أنت قلبي الجزء الثالث

الحلقة ٧٩

#انت_قلبي٣
__________
الحلقة ٧٩

شهد : تعالى يا حبيبي شوف ابنك وخطيبته.
علاء : حصل ايه يا شهد قلقتيني ؟
كريم خارج من جوه : محصلش حاجه يا بابا.
شهد : لا حصل وبلاش كذب بس الحق مش عليك الحق على الهانم اللي وافقت على كده وتلاقيها كمان هي اللي اتصلت بيك علشان تروح تجيبها من الجامعة اه ما هو دا اخرة البيت اللي مفيهوش راجل.
علاء : أنا كده فهمت.. اولا عيب الكلام اللي قولتيه ده بيت ايه اللي مفيهوش راجل امال احنا ايه
وبعدين متعرفيش تنصحي غير بالاسلوب المقزز ده عرفتي اللي يصح واللي ميصحش ومعرفتيش إن الغيبه والنميمه واتهام الناس بالباطل دا أكبر من اللي ضايقك من ابنك وخطيبته وجايبه اللوم عليها هي ليه هو ابنك مش راجل وعارف الصح من الغلط هو كمان ولا ايه؟!
شهد : يعني أنا اللي غلطانه
ايوه قول كده بقى هو أنت عمرك تغلط حد من أهلك المهم إن شهد هي اللي تطلع غلطانه دايمًا.
علاء : ممكن حضرتك تحترمي وجودي وتسبيني اكلم ابني براحتي من غير ما تقاطعيني
شهد : ما تكلمه هو أنا ماسكه فيك؟!
علاء : أنت ايه اللي خلاك تروح الجامعة وتجيب خطيبتك من هناك؟
كريم : وفيها ايه يا بابا مش بدل ما تركب مع حد غريب؟
__________
في شقة حازم.
ندى : فيه ايه انطقي؟
تالا : مفيش حاجه يا ماما؟
ندى :انتي يا بنتي مش لسه فاتحه الباب وداخله
وبعدها اسمع شهد بتزعق ها بتزعق ليه بقى؟
تالا : طب وانا مالي؟
ندى : وانتي مالك ازاي أنا سامعه وهي بتكلمك بتقول جايين مع بعض
قابلتي كريم فين تحت ولا جايين منين انطقي؟
تالا دخلت جوه فدخلت ندى وراها وهي متعصبه.
ندى : أنا مش بكلمك مش توقفي لما اخلص كلامي.
تالا : معلش يا ماما أنا راجعه تعبانه ومحتاجه استريح.
ندى : تعبانه من ايه هو انتي بتروحي الجامعة تشتغلي هناك وبعدين تعالي هنا قوليلي جايه مع كريم منين يا تالا ومن غير كدب علشان انتي عارفه إني بفهمك وبعرف إن كنتي بتكدبي ولا لأ.
تالا : كريم عدى عليه في الجامعة وطلب يوصلني.
ندى : وركبتي معاه؟!
تالا : ايوه.
ندى : وقعتك مهببه مين قالك تعملي كده وانتي كلمتيني وعرفتيني ينفع يوصلك ولا لأ؟
تالا : بصراحة أنا لاقيت إنه يوصلني احسن ما اركب مع سواق معرفوش.
ندى : ليه يا حبييتي وفين صحابك اللي بتنزلوا وترجعوا مع بعض كل يوم؟
تالا : خرجت من الإمتحان ملقتش حد كلهم مشيوا اعمل ايه أنا بقى اركب لوحدي؟!
ندى : لا تكلمي اخوكي يجي ياخدك متركبيش مع خطيبك وتكدبي عليه إن دا حصل بالصدفه يعني صحابك يمشوا ويسيبوكي
النهاردا بالذات جه بالصدفه و بالصدفه برضه لاقيتي كريم في وشك فطلب منك يوصلك وانتي طبعا شوفتي إنه أولى من الغريب شوفي ازاي اما قصة مقنعه بصحيح.
تالا : ايوه كل دا حصل من غير أي ترتيب.
ندى : ماشي يا تالا همشي معاكي للأخر وهعتبر مفيش ترتيب لـ أي حاجه من دي توافقي بقى ليه إنك تركبي معاه؟
تالا : يا ماما مش معنى إننا لما نكون مع بعض لوحدنا إن هيحصل حاجه وحشه.
ندى : لا يا شيخه اقتنعت أنا كده وبعدين أنا دلوقت مبتكلمش في الحوار ده أنا بسألك ركبتي معاه العربية ليه انطقي علشان أعصابك بدأت تفلت مني وهتشوفي وش تاني خالص.
_________
في فيلا آسر.
مجدي : علي يا على.. أخيراً هتتجوز وتحل عننا بقى.
علي : يا سلام اللي يسمعك كده يقول إني مضيق على البيت.
مجدي : لا بس فرصة بقى إني أدلع شويه ما هو مش هيبقى في غيري ولو إنك هتقطع بيه.
علي : هههههههههههه يا عيني يا ابني.
مجدي : ايه صعبان عليك؟
علي : قوي.
مجدي : ما تبطل بقى.
علي : مش أنت اللي ابتديت استحمل بقى ومتعيطش.
مجدي : هي الأمور اتغيرت بعد كتب الكتاب؟
علي : مش فاهم تقصد ايه؟
مجدي : يعني بقيتوا بحريتكم أكتر ايه اللي مش مفهوم في سؤالي عاوز افهم؟
علي : لا أنت كده مش عاوز تفهم أنت عاوز قطم رقبتك.
مجدي : هههههههههههه ليه بس كده؟
علي : يعني أنت متخيل إن الحاجات دي اصلا هتكلم معاك فيها ارجع اوضتك يا مجدي.
مجدي : ما هو أنا هروح اعمل ايه في اوضتي لو كلمت زينة كلامها معايا رسمي قوي وبتخنق بصراحه.
علي : امال أنت عاوز ايه؟!
مجدي : لأ دماغك متروحش لبعيد بس هو يعني فترة الخطوبة دي مبيكونش فيها حب ومشاعر وكلام كده رومانسي علشان اعرف منها إنها بتحبني.
علي : الحب أفعال مش كلام وخصوصًا في فترة الخطوبة لو قضتوها كلام
الشيطان هيحلي الحوار دا قوي في عينك والموضوع مش هيوقف عند النقطة دي وبس ما هو لازم تكمل
وأنت عارف النهاية هتكون ايه.
مجدي : ما هو لا كده ولا كده يعني الوسط حلو.
علي : في أمور لازم تتأجل لوقتها علشان تحس بحلاوتها.
مجدي : يعني عاوز تفهمني إنك ولا مرة كده فكرت هاه..أكيد فاهمني.
علي : هنكر يعني بس في كل مرة كان الباب بيتقفل قدامي ووقتها كنت بزعل قوي لكن أنا مستريح دلوقت إن وصلت للمرحلة دي من غير أي غلط علشان صدقني الغلطة اللي ممكن تحصل دي هتخليك ندمان العمر كله وكل اما تفتكرها تعكنن عليك حتى لو كنت طاير من السعادة الحلال حلو
وحلاوته بتدوم اما الحرام متعته في لحظتها لكن الندم والألم اللي بيجي بعده بيستمر العمر كله أنا مش هقولك إني ماشي صح في كل حاجه
بس الفترة دي استفدت منها كتير ودا اختبار كبير اتحطيت فيه حاول تجاهد نفسك وتنجح في ده.
مجدي : تلات سنين كتير قوي.
علي : معلش اتحمل واصبر واتلهي بالمذاكرة والشغل علشان دا مستقبلك ودا اللي بيه هتعرف تفتح بيت.
مجدي : حاسس إني بكلم جدي مش اخويا.
علي : لو مش جاي على هواك براحتك اتفضل بقى علشان تعبان ومحتاج أنام.
مجدي : بتطردني بالذوق يعني.. اوك بس خليك فاكرها.. مش عارف لما تتجوز هتعمل فينا ايه إذا كان دلوقت مش عارفين نكلمك.
علي : هههههههههههه
__________
في التليفون 📞
فريدة : خلاص علشان خاطري اهدي يا ندى متعيطيش.
ندى : نرفزتني يا فريدة.
فريدة : تقومي تضربيها اخص عليكي يا ندى معقول كلمتين قالتهم يخلوكي تعملي كده.
ندى : انتي مش عارفه بس الكلام اللي بيتقال دلوقت عني أنا وبنتي شهد ما بتصدق تشبط في حاجه وتلاقيها عماله تقولك تقول وتعيد بس الغلط عندي أنا إني معرفتش اربي بنتي بفكر اقوم دلوقت ارجعلهم الحاجه بتاعتهم.
فريدة : ما تهدي بقى.. هي اه غلطانه بس انتي عملتي ايه عالجتي الغلط بغلط أكبر هي فاهمه إن دا عادي كريم يعتبر ابن عمها ومتريبين مع بعض وخطيبها وشايفه الأمور طبيعية.
ندى : طبيعية ازاي بس يا فريدة هي عارفه الصح من الغلط بدليل بتقولي أنا قولتله ينزلني بعيد عن البيت بس هو مسمعش الكلام وقال ايه خاف ينزلها على أول الشارع حد يضايقها دا على اساس يعني إن كلام مامته ولا لما شدته ودخلته جوه قدامها مضايقهاش.
فريدة : متنسيش إننا كنا برضه بنغلط واحنا قدهم يا ندى.
ندى : ماشي يا فريدة غلطنا ومحدش معصوم من الغلط بس لو اهالينا وقتها لو كانت عرفت كان اللي هيحصل؟
فريدة : هيعملوا زيك كده
اقعدي اتكلمي مع بنتك وفهميها بالراحة ليه مينفعش تركب العربية مع خطيبها وهما لوحدهم حتى لو واثقه فيه وهي واثقه من نفسها بصراحه أنا بالذات منفعش للمهمة دي.
ندى : ليه بقى؟
فريدة : بلاش نقلب في الماضي.
ندى : كنا بنتعامل بحسن نيه بس خلاص فهمنا إن حسن النيه لوحده مش كفاية.
فريدة : بصراحه أنا نفسي حتى حاسه إني متناقضه مع نفسي ازاي بنكر حاجه كنت بعملها زمان.
ندى : بس كنتي عارفه إنها غلط صح مش بتبرري لنفسك زي ما المفعوصه بتاعتي بتتكلم وترد عليه تقول كل واحدة من صحابتي مشيت مع خطيبها ولا اللي بيحبها وفضلت أنا لوحدي كأن دا عادي يعني.
فريدة : المفعوصه دي عروسة دلوقت يا ندى مش واخده بالك ولا ايه
وبعدين بلاش تضربيها وانصحيها تحافظ على نفسها ومتسمحش لحد يضايقها بكلمة ولا بنظرة.
ندى : ما هو علشان عارفه إن اللي بتعمله غلط مقدرتش تكلم الولد لما بصلها هي والأستاذ خطيبها.
فريدة : معلش متزعليش نفسك وصالحيها وبلاش اللي حصل دا يتكرر تاني
علشان الحاجات دي مبتتنسيش أنا لسه فاكرة العلقه اللي اخدتها من بابا يوم فرحك.
ندى : ياااه يا فريدة لسه فاكرة؟
فريدة : دي حاجه متتنسيش يا ندى دا أنا كنت هموت واللي وجعني أكتر لما كنت في بيت واحد مع كريم ومكانش قادر يطلع يطمن عليه علشان بابا كان محرج عليه يدخل عندنا.
ندى : انسي بقى دا الموضوع دا داخله على أكتر من خمسة وعشرين ميبقاش قلب اسود بقى.
فريدة : طيب صالحي بنتك وانصحيها بالراحة بلاش العنف اللي كانوا بيتعاملوا معانا بيه ده.
ندى : على فكرة محدش اتدلع زيك بس انتي بتنسي.
فريدة : منكرش إني اتدلعت كتير من بابا بس جه في الأخر كده معرفش حصل دا ازاي.
ندى : إيهاب دخل حياتنا بوظ حاجات كتير.
فريدة : عندك حق.. بس خلاص مش عاوزه افتكر أكتر من كده.
ندى : مش انتي اللي فاتحه الحوار ده قفلي عليه بقى وروحي شوفي وراكي ايه وسبيني أنا بقى اصالحها ولا اشوف هعمل معاها ايه.
فريدة : تمام... سلام.
_______
في المطعم الجديد.
ياسمين : ها ايه رأيك يا مليكة؟
مليكة : يجنن يا سمسمه على كده بقى هنيجي ناكل عندك كل يوم ببلاش؟
ياسمين : هههههههههههه من عينيه.
مليكة ' هههههههه بهزر معاكي اظن انتي عارفه لإن كان زمانك خرجتيني بره دلوقت.
ياسمين : هههههههههههه المكان مكانك يا مليكة
تعالي في أي وقت.
مليكة : بصراحة الفكرة حلوة وعجبتني وكويس إنك عرفتي تحددي انتي شاطرة في ايه وتستغلي موهبتك في الطبخ وتشتغلي عليها.
ياسمين : عاوزه اقولك إن ماما معترضه وبتقولي هتقلي من قيمتك وجوزك مش هيشوفك غير طباخه وبس.
مليكة : ياريت أنا كنت شاطرة في المطبخ كان زمان حاجات كتير اتغيرت وعلاقتي بسيف بقت أقوى.
ياسمين : هههههههههههه
حاسه بيكي طب ما اقولك تعالي خُدي كورسات في الطبخ وانتي تبقي بريمو.
مليكة : ويوسف اسيبه لمين والمذاكرة اعمل فيها ايه وسيف بقى يتخانق معايا.
ياسمين : يتخانق ليه هو انتي مش هتتعلمي علشانه.
مليكة : لا كده أنا كويسه وتمام وزي الفل واهي ماشيه عمو كمال بيساعدني وبدأت اهو اعرف شوية تريكات
كده في الطبخ حسنت من مستوايا شويه.
ياسمين : طب كويس يجي منك اهوه.
مليكة : هههههههههههه يعني.
ياسمين : طب اقعدي بقى الأكل زمانه جاي.
مليكة : لا أنا لازم امشي يوسف زمانه راجع من الحضانة وعنده درس عاوزه اراجعله.
ياسمين : يوسف عنده درس!
ودا بياخد درس عند مين؟!
مليكة : عند جدو وأنا مش عاوزه ازعله بصراحة لإن يوسف مطلع عينا كلنا.
ياسمين : هههههههههههه
الأستاذ كمال يا عيني هيطفش منك انتي وابنك
أنا فاكرة لما كان بيشرحلنا يقعد يتكرر المعلومة كتير
ويقولنا اللي مش فاهم يقولي وأنا أفهمه تاني بصراحة كان عنده ضمير جدًا في الشرح مفيش حاجه اسمها فهمت فهمت مفهمتش عنك ما فهمت.
مليكة : فعلاً كل اللي اخد عنده دروس قال الكلام ده بس أنا بقى مكونتش من الناس اللي نالت الشرف ده.
ياسمين : هههههههههههه اديكي قاعدة في بيته شخصيًا اتعلمي بقى.
مليكة : بصراحة أنا باخد يوسف واقعد بعيد اشرحله كده بدماغي على حسب ما درست ولو جه قعد جنبي يشوفني بذاكرله ازاي بسكت خالص منطقش.
ياسمين : هههههههههههه
مليكة : يكمل هو بقى.
ياسمين : وابنك ده بياخد دروس ايه بتاع كيجي ده؟!
مليكة : هههههههههههه
اسكتي دا بياخد حاجات كتير قوي واحنا في سنه مكوناش بناخد كل ده.
ياسمين : اهو الأكل وصل
اقعدي بقى وخُدي راحتك دا مطعمك.
مليكة : استني رايحه فين هو انتي اللي عامله كل الأكل ده؟
ياسمين : لأ طبعاً أنا بشرف بس بقولهم على الطريقة بتاعتي وهما يعملوا.
مليكة : هههههههههههه اه بحسب علشان كده استغربت اقعدي معايا.
ياسمين : حاضر وادي قعدة يلا بألف هنا وشفا.
________
بعد ١٢ يوم وتحديدًا يوم فرح علي ورُقية.
في الصباح.. في التليفون📞
كريم : انتي فين يا فريدة؟
فريدة : حاضر يا كريم جايه.
كريم : عارفه إني بقالي ساعة قاعد في المدرسة مستني تيجي ومعايا الناس مش عارف اقولهم ايه ما هو لو المصلحة دي ممكن تخلص من غيرك كنت خلصتها.
فريدة : يا سلام!
كريم : فريدة تعالي امضي على الأوراق خلينا نخلص.
فريدة : حاضر يا كريم جايه بقولك اهو عديت الإشارة اللي قبل الكوبري على طول وداخله عليك اهوه.
كريم : توصلي بالسلامة.. اخيرًا.
فريدة بابتسامة : هدي أعصابك يا كيمو مش كده.
كريم : أنا لسه هرجع المستشفى عاوزني ضروري ولسه هروح أحلق شعري قوليلي البدلة جات؟
فريدة : ايوه واستلمتها بنفسي عقبال البدلة اللي هتلبسها في فرح ولادنا يا كيمو.
كريم : انتي كل دا ولسه في العربية يا فريدة وتقوليلي خرجت من الإشارة!
فريدة : اعمل ايه بس الطريق زحمة افضل كده سربعني علشان اعمل حادثة.
كريم : بعد الشر عليكي يا حبيبتي تعالي بقى.
فريدة : أنا وصلت اهوه هركن العربية بس واجيلك.
كريم : البوابة مفتوحة ادخلي.
فريدة بابتسامة : اه صحيح شوفتها مفتوحه
سلام.
بتدخل جوه وتركن العربية كان كريم واقف مستنيها.
كريم : يلا بسرعة.
فريدة : هقع على وشي بالراحة طيب.
كريم : يلا معنديش وقت.
فريدة : اعمل فيك ايه بس مسربعني كده على طول.
كريم : بقالك ساعة تقولي جايه في الطريق ودلوقت مسربعك!
____________
في شركة مراد.
شادي : لا دي غلطة مطبعية.
هشام : طب حاول تصلحها غلطة زي دي تكلفنا كتير.
شادي : حضرتك عندك حق.
هشام : تكون موجود اثناء الإجتماع مش زي المرة اللي فاتت.
شادي : ما أنا استأذنت من حضرتك.
هشام : خلاص حصل خير.