أنت قلبي الجزء الثالث

الحلقة ١٣٨

#انت_قلبي٣
__________
الحلقة ١٣٨

في البلد.
كوثر : وانتي تفتكري لو أهل البلد اتنازلوا هنادي هتتنازل دي غلاويه وحقوده ومصدقت واحد من بيت العمدة يتمسك علشان تفرح وتشمت فيه.
صباح : ما اني عارفه بس بقول لو سكتنا أهل البلد كل واحد بقرشين تعويض عن الحريق اللي مسك في بيته هيتكتموا ويروحوا يتنازلوا وسعدية لو روحنا عند بيت أختها ده وكلمناها هتروح تتنازل هي كمان هنادي ملهاش دعوة بالموضوع ده من الأساس.
كوثر : مين اللي يروح لمين يا صباح انتي جرا لك حاجه ولا ايه احنا نروح بيت الناس دي؟
صباح : امال هنسيب الواد يروح في داهيه من ورا العمله السوده اللي عملها دي يا كوثر يا أختي؟!
كوثر : لأ بس إلا إننا نروح للست دي نتكلم معاها ولا مع بنتها مستحيل ده يحصل.
صباح : ده بقى الحل اللي عندي عندك حل تاني؟
كوثر : لا معنديش.
____________
في شقة حازم.
حازم : اقعد يا كريم واقف ليه؟
كريم : عمي أنا عارف اللي حصل ومتأسف جدًا حقك عليه.
حازم : اللي حصل من مامتك دا لو مكانتش قالته كان أي حد تاني شاف بنتي وهي بتروح الشقة بتاعتك اللي مفتاحها معاها كان هيقوله يا كريم ليه تحط بنتي في الموقف ده؟
كريم : أنا مكونتش أعرف إن الموضوع هيوصل للدرجة دي أنا قولت يبقى معاها مفتاح للشقة علشان يعني لو حبت تشوف حاجه أو تعدل في حاجه هناك.
حازم : طب ما تشوف وتعدل براحتها يا ابني بس تاخد مامتها معاها ولا أي حد مننا هو لازم المفتاح يعني يكون معاها وتروح لوحدها؟!
كريم : أنا آسف يا عمي.
حازم : لا أنا زعلان طب حتى كنت استأذنتني.
كريم : فاتتني دي حقك عليه يا عمي.
حازم : لا مش فاتتك ولا حاجه أنت مكونتش حابب إني أعرف لإنك عارف رأيي كويس قوي ودا اللي مزعلني منك أكتر.
كريم : طب أعمل إيه علشان أحل المشكلة دي؟
حازم : مامتك غلطت في بنتي أنا مش عاوز أضغط وأقول تيجي تعتذر خصوصا في الظروف اللي حاصله دي.
كريم : بجد يا عمي أنا متوقعتش إن يحصل كده بين ماما وبابا وضميري واجعني قوي حاسس فجأة إن كل حاجه بتتهد قدامي.
حازم : حاول تصالحهم على بعض علشان ضميرك يستريح.
كريم : طب وتالا يا عمي؟
حازم : ايه فاكرني هقولك نفركش؟
لأ مش هقولها.
كريم بابتسامة : متشكر يا عمي.
حازم : بس في حاجه لازم تعملها لو حابب إن موضوعكم يكمل.
كريم : ايه هي؟
حازم بينادي : تالا.
تالا جايه : نعم يا بابا.
حازم : هاتي المفتاح اللي معاكي.
تالا : اتفضل.
حازم : دا انتي مجهزاه بقى!
تالا : عامله حسابي.
حازم : اتفضل مفتاح شقتك.
كريم بياخد المفتاح من حازم.
حازم : مفيش مرواح الشقة غير مع مامتك أو اخوكي أو أنا لو حابه يعني.
تالا : حاضر يا بابا.
حازم : كمان مفيش مقابلات بره المقابلات هنا وبس.
كريم : دا اللي بيحصل اصلا يا عمي أنا عمري ما قابلت تالا بره غير صدفه بس على السلم وهي جايه أو خارجه من البيت.
حازم : لا أنا بعيد عليك الكلام ده ليه علشان لو اكتشفت في يوم من الأيام إن حصل الكلام ده هيبقى وقتها ليه حق أقول فركش.
كريم : تمام يا عمي.
حازم : تعتذر أنت لطنط ندى بالنيابة عن مامتك عقبال ما الأمور بين باباك ومامتك تهدا شويه وتيجي تعتذر لإن الكلام اللي قالته مامتك ميصحش أبدًا إنه يتقال على بنتي وانتي السبب في كل ده وطبعاً حضرتها ساعدتك لما وافقت تاخد المفتاح.
كريم : حاضر يا عمي أنا أصلا كنت جاي علشان اعتذر لطنط ندى.
حازم : عند مرات عمك علشان فكت الجبس النهاردا.
كريم : بجد؟
دا خبر كويس جدًا.
تالا : وعمتو فريدة بقيت تمشي وتحرك ايدها كويس يا بابا؟
حازم : أنا ما شوفتهاش يا بنتي ساعة كده ولا حاجه هبقى أروح أطمن عليها.
تالا : خلاص أجي مع حضرتك.
حازم بابتسامة : ماشي.
___________
في فيلا كريم.
ندى : بطلي أكل من الحلويات دي لا تروحي فيها أنا مش ناقصه.
فريدة : هههههههههههه
الحته دي وبس.
ندى : خايفه عليكي يا فريدة.
فريدة : من ايه؟
ندى : السكر يعلى خُدي بالك من نفسك.
فريدة : اهو اديني بحاول بس من زمان مأكلتش حلو متقلقيش الحته دي مش هتعمل حاجه.
ندى : وهي دي بس اللي أكلتيها يا فريدة؟!
يلا مش عاوزه حاجه؟
فريدة : اقعدي يا ندى لسه بدري.
ندى : معلش علشان بس أروح أصل أنس جاي الليله.
فريدة : جاي منين؟
ندى : هو أنا مقولتلكيش؟
فريدة : قولتي لي ايه؟
ندى : مش ياسين أخده وقدم ورقه في الشركة اللي كان شغال فيها في السويس.
فريدة : وقبل؟
ندى : اه بس مش مضايقني غير غربته بعيد عني دي.
فريدة : يا ستي سبيه يشوف مستقبله ويكون نفسه علشان يعرف يتجوز وبعدين غربة ايه هو مسافر بره مصر؟!
دول ساعتين ويلاقي نفسه في البيت عندك جمدي قلبك شويه.
ندى : اه ما انتي بتسافري شرم وتسيبي ولادك لوحدهم لازم تقولي كده.
فريدة : يا أختي احنا سفرية شرم دي جات على دماغنا اسكتي.
ندى : صحيح كريم عمل ايه في الحوار ده؟
فريدة : لسه هو ودكتور هشام بيحاولوا يحلوا الموضوع ده مع جوز الست اللي توفيت.
ندى : يعني جاي يفكر دلوقت في حقها بعد خمس شهور كان فين قبلها؟
فريدة : أنا عارفه بقى؟
المهم ميكونش في مسؤلية على المستشفى.
ندى : لا يا فريدة لو المستشفى فعلا قصرت في إنقاذ الست دي يبقى لازم كل المسؤل عن اللي حصل ده يتحاسب.
فريدة : وأنا مقولتش ميتحاسبش بس كريم قال إن مفيش أي مسؤلية على المستشفى لإن مفيش غلط من عندهم.
ندى : امال الراجل ده ايه اللي مجمد قلبه كده ورايح يشتكي البوليس دا لو ثبت العكس هتبقى مشكلة ليه.
فريدة : مش عارفه بقى اصلا اللي بيحصلنا دا غريب الرسالة اللي جاتني دي أنا حاسه إنها مش رُفيدة.
ندى : ازاي بقى اذا كان بنتها اعترفت عليها.
فريدة : ما أنا عارفه ما رُفيدة هي اللي بعتت البلطجيه دول ليه بس الرسالة دي مش منها.
ندى : تقصدي دا حد استغل اللي حصل ودخل يهددك علشان تخافي؟
فريدة : أو كريم هو اللي يخاف.
ندى : حاجه غريبه فعلاً بنت يا فريدة انتي قلقتيني.
فريدة : امال أنا اعمل ايه؟
ردي على التليفون.
ندى : دا حازم
ها يا حازم في حاجه؟
حازم : انتي لسه عند فريدة؟
ندى : اه وقايمه امشي أهو.
حازم : لا خليكي عندك أنا جاي أنا وتالا نطمن على فريدة.
ندى : طب وأنس؟
حازم : اتصل وقال هيتأخر شويه.
ندى : ليه في حاجه ولا ايه؟
حازم : مستني زميله علشان يسافروا مع بعض.
ندى : طيب هقعد استنى بقى بس متتأخرش أنا هنا من بدري.
حازم : يا ستي اديكي روقتي دمك شويه.
ندى : اه روقته على الأخر.
حازم : ليه هي فريدة مش كويسه؟
ندى : كويسه اهي قاعدة عماله تاكل من ساعة ما قعدت.
فريدة : هههههههههههه
حازم : طيب تالا دخلت تلبس هجيبها واجي.
ندى : ماشي مع السلامة.
____________
في المستشفى.
كريم : ادخل.
معتز : سلام عليكم.
كريم : وعليكم السلام
اتفضل يا دكتور معتز.
معتز : اولا كده أنا جاي اعتذر لحضرتك يا دكتور.
كريم : خلاص محصلش حاجه.
معتز : أنا مش عارف أقول لحضرتك ايه بصراحه بتحرجنا بكرم أخلاقك دا يا دكتور.
كريم : الموضوع مش مستاهل كل واحد عارف قيمة نفسه.
معتز : طبعاً يا دكتور أنا كنت جاي أردلك الفلوس دي.
كريم : فلوس ايه دي؟!
معتز : الموضوع من الأول أنا كنت طلبت من علاء مبلغ كده على سبيل السلف يعني وهو قال لي هتصرف أنا معرفش إن هو مش معاه اتفاجئت لما كلمته الصبح أرد له الفلوس إنها في الأساس بتاعت حضرتك وهو استلفهم منك.
كريم : طب ما جتش قولت لي ليه من الأول؟
معتز : بصراحه اتكسفت.
كريم : من ايه بس احنا أخوات.
معتز : تسلم يا دكتور وأنا ليه الشرف طبعا وحضرتك في مقام اخويا الكبير.. تفضل.
كريم : بس أنا مش محتاج الفلوس دي خليهم معاك ممكن تحتاجهم.
معتز : لا خلاص مش محتاجهم كتر خيرك يا دكتور بعد اذنك.
كريم : اتفضل.
________
في شقة إياد.
سهر : عطلتيني لا روحت ولا جيت أعمل فيكي ايه بس؟
منه : هو انتي لو معملتيش شعرك النهاردا هيحصل ايه؟
سلمى : جوزها مش هيدخل ها البيت ههههههه
نظرت سهر لسلمى وسكتت.
منه بابتسامة : سلمى
بتحب تضحك.
سهر : طيب أنا ماشيه محتاجين حاجه؟
منه : لا سلامتك خلاص روحي انتي شوفي مصلحتك.
سهر : أوك.. سلام.
منه : مع السلامة.
وخرجت سهر من الشقة.
سلمى : هو أنا غلطت قوي كده لما جيبت سيرة اخوكي؟
منه : لأ.
سلمى : امال زعلت وقامت مشيت ليه؟
منه : انتي مش سامعاها من أول ما جيتي وهي بتقول عاوزه اروح أعمل شعري؟!
سلمى : دا بس علشان القعدة مش عجباها لو سلمى مش قاعدة كان زمانها قعدت معاكي عادي.
منه : لا صدقيني من قبل حتى ما تيجي وهي مستعجله عايزة تمشي.
سلمى : ماشي يا منه هصدق عاوزه حاجه؟
منه : ما تقعدي وراكي ايه؟
سلمى : ورايا بيتي يا أختي مش جيبتيني على ملا وشي وتعالي يا سلمى دلوقت ضروري أنا قولت حصل ايه إياد متخانق معاها ولا ايه.
منه : طبعاً كان نفسك تيجي تلاقينا متخانقين.
سلمى : لا يا حبييتي وأنا هيبقى نفسي دا يحصل ليه امال فين سهر صحيح؟
منه : سهر في الشركة عند خالها آسر.
_________
في شركة آسر.
آسر : ها يا سهر فهمتي طبيعة شغلك هتكون ايه؟
سهر : بصراحه يا خالو مش قوي.
آسر : هههههههههههه
شوفي هو في الأول هيكون الموضوع صعب شويه عليكي بس واحدة واحدة هتتعودي على الشغل وهيكون سهل بالنسبه ليكي تعالى يا حسام.
حسام : الملف اللي طلبته.
آسر : ماشي سيبه على المكتب.
سهر : ازيك يا انكل حسام؟
حسام : تمام ازيك يا سهر؟
سهر : أنا كويسه.
حسام : سلميلي على ماما وبابا.
سهر : حاضر يوصل.
حسام : طيب مش عاوز حاجه مني؟
آسر : مستعناش يا حسام.
سهر : طيب يا خالو استأذن أنا بقى.
آسر : اتفضلي يا حبيبتي خلي بالك من نفسك وانتي مروحه.
سهر : حاضر بعد اذنكم.
وخرجت سهر من المكتب.
حسام : أنا رايح اشوف شغلي.
آسر : استنى يا حسام.
حسام : نعم.
آسر : أنت بتكلمني كده ليه حصل ايه لكل ده؟
حسام : بكلمك ازاي يعني مش فاهم؟
آسر : يعني من امبارح وأنت متغير معايا وكلامك وطريقتك مش هي خالص.
حسام : اعمل اللي تعمله يا آسر دا ملكك وسمعتك وأنت حر فيهم.
آسر : مش فاهم كل ده علشان وليد والراجل اللي معاه جم هنا الشركة؟!
حسام : أنت عارف السبب يا آسر يبقى بلاش لف ودوران.
آسر : أنا مبلفش ولا بدور يا حسام أنت عارفني كويس قوي.
حسام : امال ايه هتفكر في عرض الراجل ده وأنت عارف كويس هو مين ذا غير إن بينه وبين هشام مشاكل كتير ودا هيزعل هشام منك بس في الأخر برضو أنت حر.
آسر : مين قال لك إني هقبل أنا قولت هفكر.
حسام : تفكر في ايه إذا كان أنت عارف كل حاجه يبقى المبدأ مرفوض من البداية وكنت قولت له الكلام ده.
آسر : مينفعش علشان محرجش وليد خصوصا إن هو اللي جايبه وكنت هوصل له قراري مع وليد وكان الموضوع انتهى أنت بقى اللى عاملي حوار من امبارح كأني ضربتك بالنار لما اتنرفزت عليك خلاص يا أخي حقك ليه.
ويقوم آسر يُقبل رأسه.
حسام بيبعد : اوعي بقى ايه اللي بتعمله ده الموضوع مش مستاهل كل ده.
آسر : يا عبيط أنا مقدرش على زعلك.
حسام : طب وليه الغلط ده؟!
آسر : هههههههههههه
خلاص بقى متدقش على كل كلمة بقولها.
حسام : خلاص يا آسر وأنا سامحتك.
آسر : ليه وأنت كنت متخاصمني ولا ايه؟!
حسام : شوفت بقى إن عمر ما عدا أربعة وعشرين ساعة واحنا متخاصمين.
آسر : هههههههههههه دا انت عايش الدور بقى
خصام ايه يا حسام احنا بينا الكلام دا برضو؟
حسام : لأ وعلشان كده أنا عازمك على العشا الليله.
آسر : وأنت ليه أنت اللي تعزمني؟
حسام : خلاص يبقى العزومه على حسابك.
آسر : دا أنت مصدقت بقى
ههههههههههههه
حسام : هههههههههههه
رجعت في كلامك ولا ايه؟
آسر : لا أنا عمري ما أرجع في كلامي.
حسام : أنت هتقولي!
آسر : ايه دي تريقه بقى ولا ايه؟
حسام : أنت عاوز تكمل خصام علشان تفلت من العزومه مش كده؟!
آسر : هههههههههههه
لا خلاص أنا عازمك على العشا بس عندي في البيت.
حسام : دا توفير بقى ولا ايه؟! هههههههه
آسر : اعتبرها كده هههههههه
حسام : هههههههههههه
_________
في محلات إياد.
سيف : اتمنى يعني إن حضرتك متكونش زعلان.
إياد : وأنا هزعل من ايه بس يا سيف طالما في النهاية الموضوع ما بينكم أنا عمري ما كنت هعرض إني اشتري المحلات لو كانت شغاله فعلا اللي خلاني أفكر هي قفلتها دي ودي حاجه تخلي الواحد يصعب عليه دي خسارة كبيرة قفلته بالشكل ده.
سيف : لا ما هو هدى أختي هتديره بنفسها.
إياد : طب كويس وهي برضو لو احتاجت حاجه أنا موجود.
سيف : متشكر جدًا لحضرتك بعد اذنك.
إياد : اتفضل بس ابقى سلملي على مليكة.
سيف : حاضر يوصل.. سلام عليكم.
إياد : وعليكم السلام.
__________
في شقة طارق.
أمل : كويس إن الموضوع دا انتهى.
هنادي : أنا مش هستريح
غير لما اجيب أمي تقعد معايا هنا لاني مبقتش عاوزه اروح البلد خلاص بس مضطره اروح علشان أمي وكل مرة اروح فيها لازم تحصل حاجه.
أمل : صح انتي لو جيبتي أمك هنا هتستريحي مش هيبقى ليكي حاجه هناك علشان تروحيلها.
هنادي : ليه خالتي وخالي هناك بس عادي ممكن اروح كل فين وفين بس أمي مقدرش أغيب عليها.
أمل : هتتحل يا هنادي اصبري شويه كده وبعدين ابقي فاتحي أمك في الموضوع دا تاني.