أنت قلبي الجزء الثالث

الحلقة ٣٦

#انت_قلبي٣
___________
الحلقة ٣٦

في فيلا ماهر.
ماهر : بقولك فيه ايه يا سامية أول مرة رغد تيجي من برة متجريش عليا وتترمي في حضني
حصل ايه فهميني؟
سامية : محصلش حاجه أنت مكبر الموضوع ليه؟
ماهر : قولتي ايه للبنت خلتيها حاسه إني غريب عنها.
سامية : مقولتش حاجه فيه ايه مالك كل دا علشان محضنتكش؟!
ماهر : لأ مش دا بس السبب البنت نظراتها ليا غريبه كأنها عاوزه تقول حاجه بس مش قادرة تنطق أنا عارف رغد كويس قوي.
سامية : خلاص بقى دماغي مش قادرة سيبني أنام يا ماهر واطفي النور ده.

في التليفون 📞
مراد : ايه مالك زهقانه زي حالاتي؟
رغد بتبكي.
مراد : ايه دا فيه ايه مالك يا رغد انتي بتعيطي؟
رغد : حاسه إني بحلم حلم ايه دا كابوس.
مراد : طب فهميني طيب مالك حصل ايه طمنيني عليكي.
رغد : معلش يا مراد أنا مش قادرة اتكلم.
مراد : دا أنا كلمتك لما حسيت إني مخنوق ومحتاج حد اتكلم معاه ويفهمني.
رغد : معلش هقفل معاك لاني بجد مش قادرة أنا آسفة.
مراد : لا عادي متتأسفيش لإن واضح انك تعبانه ألف سلامة عليكي بس ممكن ابقى اكلمك بكرة اطمن عليكي؟
رغد : اوك.. سلام.
مراد : مع السلامة.

أمل : مراد انت لسه منمتش؟
مراد : لأ.
أمل تدخل الغرفة : منمتش ليه؟
مراد : علشان مش جيلي نوم.
أمل : كويس كده اللي حصل ده؟
مراد : لا مش كويس طبعا.
أمل : يا ابني انت بتصعب عليا أنت مستريح كده؟
مراد : مش مستريح بس كمان مش هتحبس في البيت.
أمل : مش أنا باخدك واروح معاك أي مكان تحبه.
مراد : مامي أنا مش صغير.
أمل : ما أنت متكسر اهو هتخرج لوحدك ازاي ومتقوليش صحابي علشان انا مش واثقه في ولا صاحب ليك ياريت بنختار صحاب كويسين لأ كلهم سلوكهم مش كويس.
مراد : مامي محدش كامل.
أمل : عارفه بس الصاحب التلفان اللي بيجر صاحبه للغلط دا نبعد عنه.
مراد : بس اللي كان معايا دا كويس واحنا على فكرة خرجنا واخدنا مركب في النيل.
أمل : حلو قوي ولما المركب دا كان يوقع بيك كنت هتخرج ازاي حضرتك؟
مراد : مركب ايه اللي يوقع يا مامي وبعدين ما انا كان معايا ناس مكونتش لوحدي يعني.
أمل : برضو اللي عملته دا غلط.
مراد : طب وهو ينفع بابي يوقعني كده على الأرض.
أمل : كويس إن دا بس اللي قدر يعمله.
مراد : ايه كان هيموتني زي ما قال؟!
أمل : يا ابني أنت دماغك دي ايه يعني كلنا كنا في المستشفى علشان مرات اخوك تعبانه وحضرتك زهقت فخرجت تتصرمح برة.
مراد : برضو اتصرمح أنا أموت نفسي واريحكم بقى.
أمل : بطل جنان واتفضل نام.
مراد : طب ممكن تطفي النور دا وتقفلي الباب؟
أمل : حاضر.. تصبح على خير.
__________
في فيلا آسر.
آسر : أنا كنت أتصور لما تحصل مشكلة بينك وبين بنتي تيجي كده تقولي يا عمي بنت حضرتك حصل منها كذا وكذا وأنا اسمع منها واشوف مين غلطان ولو ليك حق تأكد إنك هتاخده لكن إنك تطرد بنتي من الشقة وحتى متجبهاش لحد البيت لأ تيجي هي لوحدها تقعد عندي شهر بحاله معرفش ايه اللي حصل بينكم علشان اتفاجئ إنك طردتها من شقة باباك طب سيبها تروح شقتها ولا دا كمان مش من حقها.
سيف : عمي أنا مطردتش مليكة ومقدرش أعمل كده.
آسر : حصل لإن بنتي مبتكدبش وممكن اناديها تقول الكلام دا قدامك بس أنا مش هعمل كده وهعتبرك نفيك للي حصل دا كسوف من اللي عملته
لكن في النهاية أنت معتذرتش لأ وسايبها شهر كده بدون أي حاجه ايه بتفكر في ايه قولي علشان اساعدك تاخد القرار الصح.
سيف : أنا فعلا قولت الكلام اللي مليكة قالته لحضرتك بس صدقني مكانش بنية إنها تخرج هي جملة خرجت مني في وقت غضب حتى لما رجعت من بره كنت جاي اصالحها بس ملقتهاش في الشقة.
آسر : مشيت زي ما قولتلها امال كنت مفكر هترجع تلاقيها في البيت
وأنا مليش علاقة بنيتك أنا بحاسبك دلوقت على كلامك أنا بنتي لا بتهان ولا بتتكسر ولا حد بيذلها
وإن كان عندك شقة وفاكر علشان هي ملكك إنك في أي وقت مسموحلك ترميها في الشارع لإنها عندها بيت ولو عاوزه شقة اجيبلها بدلها اتنين وتلاته.
عُمر : أستاذ آسر ممكن بس أقول حاجه.
آسر : اتفضل يا بشمهندس بس اتمنى إنك تعذرني في الكلام اللي قولته واللي لسه هقوله اتفضل.
عُمر : طبعا أنا مقدر انفعالك ومعاك حق فيه وأنا عندي بنت متجوزه مجرد ما جوزها بس قالها اجهزي علشان اوصلك لبيت باباكي أنا زعلت.
آسر : شوفت زعلت علشان قالها أنا اوديكي
مش الباب يفوت جمل وتجيلك لوحدها منهاره ومكسوره.
عُمر : محدش يقدر يكسر بنت حضرتك وهي فوق دماغنا بس زي ما قال سيف كانت لحظة غضب وقال الكلمة ومكانش عامل حسابها.
آسر : تمام.. رجعت قالتله لو خرجت مش راجعه قالها مبتهددش قالتله كده علشان تفكره إنه غلط يحاول يلم الموضوع ويعتذر لأ حضرته معملش كده سابها وخرج ايه بقى منتظر منها ايه تاني وهي اللي كانت منتظره منه يطبطب عليها يقولها معلش مكانش قصدي تعبان شويه عندي مشاكل في الشغل معلش استحمليني ما كلنا بيجي لينا اوقات مبكونش طايقين نفسنا لكن منخربش البيت ونرجع نقول أصل مكانش قصدي.
عُمر : مفيش خراب ولا حاجه سيف هيعتذر لمراته قدام حضرتك دلوقت وياخد مراته وابنه ويرجعوا بيتهم.
آسر : بس مش دا اللي مليكة عاوزاه.
عُمر : اللي هتطلبه هيتنفذ مش كده يا سيف؟
سيف : اللي عاوزاه انا هعمله.
آسر : لا احترمت بنتي ولا احترمت الراجل اللي جيت طلبت ايد بنته
ولا عملت حساب لحد
شهر بحاله يا أخي طب ما فكرتش إن ليها أب اروح اكلمه واتفاهم معاه ولا خلاص فكرت ملهاش حد هترميها بقى وهترجعلك تاني بكل سهوله..
سيف : ممكن اتكلم مع حضرتك بصراحه يا عمي؟
آسر : اتفضل.
سيف : من الأسباب اللي خلتني متكلمش مع حضرتك خوفي انك توقف في صف مليكة حتى لو غلطانه.
آسر : تمام.. بس أنا مش هقف في غلط وانا عارفه إنه غلط يا سيف.
سيف : ايوه بس علشان بنتك هتقف في صفها.
آسر : جيت وكلمتني وقولتلي حصل منها واحد اتنين تلاته ولما واجهتها اعترفت وقالت فعلا دا حصل ورغم ده وقفت في صفها ضدك؟!
سيف : لأ ما أنا بقول لحضرتك علشان كده خوفت اتكلم.
آسر : طالما متكلمتش يبقى متلومنيش على احساسك ده أنا مبقفش في الغلط لكن كمان مش هسمح لحد يكسر بنتي ويوصلها للحالة اللي هي فيها دي لما أموت لو اخوتها موقفوش معاها و جابولها حقها ابقى بيع واشتري فيها براحتك.
عُمر : بعيد الشر عنك متقولش كده ومليكة كبيرة بحضرتك وبـ أخواتها ومحدش يقدر يكسرها لا سيف ولا غيره.
آسر : متشكر يا بشمهندس.