن تكون مامي حكت اللي حصل لما طلعت أنا ورغد فوق
لا معتقدش مامي هتقول لحد بس ايه اللي حصل
يا ترى موتر البيت بالشكل ده؟
نورهان : مش كنت عاوز تعرف ايه اللي حصل امبارح أنا بقى هقول لك.
_________
في فيلا آسر.
آسر : هما الولاد لسه نايمين يا سهر؟
سهر : علي نايم مش داري بالدنيا حاولت اصحيه مقامش قولت اسيبه نايم بقى بما إن النهاردا الجُمعة بس شويه كده وهصحيه هو ومجدي.
آسر : على حداشر ونص كده صحيني.
سهر : استنى هنا أنت هترجع تنام؟
آسر : مش النهاردا اجازة؟
سهر : ايوه بس يعني سهر ملهاش حق في ساعة الصبحيه دي.
آسر بيرفع الغطاء ويبتسم ليها : الجو برد تعالي اتغطي ونامي شويه.
سهر : أنت كسلان ومش عاوز تقوم.
آسر : بصراحه اه ههههههه
سهر : خلاص هنزل أفطر لوحدي.
آسر : طب ما تقول لي لرهام تجيب الفطار هنا.
سهر : طب ما تيجي نفطر في الجنينة دي الشمس طالعه والجو حلو قوي بره.. البيت هو اللي متلج.
آسر : عندك حق بس مكسل اقوم.
سهر : اقومك أنا هات ايدك.
يعطيها ايده فتيجي تقومه يشدها هو ناحيته.
آسر : هههههههههههه
سهر وهي متنرفزه : بقى دا اللي كسلان؟!
آسر : هههههههههههه
اعملك ايه بس ما انتي عماله تقول لي الجو حلو الجو حلو قولت تيجي هنا جنبي علشان تطمني على الجو.
سهر : جو ايه؟
آسر : مش زمان كان بيتقال على الاتنين اللي بيحبوا بعض الجو؟
سهر بابتسامة : ايوه
أنت بقى تقصد الجو ده اللي هو أنت يعني؟
آسر : ايوه يا سهور.
سهر : تعرف من زمان قوي ما دلعتنيش بالاسم ده.
آسر : يا خبر معقول؟!
الكلام ده؟!
سهر : هههههههههههه
مالك مستغرب كده ليه؟
وبعدين شيل عينك دي عني.
آسر : وابص لمين؟
سهر : الأوضة مليانه حاجات تانية بص مكان ما أنت عاوز.
آسر : يعني معقول حد يسيب القمر اللي قاعدة جنبه دي ويبص لدولاب ولا سرير؟!
سهر بابتسامة : مش معقول طبعًا.
بتكح سهر.
آسر : ايه دا انتي أخدتي برد ولا ايه؟
سهر : لأ متقولش أنا مش عاوزه انام في السرير.
آسر : هههههههههههه عارف أنا بيحصل ايه وقتها.
سهر : خلاص ما أنت عارف كل حاجه بقولك ايه.
آسر : قولي يا حبيبتي بس الأول غطي نفسك كويس.
وبيغطيها آسر.
سهر بابتسامة : هروح لـ أمل النهاردا.
آسر : خير فيه حاجه ولا ايه؟
سهر : رايحه اقعد معاها عادي.
آسر : اممم اوك روحي.
سهر : طيب هقوم اجهز اللبس اللي هخرج بيه.
آسر : لسه بدري مش هتروحي بعد الغدا برضه.
سهر : ايوه.. أنت خارج؟
آسر يهز راسه.
سهر : كنت حاسه طالما وافقت كده على طول إني اخرج ومعترضتش ولا قولت اقعدي معايا دا النهاردا يوم اجازتي يبقى خارج طبعًا.
آسر : معزوم على العشا.
سهر : فين؟
آسر : حسام عازمني أنا ووليد اخويا وقال لي دي عزومة رجاله بس.
سهر : عزومة رجاله يعني ايه؟
آسر : هههههههههههه يعني مش عازم الستات.
سهر : تصدق ابن عمك ده
..... ولا بلاش احسن.
آسر : هههههههههههه لا كملي كنتي عاوزه تقولي ايه؟
سهر : لا يا عم مااخدش ذنب أنا بسببه.
آسر : أصل يارا مسافره عند أهلها..
سهر : اااه قولت لي بقى
كويس إني مغلطتش فيه.
آسر : المرة الجايه نعزمهم عندنا.
سهر : وماله بس تكون عزومة ستات بقى.
آسر : هههههههههههه بقولك مراته مسافره.
سهر : عادي كان استنى لما رجعت محبكتش يعني دلوقت وبعدين مين اللي هيعمل الأكل؟
آسر : هيطلب أكل من بره.
سهر : طب خُد بالك علشان مفيش مرة اتعزمنا عنده غير اما ترجع تعبان.
آسر : هو اللي بيغريني
ههههههههههههه
صحيح هو انتي مبقتيش تطلبي مني تروحي لسلمى بنت خالتك ليه؟
سهر : علشان مش عاوزه اروح هناك.
آسر : انتو متخاصمين؟
سهر : آسر مش عاوزه حد يكلمني خالص في الموضوع ده.
آسر : خلاص خلاص احنا كنا كويسين مالك فيه ايه؟
سهر : علشان مش عاوزه حد يكلمني عنها خالص.
آسر : خلاص براحتك.
________
في فيلا مراد.
هشام بيحاول يصحي أمل.
هشام : أمل.. أمل يا حبيبتي قومي بقى طب ردي عليه.
يمسد على ايدها ويُقبلها فتحت أمل عينها وبصوت ناعس : هشام!
هشام : ايوه يا حبيبتي انتي عامله ايه دلوقت؟
أمل : أنت جاي ليه؟
هشام : جاي اطمن عليكي.
أمل : مش عاوزه حد يطمن عليه عاوزاكم بس تسيبوني في حالي محدش يقول لي كلام يوجعني ويرجع يقول لي جاي اطمن عليكي.
كانت أمل بتبكي.
هشام : أنا آسف يا أمل مقصدتش اللي فهمتيه أنا بس كنت بنصحك.
أمل : بتنصحني ولا مش قادر تنسى يا هشام هاه رد سكت ليه؟
هشام : وبعدين بقى يا أمل ايه لازمة إننا نقلب في اللي فات دلوقت؟!
أمل بانفعال : أنا مقلبتش في حاجه.. هاه مقلبتش في حاجه يا هشام أنت اللي اتكلمت أنا كنت ساكته كاتمه في قلبي وساكته أنت اللي قعدت تضغط وتفتح جرح قديم بحاول انساه وبتحاسب عليه لحد النهاردا.
هشام : مين يحاسبك على حاجه ملكيش ذنب فيها
وبعدين أنا مبحبش افتكر كل ده.
أمل بانفعال : هو أنا اللي فكرتك ولا أنت؟!
هشام : خلاص حقك عليه ولو اني اصلا مكانش قصدي أي حاجه دي كانت نصيحه عامة بس واضح إن الجرح لسه ملمش.
أمل بحزن ووجع : وعمره ما هيلم يا هشام عمره ما هيلم.
هشام : طب بس اهدي وحقك عليه.
أمل : مراد بيقول لي كلنا بنغلط يعني يا مامي عمرك ما غلطتي وبصلي بصه عمري ما هنساها.
هشام : بيقول لك كده بمناسبة ايه؟
أمل : بنصحه إن هو وخطيبته
يتعاملوا مع بعض في أضيق الحدود هو عاوز يخرج معاها ويقعدوا لوحدهم عادي وأنا كنت خايفه يغلط فكان دا رده عليه تفتكر يقصد ايه يا هشام؟
هشام : أكيد ميقصدش اللي في دماغك يا أمل
هو بس بيحاول يلاقي مبرر لنفسه بس اللي بيعمله دا غلط وانا هاخده دلوقت ونروح للراجل ده وبعدها يقطع علاقته بيه وببنته ولو حكمت حتى احبسه في البيت هعمل كده لاني خلاص مش مستعد اخسر ابني لازم يتشد عليه أنا كنت غلطان لما سيبته يعمل اللي هو عاوزه.
أمل : متتخانقش مع الراجل ده يا هشام شكله مش سهل وأنت يا حبيبي ملكش في المشاكل والقرف ده.
هشام : مضطر يا أمل مفيش حد بيحب المشاكل بس إذا جات لحد عندنا يبقى اهلا بالمعارك زي ما بيقولوا.
أمل : خايفه.
هشام : متقلقيش الحق معانا أنا بدافع عن نفسي
مش معقول هخاف منه واعديله اللي هو عمله دا
يا أمل دا أنا مبقاش راجل بقى.
أمل : طيب روح ومتتأخرش.
يحضنها هشام : يعني خلاص مش زعلانه؟
أمل : لا خلاص يا هشام مش زعلانه.
بينظر للغرفة..
هشام : كل أما تضايقي تيجي هنا؟!
أمل تنام وتحضن المخده : برتاح هنا.
هشام : طب معلش قومي نامي جوه.
أمل : سيبني هنا شويه.
هشام يقومها بالعافية : لأ قومي معايا يلا.
أمل : وبعدين بقى.
هشام يحضنها : وبعدين ايه ما هو أنا مش هسيبك
هنا لوحدك يلا بينا.
نظرت أمل للغرفة قبل ما هشام يقفلها.
هشام : يلا.
وبيقفل الغرفة وياخدها من ايدها.
زينة بابتسامة : صباح الخير.
يرددوا : صباح النور.
هشام : يلا انزلي افطري مع اخوكي وعمتك.
زينة : حاضر.
هشام : يلا يا أمل علشان تفطري.
تبتسم أمل : حاضر.
__________
في شقة كمال ونادين.
كمال : لأ دا اسمه ألف سيب الباء في حالها دلوقت.
سيف : هههههههههههه ما قولنا هيغلبك يا بابا.
يوسف : دا طبق وتحته نقطة صح يا جدو؟
كمال : ايوه بس اسمه باء مش ألف الألف بتتكتب كده وريني.
يوسف : اتفضل.
كمال : اهوه شايف؟
سيف : شوف يا يوسف الألف واحد وفوقه همزة بيتكتب كده.
كمال : ما اقوم أنا بقى وتتفضل حضرتك تشرحله.
سيف : هههههههههههه أنا آسف يا بابا اتفضل كمل.
كمال بتنهيدة : مش هينفع كده خليك في حالك لو سمحت.
سيف : هههههههههههه حاضر.
مليكة جايه بالشاي : اتفضلوا.
سيف بابتسامة : تسلم ايدك.
ويغمزلها.
مليكة مش فاهمه : ايه فيه ايه؟
سيف بهمس : بينا اقولك.
مليكة : سيف سيب ايدي.
سيف : بابا مندمج مع يوسف تعالي بس هقولك كلمتين.
مليكة : سيف اقعد بقى
يوسف عامل ايه معاك يا مستر؟
كمال : لا في تقدم ملحوظ يوسف شاطر وبيسمع الكلام.
يوسف : الألف طبق وتحته نقطة زي كده
صح يا جدو؟
نظر سيف لوالدة بابتسامة : معلش يا أستاذ كمال هيغلبك شويه.
يوسف : اه اه افتكرت دا واحد وفوقه مزه.
كمال نظر لسيف.
سيف : هههههههههههه
مزه ايه يا ابني هتودينا في داهيه اسمها همزة.. همزة يا حبيبي ركز علشان جدو بدأ يتعب منك.
يوسف : اوك اوك محدش يوشلش عليه.
سيف : يوشلش عليك
ههههههههههههه أنت مش عاوز مدرس لغة عربية أنت عاوز حداد يدق علي لسانك ده.
مليكة : بلاش تنمر بكره لسانه يتعدل.
سيف : ايوه بلاش تنمل وبعدين لجع اللعبة بتاعتي اللي اخدتها.
سيف : أنا اخدت منك لعبة؟!
يوسف : اه امبالح جيت اخدتها مني وقولت لما تصحى الصبح هتاخدها تلعب بيها.
سيف : حاضر بس كمل الحصة.
كمال : لا يكمل ايه طالما حضراتكم بتحضروا معاه الحصة هيركز ولا هيفهم حاجه؟!
سيف : هههههههههههه
ركز يا حبيبي في مستقبلك.
يوسف : اششش بقى محدش يوشلش عليه.
سيف : يا ابني اسمها يشوشر يعني الراء لام وقولنا ماشي بكره تتعدل كمان بتبدل الحروف!!
مهمتك هتكون صعبة يا أستاذ كمال أنا بنصحك تسيبه أنا هنزله حضانة يتكحرت هناك مع العيال يجي بيتكلم لبلب.
كمال :  يتكحرت!
هو دا اللي هتعلمه لـ ابنك؟!
يوسف : هو يعني ايه كحلت دي يا جدو؟
كمال : رد على ابنك.
سيف : دي يا حبيبي يعني تتمرمط شوية.
يوسف : ملمط!
مش عاوز ملمط أنا.
مليكة : هههههههههههه
سيف بهمس : اخيرًا الملكة بتاعتي ضحكتك.
مليكة : طب بس علشان باباك قاعد.
سيف : طب ما أنا بقولك تعالي اقولك كلمتين جوه مش عاوزه.
كمال وبيخبط على الطربيزة : ركز يا حبيبي
ركز يا ابني.
سيف : اهو بابا بدأ يتعصب ههههههههه
مليكة : نعمل ايه ما هو ابنك طالعلك.
سيف : ظالمه ابوه دا غلبان وشقيان ونفسه في شوية حنان هههههههههه
شعر بقول شعر ايه رأيك في البيت اللي مألفة حالا ده؟
مليكة : بقول تقوم تلبس علشان تنزل.
كمال يقفل الكراسة : كفاية كده النهاردا يلا يا سيف مش هتصلي الجُمعة؟
سيف : اه يا بابا حاضر هقوم اغير هدومي.
كمال : طيب أنا هسبقك على تحت.
يوسف : اجي معاك يا جدو.
كمال : تعالى.
سيف : ما بلاش يا بابا.
كمال : يوسف مؤدب وهيفضل قاعد جنبي مش كده يا يوسف؟
هز الصغير رأسه.
مليكة : خلاص تعالى يا يوسف اغيرلك هدومك.
_________
في شقة حازم.
ندى : رجعيه مكانه يا فريدة.
فريدة بدهشه : انتي بتقولي ايه يا ندى؟!
ندى : ايوه زي ما سمعتي كده بقول لك رجعي الجواب مكانه جوزك مش صغير.
فريدة : يا سلام يعني اسيبه يقرأ الكلام ده علشان هو مش صغير يا ندى؟!
ندى : ايوه
رجعيه مكانه وشوفي رد فعله ايه ما هو لازم يعرف الأمور وصلت لـ ايه وسبيه هو يتصرف.
فريدة : مش مقتنعه بكلامك دا يا ندى.
ندى : يا بنتي ما هو لما تخبي الجواب فكرك كده مش هتكتب غيره يعني ايه هتفضلي بقى تدوري في كل ورقة علشان تعرفي بتبعتله جوابات ولا لأ؟
سبيه يعرف الحقيقة علشان يتصرف وأنا متأكدة إنه هيتصرف بعقل جوزك مش صغير يا فريدة لازم تكوني واثقه فيه أكتر من كده.
فريدة : واثقه فيه لكن يا ندى المغريات كتيره والفتنه دي مش سهله بنت صغيرة تحبه ممكن نفسه تـ.....
وسكتت فريدة مقدرتش تكمل.
ندى : معاكي بس اعتبري دا اختبار ليه وشوفي هيعمل ايه.
فريدة : لا أنا بفكر اروح اواجهها.
ندى : لأ تبقي غلطانه سيبي جوزك يتصرف اسمعي مني بس.
فريدة : مش هتنزلي معايا نساعد مامتك؟
ندى : ما أنا كنت نازله قبل ما تيجي يلا بينا ومتشغليش بالك بالحوار ده واسمعي الكلام اللي قولتهولك.
فريدة : حاضر.
_________
ترن ياسمين جرس الباب.
تفتح ليلى وهي هاريه نفسها من العياط.
ياسمين ' ايه يا ليلى مالك؟
ليلى بتبكي: يزيد مش عاوز ينام من بالليل وانا رايحه جايه بيه كده لما خلاص هموت وانام.
ياسمين : هههههههههههه يا شيخه خضتيني.
ليلى : ودي حاجه سهله يا ياسمين؟!
ياسمين : على الأقل مش حاجه تقلق يعني كل العيال كده هاتيه بس يمكن عنده مغص ولا حاجه هاتي الدوا من جوه.
ليلى : خلصان.
ياسمين : خلصان ايه هو لحق يخلصه يا ليلى انتي بتهزري.
ليلى : بكلمك بجد خلصان.
ياسمين : انتي ادتيه الازازة كلها؟!
ليلى : دي صغيرة قد كده.
ياسمين : يا حبيبي يا ابني اوعي كده ماتلمسيش الواد انتي أم انتي؟!
ليلى : امال اعمل ايه ما هو عمال يعيط شبعان ومغير وعامله ليه جو يخليه غصب عنه ينام وبرضه مش عاوز ينام.
ياسمين : غلط كده وشادي كان فين وانتي عماله تديه في الدوا لحد ما خلصتي الازازة؟
ليلى : هو مضر بجد يا ياسمين ولا ايه؟ قلقتيني.
ياسمين : متعمليش كده تاني التزمي باللي مكتوب على العلبة أو زي ما قالك الدكتور ونيميه كده شايفه؟
ليلى : حاضر...دا نام يا ياسمين!
ياسمين : امااال دا أنا خبرة يا بنتي هههههههه
وسعي بقى اما انيمه جوه.
ليلى : هاتيه أنا هدخله ينام.
ياسمين : لأ علشان ميصحاش وسعي بقى.
ليلى بابتسامة : اتفضلي.
___________
في فيلا مراد.
هشام نازل من فوق ومعاه أمل وزينة.
هشام : فين مراد يا نور؟
نورهان : خرج.
أمل : خرج راح فين؟
نورهان : راح يجيب حقك.
أمل : يجيب حقي من مين؟
هشام : مراد خرج راح للراجل ده؟
نورهان : ايوه.. أنا قولت له كل حاجه فلاقيته خارج بسرعة مستناش حتى اسأله رايح فين بس أنا فهمت لوحدي.
أمل : هشام روح إلحقه ليتهور ولا الراجل ده يعمل فيه حاجه.
نورهان : متخافيش سيبي ابنك يتصرف خلينا نشوف هيطلع راجل ويجيب حقك ولا لأ.
أمل : انتي مجنونه يعني رايحه تقولي له على اللي حصل وتولعيها يا نور علشان يروح يتخانق معاه والراجل دا يعمل فيه حاجه انتي كده هتبقي مبسوطه يعني؟!
نورهان : هو بعيداً يعني عن طولة لسانك بس ايوه هبقى مبسوطه يا أمل لما يروح وياخد بحقك ويعرفه مقامه متخافيش عليه.
أمل : هشام اتصرف أنت هتفضل واقف كده ولا اروح أنا أشوف ابني راح فين.
هشام : حاضر يا أمل ثواني بس اشوفه فين؟