أنت قلبي الجزء الثالث

الحلقة ١٥١

#انت_قلبي٣
__________
الحلقة ١٥١

في فيلا مراد.
مراد لمجدي : مبروك.
مجدي : متشكر بس دي عاشر مرة تقولي مبروك ايه مش ناوي تهوينا؟
مراد : لأ أنا عاجبني القعدة هنا قوي.
وبيحط مراد رجل على رجل.
مجدي : بلاش غلاسه واتفضل قوم هو أنت مش اتجوزت عاوز مني ايه؟
مراد : هو أنت عاوزني أقوم ليه؟
مجدي : تفتكر ليه؟
مراد : أنا عارف بقى ما أنا مستني حضرتك تقولي.
زينة : أنتو بتقولوا ايه؟
مراد يقوم ويقعد في النصف بينهم.
مراد : مجدي عاوزني أقوم واسيبك يرضيكي كده يا زنزون؟
نظرت زينة بخجل لمجدي ومراد ومردتش.
مجدي : يا عم قوم روح لعروستك.
مراد : قاعدة مع مامتها وبعدين أنا عاجبني الحته دي قوي الجو هادي وطراوة كده عن بره.
مجدي يغمز لزينة.
تهز دماغها (بمعنى إنها مش هتقدر تقول لـ أخوها يمشي).
شادي معدي ينادي عليه.
مجدي : حلو اهو شادي عاوزك قوم بقى.
مراد : عاوز ايه يا شادي؟
شادي : تعالى عاوزك.
مراد بيقوم ومجدي بدأ ياخد نفسه وهو مرتاح.
مراد : أنا راجع تاني.. ها يا مجدي سامعني؟
مجدي يشاورله وهو مضايق منه : امشي بقى.
زينة : هههههههههههه
مجدي قرب منها : اخوكي دا غلس قوي.
زينة : يعني مش قوي أوقات بيكون دمه خفيف.
مجدي : بس أكيد في الوقت ده لما يغلس علينا كده ماسمهاش خفة دم ولا ايه؟
زينة : مش عارفه.
مجدي : زينة احنا اتجوزنا.
زينة بابتسامة وخجل : عارفه.
مجدي : أنا مش مصدق نفسي.
وقرب عاوز يطبع قُبله على خدها فتبعد.
مجدي : على فكرة احنا مكتوب كتابنا دلوقت.
زينة : مش هينفع يا مجدي وبعدين بابي ولا حد من اخواتي جه وشافنا هيبقى موقفي أنا ايه.
مجدي سكت بتنهيدة.
زينة حاولت تلطف الجو : ايه رأيك في الفستان؟
مجدي : حلو.
زينة : خلاص بقى فُكها شويه.
مجدي : أنا اللي عاوزك...
ولسه مكملش كلامه كان مراد جاي ناحيتهم.
مجدي : خير جاي ليه؟
مراد : جاي أقولكم إني ماشي حد عاوز حاجه؟
مجدي : لأ.
يدخل مراد ويقرب من زينة وياخدها في حضنه : مبروك يا زنزون.
زينة : متشكره يا ميرو.
مجدي : هههههههههههه
مراد : اه ميرو دا الدلع بتاعي عندك مانع؟
مجدي : لا يا عم معنديش طالما هتفارقنا.
مراد بيسلم على مجدي : خُد بالك من زينة.
مجدي : في عينيه.
مراد : أنا عارف بس كنت بهزر معاك على فكرة سلام.
مجدي : مع السلامة.
تشاور مريم لزينة بابتسامة فتشاورلها زينة وياخدها مراد ويخرجوا.
في الجنينة.
مريم : مش كنت دخلت سلمت على زينة دلوقت تزعل.
مراد : لا هتزعل ولا حاجه ولا هما اصلا عاوزنا يلا بينا.
بتركب مريم العربية وبابتسامة : يلا.

بتقدم ليلى القهوة لخالها هشام وهاني.
هشام : اقعدي يا ليلى.
بتقعد ليلى.
هشام : ها زعلانه من بابي ليه؟
نظرت ليلى لهاني وهي مدمعه : أنا مش زعلانه.

هشام الابن جاي ناحيتهم : بابي أنا ماشي.
هشام (الأب) : طيب يا حبيبي مع السلامة.
بيسلم عليهم هشام وياخد ياسمين والولاد ويخرجوا.

يقوم هاني ويقعد جنب ليلى.
هاني : أنا عارف إنك زعلانه مني علشان مقولتش ليكي من الأول بس أنا كنت خايف تزعلي مني وقولت تعرفي لوحدك.
ليلى : أنا مليش ازعل ولا حتى أوافق أو أرفض دي حياتك وحضرتك حر فيها.
هشام : صح يا حبيبتي كده.. وبابي هيفضل زي ما هو مفيش حاجه هتتغير.
ليلى : لا يا خالو حاجات كتير أكيد اتغيرت ذكرياتنا مع مامي في الشقة أكيد جات واحدة تانية تشارك بابي فيها.
هاني : ليلى يا حبيبتي أنتي تعرفي اللي في قلبي؟
ليلى : أكيد لأ بس ممكن احس بيه.
هاني : طب أنا بقى بقولك مفيش أي واحدة ممكن تاخد مكان مامي هي ممكن تاخد مكان تاني بس نفس المكان لأ.
ليلى : يبقى بتظلم الست اللي معاك.
هاني : لا يا حبيبتي مبظلمهاش علشان قلبي دا مليش حكم عليه مبقولكيش كده علشان تطمني لإن دا مش هيأثر على تعاملي مع الست اللي معايا أكيد فهماني.
ليلى : بابي أنا قولت لحضرتك في البداية دي حياتك وأنت حر فيها.
هاني : طب زعلانه ليه بقى؟
ليلى : مش زعلانه.
هاني يحضنها وهو مدمع : امال ايه الدموع اللي في عينك دي؟
ليلى ونظرت ليه : الدموع دي شايفاها في عين حضرتك.
هاني : وحشني حضنك يا ليلى.
بتحضنه جامد وبعدها : اه.
هاني : ايه مالك؟
هشام : مالك يا ليلى؟
ليلى : ضهري بس بيوجعني.
هشام : طب اقعدي استريحي.
ليلى : هطلع اقعد مع طنط أمل بعد اذنكم.
___________
في شقة أكرم.
ندى : متتحركش كتير يا بابا علشان الكانيولا.
أكرم : مش طايقها في ايدي شيلها يا علاء.
كريم : لسه يا عمي المحلول مخلصش وبعدين سيبها علشان الحقن.
أكرم : مش مستحملها يا ابني.
فريدة : ريحه يا كريم وشيلها.
كريم : حاضر لما المحلول يخلص.