#انت_قلبي٣
__________
الحلقة ٨٠
في فيلا آسر.
مجدي : الواحد عاوز يشتري كل القُلل اللي في البلد ويكسرها هههههههههه
آسر : ليه؟
مجدي : مش بيقولوا نكسر وراك قُله أنا بقى كان نفسي يكون عندنا علشان اكسرها بجد.
آسر : طب ايه مش هتطلع تنام؟
مجدي : اه هطلع اهوه.
آسر يطبطب على كتف مجدي بابتسامة :
عقبالك يا حبيبي.
مجدي : بابي هو مفيش محاولة كده أخيرة يمكن انكل هشام يوافق إننا نتجوز بقى.
آسر : قبل الميعاد اللي متفقين عليه معتقدش
ثم خطيبتك نفسها مش موافقة.
مجدي : ممكن الين دماغها إنما انكل هشام صعب الحقيقة.
آسر : خلاص يبقى بتقولي ليه قفل على الموضوع ده وركز في شغلك ودراستك دلوقت والفرح جاي جاي متستعجلش تصبح على خير.
مجدي : وحضرتك من أهل الخير.
يطلع آسر اوضته يلاقي سهر قاعدة وحاطه ايدها على دماغها.
آسر : ايه يا حبيبتي لسه مصدعه؟
سهر : قوي حاسه إن دماغي خلاص هتضرب.
آسر : طب نامي يمكن الصداع يخف دا من الإرهاق وقلة النوم صح؟
سهر : معرفش من ايه بالظبط بس حاضر هحاول أنام مجدي دخل ينام؟
آسر : سيبته تحت لسه بيشاور عقله.
سهر : هيحس بالوحدة وهيفتقد اخوه قوي.
آسر : ولا هيفتقده ولا حاجه علي ساكن قريب مننا يعني كل اما يحب يشوفه هيعدي عليه بس بلاش يغلس عليهم اليومين دول.
سهر بابتسامة : لأ هو الأفضل ميغلسش عليهم خالص لا دلوقت ولا بعدين شوفت علي عمل ايه الليلة؟
آسر ياخدها في حضنه : دي أقل حاجه يا حبيبتي
انتي عملتي كتير قوي علشانهم.
سهر : أنا اسعد واحدة في الدنيا دي النهاردا لولا بس الصداع ده كان زماني..
وسكتت سهر.
آسر : كان زمانك ايه؟
سهر : خلاص بقى يا آسر.
آسر : لا ما أنا عاوز أعرف
ههههههههههههه
سهر : خلاص بقى.
آسر : هههههههههههه خلاص مش هكسفك أكتر من كده.
سهر : طب اقفل النور ده علشان ننام.. تعبانه قوي.
آسر : حاضر يا حبييتي.
________
في فيلا مراد.
أمل بعد ما طلعت غيرت هدومها ومنتظرة هشام علشان يطلع ينام اتأخر فنزلت تحت.
أمل تخبط على باب المكتب : ايه يا هشام بتعمل ايه هنا؟!
كان هشام بينهي مكالمة مع حد في التليفون.
أمل : هو ايه حكاية التليفون دا الليلة من ساعة ما وصلنا الفرح والتليفون مبطلش رن فيه ايه؟
هشام : في خبر سعيد متأكد إنه هيفرحك.
أمل : يا سلام وساكت ليه قول وفرحني.
هشام : ماهر اتقبض عليه.
أمل : ليه؟
هشام : كذا قضية كده منها الرشوة والفساد والغش التجاري وحاجات تانية لسه مخفيه هتظهر بعدين هيه بتجيب بعضها.
أمل : طب وأنت عرفت منين؟
هشام : من مصادري الخاصة.
أمل : أنت لك يد في الحوار ده؟
هشام بابتسامة : ليه يد؟!
دا أنا اللي نبشت في كل دول لحد ما قدرنا توقعه.
أمل : كويس اهو يبعد عننا بقى.
هشام : هو مش هيبعد وبس دا احتمال الغيبه تطول.
أمل : عاوزينها تطول ومنشفهوش خالص.
هشام بابتسامة ويقرب منها : ايه رأيك في الفرح؟
أمل : كان حلو قوي.. ايش معنى بتسأل؟
هشام : كان نفسي اعملك فرح زي ده.
أمل : أنت فرحتي ودا كفاية.
هشام : آآآه.
أمل : ايه مالك يا هشام ؟
هشام : كلامك مس قلبي وخلاني مش عارف ارد أقول ايه.
أمل تخبطه في كتفه : خضتني يا أخي.
هشام : هههههههههههه
سلامتك من الخضه يا اموله بينا بقى علشان ننام.
____________
في الصباح..في شقة علي.
علي : روكه.. حبيبتي اصحي بقى كفاية نوم
قومي شوفي حضرت الفطار و....
تفتح رُقية عينها فييتسم علي ويسكت عن الكلام.
رُقية نظرت ليه بدهشه.
علي : صباح الخير يا أجمل عروسة في الدنيا.
رُقية بتتثائب وتنظر في الغرفة تغمض عينها وتفتح.
رُقية : أنا فين وأنت بتعمل ايه هنا؟
علي : اهدي... اهدي أنا هفهمك.
شهقت رُقية ولسه هتصرخ وضع ايده على بؤها : بس اهدي هتلمي علينا العمارة.. احنا اتجوزنا امبارح.
رُقية : اتجوزنا!
علي : ايوه.. أنتى فقدتي الذاكرة ولا ايه
عملنا فرح ولبستي الفستان شايفه اهو الفستان في مكانه متشالش من على الكرسي من ساعة ما دخلنا الشقة.
رُقية لسه بتحاول تستوعب هي فين.
علي اخد الموبايل : صورنا في الفرح أنا وأنتي اهوه شايفه اهي مامتك
وباباكي واخواتك وأهلي أنا كمان..
رجعت بدماغها على السرير.
علي : ايه افتكرتي؟
وبيقرب منها فتشد الغطا عليها : ايه بتبصلي كده ليه؟
علي : هههههههههههه
خضتيني أنا قولت فقدتي الذاكرة ولا ايه.
رُقية : طب ابعد شويه.
علي : هههههههههههه
ألف مبروك يا عروسة.
رُقية : علي أنت متأكد إننا اتجوزنا؟
علي : هههههههههههه
كلمي مامتك واسأليها.
رُقية : اكلم مامي اقولها ايه وأنا بايته بره البيت.
علي : هههههههههههه
حلوة دي امال عاوزه بعد ما اتجوزنا تباتي في بيتكم؟!
قومي بقى أنا واقع من الجوع حضرت الفطار وقاعد جنبك مستني تقومي طولتي في النوم قولت مبدهاش بقى.
رُقية : طب ممكن تخرج.
علي : أخرج ليه؟
رُقية : كده.
علي : كده ليه بقى ها
مفيش حد غريب وبعدين مغطيه دماغك بالبتاع دا ليه خايفه تكشفي شعرك قدامي؟!
رُقية : ما أنا بقول الاحتياط واجب لتكون بتكدب عليه.
علي : هههههههههههه
انتي لسه مش مستوعبه إننا اتجوزنا بجد؟!
رُقية : ايوه أصل الموضوع جديد عليه ومش قادرة أفهم أنا ازاي نمت هنا.
علي : هههههههههههه
لا انتي حالتك صعبة قوي
اقولك أنا هسيبك نص ساعة كده تقومي تاخدي شاور وتغيري هدومك يمكن المياه تفوقك.
رُقية : ياريت واقفل الباب بالمرة.
علي : حاضر.. هسايرك بس النهاردا اما اشوف اخرتها ايه.
رُقية : طب يلا قوم بقى.
علي بابتسامة : حاضر.. بس هي نص ساعة متتأخريش.
____________
أنت تقرأ
أنت قلبي الجزء الثالث
Werewolf(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
