#أنت_قلبي٤
____________
الحلقة ١١
تحت في الصيدلية.
قاعد كريم مع علاء وحازم.
علاء : من يوم ما جه قعد في البيت وهو عامل لنا صداع معرفش عاوز ايه دا غير إنه قاهر مامته الود ودي اطلع اضربه دلوقت بس اضرب ايه دا مبقاش عيل صغير يتضرب.
حازم : ما أنا قادر اطلع اكسره دلوقت بس ندى اللي حايشاني عنه.
كريم : طب ما طنط تقعد معاك يا حازم وسيبوا له الشقة بدل المشاكل دي طالما مش مريح حد.
علي جاي عليهم : هو مين اللي مش مريح حد يا دكتور؟
حازم : علي احترم نفسك وأنت بتكلم اللي أكبر منك.
علي : صحيح أكبر مني بس مين اللي اداله الحق إنه يغلط فيه؟!
علاء : محدش غلط فيك يا علي.
كريم :"خلاص يا علاء حقك عليه يا علي لو كنت غلطت فيك.
علي : مش عيب يا دكتور علاء تكون راجل كبير كده وتكدب؟!
علاء : لا دا أنت عيل قليل الأدب بقى.
علي : احترم نفسك.
حازم : أنت يالا اللي تحترم نفسك مالك كده طايح في الكل ومحدش هامك احنا لو اتفقنا عليك من بكرة هنرميك في الشارع.
علي : ليه هو دا مش بيتي زيكم ولا ايه؟!
كريم : خلاص يا حازم اهدا يا علاء واقعد استريح طلباتك ايه يا علي؟
علي : مليش طلبات سيبوني في حالي بس.
حازم : أنت يالا حد كلمك مش أنت اللي كل يوم والتاني تتخانق مع مامتك؟
علي : اديك قولت مامتي يعني احنا احرار مع بعض اطلع منها يا حازم.
حازم : لا دا أنت عيل قليل الادب.
وبيرفع حازم ايده علشان يضربه يوقف علاء وكريم ما بينهم.
بعد شوية.. في شقة أكرم.
كريم : حقك عليه يا طنط.
ميرفت : يا خبر يا كريم حقك عليه أنا يا ابني.
كريم : حق ايه بس علي أخويا الصغير وأنا مستحيل أزعل منه.
ندى : لا يا دكتور ليك حق تزعل وكلنا نزعل كمان.
فريدة : ما تيجي معانا يا طنط.
ندى : جرا ايه يا فريدة ايه اللي بتقوليه ده؟!
ميرفت : يا حبيبتي المشكلة مش في السكن ما الشقق كتير في البيت اديكي شايفه بس علي ابني اللي متغير.
ندى : متغير!
لا هو طول عمره كده بقى يا ماما.
كريم : طب ما تشتري نصيبه في الشقة يا طنط وهو يشتري بره.
ندى : لا هو مش عاوز نصيبه وبس يا دكتور هو عاوز الشقة كلها يعني ياخد نصيبي ونصيب ماما وميدفعش حاجه وأنا مستحيل اتنازل مش علشان الفلوس لأ لكن علي لو أمتلك الشقة ممكن يبيعها.
فريدة : يبيعها ايه بس يا ندى؟
ندى : انتي مش مصدقه؟ دا أخويا وأنا عارفاه علشان كده نصيبي مش هتنازل عنه.
ميرفت : براحتك يا بنتي دا حقك.
كريم : طب محتاجه حاجه يا طنط؟
ميرفت : لا يا ابني سلامتك.
كريم : يلا يا فريدة.
فريدة : يلا يا كريم.
كريم لندى : لو في حاجه كلميني أو كلمي فريدة.
ندى : حاضر يا دكتور متشكرين جدًا وآسفين تعبناك معانا.
كريم : تعب ايه بس هو أنا عملت حاجه؟
ندى : أقل ما فيها إنك استحملت رزالة أخويا.
كريم : ما هو اخويا برضو ولازم استحمله.. سلام عليكم.
يرددوا : وعليكم السلام.
نزلت فريدة مع كريم اللي وقف شويه مع علاء وبعدها وصل فريدة البيت ورجع المستشفى.
________
في عيادة طبيبة النساء.
الطبيبة بعد ما اطلعت على التحاليل وشافت الأشعة : مش قولتلك من بدري تعملي التحليل والاشاعات دي يا مدام هنادي؟!
هنادي : اديني عملتها يا دكتور فيها ايه بقى؟
داليا : طمنينا يا دكتور.
الطبيبة : للأسف اللي كنت شاكه فيه التحاليل اللي قدامي أكدته.
هنادي : اللي هو ايه بقى مش فاهمه؟
الطبيبة : شوفي يا مدام يا هنادي احنا الأول هنمشي على الدوا ده كمرحلة أولى بعد كده نشوف لو احتاجنا عملية هنعملها.
داليا : عملية ايه يا دكتور؟
الطبيبة نظرت لهنادي وهي بتتكلم : مدام هنادي
عندها شوية مشاكل في الرحم لو قدرنا بالعلاج نتغلب عليها يبقى كويس بس المشكلة متكبرش أكتر من كده وتنتشر.
هنادي : مشكلة ايه دي؟
الطبيبة بتشرح لهنادي الحالة بالظبط وضعها ايه وإنها هتحتاج علاج ولازم تتحجز في المستشفى لفترة معينة وإن أي إهمال هيضر بصحتها أكتر.
أنت تقرأ
أنت قلبي الجزء الثالث
Lobisomem(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
