أنت قلبي الجزء الثالث

الحلقة ٣٣

#انت_قلبي٣
__________

الحلقة ٣٣

يدخل عُمر من برة.
عُمر : في ايه يا ياسمين
مالك يا فريدة بتعيطي ليه؟
تدخل فريدة و متقدرش ترد.
عُمر : في ايه يا ياسمين ما تتكلمي؟
ياسمينا : زعلانه وبتعيط علشان بقولها خلاص الموضوع إياه دا فركش و متفكرش فيه تاني.
عُمر : تاني يا ياسمين مش قولتلك أجلي كلام في الموضوع دا دلوقت.
ياسمينا : ونأجل ليه ونضيع وقت الموضوع دا خلاص انساه اصلا كتر المشاكل الكتير بتبوظ حلاوة أي حاجه فسيبك بقى بكرة يجيلها احسن منه.
عُمر : غلط يا ياسمين اللي بتعمليه ده هتزعلي بنتك و صاحبتك منك.
ياسمينا : اذا كان صاحبتي مهمهاش زعلي وفتحت فيه ولا القطر معرفش انا عملت لها ايه لكل ده؟!
عُمر : طب معلش ادخلي لفريدة راضيها بكلمتين وطمنيها إن مفيش حاجه هتحصل من اللي قولتيها دي.
ياسمينا : انت عاوز تكسر كلامي يا عُمر.
عُمر : لا اكسري قلب بنتك علشان كرامتك وجعتك شويه من كلام صاحبتك.
ياسمينا : علشان الكلام مكانش ليك بتقول كده
انت عمرك اصلا ما اهتميت بمشاعري.
عُمر : انتي عاوزه ايه ياياسمين هو بدل ما نحل المشكلة اللي حضرتك عملتيها عاوزه تعملي مشكلة كمان بيني وبينك
مشاعر ايه اللي عمري ما اهتميت بيها ما تعقلي بقى.
ياسمينا : أنا مجنونه يعني يا عُمر؟!
عُمر : يووووه بقى مفيش فايدة من الكلام معاكي مصممه تغلطيني وخلاص لا يا ستي انتي ست العاقلين ارتحتي كده؟!
__________

في البلد.. في منزل كامل.
هنادي تخبط على الباب.
مريم : اتفضل.
هنادي : اتفضل دي ليا أنا؟!
التفتت مريم اللي كانت قاعدة وفي ايدها الموبايل قفلته أول ما لمحت والدتها.
هنادي : ايه ممكن ادخل ولا ممنوع؟
مريم : اتفضلي يا ماما.
هنادي : متأكدة اني أمك؟
مريم : هو فيه ايه؟!
هنادي : يعني مش مرات ابوكي اللي بتكرهيها وبتتمني موتها؟!
مريم : أنا آسفة.
هنادي : ليا الحرية  مقبلش اعتذارك ولا لازم اقبله؟
مريم : براحتك طبعاً.
هنادي : أنا بقول مقبلوش علشان تتربي و تتعلمي ازاي تحترمي مامتك.
مريم : طيب ولما هو كده حضرتك جايه ليه؟
هنادي : حضرتي جايه علشان اخد بنتي اللي للأسف معرفتش اربيها.
مريم : اه هتاخديني معاكي بقى علشان تعذبيني.
هنادي : لا يا مريم مش هعذبك أو نقدر نقول كده إنه عذاب من نوع أخر متخافيش مش همد ايدي عليكي بس يكفي إن الاجازة هتقضيها في البيت انسي إنك تتكلمي معايا أو تطلبي مني أي حاجه دا هيبقى اخر حوار ما بينا لحد ما اتأكد إنك تربيتي كويس.
مريم : وممكن مجيش برضو ولا هو بالعافية؟
هنادي : مش بالعافية بس انتي ملكيش مكان تاني تروحيه تيته مش عاوزاكي معاها البيت اللي في البلد بيعته وانسي اصلا اني كنت هسيبك تقعدي فيه لوحدك كمان تنسي بيت جدك العمدة لان ملكيش مكان فيه
شقة باباكي أنا بيعتها لعمك سعيد من زمان وفلوسها صرفتها عليكم علشان بس متسألنيش وديت فلوسها فين يبقى كده ملكيش غير شقة باباكي اللي في القاهرة
هتعيشي معايا ومع اخوكي اللي هيبقى الحوار ما بينكم وبس اما أنا فمش عاوزه اسمع كلمة ماما منك وكويس قوي اني قادرة اتمالك اعصابي بعد الكلام اللي قولتيه ليا لما كنا لوحدنا والكلام اللي قولتيه قدام أهل باباكي اه حاجه كمان اخوكي ميعرفش حاجه عن الموضوع القديم إياه اللي لسه متحلش بس دا علشان حضرتك طفشتي وخوفتي تواجهي المشكلة اللي وقعتي نفسك فيها فهربتي هنا على البلد وواخده ابن عمك كأب ليكي وهو أكتر واحد مبيحبناش بس معلش طالما عمل حاجه كويسه فواجب كنت اشكره لكن دوره انتهى كده... اجهزي علشان بكره الصبح هنسافر.
مريم : تيته اللي قالتلك إنها مش عاوزني هنا؟
هنادي : تقدري تسأليها ولو حتى موافقة ومرحبه انا مش موافقة لحد هنا وانتهى الكلام معاكي.
خرجت هنادي وقفلت الباب.
مريم منهاره و بتبكي فكرت تتصل بمحمود بس افتكرت كلام والدتها.
مريم : طب اعمل ايه انا دلوقت مش هقدر انا استحمل اعيش هناك بالاسلوب والطريقة بتاعت ماما دي ما أنا اعتذرت عاوزه ايه تاني؟
ويعني ايه عاوزه تربيني؟!
اوووف بقى.
_________