أنت قلبي الجزء الثالث

الحلقة ٦١

#انت_قلبي٣
_________
الحلقة ٦١

آسر بيركن عربيته أمام العمارة اللي ساكن
فيها كمال (والد زوج بنته).
آسر : مليكة.
مليكة : نعم يا بابي.
آسر : فكرتك نمتي يا حبيبتي.
مليكة : لأ أنا صاحيه.
آسر : طيب اطلعي معانا
سهر.. سهر قومي وصلنا.
مليكة : بابي ممكن أفهم بس هنطلع نعمل ايه؟
آسر : ابنك مش بتقولي فوق؟
مليكة : ايوه بس ممكن سيف يطلع يجيبه عادي احنا بقى هنطلع نعمل ايه؟
آسر : عاوز جوزك في كلمتين والكلام دا لازم يكون في حضور والده.
مليكة : بابي عمو كمال تعبان.
آسر : وأنا مش هتعبه يا بنتي بس في كلام لازم يتقال وعاوزه يبقى شاهد عليه سهر.. سهر قومي يا حبيبتي.
سهر بصوت ناعس : فيه ايه احنا فين؟
آسر : مش هتطلعي معانا؟
بتتلفت حواليها لاقيت نفسها قدام العمارة اللي ساكن فيها الأستاذ كمال.
سهر : أنت جايبنا هنا ليه؟
آسر : اطلعي وانتي تعرفي.
سهر : لأ مش قادرة عاوز تطلع أنت براحتك.
آسر : هتقعدي هنا لوحدك؟
سهر : ايوه.
آسر : خلاص براحتك يلا بينا يا مليكة.
واخد آسر مليكة من ايدها وطلعوا فوق وتركوا سهر في العربية.

بتفتح فيروز باب الشقة تسلم مليكة وتاخد ابنها في حضنها وتقعد جنب والدها.
سيف كان جوه بيدي والده الحقنه ويخرج علشان يشوف حماه عاوزه في ايه وطبعًا والده موجود.
____________
في شقة أكرم.
حازم : ألف سلامة عليك يا عمي.
أكرم مردش.
ميرفت : تسلم يا ابني دول شوية برد بس عمك كان عاوز يعرف معزته عندنا.

جرس الباب يرن..
لسه حازم قايم يفتح الباب كانت تالا فتحته.
ندى : انتي بتعملي ايه عندك كل ده مطلعتيش ليه علشان تنامي؟
تالا : حاضر يا ماما جايه.
ندى : هو جدك عنده ضيوف؟
تالا : ايوه قصدي دا مش ضيف.
ندى : امال مين اللي جوه؟

كان حازم قاعد قصاد السرير اللي نايم عليه أكرم وفي وش الباب على طول فلمح ندى وهي واقفه مع بنته..

ندى : اه طيب اقعدي لحد ما يمشي أنا هنام تصبحي على خير.
تالا : وحضرتك من أهل الخير.

حازم كان عاوز يقوم قبل ما ندى تطلع فوق لكن ملحقش كانت تالا بتقفل الباب استأذن وخرج بسرعة وهو عينه على السلم فوق ومتردد يطلع ولا يمشي.
حازم : وهو يصح اصلا إنك تطلع فوق وفي الوقت ده كمان؟
تالا : بابا.. بابا.
كان حازم سرحان انتبه لصوت تالا : ايوه يا حبيبتي.
تالا : تصبح على خير علشان طالعه أنام.
حازم : وانتي من أهل الخير ابقي سلميلي على ماما.
تالا : حاضر.
تُقبل خد والدها وتطلع جري على السلم.
ينزل حازم تحت يلاقي علاء لسه فاتح الصيدلية يقعد معاه شويه ويروح وبعدها يقفل علاء الصيدلية ويطلع شقته.
___________
في فيلا كريم.
فريدة : كريم... كريم يا حبيبي أنت نمت؟
كريم بصوت ناعس يرد : عاوزه حاجه يا فريدة؟
فريدة : كنت عاوزه اقعد معاك وندردش شويه.
كريم نظر في الساعة.
فريدة : عارفه الوقت متأخر بس أنا تعبانه قوي ومحتاج حد افضفض معاه.
قام كريم يسمعها : فيه ايه يا حبيبتي اتكلمي؟
فريدة : من امبارح وصورة ماما مش مفارقه خيالي.
وبتبكي وكريم يطبطب عليها.
كريم : ادعيلها يا فريدة كل اما تفتكريها ادعيلها هي محتاجه دا قوي.
فريدة : صورتها مش مفارقه خيالي فاكرة اليوم ده زي ما يكون امبارح
وفاة رحمة وبعدها مفيش أربعة وعشرين ساعة تتوفى ماما كان صعب عليه قوي.
كريم : حبيبتي حاسس بيكي بس ادعيلهم يا فريدة عارف الموقف صعب وكل ما حد قريب مننا يفقد حد عزيز عليه بنفتكر لحظة فراقنا لـ احبابنا بس مفيش في ايدنا حاجه غير الدعاء وصدقة جاريه على روحهم
الموت دا سنة الحياة محدش يقدر يهرب منه.
فريدة : قلبي موجوع قوي.
ياخدها في حضنه وهي بتبكي ويطبطب عليها وكل ما يشتد بكاءها يشد بدراعته فتحاوطها أكتر.
فريدة : طمني يا كريم إنك معايا.
كريم : أنا معاكي اهو وانتي في حضني متخافيش بقى.
فريدة : بحبك يا كيمو.
كريم بابتسامة : هتخليني اضحك في موقف صعب زي ده اعمل فيكي ايه؟
فريدة : تحبني.
كريم : يااااه هو أنا كل دا ومبحبكيش؟!
دا حبك سكن جوه قلبي من سنين.
فريدة تطبع قُبله على خد كريم.
كريم بابتسامة يقفل نور الابجورة و....
_______
في شقة كمال ونادين.
كمال : اقعد يا سيف.
سيف بيقعد وهو عينه من مليكة اللي كانت قاعدة بجانب والدها كأنها بتتحامى فيه من خوفها منه احساس وجعه ومتلخبط ومش عارف حماه هيقول له ايه.
آسر : أستاذ كمال حضرتك عارف معزتك عندي قد ايه.
كمال : وأنا كمان بعزك ومن قبل ما نبقى نسايب كمان أنت عارف.
آسر : عارف طبعًا.. دلوقت بنتي تبقى مرات ابنك يعني زي بنتك.
كمال : مليكة بنتي فعلاً ومش كلام هي عارفه أنا بحبها وبحترمها قد ايه.
مليكة : العفو يا عمو الاحترام دا لازم يكون مني لحضرتك.
كمال : بنت أصول ومتربيه يسلم اللي رباكي يا بنتي.
آسر : وهو يصح يا أستاذ كمال إن الأب اللي يربي بنته يتوجع عليها بالشكل ده؟
كمال : ألف سلامة عليك من الوجع وحقك عليه لو فيه سوء تفاهم أنا أحب اوضحه.
آسر : مع احترامي لحضرتك بس اللي حاصل مش سوء تفاهم دا سوء معاملة من ابنك لبنتي.
سيف : أنا بعترف إني أوقات بكون عصبي لدرجة إني بعدها مبفتكرش انا قولت ايه ولا عملت ايه ودا مش كدب ولا استعباط بس أنا حقيقي مبكونش مدرك ادراك كامل أنا بعمل ايه
وكلها مبتخرجش عن كوني بزعق وصوتي بيعلى لكن عمري ما اهانت مليكة ولا ممكن يحصل.
آسر : بنتي لما بقت تدخل عليه البيت بحس إنها مكتئبه جواها حاجه وجعاها ومش قادرة تقولها
أنا عاوز اعرف بنتي ليه اطفت في بيتك يا سيف؟
سيف : مش فاهم؟
آسر : بنتي انت اخدتها من بيتي وردة مفتحه كل يوم بتطفيها عن اليوم اللي قبله لحد ما دبلت خالص لا بقت تضحك ولا تهزر مع أخواتها ودايمًا قاعدة لوحدها مالك يا بنتي مبتقولش اخر مرة اخدتها من عندي كان على وعد إنك هتغير طريقتك دي معاها لكن محصلش ده بدليل شكلها اللي واضح اهو قدامي.
مليكة نظرت لوالدها وهي حابسه دموعها.
آسر : قلبي يوجعني ولا لأ يا أستاذ كمال لما الاقي بنتي كده؟
كمال : بعد الشر عنك ومعاك حق في كل اللي قولته.
آسر : أنا هجيبهالك على بلاطه زي ما بيقولوا
لو بنتي متعاملتش معاملة تليق بيها انا هاجي اخدها من ايدها ومش هتشوفها تاني غير عند المأذون علشان نكون خلصنا بقى.
كمال : اهدا بس مأذون ايه مفيش حاجه من دي هتحصل قرب يا سيف صالح مراتك.
آسر : يفيد بـ ايه الصلح لما يرجع تاني يوم لنفس المعاملة قول لي يا ابني لو بنتي مضايقاك في حاجه ولا متجوزها غصب عنك أنا هصلح الغلطه دي واريحك منها خالص.
سيف : مفيش حاجه من دي يا عمي جوازي من مليكة كان حلم بالنسبة ليه.
آسر : امال حصل ايه بعد الجواز اكتشفت إنها خدعتك في حاجه مثلا مش قادر تنساها ليها
ما هو مش معقول كله تمام وأنت يعني اللي بتتصرف كده من دماغك قول لي لو غلطانه هي في حاجه اعقلها.
سيف : لا يا عمي مليكة مش غلطانه في حاجه بالعكس أنا اللي غلطان في حقها.
وقام قرب منها.
سيف : وابوس راسها كمان قدامكم ولو زعلانه مني في حاجه هطلب تسامحني أنا آسف يا مليكة.
وبيحتضنها وهي محرجه وبتحاول تبعد عنه.