أنت قلبي الجزء الثالث

الجزء الرابع /الحلقة ١٥

#أنت_قلبي٤
_________
الحلقة ١٥

في شركة مراد.
هشام : حضرتك لسه صاحي من النوم؟!
مراد : لا يا بابي أنا جاي من زمان.
هشام : امال محضرتش الإجتماع ليه؟
مراد : مكنتش أعرف إن في إجتماع. 
هشام : ليه شادي متصلش بيك وقالك؟!
مراد : كلمني بس كنت لسه في البيت.
هشام : تقصد في السرير كنت نايم حضرتك طبعا مش في دماغك مش في مرتب بتقبضه أخر الشهر تيجي بقى متجيش براحتك ما هي التكيه بتاعتك.
مراد : أنا آسف وياريت حضرتك تراعي إننا في الشركة مش في البيت.
هشام : أنت هتعرفني أقول ايه وفين وامتى يا واد أنت؟!
مراد : العفو يا بابي بس أنا مش فاهم كل دا ليه كنت تعبان ولسه لحد دلوقت تعبان وقولت مش جاي حضرتك عاوز تخصم اليوم دا من مرتبي أنا مش معترض لكن من حقي لما أكون تعبان اريح في البيت كل الموظفين بيعملوا كده وأنا ابنك يعني.
هشام : وعلشان حضرتك ابني تبقى مستهتر بالشكل دا؟!
مراد : فين اللي مستهتر أنا من وقت ما دخلت الشركة وأنا قاعد على المكتب بخلص الشغل وكل الأوراق اللي كانت مطلوبة مني سلمتها على مكتب دكتور مازن يعني أنا مش مستهتر.
هشام : امشي أرجع شوف شغلك.
مراد : بس أنا مش قادر أكمل.
هشام : ليه خير يا حبيبي مالك؟
مراد : جسمي كله مكسر ومحتاج ارتاح في السرير.
هشام : اتفضل امشي يلا.
مراد : ارجع البيت؟
هشام : ايوه.. اتفضل بقى عندي شغل.
مراد : حاضر.
وخرج مراد من المكتب.
هشام بتنهيدة بيكمل مراجعة الورق اللي قدامه.
_________
في شقة كمال ونادين.
ياسمينا : بقولك السكينه في ايدي ابعد احسنلك علشان السلاح هيطول.
عُمر : مهونش عليكي أنا عارف.
ياسمينا : لا يا حبيبي تهون زي ما أنا هونت عليك.
عُمر : عمرك ما تهوني عليه يا ياسمين علشان كده بقولك يلا نرجع بيتنا وننسى كل اللي فات.
ياسمينا : ننسى ايه!
عاوزني اروح الاقي الست هانم قاعدة في بيتي مش كده؟!
عُمر : مفيش هانم هتقعد في بيتك غيرك يا سمسمه.
ياسمينا : الكلام دا كنت تعرف تضحك عليه بيه زمان لكن دلوقت خلاص يا ابن عمتي.. عُمر خلي كل واحد يروح لحاله.
عُمر : مفيش عروسة ولا في جواز يا ياسمين.
ياسمينا : أنا الحكاية عندي مش إن في عروسة وفرح ولا لأ أنا مشكلتي في إنك اصلا فكرت تتجوز عليه.
عُمر : مش هيحصل يا ياسمين.
ياسمينا : يحصل ميحصلش مش فارق طالما فكرت ونطقتها من بؤك خلاص مش هقدر اعيش معاك تاني.
عُمر : خلاص بقى يا سمسمه قلبك كبير سامحيني وتعالي نرجع بيتنا.
ياسمينا : مش راجعه بقولك أنا مش راجعه سمعتني؟
عُمر : بلاش يا ياسمين كده البنات تعبانين بسبب الموضوع ده وأنا كمان
تعرفي إني محطتش حاجه في بؤي من يوم ما خرجتي من البيت غير المياه والقهوة بس وقاعد في البيت حاسس إن خسرت كل حاجه ارجعي معايا ياسمين وكل حاجه هتتصلح.
ياسمينا : اللي كسرته جوايا عمره ما هيتصلح يا
عُمر.
عُمر : دا اخر كلام عندك يا ياسمين؟
ياسمينا : اه أخر كلام عندي.
__________
في شقة طارق.
هنادي : ايه اللي أخرك كده يا مريم؟
مريم : يبقى الولاد تعبوكي.
هنادي : لا محدش تاعبني ريان نايم من ساعة ما نزلتي مريم بس اللي كانت صاحيه قعدت ألعب معاها لاقيتها يا حبيبتي نامت كده لوحدها اخدتها نيمتها جوه.
مريم : اهم يناموا بالنهار ويصحوا طول الليل.
هنادي : طنط أمل اتصلت بيكي انتي نسيتي تليفونك هنا.
مريم : اه أنا أصلا كنت نازله حاسه إني ناسيه حاجه حتى برضو دخلت السوبر ماركت ونسيت حاجه ورجعت جبتها مش عارفه دماغي مالها مش مركزة خالص هي طنط أمل قالت لك حاجه يا ماما؟
هنادي : انتي لسه فاكرة؟!
مريم : هي كويسه؟
هنادي : اه كويسه بتقول مراد راجع من بره تعبان.
مريم بدون اهتمام : تعبان ماله يعني؟
هنادي : استأذن من باباه ورجع البيت مكملش شغل عنده دور برد بس شكله شديد حبتين.
مريم : لا ألف سلامة.
هنادي : قولتلها بقى يشرب سوايل دافيه ويقعد كده في البيت ميخرجش ولا يعمل مجهود لحد ما يخف.
مريم : طيب أنا دخلت الحاجات كلها التلاجة هروح اشوف ريان كده يمكن عاوز يغير.
هنادي : ماشي يا بنتي.
دخلت مريم الغرفة واخدت التليفون فكرت تكلم مراد تطمن عليه وبعدين رجعت في كلامها.
مريم : عادي يعني دول شويه برد مش لازم ابان اني ملهوفه عليه قوي كده يعني.
بس برضو تلاقيه تعبان دلوقت وعاوز حد جنبه
طب ما هي مامته معاه بلاش الحنيه اللي هتوديكي في داهيه دي اجمدي كده دور برد وهيروح لحاله بس طنط أمل بتكلم ماما تقولها ليه؟ علشان يعني اتصل اطمن عليه ولا اروح البيت اشوفه؟
________
في شقة عمار.
ملك : القهوة يا عمتو القهوة يا مامي.
منه : تسلم ايدك يا ملك.
سهر : اقعدي استريحي يا ملك.
ملك : صحيح يا عمتو هي سهر رجعت من السفر امبارح؟
منه : اه عمار قالك؟
ملك : بيقولي امبارح وأنا كنت رايحه في النوم ولما قومت الصبح افتكرت قولت هو أنا كنت بحلم ولا ايه علشان كانت هنا قريب يعني.
منه : اهي جايه تقعد كام يوم كده.
ملك : مليكة مجاتش معاكي ليه يا مامي؟
سهر : مليكة مجاتش عندي.
ملك : يعني معدتيش عليها؟
سهر : لأ.
منه : مبقتش تيجي كتير يا سهر؟
سهر : اه.. الولاد لما ب يكبروا بيشغلوا أمهم معاهم.
ملك : ويوسف ده مش عاوز أم واحدة دا عاوز كتير.
منه : هههههههههههه كتير ازاي يعني الواد غلبان بلاش تفتري عليه.
ملك : افتري عليه شوفي مخربش سليم في وشه ازاي.
سهر : لا أنا كنت حاضره الخناقه دي وبصراحه سليم اللي بدأ يا ملك.
ملك : علمه الشقاوة يا مامي ابني بقى عدواني بسببه أنا خايفه على اللي في بطني منه بدأ يغير من دلوقت.
سهر : معلش يا حبيبتي لما تقومي بالسلامة ابقي كده حببيهم في بعض هاتي لعب ليهم هما الاتنين وحاولي تهتمي بيهم عارفه الموضوع هيكون صعب هي تربيتهم اصلا مش سهله.
منه : عندك حق يا سهر بس انتي كان عندك أربعة
ههههههههههههه
ملك : صح مامي كانت بتعاملنا كلنا زي بعض مجدي بس اللي كان بيرخم علينا شويه.
منه : صحيح مجدي ومراته وبنته عاملين ايه؟
سهر : بخير يا منه.
ملك : مجدي عنده بنت صوتها صعب قوي.
منه : هههههههههههه بكرة نشوف بنتك.
ملك : اه يا خوفي من كتر التنمر اللي عماله اتنمره على العيال ده يجي على دماغي وبنتي تخليني أشد في شعري.
منه : هههههههههههه هيحصل.
________
في المساء في المستشفى.
هشام : ايه الكلام دا يا دكتور استلم ايه ما طول عمرك متحمل مسؤلية المستشفى لوحدك ايه اللي حصل عاوز افهم؟
كريم : حاسس اني مش قد المسؤلية يا دكتور هشام علشان كده أنا بسلمك كل المستندات الخاصة بالمستشفى لاني محتاج استريح شويه.
هشام : اوك تستريح كام يوم دا حقك لكن تسلم كل حاجه كده خالص ازاي بس أنا مش هعرف اعمل حاجه من غيرك.
كريم : تعبت صدقني ومحتاج استريح.
هشام : قولي يا دكتور كريم ايه اللي حصل بالظبط؟
كريم : يبقى عارف اللي حصل يا دكتور هشام.
هشام : بصراحه عرفت.
كريم : وشايف ايه الحل؟
هشام : الحل زي ما قولت يتحول للتحقيق وبلاغ في النقابه وهو يقدم المستندات اللي عنده مش علشان أنت مش محل ثقه لا بالعكس بس دا علشان نكشف كدبه وياخد جزاءه أنا مش عارفك أول امبارح يا دكتور احنا عشرة عمر ومحدش اجبرني إني اشاركك في المستشفى وبعدين لو عاوز تعمل فلوس حقيقي زي الدكتور دا ما قال هتعملهم بره المستشفى خالص.
كريم : صدقني أنا عمري ما اخدت مليم من المستشفى دي مخرجتش بيه فاتورة وكل حاجه متسجله عندك.
هشام : على فكرة أنا زعلان منك قوي ازاي تفكر اصلا اني ممكن أشك فيك دكتور كريم احنا مش شُركه بس في المستشفى علاقتنا ببعض  أقوى من كده بكتير وأنت عارف.
قعد كريم وهو حاسس بصداع مش قادر يتحمله.
هشام جري عليه : في ايه مالك؟
كريم : معرفش دا ضغط ولا ايه بس حاسس اني مش متزن خالص ودماغي هتنفجر.
هشام : طب حاول تهدأ فين جهاز الضغط؟
كريم بيشاورله يجري هشام ياخد الجهاز ويقيس الضغط وفعلا يطلع الضغط عالي .
___________
تحت أمام المعمل.
سيف : بشمهندس عُمر!
عُمر : ازيك يا سيف؟
سيف : تمام.. خير.
عُمر : كنت عاوز اتكلم معاك.
سيف : بس أنت عارف إن دا مكان شغلي.
عُمر : مفيش مشكلة هستنى بره لما تخلص أنا عارف قدامك نص ساعة.
سيف : ماشي.