أنت قلبي الجزء الثالث

الحلقة ٦٤

#انت_قلبي٣
_________
الحلقة ٦٤

في شقة ياسين الجديدة.
فريدة : شوفي كده ياياسمين.
ياسمينا : حلو اللون ده.
فريدة العروسة : بس انا مقولتش بينك أنا قولت يدهن اوضة الأطفال اوف وايت.
ياسمينا : طب ودي لما تتدهن بيج علشان مبحبش الانجليزي بتاعكم ده هو ايه اللي بينك واوف وايت ما تقولي بمبي وبيج يا اختي ولا مش هنفهم كده
شوفي يا حبيبة قلبي اوضة الأطفال بمبي حلو اهو ماله جميل والريسبشن بيج.
فريدة : سبيها تختار براحتها يا ياسمين.
ياسمينا : ما هو دا لو مكانش الأوضة ادهنت هي مصاريف على الفاضي.
ياسين طالع بالأكل
وبابتسامة : اللي فريدة عاوزاه أنا هعمله المهم تكون مبسوطه.
ياسمينا توقف بينهم : ايييه عينك بتبص فين؟
فريدة : هههههههههههه
ياسمينا : بتضحكي!!
وتهمس لفريدة : لمي ابن اختك احسنلكم انتو الاتنين.
فريدة : هههههههههههه
ياسمينا : مسخسخه انتي من الضحك ما هو لو بنتك كنتي لطشتيه بالقلم دلوقت.
فريدة : اخص عليكي يا سمسمه وهو في فرق برضه ما هو فريدة بنتي.. ياسين تعالى هنا.
ياسين : نعم يا خالتو.
فريدة : جيبت اللي قولت لك عليه؟
ياسين : ايوه.
فريدة : طب جهز السفرة عقبال ما اغسل ايدي تعالي يا ياسمين.
ياسمينا تمسك بـ ايد بنتها : تعالي معايا.
فريدة الصغيرة : حاضر يا ماما بس سيبي ايدي بتوجعيني.
ياسين يشاور لفريدة.
ياسمينا : يلا معايا..

على السفرة.
فريدة : البيت بيتك يا ياسمين خُدي راحتك وانتي كمان يا فريدة.
ياسمينا : انتي هتستهبلي ما هو بيتها فعلا أنا وانتي اللي ضيوف.
ياسين : حضرتك وخالتو أصحاب البيت يا طنط.
ياسمينا : تسلم وتعيش
بت يا فريدة.
فريدة : ايه مش فاضيه.
ياسمينا : طبعًا عماله تُلغي هتفضيلي ازاي.
فريدة : عاوزه ايه؟
ياسمينا ' ولا حاجه.
فريدة : يا سلام على رخامتك يا شيخه.
ياسمينا : هههههههههههه
وبعدها تلمح ياسين بيعزم على خطيبته : استنى وقف عندك بتعمل ايه؟
ياسين : أصل فريدة مش قدامها جمبري فقولت اقربه منها.
ياسمينا : أنا هديها كُل أنت بس علشان منعطلكش مش نازل برضه رايح تجيب بتاع الستاير علشان ياخد المقاسات؟
ياسين : ايوه.
ياسمينا : طب كُل ومتشغلش بالك بفريدة أنا فطماها من زمان وبتاكل لوحدها.
تخبطها فريدة برجلها.
ياسمينا ببتألم : آيييي.
فريدة : متبقيش حشريه كده.
ياسمينا : حشريه دا ايه يا حبيبتي لا اركب ارايل احسن مش كده؟
فريدة : انتي بتجيبي المصطلحات الغريبه دي منين؟
ياسمينا : لا يا شيخه مثلي بقى مثلي.
فريدة : هههههههههههه
بطلي رغي وخلينا نعرف نبلع اللقمه.
ياسمينا : لُغي يا اختي لُغي.
فريدة : هههههههههههه
_______
في شقة كمال ونادين.
على السفرة وكمال خارج من المطبخ وفي ايده صنية السمك.
سيف يفضي مكان بسرعة علشان كمال ينزل بصنية السمك.
سيف : امممم ريحتها تجنن قالبه العمارة كلها.
كمال : هههههههههههه
سيف : فكرتنا بـ أيام زمان يا أستاذ كمال.
كمال : يلا دوق وقول لي رأيك يلا يا مليكة هاتي يوسف وتعالي.
مليكة خارجه من جوه : يوسف نام.
كمال : طب هو أكل؟
مليكة : اه أكلته أول ما الأكل خلص.
كمال : بس مداقش من السمك ده لما يصحى بقى.
سيف : منيماه دلوقت ليه
كده مش هينام بالليل.
كمال : لا متقلقش هينام بعد الحصص أكيد.
سيف : حصص ايه هو حضرته راح المدرسة من ورايا ولا ايه؟!
كمال : لأ أنا اللي قدمتله في المدرسة هنا في البيت.
سيف : هههههههههههه كان قلبي حاسس إن حضرتك هتعمل كده أول ما يكبر بس لسه صغير يا بابا على مسك القلم.
كمال : لا بعلمه بس في الأول ينطق الحروف صح ويميز شكل كل حرف.
سيف : لا كده بقى اطمن على مستقبله.
كمال بابتسامة : طب كُل يلا مبتاكليش ليه يا مليكة؟
مليكة : باكل اهو يا عمي.
يحط الطبق قدامها.
مليكة : أنا هاكل كل ده؟
كمال : كُلي اللي تاكليه المهم متقوميش غير وانتي شبعانه.
سيف : بصراحه السمك طعمه خطير.
مليكة : تسلم ايدك يا عمي.
كمال بابتسامة : بألف هنا وشفا.
_____________
في المستشفى..كريم يتصل بفريدة.
في التليفون 📞
كريم : لسه عندك يا فريدة؟
فريدة : لا مروحه اهو يا كريم.
كريم ينظر في الساعة
وبتنهيدة : طبعًا كل ده وسايبه جميلة عند ندى.
فريدة : هو أنا يعني خارجه من غير ما اقولك يا كريم.
كريم : خلاص يا فريدة روحي هاتيها علشان تروحوا يلا.
فريدة : فيه ايه بتكلمني كده ليه؟
كريم : يا حبيبتي مينفعش كده من الصبح لحد دلوقت وانتي بره البيت وسايبه بنتك عند ندى وانتي عارفه هي شقيه قد ايه.
فريدة : ما هي كانت في المدرسة كنت اخليها متروحش يعني؟!
كريم : ياريت اهو اهون ما تسبيها هناك لوحدها.
فريدة : اطمن تالا بتحبها وبتفضل معاها طول الوقت.
كريم : اوك روحي هاتيها بقى.
فريدة : حاضر بس فُكها بقى ولا عندك مشكلة في المستشفى هتطلعها عليه بقى.
كريم : لا مفيش حاجه مع السلامة.
فريدة : مع السلامة يا حبيبي.
بيقفل كريم مع فريدة ويقلب في الورق اللي قدامه يدخل الساعي بالقهوة ويجمع كريم الأوراق ويحطها في ملف.
كريم : لما اروح بقى هات يا عم يسري الواحد دماغه خلاص فصلت.
يسري : بعد الشر عليك يا دكتور اجيبلك حاجه للصداع؟
كريم : لا اخدت.
يسري : متكترش بقى علشان سمعت إن الحاجات دي غلط.
كريم بابتسامة : حاضر.
يسري : أنت عارف بعزك قد ايه.
كريم : وأنا كمان يا عم يسري عاوز تقول حاجه؟
يسري : يعني هو طلب كده مش عارف بقى وقتك يسمح بيه ولا لأ.
كريم : يا سلام ولو ميسمحش اخليه يسمح عادي هههههههه
قول لي فيه ايه؟
يسري يسلمه كارت دعوة لحضور فرح ابنه.
يسري : يعني لو تحضر الفرح هيبقى شرف كبير ليه.
كريم : دا شرف ليه أنا حاضر هجي هو يوم ايه؟
وبيقرا التاريخ اللي موجود في الكارت.
يسري : احنا عاملينه كده على الضيق بس هينور بحضورك.
كريم : متشكر وحاضر هبقى موجود في الميعاد بالظبط.
يسري : تسلم يادكتور وتعيش دا شرف ليه بعد اذنك.
كريم : اتفضل.
_________
في التليفون 📞
رُقية : طبعًا لما الدراسة بتبدأ محدش بيسمع صوتك.
علي : هههههههههههه طب اهدي بس ايه مالك داخله فيه شمال كده ليه؟
رُقية : هو أنت بتبقى فاكرني ولا مبجيش على بالك
يا علي؟
علي : طبعًا فاكرك ومبتغبيش عن بالي.
رُقية : مش باين.
علي : طب اعمل ايه علشان يبان؟
اقول لك بكره هجيلك.
رُقية : يا سلام ما هو معروف يعني بكره الجُمعة
ولازم هتيجي.
علي : طب اطلبي حاجه نفسك فيها وأنا اجيبها
أو اعملها على حسب انتي عاوزه ايه.
رُقية : مش عاوزه حاجه.
علي : خلاص بقى يا رُقية متزعليش هانت خلاص اهوه أنا عارف إن فترة الخطوبة طولت بس فات الكتير مبقاش إلا القليل وبكره نتجوز ونقعد مع بعض لحد ما تزهقتي مني خالص.
رُقية : أو تزهق مني.
علي : لا طبعًا مش هيحصل هاه كنتي بتعملي ايه؟
رُقية : كنت في المطبخ بجهز الأكل.
علي : بقيتي تدخلي المطبخ كتير اليومين دول.
رُقية : اديني بتعلم وبيني وبينك دخلت المطبخ من الزهق والفراغ اللي عندي.
علي : بس كويس اهو بتعملي حاجه مفيدة.
رُقية : هقفل معلش علشان مامي بتنادي.
علي : اوك مع السلامة على ميعادنا بكره هاه.
رُقية : تمام تيجي بالسلامة.
علي : هههههههههههه جاي من السفر ولا ايه؟!
رُقية : وبعدين بقى يا علي متكسفنيش.. تشرف وتنور كده كويس؟
علي : أي حاجه منك مقبوله.
رُقية : خلاص سلام مامي صوتها بدأ يعلى وأنا مش عاوزه اتضرب هتبقى أنت السبب.
علي : هههههههههههه لا خلاص روحي سلام.
رُقية : مع السلامة.
________
في التليفون 📞
أمل : تمام ازيك انتي يا سهر؟
سهر : أنا كويسه
أمل كنت عاوزه اتكلم معاكي في موضوع مهم.
أمل : اتفضلي.
سهر : مش هينفع في التليفون ومش عارفه مواعيدك ايه بعد ما بقيتي تروحي الدار.
أمل : ممكن تجيلي على هناك وبرضه برجع الساعة خمسة ممكن نتقابل عندي.
سهر : خلاص يبقى بكره بعد ما تروحي البيت بقى.
أمل : تمام وأنا في انتظارك.
تقفل أمل مع سهر وجايه نورهان تقعد جنبها.
نورهان : مش هتقولي لي بقى مالك من ساعة ما رجعتي من بره وانتي كده شكلك متغير حصل ايه؟
أمل سكتت بتنهيدة.
نورهان : ما تتكلمي يا أمل قلقتيني فيه ايه؟
أمل : هو في حاجات كتير بس هقولك على اللي ينفع تعرفيه.
نورهان : لا يا اختي احتفظي بيه لنفسك طالما الحكاية كده.
أمل : بقولك ايه يا نور أنا مش ناقصه.
نورهان : خلاص اتكلمي.
أمل : النهاردا لسه داخله المكتب لاقيت حماه مراد ابني.
نورهان : لاقيتيه فين؟
أمل : بقولك في المكتب.
نورهان : دا في الدار يعني ولا ايه؟
أمل : امال هنا يعني يا نور؟!
نورهان : ايوه جاي ليه؟
أمل : جاي يتبرع للدار بس أنا رفضت.
نورهان : ايه السبب.
أمل : اسلوبه مش كويس ومكانش ينفع اقبل تبرع منه.
نورهان : يعني ايه اسلوبه مش كويس؟
أمل : يعني بيلمح بكلام كده فيه غزل.
نورهان : غزل لمين بقى
وايه نوع الغزل ده بالظبط؟!
أمل : الكلام كان موجه ليه.
نورهان : نعم!!
أمل : ما هو علشان كده رفضت التبرع بتاعه.
نورهان : تبرع ايه يا حبيبتي
قولي لي هنا عملتي ايه بقى لما غازلك؟
أمل : طردته من المكتب.
نورهان : بس؟!
هو دا كل اللي عملتيه يا أمل؟
أمل : كنت أعمل إيه تاني يا نور؟
نورهان : نعم يا اختي وكمان مش عارفه تعملي ايه؟ حاضر يا أمل انا هقولك كنتي تعملي ايه
كنتي لطشتيه كام قلمك على وشه وخلعتي اللي في رجلك وادتيه بيه مش تقولي طردته لا يا شيخه هو دا اللي قدرتي عليه ولا خايفه على شعور البيه ابنك هو وخطيبته؟
أمل : لا يا نور خوفت على ابني.
نورهان : يتفلق يخبط دماغه في اتخنها حيطه يا حبيبتي اللي ميخافش على مامته يبقى ميستهلش اصلا إنك تخافي عليه.
أمل : مراد من يوم ما عرف الراجل دا وهو حاله مقلوب دا عامله غسيل مخ ومهما اتكلم ولا كأني بقول حاجه أنا مش عارفه اعمل ايه؟
نورهان : تقولي لهشام.
أمل : اقول لهشام ايه؟
نورهان : تقولي له على اللي حصل من الراجل دا النهاردا ولو مش هتقولي هروح أنا اقوله يا أمل.
أمل : استني بس بتعملي ايه؟
نورهان : انتي مش فاهمه ولا بتستعبطي عارفه لو مش عارفاكي يا أمل كويس كنت قولت إن الكلام جه على هواكي.
أمل : ايه اللي بتقوليه دا يا نور؟!
نورهان : ما أنا بقولك لو معرفكيش كويس كنت قولت كده الجوازة دي مش لازم تتم البنت دي متنفعش ابنك ولا العيله دي تشرفنا مراد لازم يسيبها ولازم كمان تقولي له على اللي حصل من حماه علشان يقتنع إن البنت دي مش مناسبة ليه.
أمل : فكرت في كده بس خايفه.
نورهان : بطلي عبط وهبل بقى خايفه من ايه ولا مستنيه ايه بعد كده المرة دي دخلتي لاقتيه في المكتب وقال اللي قاله المرة الجايه منعرفش هيعمل ايه.
أمل : ايه اللي بتقوليه دا يا نور؟
نورهان : بقول اللي متوقع يحصل يا أمل الراجل من دول يا حبيبتي بيجس نبض الست اللي قدامه بكلمة كده يشوف رد فعلها سكتت يبقى المرة الجايه ياخد خطوة أكبر ومرة في مرة ينول مراده لكن لو من اول مرة اخد على دماغه هيخاف وعمره ما يفكر يهوب حتى ناحية الشارع اللي ساكنه فيه
وحضرتك لو سكتي هيتمادى لإنه هيفهم إنك خوفتي تقولي لهشام فيبدأ يبتزك أكتر.
أمل :"كلامك معقول ومنطقي وعارفه إن دا اللي مفروض يحصل بس هشام متهور يا نور ومراد لو وقع مع الراجل دا معرفش هيرتبله ايه علشان ينتقم منه.
نورهان : حلوة هشام متهور دي!!
امال انتي فاهمه ايه
يعني مراتك راجل يتغزل فيها وهو مفروض يقعد يشرب حاجه ساقعه ميعملش أي حاجه؟!
أمل : لأ بس...
تقاطعها نورهان : لو متقوليش لهشام أنا اللي هقوله
يا أمل.
أمل : حاضر يا نور.
نورهان : ومراد كمان لازم يعرف.
أمل : طيب حاضر هقول لهم.
______
في شقة شادي.
عبد الرحمن : مش كده يا بابي شبهي؟
هاني : يعني بس اصل خُد بالك البيبي شكله بيتغير كتير يعني كل شهر هتلاقي له شبه.
شادي : دا حقيقي يزيد أول ما اتولد مكانش الشكل دا خالص.
ليلى جاية بالشاي والكيك.
ليلى : فاكر يا شادي قولت لك شبه مين وقتها اتفضل يا بابي اتفضل يا عبد الرحمن.
هاني : تسلم ايدك يا لوله.
شادي : ايوه فاكر كان شبه مراد اخويا بالظبط بس دلوقت قلب على هشام وجدو شويه.
هاني : تعرف معاك حق شبه جدك مراد حقيقي.
عبد الرحمن : ما أنا شبه جدو.
ليلى بتقعد وسطهم : شبه جدو ازاي يعني أنت مفكش حاجه خالص منه اللي شبه جدو حقيقي هو خالو هشام وكمان هشام ابن خالو.
شادي : حقيقي بابي وهشام اخويا اللي شبه جدو قوي.
ليلى : نويت بقى تستقر هنا ولا لسه عاوز تعيش بعيد عننا.
هاني : هتصدقي لو قولت لك إني تعبت ونفسي اقعد كده في بلدي واستريح بس لما عبد الرحمن يخلص دراسته.
شادي : أنت يا ابني لسه مخلصتش؟!
عبد الرحمن : فاضلي سنة واحدة وبعدها أقول وداعًا يا مذاكرة.
ليلى : طب هات يزيد بقى طالما نايم علشان انيمه
في سريره.
عبد الرحمن : اتفضلي.
___________
في فيلا كريم.
فريدة داخله المكتب بالقهوة.
فريدة :كريم.. كرييييم
هو راح فين؟
يقولي اعملي قهوة وبعدين يمشي معقوله خرج؟!
تحط القهوة على المكتب.
فريدة : كالعادة ورق في كل حته حتى اللي واقع على الأرض مشلوش من مكانه.
تنحي تلم الورق اللي على الأرض : مهمل جوزي دا قوي وايه دا كمان؟
بتشيل الورق وقع الجواب بتاخده من الأرض كان مفتوح ومكتوب عليه من بره (إلى من يهمه أمري).
فريدة : يعني ايه دا بقى؟!
بتحط الجواب مكانه وبعدها الفضول خلاها ترجع تاخد الجواب.
كريم بابتسامة : عملتي القهوة؟
تفزع فريدة وتبدأ تخبي اللي في ايدها تطبقه وتحطه في جيب الروب بتاعها.
كريم : فيه ايه يا فريدة مالك؟
فريدة ب ارتباك : هاه.. مفيش.
كريم : امال واقفه كده ليه؟
فريدة : لاقيت حضرتك موقع الورق دا في الأرض فشيلته اهوه على المكتب.
كريم : متشكر يا حبيبتي
دا محمد نادى عليه من بره فقومت بسرعه اشوفه عاوز ايه.
فريدة : وطبعًا وأنت خارج ايدك لطشت الورق وقعته وكسلت ترجعه مكانه.
كريم بابتسامة : كنت جاي اشيله ارجعه مكانه بس سبقتيني بقى اعمل ايه.
فريدة : اشرب القهوة.
كريم : رايحه فين؟
فريدة : هما الولاد بيعملوا ايه في الجو ده؟
كريم : بيلعبوا باسكت الجو حلو بره على فكرة لو عاوزه تقعدي في الجنينة شويه قبل ما تنامي.
فريدة : قدامك كتير؟
كريم : ساعة إلا ربع كده.
فريدة : يعني متمشيش ساعة؟
كريم : نخليها ساعة علشان خاطرك.
فريدة : أنت بتتلكك!
كريم : هههههههههههه
ما هو انتي اللي معطلاني.
فريدة : ماشي هخرج اما اشوف حجتك ايه.