أنت قلبي الجزء الثالث

الحلقة ٥٩

#انت_قلبي٣
__________
الحلقة ٥٩

في فيلا آسر.
سهر بتزعق : مجدي هات مياه نفوق أختك.
كان سيف بيحاول يفوق مليكة اللي مغمى عليها بعد ما اشتدت الخناقة بينهم
على مين فيهم اللي غلطان ومحاولات سيف في الصلح مجابتش نتيجة لاقوا مليكة واقعة مغمى عليها.
جري مجدي بسرعة يشوف فيه ايه كانت سهر بانفعال طلبت منه مياه تفوق بيها مليكة.
جري مجدي بسرعة.
سهر تاخد مليكة من سيف اللي كان محاوطها بدراعاته بيحاول يفوقها
فاقت مليكة على المياه اللي جات على وشها وهي بتصرخ.
مليكة : مش عاوز اروح معاه خليه يرجع لوحده يا مامي.
سهر : طب خلاص حاولي تهدي بقى شايفه عملت ايه في نفسك؟!
مليكة بصوت متعب : مش عاوزه ارجع معاه خليه يروح لوحده أنا الموت عندي اهون من إن يتقفل علينا باب واحد.
سيف كان واقف وسامع كل الكلام ده محرج من اخوها ومامتها.
سهر : سيف سيبها كام يوم تهدي اعصابها.
سيف لسه هيتكلم صرخت مليكة بشكل مش طبيعي علشان توقفه ميتكلمش.
سهر بانفعال : خلاص بقى اسكتي وأنت سيبها البنت جالها انهيار عصبي بسببك.
سيف بحزن : حاضر يا طنط.. براحتك يا مليكة
خليكي هنا براحتك.. بعد اذنكم.
وخرج سيف من الفيلا.
مجدي : ممكن اعرف بقى فيه ايه؟
سهر : مش وقته اسند معايا اختك نطلعها تستريح فوق.
مليكة بصوت متعب : لا يا مامي أنا هقوم لوحدي.
قامت مليكة لوحدها وطلعت اوضتها.
قعدت سهر وهي حاطه ايدها على خدها حزينة على بنتها وعلى الحالة اللي وصلت ليها.
مجدي : ممكن افهم إيه الحكاية بقى ولا مش من حقي؟
سهر : مجدي أنا مش عاوزه اتكلم خالص ممكن تسيبني لوحدي؟
ولا على ايه أنا قايمه طالعه اوضتي.
________
في شقة معتز.
معتز بانفعال : انتي أكيد اتجننتي ندى مين اللي بتتكلمي عنها؟!
هدى : ندى حبك الأول يا دكتور.
معتز : ميصحش اللي بتقوليه دا يا هدى.
هدى : لو مش صح قول لي أنت ايه الصح
ندى مكانتش حبك الأول؟
معتز بحزن : انتي قولتي كانت يعني دا ماضي ايه لازمة الكلام عنه دلوقت يا هدى عيب كده ميصحش
هي ليها بيتها وحياتها وانا كمان ومبقناش صغيرين للكلام ده عيب.
هدى : ما هي انفصلت عن جوزها قصدي اللي بقى طليقها خلاص.
معتز : طب وانا مالي كل واحد حر في حياته.
هدى : بتروح هناك كل ليلة ليه يا معتز؟
معتز : حاجه غريبه بجد يعني ايه بروح هناك كل ليله دي؟! هي يعني حاجه جديدة ما دا البيت اللي متجوزه فيه أختي وعلاء صاحبي اصلا من قبل ما يتجوز شهد.
هدى : اه تقصد أيام ما كنت بتروح هناك علشان حبك الأول تشوفك وتتقابلوا هناك مش كده؟
معتز : هنفترض إن كلامك صح مع إن دا عمره ما حصل وانتي عارفه البيت دا كويس قوي باباها الأستاذ أكرم مربي ولاده والأستاذ حلمي والد علاء ودكتور كريم والأستاذ عماد كلهم ناس كويسه اللي توفوا واللي موجودين دلوقت عمر ما حد هيسمح بكده وبعدين مين قال لك بقى شهد مش كده؟
هدى : ايش معنى شهد يعني؟
معتز : علشان هي اللي عارفه الموضوع القديم ده اللي كل شويه تقلب فيه بس أنا بقى مش هسكتلها المرة دي اما حضرتك مصدقه بقى مش مصدقه انتي حرة.
هدى : كده هوه يعني ميهمكش؟
معتز : لا ميهمنيش يا هدى علشان أنا لا عملت حاجه غلط ولا بعمل حاجه غلط دلوقت علشان اخاف.. وخارج أكل في أي حته وخليكي لخيالك والكلام الفارغ اللي سمعتيه.
هدى : يعني مش فارقه معاك يا معتز؟!
مردش وفتح الباب وخرج
دخلت هدى تجهز شنطة هدومها.
__________
في المستشفى.
كريم قاعد في مكتبه بيتكلم مع نفسه : أنت كده ضميرك مرتاح يا كريم وشايف إنك لما حسست فريدة إن هي اللي غلطانه
مع إنك واثق ومتأكد إنها كان عندها حق لما تغير وتضايق حتى لو شايف إن دي عيله والموضوع كله اصلا ميستاهلش بس كنت احترمت مشاعرها وغيرتها عليك وبعدين أنت ليه محرج من البنت تكلمها بصراحة كأب خايف على بنته تنصحها إنها تركز في دراستها
بس أنا عملت ده لكن كمان لازم اعرفها إن دا مينفعش علشان متتعلقش بيه أكتر من كده.