أنت قلبي الجزء الثالث

الحلقة ١٤٣

#انت_قلبي٣
__________
الحلقة ١٤٣

في شقة حازم.
ندى : هههههههههههه
فريدة : بتضحكي على ايه دلوقت أنا عاوزه أفهم؟!
ندى : هههههههه في مثل كده بيقول اخطب لبنتك ولا تخطبش لـ ابنك.
فريدة : يعني ايه؟
ندى : يعني تسيبي ابنك في حاله محمد في خامسه طب ودي كلية محتاجه مذاكرة وتركيز جامد وانتي عماله تدوريله على عروسة!
ولا شوفتي صحابك ولادهم بيتجوزوا غيرتي انتي كمان وعاوزه تعملي زيهم؟!
فريدة : كلامك في تلميحات كده مش لطيفه خُدي بالك أنا مبغرش من حد حتى لو كان قريب مني زيك مثلا.
ندى : حلو اعملي زيي بقى اهو ابني أكبر من ابنك وسيباه براحته.
فريدة : هو أنا بقول له روح اتجوز أنا عاوزاه يخطب دلوقت علشان أول ما يتخرج يتجوز على طول.
ندى : هههههههههههه ليه هو بنت ولا ايه؟!
طب البنات بتتخرج وتتجوز علشان مش محتاجه تكون نفسها وتجيب شقة وشبكة والذي منه باباها بيروح يجيبلها الحاجات اللي بقت على العروسة غصب كده واقتدار وخلاص خلصنا إنما ابنك محتاج يكمل دراسته ويشتغل ويكون نفسه علشان يحس بقيمة القرش.
فريدة : مش ممكن كريم قاعد قدامي دلوقت وهو اللي بيتكلم.
ندى : هههههههههههه طب كويس إن دا نفس رأي جوزك أنا كده عرفت إني صح لإن جوزك تفكيره عاقل مش زيك.
فريدة : فيها ايه لما اكون عاوزه أفرح بـ ابني واجوزه بدري وأفرح بـ أولاده.
ندى : يا حبيبتي مفيهاش حاجه بس هو اللي يجي يقولك الكلام ده مش انتي اللي تفرضي عليه رأيك.
فريدة : هقولك حاجه يا ندى يمكن لـ أول مرة أقولها أنا أوقات بيصعب عليه كريم وبقول لو كان اتجوز بدري شويه كان زمانه دلوقت فرحان بـ أحفاده.
ندى : مكنتيش هتبقي مراته عارفه ليه لانك كنتي صغيرة دا نصيب يا فريدة إنه يتجوز في السن دا علشان تكوني انتي نفسك كبرتي وتبقى من نصيبه يبقى بلاش التفكير بتاعك ده وبلاش حتى تلمحي لجوزك بالكلام ده هو مش عيب يعني فيه أي واحدة كانت تتمناه بس دا النصيب علشان تبقوا لبعض.
فريدة : يا حبيبتي فاهمه كل ده ولو الزمن رجع لورا مش هختار غير كريم بالعكس أنا ندمانه قوي إني كنت أوقات ساذجه وعقلي صغير ومشيت كتير ورا قلبي وضيع وقت وكنت هضيعه كمان من ايدي.
ندى : طيب يبقى تهدي كده وتبطلي تفكيرك ده وسيبي ابنك يختار براحته وعلى مهله بلاش السربعه بتاعتك دي.
فريدة : عملتوا ايه في موضوع أنس ده؟
ندى : تعرفي إنه مبقاش يتكلم معايا في الموضوع ده ولا أنا بسأله اصلا شكله نسيها.
فريدة : تفتكري؟
_____________
في شقة طارق.
داليا : كويس إني لاقيتك وأنا جايه عماله أفكر وأقول لنفسي يا ترى هروح الاقيها ولا لأ.
هنادي : اقعدي استريحي يا داليا تشربي ايه؟
داليا : ولا حاجه
اقعدي يا هنادي عاوزه اتكلم معاكي.
هنادي : طيب ثواني وجايه.
داليا : متتعبيش نفسك أنا جايه اقعد معاكي شويه.
كانت هنادي دخلت المطبخ.
_________
في شقة إياد.
منه : أنا عارفه يا سهر إن دا غصب عنك بس انتي سامحتي الكل جايه على سلمى يعني ومش قادرة تسامحيها!
سهر : يمكن علشان اللي ظلموني مكنوش بيحبوني من الأول عمره ما فهموني ولا عاشوا معايا زيها ولا اتقسمت معاهم في طبق ولقمه مع بعض مكنتش بقعد طول احكي معاهم زيها ولا سري كان مع حد غيرها.
منه : بس سامحتي آسر يا سهر.
سهر : آسر عمل حاجات كتير علشاني يا منه وجعني اه لما اتجوز عليه واتوجعت أكتر لما شك فيه بس دا كان موضوع تاني من تأليف وإخراج مامته يلا بقى اهي ماتت الواحد مش عاوز يغلط في الأموات جوازه من هايدي أكتر حاجه ندم عليها عمره كله ولاني عيشت دا معاه فبقولك الكلام اللي عيشته وحسيته بجد هو تعبان أكتر مني لكن سلمى كان ايه عذرها يا منه ممكن تفهميني ايه عذرها بالظبط أنا لا ظلمتها ولا جيت عليها ولا اهملتها لإني مقطعتش صلة الرحم اللي بينا ولحد الآن مقطعتهاش ولا هيحصل بس كل اللي فيها إني بقيت اتجنب الكلام معاها خايفه أرجع معاها زي الأول توجعني تاني بتدخلها في تفاصيل حياتي بنصايحها على كل كبيرة وصغيرة اللي ينفع واللي مينفعش أنا مبكرهاش وهتفضل ذكرياتنا مع بعض زي ما هي بس نرجع زي الزمان لا مش هقدر.
منه : خلاص اقعدي رايحه فين؟
سهر : هعدي اقعد مع مليكة شويه.
منه : طيب خلاص براحتك.
_________
في شقة طارق.
داليا بتبكي : لا يا هنادي كنت فاكرة إنك فهماني
لإن دي مش عشرة سنة ولا اتنين احنا صحاب من يجي عشرين سنة مش معقول كل السنين دي ومعرفتنيش أنا اضايق منك وتبقي هم تقيل على قلبي أنا بجد مش عارفه هنسى الكلام اللي قولتيه دا ازاي.
هنادي : داليا أنا مش قصدي حاجه ومهما كان البني آدم تقيل برضه وكل واحدة ليها بيتها وولادها ومش عاوزه وجع دماغ احنا نتقابل اه نهزر ونضحك مع بعض بس في الحزن كل واحد مفروض يشيل همه لوحده.
داليا : من امتى الكلام دا يا هنادي ما احنا طول عمرنا من أول ما شوفت انتي وياسمين وأمل وسهر وفريدة فرحنا وحزننا مع بعض كلام جديد ده.
هنادي : مش عاوزه اتقل على حد يا داليا أنا كده مستريحه أكتر.
داليا : بتضحكي على نفسك يا هنادي يا ستي لو مزعلكش قوي نصيحتي ليكي إنك تتجوزي اعتبري مقولتش حاجه ودي حياتك وانتي حره فيها لكن متعملهاش مشكلة بالشكل دا يا هنادي.
هنادي : يا حبيبتي ولا مشكلة ولا حاجه ولا أنا جيبت سيرة الموضوع ده كل اللي قولته لـ أمل إني مش عاوزه اتقل عليكم وكتر خير الأستاذ مجدي هو وقف جنبي كتير وقدرت اخد الأرض وبيعتهم واهو استفدت بفلوسهم وإن كان على محمود اهو مسجون والقضية لسه شغاله والمحامي طمني وقال لي هياخد في حكم مش قليل دا شروع في قتل.
داليا : زي ما قال مجدي بالظبط انتي قومتي محامي؟
هنادي : اه.
داليا : طيب براحتك بس ياريت ميكونش القرار دا وراه زعل مننا بجد مجدي لو عرف هيزعل قوي ليه بتعملي فرق ما بينا يا هنادي وهو احنا مش أخوات؟
هنادي : ايوه يا داليا بس خلينا كده حبايب أحسن كل واحد فيه اللي مكفيه وانتي يا حبيبتي مش ناقصه وجوزك عنده شغله مش عاوزه أوجع دماغه بمشاكلي.
_________
في شقة سيف.
سهر قاعدة في الريسبشن بعد ما فتح لها يوسف.
مليكة خارجه من اوضتها وبصوت ناعس : ثواني يا مامي هغسل وشي وجايه.
سهر : يا حبيبتي.. انتي كنتي نايمه؟
خلاص خليكي أنا ماشيه.
مليكة : لأ ماشيه فين بس أنا أصلا كنت هقوم دلوقت علشان يوسف لسه معملش الواجب بتاعه وكمان حلا صحيت يوسف متدخلش تجيبها تعالى هنا.
سهر : طيب اديني قاعدة لما تيجي.
دخلت مليكة غسلت وشها وعملت حاجه لمامتها تشربها وقعدت تدردش معاها ويوسف بيكتب الواجب بتاعه جنبها.
سهر : هاتي حلا وافتحي الباب انتي.
مليكة :"يوسف اقعد مكانك مليون مرة اقولك متفتحش الباب.
بتفتح مليكة الباب كان سيف جايب حاجات معاه وهو راجع من الشغل ومعرفش يفتح بالمفتاح اللي معاه.
سيف بابتسامة : سلام عليكم.. ازيك يا طنط.
ويضع الحاجه على السفرة
ويقرب يسلم على سهر.
سهر : وعليكم السلام.. ازيك يا سيف؟
يسلم عليها ويقعد وتدخل مليكة تبدأ تجهز الغدا.
سهر : مليكة أنا ماشيه بقى عاوزه حاجه؟
سيف : رايحه فين يا طنط هنتغدا مع بعض.
سهر : لا معلش علشان مجدي زمانه راجع من بره.
مليكة : رايحه فين بس يا مامي الغدا خلص هنقعد ناكل مع بعض وبعدين مجدي يعني مش صغير.
سهر : معلش أصل بيضايق لما يرجع ميلاقيش حد في البيت انتي عارفه باباكي في الشركة ومبيرجعش غير متأخر.
سيف : معلش يا طنط نص ساعة يعني مش هيأخروا حضرتك يرضيكي يوسف يزعل دا عمال يخلص كتابة الواجب بسرعة علشان يقعد معاكي.
سهر :"بس مش هينفع أنا مش عاوزه اتأخر.
سيف : مليكة تعالي لمامتك مصممه تخرج.
مليكة : علشان خاطري بقى يا مامي اقعدي معانا أنا بجهز السفرة اهو يوسف تعالى ساعدني وحط اطباق السلطة.
ترك يوسف الكتابة وجرى بسرعة على المطبخ.
سهر : طب خُدي منه يا مليكة.
يوسف خارجه ومعاه طبقين سلطة صغيرين : متخافيش أنا بقيت بساعد مامي ومش بوقع حاجه.
سهر بابتسامة : شاطر يا سوفه هات بوسه بقى.
يقرب خده من سهر وتطبع قُبله على خده.
سيف : بعد إذنك يا طنط هدخل بس اغير هدومي.
سهر : اتفضل يا ابني.
سيف : حاسب يا يوسف
مليكة كفاية الأطباق اللي اخدها متخلهوش يشيل حاجه تانية.
مليكة : لأ الطبق دا سُخن يا حبيبي يروح بقى اغسل ايدك علشان تاكل.
يوسف : حاضر.
سهر : تعالي يا مليكة لبنتك شكلها جعانه.
مليكة : حاضر يا مامي جايه.
____________
في شركة وليد.
وليد : بصراحة كنت مستني تيجي ولا على الأقل تكلمني علشان نوصل لحل يرضي جميع الأطراف.
آسر : وليد أنت بجد مصدق نفسك يعني أنت فاهم إن ليك حق عندي وأنا طول السنين دي ظالمك فوق لنفسك أنا لسه لحد دلوقت عامل حساب الاخوة اللي بينا بلاش نخسر بعض على حاجات تافهه.
وليد : خلاص طالما شايفها تافهه يبقى رافض ليه نتقاسم فيها.
آسر : لإنها ببساطة مش من حقك أنا كل اللي اخدته هو جزء من الفلوس اللي رديتها لمنه لما جه قسم كل ما يملك بيني وبينك وتجاهل أختنا لإنها وقفت في صف جوزها ودا كان شيء طبيعي لإنه ابن ناس ومحافظ على أختك ومشاكلي مع بابا منه ملهاش علاقة بيها لكن علشان ترجع بعد السنين دي كلها تقولي إنك ليك حق في الفيلا اللي هي أساسا بتاعة أمي يبقى أنت كده يا وليد ماشي في طريق غلط ومصمم إننا نخسر بعض.
وليد : آسر أنت عارف كويس قوي إن الفيلا دي في الأساس بتاعة بابا كل اللي حصل إن بابا سابها لمامتك تعيش فيها علشان كنت في حضانتها يعني كان مفروض ردتيها لينا من زمان أو جمعتنا كده وقولت لنا نصيبكم فيها أهو.
آسر : نصيب ايه يا ابني هو أنت فاهم علشان مبدققش معاك ومش ماسك ورقة وقلم وحسيتها بالمليم وقتها إني هوافق كده على ملكي اللي ورثته عن أمي؟!
وليد : مامتك اشتريتها من بابا لأ قبل ما ترد هعدل السؤال دفعت تمنها يعني؟
آسر : دفعت أو مدفعتش بابا كتبها ليها بكامل ارادته
من غير ما حد يجبره يعمل كده ولحد ما توفي متكلمش في حاجه زي كده جاي أنت دلوقت عاوز تدفعني تمنها بأمارة وشايف الحق معاك قوي
طب أنا لو مكانك مكونتش اتكلمت في حاجه زي كده عيب عيب قوي يا وليد اللي بتعمله ده عاوز فلوس قول لي وأنا من عنيه الاتنين اللي أنت عاوزه لكن الطريقة دي هتخسرنا بعض زي ما قولت لك.
وليد : متحاولش يا آسر مش يبقى حقي قدام عنيه وتسلفهولي وتبقى بجميله كمان لا يا حبيبي مش هيحصل.
خرج آسر من مكتب وليد من غير ما يرد عليه قابل مدحت تحت متكلمش معاه ركب عربيته واتجه ناحية الشركة بتاعته.
___________
في فيلا مراد.
أمل : يلا بقى يا بنتي
مش قولتي خارجة تشتري شوية حاجات؟
زينة : حاضر يا مامي جايه أهو لو تعبانه بلاش أنا هكلم حد من صحابي نخرج مع بعض.
أمل : لا يا حبيبتي انتي لما بتخرجي مع صحابك تعملوا شوبنج بترجعيلي متأخر رجلي على رجلك بقى يلا.
زينة : اوك.. يلا بينا بس افتكري إن حضرتك اللي صممتي تخرجي معايا.
أمل : اه يا خوفي منك تلففيني كعب داير وفي الأخر تشتريلي حاجات غريبه متتلبسش.
زينة : مامي يا حبيبتي أنا هشتري الراحة اللي الاقي نفسي فيها.. اوك؟
علشان بس هناك الحوار ميطورش ونضطر نحل مشاكلنا في القسم.
أمل بابتسامة : قدامي خلصيني.
زينة : وعلى ايه بس ما تقعدي في البيت معززه مكرمه وأنا هجيبلك الحاجه لحد عندك تشوفيها من غير كل التعب ده.
أمل : يلا بقولك.
زينة : حاضر متقوليش بقى واحنا راجعين أنا اللي جيبته لنفسي.
________
في الصيدلية.
كريم : ايه يا علاء مردتش يعني.
علاء : هرد أقول ايه بس يا كريم؟
كريم : هتتجوز وترجعها لعصمتك تاني ولا هتنهي إجراءات الطلاق وكل واحد يشوف مصلحته؟
علاء : ليه هي هتتجوز؟
كريم : دي حاجه لا أنا ولا أنت لينا دخل بيها أنت هتعمل ايه؟
علاء : منكرش إن صعبان عليه العشرة اللي كانت بينا ومفيش حد أبدًا يحب حياته الزوجية تنتهي النهاية دي لكن كمان مش قادر اتقبل وجودها في حياتي والمشاكل اللي كنت عايش فيها كريم في حاجات كتير تعبتني نفسيًا في العلاقة دي بس أنا هصون العشرة للنهاية وهخلص معاها وتاخد كل حقوقها..
كريم : خلاص اللي تشوفه أنا ماشي.
علاء : هو مين اللي كلمك بالظبط معتز ولا شهد؟
كريم : هتفرق معاك؟
علاء : أحب أعرف.
كريم : صاحبك اللي أنت مخاصمه.
علاء : أنا مخاصمتش حد هو اللي واخد جنب من وقتها وبحاول أكلمه مش عاوز يصفي ولا يصدق إن كل شيء نصيب.
كريم : بلاش تخسر كل حاجه يا علاء.. سلام عليكم.
علاء : وعليكم السلام.
__________
في المحل.
أمل واقفه أمام اوضة اللبس : يا بنتي يلا بقى كل دا ولسه مختارتيش حاجه؟!
زينة : هعمل ايه مش لاقيه حاجه مناسبة.
أمل : طب اختارلك أنا؟
زينة : اوك.. خلاص مضطره بقى.
أمل : همشي واسيبك.
زينة : خلاص بقى يا مامي شوفي أي حاجه على ذوقك.