#انت_قلبي٣
___________
الحلقة ٨٧
آسر : اتفضلي استريحي تشربي ايه؟
سلمى : متشكره أنا كنت جايه أقولك كلمتين وماشيه على طول.
آسر : سامعك.. اتفضلي.
سلمى : سهر مخصماني.
آسر : دي حاجة بينكم أنا ايه علاقتي بالموضوع ده؟
سلمى : أنت عارف السبب.
آسر : رغم إني مش حابب أفتح الموضوع ده بس طالما أنتي اللي اتكلمتي فهقولك شوفي يا مدام سلمى أنا من يوم ما اتجوزت سهر بنت خالتك متدخلتش خالص بينكم تتخانقوا تتصالحوا مليش فيه لكن المرة دي الموضوع له علاقة ببنتي
فلو سمحتي ملكيش أي علاقة بملك ومتحاوليش تقلبي جوزها عليها علشان كده مش كويس.
سلمى : وأنا مالي ومال بنت هايدي.
آسر : سامعة نفسك بتقولي ايه؟!
سلمى : هي مش بنت هايدي برضه؟
آسر : فعلًا بنتها بس لما تكوني بتتكلمي عن ولادي مينفعش تنسبيهم لمامتهم وتتجاهليني والغرض أنا عارفه هايدي ماتت غلطانه مش غلطانه مذنبه مش مذنبه لا قصتي ولا قصتك ولا ولادي ليهم فيه
كل واحد هيتحاسب على عمله وبس.
سلمى : كويس قوي وسهر.
آسر : سهر!
سلمى : ايوه اللي عملته فيها زمان ودلوقت.
آسر : تمام أنتي عاوزه ايه بقى دلوقت؟
سلمى : أنت بتبعدها عننا ليه؟
آسر : أنتم مين؟ أنا عمري ما بعدتها عن أهلها لو دا اللي تقصديه سهر في البيت لو عاوزه تروحيلها اتفضلي بيتي مفتوح للكل.
سلمى : بس هي مش تسامحني.
آسر : طب وأنا مالي؟
سلمى : ما هو كل دا كان بسببك هي سامحتك لكن مش قادرة تسامح سلمى اللي معملتش ربع اللي أنت عملته.
آسر : عماله تكرري الكلام دا كتير وأنا ساكت متحاوليش توقعي بينا زي ما حاولتي قبل كده توقعي بين ملك وجوزها.
سلمى : أنا مبوقعش بين حد كل ما في الموضوع إني كنت بعزي بنتك في وفاة مامتها وخصوصًا بعد
ما عرفت ماتت ازاي.
آسر : يا ستي متشكرين
سعيكم مشكور.
سلمى : شوفت عرفت الفرق بين سهر واللي اتجوزتها عليها عرفت الفرق بين اللي صاينه بيتك وشرفك واخدت ولادك ربيتهم مع ولادها وبين اللي كانت عايشه حياتها بالطول والعرض
ياترى لما بتيجي تنام بتكون مرتاح بعد ظلمك للست اللي استحملت وعاشت معاك على الحلوة والمرة وأنت عارف المر اللي شافته منك.
آسر : المهم تكوني بتنامي وانتي ضميرك مرتاح ملكيش دعوة بغيرك.
سلمى : خليها تسامحني وأنا مليش دعوة بيكم.
آسر : اخليها تسامحك ازاي بالعافية يعني روحلها واطلبي منها ده.
سلمى : طول عمرك ميهمكش غير مصلحتك وبس طالما أنت وسهر كويسين ميهمكش الباقي بقى.
آسر : يا ست أنتي ابعدي عننا كل واحد فيه اللي مكفيه.
سلمى : ليه مالك ما سهر ربيتلك ولادك وجوزتهم خلاص ايه اللي تاعبك دلوقت؟
آسر : هو أنا اشتكتلك
أنتي عاوزه مني ايه؟
سلمى : بص يا آسر أنا عارفه إنك جدع رغم يعني في مواقف كتير مضايقني منك بس برضه في حاجات كتير حلوة عملتها مقدرش انكر كمل جميلك بقى وحاول تصالحني أنا وسهر.
آسر : جدع!
بقى بعد كل اللي قولتيه ده جايه تذوقي الكلام
أنا مش عارف أنتي جيبتي الثقة دي منين إني أقدر اصالحكم على بعض أنتي عارفه سهر محدش بيقدر يأثر عليها.
سلمى : بالعكس أنت أكتر واحد بتقدر تأثر على سهر هي بتسمع كلامك وبتقتنع بيه ولو كلمتها هي هتقتنع حاول كده.
آسر : أنتي أمرك عجيب بقى بعد الكلام اللي قولتيه ده عاوزني اساعدك؟!
سلمى : معلش أنا آسفة لو كلامي ضايقك بس صدقني أنا كنت جايه وناويه مفتحش أي مواضيع خالص تخصك أنت وسهر كل اللي كنت جايه فيه إني أطلب منك تصالحني أنا وسهر لإني عارفه هي بتعملك خاطر ازاي ومش هتكسفك.
آسر : طب بما إنك طلبتي مني الطلب ده ممكن أطلب منك كمان متدخليش بين ملك وجوزها وتسبيهم في حالهم.
سلمى : حاضر مش هدخل خالص بينهم بس توعدني تتكلم مع سهر وتحاول معاها إنها تسامحني.
آسر بتنهيدة : حاضر.
__________
في شقة علاء.
علاء : المهم إنك تكوني عقلتي وراجعه بيتك علشان تحافظي عليه مش جايه تعملي مشاكل يا شهد.
شهد : عارف يا علاء كلامك دا اللي بيعمل مشاكل.
علاء : ليه هو أنا بحرضك على حد أنا بقولك حافظي على بيتك.
شهد : محدش هيعرف مصلحتي أكتر مني ماشي؟
علاء : عيبك إنك بتكابري بصي أنا مش عاوز وجع دماغ وخلاص.
شهد بتقرب من علاء : يعني موحشتكش؟
علاء : نفسي تحبي كل الناس وتعاملي خطيبة ابنك أقولك بلاش خالص يبقى بينكم أي معاملة مع إن دي حاجه مش كويسه بس اهون ما تحتكي بيها وتعملي مشاكل معاها.
شهد : تحب تاكل ايه على العشا؟
علاء : امممم
بتجري ناعم مش كده؟
شهد : فاكر يا حبيبي أول ما اتجوزنا كنا بنحب بعض قد ايه؟
علاء : ولسه بحبك يا شهد بس بضايق لما تعاملي حد بطريقة مش كويسه عاوزك تعيشي في حالك يا حبيبتي.
شهد : حاضر.
علاء : بتهاوديني علشان تريحيني ولا أنتي فعلًا من جواكي ناويه تعملي كده؟
شهد : حبيبي.
علاء بتنهيدة : نعم.
شهد : تحب تاكل ايه على العشا؟
علاء : أي حاجه من ايدك هتبقى شهد يا شهد.
شهد بابتسامة : طيب يا حبيبي انزل شوف شغلك وانا أول ما أخلص الأكل هرن عليك تطلع تاكل.
علاء بابتسامة : ماشي خُدي بالك من نفسك اوعي تحرقي ايدك من الفرن زي كل مرة.
شهد : أطمن يا حبيبي.
علاء : طب سلام.
شهد تشاورله : مع السلامة.
بيفتح علاء باب الشقة وينزل.
علاء : معقوله تكون شهد جايه فعلًا وناويه تتغير ولا بتفكر في ايه؟
ندى : سلام عليكم.
علاء : وعليكم السلام
اساعدك في حاجه يا ندى؟
ندى : متشكره يا علاء.
بتخبط على تالا فتفتح الباب.
ندى : شيلي معايا يا بنتي.
تالا : حاضر يا ماما.
بينزل علاء يقابل حازم تحت.
علاء : ازيك يا حازم اخبارك ايه؟
حازم : تمام قولي ايه الاخبار؟
علاء : اخبار ايه؟
حازم : يعني البيت عامل ايه عمي أكرم صحته كويسه؟
علاء : كلنا بخير اقعد ولا طالع فوق؟
حازم : بصراحه أنا كنت جاي وعاوزك في موضوع كده.
علاء : خير يا حازم.
حازم : خير متقلقش
أنا كنت عاوز أرجع شقتنا فوق.
علاء : شقة ايه؟
الشقة اللي قاعدة فيها ندى وتالا؟
حازم : لا طبعًا هو ينفع أصلًا أقعد هناك؟!
أنا أقصد شقتنا القديمة.
علاء : اه.. طيب ايه المطلوب مني؟
حازم : أنا ممكن اجيب حاجتي واجي أنا وانس عادي بس مش هقدر أعمل كده قبل ما استأذن عمي وعاوزك يعني تكلمه.
علاء : حازم أنت عارف رأي عمي في الحوار ده.
حازم : يمكن يغير رأيه.
علاء : حاضر هكلمه.. ايه رايح فين؟
حازم : همشي.
علاء : أنت كنت جاي علشان كده بس؟
حازم : ايوه.
ندى نازله تجيب باقي الحاجة اللي سابتها مع صاحبة السوبر ماركت اللي قصاد بيتهم بتعدي الطريق كان حازم راكن عربيته على الناحية التانية جنب السوبر ماركت.
تلمحه فتدخل جوه ينتظرها لما تخرج يشوف الحاجه اللي معاها يطلب منها إنه يساعدها فترفض.
حازم : مش هيحصل حاجه لما أطلع الحاجه وأنزل على طول وبعدين مبتقوليش لحد يساعدك ليه بدل ما تشيلي الحاجات دي لوحدك؟!
ندى : مش عاوزه مساعدة من حد.
حازم : متنشفيش دماغك بقى.
ندى : لو سمحت سيب الحاجة أنا مطلبتش منك المساعدة.
حازم : بس أنا حابب أساعدك سيبي بقى.
ياخد حازم منها الحاجة ويسبقها على فوق يرن الجرس فتفتح تالا الباب يسلم عليها ويطمن على أحوالها ويدخل الحاجات جوه كل دا وندى واقفه تحت لحد ما ينزل علشان ميوقفش معاها فوق.
بينزل حازم وهي بتعمل نفسها بتشتري حاجه من السوبر ماركت يشاورلها فمتهتمش وتعدي الطريق وتدخل بيتهم.
بعد ما اطمن حازم إنها دخلت البيت ركب عربيته ومشي.
________
في منزل عُمر.
عُمر : ليه يا ياسمين؟
ياسمينا : كده يا عُمر مش عامله أنا سبوع عندي في البيت لما ترجع بيتها تبقى تعمل سبوع ولا هي حره.
عُمر : فيه ايه يا ياسمين هو أنا كل اما اقولك حاجه تعترضي عليها بالشكل ده؟!
ياسمينا : عاوز تعمل سبوع براحتك بس أنا هقعد في اوضتي مش طالعه أقابل حد ولا همد ايدي في حاجه.
عُمر : رغم إني عارف إن دا أسلوب عند وعاوزه تعملي مشكلة وخلاص بس ماشي يا ياسمين متطلعيش ومحدش طلب منك تعملي حاجه أنا هجيب اللي تعمل.
ياسمينا : ايه هتبعت لـ أختك تيجي من الكويت تساعدك ولا هتجيب اخواتي اسمع يا عُمر دلع بنتك ده متجبوش عليه أنا بقالي يومين حيلي اتهد وضهري وجعني من الجري ورا الكبيرة وشيل الواد الصغير والهانم نايمه وكل أما حد يكلمها تهب فيه اسأل فريدة بنتك دي طفشت منها وقالت هروح ارتاح في بيتي.
عُمر : عيب اللي بيحصل ده.
ياسمينا : يا حبيبي المسألة مش تعب بس من خدمتها هي اسلوبها وحش لدرجة إني مبقتش عاوزه أدخلها.
عُمر : نرميها في الشارع يعني يا ياسمين علشان تستريحي؟!
ياسمينا : لا يا حبيبي دا بيتها خليها قاعدة.
أنت تقرأ
أنت قلبي الجزء الثالث
Werewolf(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
