أنت قلبي الجزء الثالث

الحلقة ٤٣

#انت_قلبي٣
_________
الحلقة ٤٣

في شقة سيف.
سيف : بتعملي إيه كل دا يا مليكة؟
مليكة : حاضر يا سيف جايه اهو.
بتجري مليكة وخارجه من الأوضة.
سيف : على مهلك.
مليكة : ما أنت اللي عمال تستعجلني مين اللي كان بيكلمك باباك؟
سيف : لأ دا دكتور كريم.
مليكة : خير عاوزك تروحله المستشفى ولا إيه؟
سيف : لا أنا النهاردا اجازة اروح فين هو كان بيكلمني بيفكرني بموضوع كده كنت كلمته فيه يلا بينا هاخد يوسف واسبقك على تحت.
مليكة : موضوع إيه ده؟
سيف : موضوع إيه مش فاهم؟
مليكة : الموضوع اللي كان بيفكرك بيه دكتور كريم.
سيف بابتسامة : أنتي مبتنسيش وبعدين دا موضوع شغل أنتي تفهمي حاجه في شغلنا؟
مليكة : لأ.
سيف : يبقى خلاص.
مليكة : أوك يا سيف مردودالك.
سيف : على فكرة أنتي بقيتي حساسه قوي من أخر مرة قعدتي فيها في بيت باباكي.
مليكة : تقصد الشهر اللي قعدته هناك؟
سيف : بتفكريني يعني
مش خلاص صفينا؟
مليكة : طب اتفضل الشنطة.
سيف : هو احنا هنبات هناك يا حبيبتي دي كلها ساعة وراجعين.
مليكة : دي هدوم ليوسف ولعب علشان يبطل شقاوة وميكسرش حاجه هناك.
سيف : هههههههههههه معاكي حق ما هو لو كسر حاجه هيدفع تمنها.
مليكة : شوفت بوفر عليك إزاي.
سيف : هو من حيث التوفير فأنتي موفرة خالص.
مليكة : دي تريقه بقى ولا ايه؟!
سيف : هههههههههههه مش عاوز زعل ابوس إيدك.
مليكة : ايوه كده اتعدل.
سيف : اتعدل!
مليكة : وبطل نرجسيه شويه.
سيف بدهشه : هي وصلت لكده كمان تمام لما نرجع بقى نشوف الموضوع ده ورايا يا أستاذ.
مليكة : وراك إيه شيله.
سيف : والشنطة دي أعمل فيها ايه؟
مليكة : خلاص هاتها وشيل يوسف.
سيف : لا هشيل الاتنين ميخلصنيش تشيلي وأنا موجود.
مليكة بابتسامة : ميرسي يا سوفه.
يوسف : أنا سوفه.
سيف : ردي بقى.
مليكة : انتو الاتنين سوفه يا حبايبي.
سيف : بس أنا سوفه من قبل سوفه ده.
مليكة : هههههههههههه سمعه علشان يتخانق معاك.
سيف : تعالى يا أستاذ يا مغلبني.
يوسف : يلا يا مغلبني.
مليكة وسيف : ههههههههه
____________

في فيلا كريم.
داخله فريدة بالقهوة تحطها على الطربيزة وتسحبها تقربها من كريم اللي كان واخد جميلة على رجله وبيلعب معاها.
كريم : حطي الرقم الكبير دا في مخك والصغير على ايدك يبقوا كام؟
جميلة : تن.
كريم : نين.
جميلة وعقدت حاجبيها : أنت بتخم يا كيمو.
كريم : هههههههههههه لأ مبخمش.
جميلة : Six وفور تن مش نين أنت نجحت في المدرسة إزاي؟!
كريم : هههههههههههه برافو عليكي أنا كنت بختبرك.
جميلة : مكسوف تقول إنك مش عارفها؟
كريم : داري عليه بقى.
تغمز له جميلة : أوك مش هقول لحد.
فريدة تنزل جميلة من على رجل كريم.
كريم : فيه إيه يا فريدة سبيها.
فريدة : جميلة يا حبيبتي اطلعي العبي أنا حاطه لعبك بره.
جميلة بتنهيده : حاضر.
فريدة : اتفضل يا دكتور.
كريم : مممم طالما قولتي يا دكتور يبقى الموضوع كبير.
فريدة : بمناسبة إنك قاعد معانا النهاردا ودا حدث مبيحصلش كتير فأنا قررت اتكلم معاك شويه.
كريم بابتسامة : اتفضلي يا حبيبتي طلباتك.
فريدة : وبما إن حضرتك ضحكت علينا وضيعت الاجازة وعشمتنا إننا هنسافر نشم هوا في أي حته فيها بحر فأنا قررت إننا نسافر.
كريم : وبعدين كملي.
فريدة : كريم أنا بتكلم جد.
كريم : أوك يا حبيبتي ما أنا سامعك اتكلمي.
فريدة : ما أنا قولت اللي عندي مستنيه ردك على اللي قولته.
كريم : أنا عمري اعترضت ولا منعتك إنك تخرجي براحتك؟
فريدة : ما هو مش هسافر أنا والولاد لوحدنا يا كريم.
كريم : الولاد فين صحيح؟
فريدة : بيلعبوا باسكت في الجنينة.
كريم : أوك كملي.
فريدة : ما أنا قولتلك مش هنسافر لوحدنا.
كريم : معنديش مانع هسافر معاكم.
فريدة : نسافر اسكندرية اسبوع.
كريم : لا استني اسكندريه إيه مش فاهم.
فريدة : الجو لسه مبردش نلحق نسافر قبل ما الدنيا تشتي.
كريم : اسبوع ده مش كتير الدراسة بدأت خلاص.
فريدة : يسافروا معانا الخميس الجاي يقضوا الجُمعة والسبت ويرجعوا أخر النهار.
كريم : وبعدين؟
فريدة : أنا وأنت وجميلة نكمل الاسبوع وننزل الجُمعة للولاد.
سكت كريم ومردش.
فريدة : قولت إيه يا كريم؟
كريم : خليها لـ اجازة نص السنة.
فريدة : مش هينفع علشان اسكندريه هتكون تلج.
كريم : مش لازم اسكندريه.
فريدة : بس أنا نفسي اروح مكان فيه بحر واحنا عندنا شاليه هناك يعني محلوله.
كريم : مش هينفع يا فريدة الولاد يسافروا معانا وبعدين نسيبهم ينزلوا لوحدهم ويقضوا الاسبوع دا كده من غيرنا مش هينفع.
فريدة : عندك حق هو فعلا مينفعش علشان كل سفريه يطلعلي فيها عفريت.
كريم : عفريت ايه؟
فريدة وهي مضايقه : مبحبش الحركة بتاعتك دي أكون بتكلم وتغمض عينك.
كريم : يا حبيبتي صوتك عالي بيوجع دماغي وعنيه.
فريدة : صوتي بيوجع دماغك وعينك يا كريم؟!
كريم : الصوت العالي يا حبيبتي وأنتي عارفه الكلام دا كويس.
فريدة : خلاص يا كريم.
قايمه وهي زعلانه مسك ايدها وبيقعدها : اقعدي نتفاهم.
فريدة : مش عاوزه اتفاهم يا كريم ولا عاوزه اتكلم معاك خالص سيب ايدي بقى.
كريم وهو مضايق : وادي القهوة بردت كمان
ما هو لازم اصالحها بس مينفعش انفذ اللي هي عاوزاه ده.
______
في فيلا مراد.
ينزل مراد من فوق جري.
زينة كانت قاعدة قدام التليفزيون.
زينة : على فين؟
مراد : مش شغلك.
زينة : كده.. أوك هقول لبابي.
مراد : طب ما تقولي اجي معاكي؟
زينة : لأ بس روح استأذنه علشان متعملش لنفسك مشاكل أنت مش عايش لوحدك.
مراد : اششش خلاص إيه هتديني درس؟!
زينة : الحق عليه إني خايفه عليك ما هو لما ترجع من بره هتسمعلك كلمتين حلوين ويمكن العربية اللي بتعد الأيام والليالي علشان يتفك الحظر بتاعها المدة تطول أكتر وتبقى سنة ولا حاجه.
مراد : آه ما هو أنا بقيت عبره لكل من هب ودب.
زينة : أنت حر أعمل اللي يريحك بس متجيش تعيط.
وتركته وطالعه فوق.
مراد : حتى مكسله تقفلي اللي كنتي مشغلاه ده وبعدين اطلعي ذاكري وخليكي في نفسك.
زينة : أنا بذاكر يا حبيبي الدور والباقي عليك أنت.
مراد : ما بلاش علشان ممكن أفكرك إنك في ثانوية عامة ومينفعش تضيعي في وقت في لعب العيال ده.
زينة : زي مذاكرتك كده؟
قولنا يمكن نستفيد منك.
أمل خارجه من غرفة المكتب : إيه الدوشه دي؟
زينة : دا مراد كان خارج يا مامي قولتله يستأذن بابي الأول غلطت أنا؟
أمل : أنت خارج؟
مراد : ايوه.
أمل : طب اتفضل ادخل لبابي قوله.
مراد : حاضر.
أمل : وحضرتك مبتذاكريش ليه؟
زينة : طالعه أهو.
أمل : طيب شاطرة.