أنت قلبي الجزء الثالث

الجزء الرابع / الحلقة ٧

#أنت_قلبي٤
________
الحلقة ٧

بيقفل عُمر باب التاكسي اللي بيتحرك بيلتفت يدخل الكافيه يلمح ياسمينا واقفه على الناحيه التانية وما بين نظرات ما بينهم يقرر يوصل عندها.
عُمر : ايه اللي جايبك في وقت زي ده يا ياسمين انتي لسه مروحتيش؟!
ياسمينا : جيت علشان نروح مع بعض يا بشمهندس بس الظاهر حضرتك كنت مشغول مش فاضي تروح بيتك.
عُمر : ارجع ازاي واسيب الكافيه لوحده على العموم أنا هقولهم يشطبوا شغل الليلة على كده ثواني جايلك.
_______
في شقة طارق.
كانت هنادي نايمه على الكنبه في الصالة والتليفزيون شغال قبل ما تسمع صوت هبد الباب فتقوم بفزع.
هنادي : مين؟!
كانت سهر داخله ناحية غرفة مازن بسرعة وقفلت الباب ومازن جاي وراها ومعاه بنته.
هنادي : في ايه يا ابني؟
مازن : لسه منمتيش يا ماما؟
هنادي : قولت اقعد قدام التليفزيون عقبال ما تيجو علشان لو عوزت تاكل ولا حاجه تلاقيني صاحيه.
مازن : لا أنا مش عاوز أكل اتفضلي ادخلي نامي آسف إني سهرتك.
هنادي : لا يا ابني عادي أنا أصلا مكونتش هعرف أنام وأنت بره هي مراتك مالها؟
مازن : مشكلة كده بسيطة هنحلها مع بعض.
هنادي : كده طيب تصبح على خير.
مازن : وحضرتك من أهل الخير.
دخلت هنادي اوضتها تنام ودخل مازن لسهر.
مازن : انتي ايه اللي عملتيه ده؟!
سهر : ايه عملت ايه ولا أنت عاوز تتخانق وخلاص؟!
مازن : لا أنا مش عاوز اتخانق بس أسلوبك ده ميمشيش معايا جرا لك ايه يا سهر انتي مكونتيش كده؟!
سهر : علشان يعني رزعت الباب وأنا داخله وقلقت مامتك؟
مازن : مش كده وبس يا سهر كل حاجه فيكي متغيره.
سهر : علشان بتفرض عليه وضع أنا مش حباه ومفكر إني كده بكره مامتك مع إنك عارف كويس إني مينفعش اكرهها لكن باسلوبك ده بتخليني حاسه إن راحتي ملهاش أي اعتبار عندك.
مازن : ووجودك هنا قلل راحتك في ايه ولا المشكلة في أمي؟!
سهر : خلاص لو سمحت مش عاوزه اتكلم في الموضوع ده.
مازن : براحتك يا سهر عاوزه تقعدي الشهر دا عند والدك أنا معنديش مانع.
سهر : وليه منقعدش في شقتنا ونبقى نيجي زيارات لمامتك ولبابي ومامي أنا عاوزه أفهم ايه وجهة نظرك في كده إذا كان مامتك اصلا عندها شغل ومبترجعش غير أخر النهار ما احنا نبقى نيجي نسهر معاها ونروح بالليل متأخر عادي اصلا مامتك مش فاضيه لينا.
مازن : انتي مش عاوزه تقعدي وخلاص وبتقولي أي كلام.
سهر : خلاص يا مازن أعمل اللي يريحك بس متسألنيش مالي بقى لما تلاقيني مضايقه طول الوقت ومكشره.
مازن : لا عادي خالص براحتك.
_______
في منزل عُمر.
عُمر : ايه اللي بتقوليه دا بس يا ياسمين؟!
ياسمينا : أنا مسكت اعصابي علشان كنا في الشارع واحنا مش لسه صغيرين للكلام ده لكن مش هسكت هنا كمان يا عُمر أنت كدبت عليه وقولت إنك بتستلم منها الشغل الساعة أربعة الهانم بقى كانت في الكافيه لحد دلوقت ليه وكمان حضرتك موصلها لحد التاكس وبتقفلها الباب كمان دا أنت معملتهاش معايا ولا مع الغُرب حلو قوي يا بشمهندس.
عُمر : انتي واعيه بتقولي ايه؟!
ياسمينا : اه كدبني بقى طلعني مجنونه بيتهيألي صح ولا مش دا اللي حصل وشوفته بعنيه.
عُمر : أنا فعلا بستلم منها
الكافيه الساعة أربعة بس حصل ظروف النهاردا ومعرفتش تروح في ميعادها.
ياسمينا : اه امال ظروف ايه دي بقى يا حبيبي؟
عُمر : أهل جوزها عاملين لها مشاكل وموقفين بلطجيه تحت بيتها فهي كانت مستنيه أمها ترجع من عند خالتها علشان تروح لها.
ياسمينا : دا أنت عارف كل أخبارها بقى.
عُمر : ما هي حكتلي علشان يعني مستغربش هي قاعدة ليه لحد دلوقت مروحتش.
ياسمينا : وبكرة بقى هتقعد معاك للساعة اتناشر؟
عُمر : لا ما هي أمها هتكون في البيت.
ياسمينا : اااه قولت لي بقى.. طيب يا عُمر خليني ماشيه وراك لحد ما اشوف اخرتها ايه معاك.
عُمر : مالك يا ياسمين بتكلميني كده ليه؟
ياسمينا : لا ولا حاجه بس تعرف لون شعرك الأول كان أحسن متصبغش تاني بقى.. تصبح على خير.
عُمر مردش.
ياسمينا : بقولك تصبح على خير.
عُمر : وانتي من أهله يا ياسمين.
__________
تاني يوم في مطعم ياسمين.
مليكة : انتي عارفه يا ياسمين لو معايا المبلغ ده مكونتش اتأخرت عنك.
ياسمين : عارفه يا مليكة كتر خيرك إنك جيتي تسألي عني مع إني مقصره في حقك وبقالنا كتير متقابلناش.
مليكة : معلش ما هو اللي عندك عندي واهي الدنيا تلاهي المهم فكرتي هتعملي ايه؟
ياسمين : مش عارفه يا مليكة دماغي خلاص هتنفجر من التفكير مش لاقيه ليها حل.
مليكة : مفيش حاجه ملهاش حل.
ياسمين وهي بتفكر : عندك حق.. اشربي العصير بتاعك.
مليكة : حاضر.
_________
في شقة إياد.
منه : اهدا كده واشرب الليمون خليه يروق دمك ويهدي أعصابك.
آسر : مش عامله لوجودي أي قيمه يا منه كإني اصلا مش موجود.
منه : متكبرش الموضوع بقى يا آسر هي كانت خايفه عليك قولتلك ما أنت عارف سهر أنا اللي هقولك برضو؟!
آسر : خليكي انتي مكاني لو انتي واقعه في مشكلة زي دي مين اللي هتروحي تتكلمي معاه وتطلبي منه يساعدك جوزك ولا حسام ابن عمك؟
منه : جوزي طبعاً وأنا مبقولش إن ملكش حق تضايق من اللي حصل بس متزودهاش بقى يا أخي اسبوع بحاله لا بتكلمها ولا تعرف عنها حاجه ينفع كده برضو وهي سهر ليها حد غيرك يا آسر؟
آسر : وجعتني يا منه وجعتني قوي لاقتني مش فارق معاه ولا موجود اصلا في حياتها.
منه : يا أخي كانت خايفه عليك قالتلي إن الدكتور منبه عليكم محدش يزعله ولا يقوله أي خبر ممكن يتعبه يعني كان نيتها خير بلاش كده يا آسر لإن سهر زي ما لها حاجات غلطانه فيها ليها برضو مواقف كتير حلوة بلاش تنسى كل ده وتفتكر الوحش
دا كلامها قطع قلبي وقعدت تعيط كتير صعبان عليها نفسها قوي منك.
آسر : مني أنا؟!
منه : ايوه وأنت عارف هي بتحبك قد ايه.
آسر : هقوم امشي بقى.
منه : هتروح البيت؟
آسر : لأ هرجع اشوف شغلي.
منه : ما تروح البيت تصالحها.
آسر : عاوزه حاجه؟
منه : عاوزاك تصالح سهر.
آسر : طيب يا منه.. سلام عليكم.
منه : وعليكم السلام.. بس مقولتليش هتصالحها؟
آسر : مع السلامة يا منه.
منه بابتسامة : عارفه إنها مش هتهون عليك وهتصالحها.
آسر : سلاااام.
_________
أمام الصيدلية كانت سهر واقفه ومتردده تدخل غمز الولد اللي شغال في الصيدلية للدكتور.
في التليفون.. 📞
سهر : عاوزه ايه يا منه؟
منه : في ايه يا سهر مالك؟
سهر : مش نايمه ومش شايفه قدامي.
منه : طب معلش الليلة هتنامي وتشبعي نوم.
سهر : طيب عاوزه حاجه؟
منه : شكلك مش فاضيه بس على العموم آسر لسه نازل من عندي.
سهر : طيب ايه المطلوب مني يعني دلوقت؟
منه : تصدقي إنك رخمه بقولك لسه نازل من عندي وقعدنا اتكلمنا وقالي وقولتله وبصراحه اقتنعت بكلامه انتي جرحتيه يا سهر بس معلش آسر طيب وبيسامح.
سهر : لا يا شيخه؟!
منه : هههههههه خلاص بقى هو احنا نصالح واحد التاني يزعل.
سهر : وصالحتيه؟ ألف مبروك.
منه : أنا اصالحه ليه هو احنا زعلانين من بعض انتي اللي هتصالحيه كلمتين حلوين كده منك والمياه ترجع لمجاريها.
سهر : عاوزه حاجه يا منه؟
منه : غريبه فكرتك هتفرحي الموضوع مبقاش فارق معاكي ولا ايه؟
سهر : بقولك مش نايمه كويس وواقفه مش مركزة عاوزه أنام قوي ياريت النوم يجي.
منه : خُدي منوم.
سهر : اخدت مفيش فايدة.
منه : طيب انتي فين؟
سهر : بره البيت قولت اتمشى شويه مخنوقه ومش طايقه قعدة البيت.
منه : طب ما تيجي يا سهر أنا قاعدة لوحدي وزهقانه برضو.
سهر : لا لا هشتري حاجه واروح البيت.
منه : كده طيب مع السلامة.