أنت قلبي الجزء الثالث

الحلقة ١١٠

#انت_قلبي٣
___________
الحلقة ١١٠

في شقة رُفيدة.
راندة : ليه يا سمر مقولتيش لمامتك الحقيقة ولا خوفتي تعرف؟؟
سمر : اقول لها ايه؟
راندة : تقوللها إنك انتي اللي متعلقه بدكتور كريم مش العكس بدل ما تروح تعمل مشكلة للراجل في بيته.
سمر : وتفتكري يا طنط مامي متعرفش؟!
لأ مامي عارفه كل حاجة بس حبيت تصدق علشان هي عاوزه تصدق إن هو اللي علقني بيه.
راندة : ومامتك هتبقى عاوزه تصدق الكلام دا ليه يا حبيبتي؟
سمر : علشان مامي كمان اتعلقت بيه هو صحيح يبان من تعامله وذوقه وأدبه معانا إنه واحد مننا وفعلاً مكانش ينفع غير يبقى أب ليه لكن أنا فضلت أعيش في قصة خياليه اخترعتها من دماغي علشان كان نفسي دا يبقى بابي وفي نفس الوقت ينفع اكمل باقي حياتي معاه ما هو لو بابي فعلا هيجي وقت وارتبط بحد تاني وابعد عنه فكنت عاوزه إنه يقوم بدورين الأب الحنين والحبيب اللي يجي يخطفني على الحصان الأبيض.
راندة : غريبة طب ما هو زين يعتبر قريب من سنك وكان ممكن يقوم بالدور ده بدل والدة.
سمر : لا لا زين مش زي باباه مش هيعرف يديني الحب اللي محتاجاه أنا عاوزه أب وحبيب وصاحب وكل حاجة.
راندة : طب بتعيطي ليه دلوقت؟
سمر : علشان أنا مكانش قصدي أذيه بالعكس أنا بخاف عليه ومتمناش أبدًا يحصله حاجة وحشه علشان هو يستاهل كل خير بس لاقيت نفسي متغاظه من اللي قاله ليه علشان كده روحت قولت لمامي الكلام ده ولاني عارفه مامي مستنيه أي حاجة علشان تنتقم من طنط فريدة بسبب حب جوزها ليها وإنه ولا مرة حاول يستغل حبي ليه واهتمام مامي بيه إنه يفضل على اتصال بينا طول الوقت بالعكس أول ما حس إن العلاقة ماشيه في طريق هو مش حابه بعد عننا تمامًا ودا زود تعلقي بيه لإن قليل اللي بيعمل كده دلوقت حد يرفض يتحب من بنت في عمر بنته ويحاول يستغل الحب ده ويحس إنه لسه شاب بنت صغيرة بتتعلق بيه لكن دا معملش كده وفضل يحافظ على بيته
أنا نفسي اعرف ازاي يتمسك بيها ويحبها وهي اللي من سن مامي يعني تعتبر بالنسبة ليه ست كبيرة ويرفضني أنا؟!
راندة : دا أمر طبيعي عاوزاه ميتمسكش بالست اللي عاشت معاه على المر قبل الحلو عاوزاه ميتمسكش بـ أم اولادة اللي ممكن تكون أول حب في حياته ميتمسكش باللي عاشت معاه شبابه وبتكمل دلوقت اللي باقي من عمرها معاه انتي لو عندك بيت قديم فيه كل ذكرياتك مع بابا وماما و اخوكي وعيشتي فيه طفولتك ولعبك ومذاكرتك وأصحابك وكل حاجة حلوة عيشتيها زمان تحبي تستبدليه ببيت جديد شكله حلو من برة لكن مفيهوش حياة ولا ذكريات جميلة تفتكريها وانتي بتتمشي ما بين جدرانه وتفتكري كل لحظة فرحتي وبكيتي فيها تفتكري الناس الجميلة اللي كانت عايشه فيه.. ها تختاري ايه؟
سمر : هو دا بالظبط اللي بيخلي حد يتمسك بالقديم لإنه بقى جزء منه.
راندة : بالظبط كده ودا اللي هيحصل معاكي
مش عاوزاكي تحزني وتكتئبي بالعكس ابتسمي للدنيا انتي لسه صغيرة وبكرة تقابلي اللي يحبك وتحبيه ووقتها هتبقي مقتنعه إن هو دا الاختيار الصح بس قبل ما نقابل الشاب ده عاوزاكي تهتمي بدراستك وتاخدي بالك من نفسك.
سمر : دا نفس اللي قاله دكتور كريم وكان نفسي مامي هي اللي تقولهولي صحيح قالته زمان بس مكانش دا ردها لما حكيت لها الموقف الأخير اللي كان بيني وبين دكتور كريم وحسيت كأن ما صدقت علشان تروح تعمله مشكلة.
راندة : احنا عاوزين ننسى بقى الموضوع ده ومنفكرش فيه تاني ونخلي بالنا من نفسنا.
سمر : طنط أنا بحبك قوي.
راندة : وأنا كمان بحبك قوي قوي يا سمورة.
سمر : هو حضرتك ليه متجوزتيش؟
سكت راندة بحزن.
سمر : أنا آسفة بس هو الفضول ده اللي بيوقعني في المشاكل.
راندة : بقولك ايه ما تيجي ننزل نتمشى تحت وأاكلك آيس كريم.
سمر : في البرد ده؟!
راندة : دا مفيش احلي من كده يلا بينا.
سمر : يلا بينا.
راندة : هههههههههههه
_______
في مطعم ياسمين.
خطيب هند : لأ مش هو دا اللي طلبته أنت شكلك كده شارب حاجة ومش شايف شغلك كويس.
الويتر : حضرتك هو دا الاوردر اللي طلبته ومفيش داعي للغلط.
هند : شوف مين مدير المخروبه دي يجي يحل المشكلة دي.
ياسمين بابتسامة : أي خدمة يافندم أنا مديرة وصاحبة المطعم ده في أي مشكلة؟
هند نظرت لياسمين من فوق لتحت : طب يا ست المديرة مش تبقي تعيني ناس مصحصحه مش شاربه ولا دريانه بنفسها.
الويتر : لو سمحتي قولت لحضراتكم مفيش داعي للغلط.
خطيب هند نظر لياسمين : باين عليكي ست كُمل وبنت ناس و....
تقاطعه هند لإنها عارفه عينه فارغه : شوفي يا ست ياسمين دي مش أول مرة اجي هنا واتعامل المعاملة دي فلو حضرتك قاصدة تعملي كده من الأول كده قولي من على الباب متدخليش بدل ما تسرقوا فلوسنا وتنزلوا طلبات احنا مطلبنهاش.
الويتر : يا مدام ولا يا آنسة هو دا الاوردر اللي طلبه حضرته أنا هنزلكم ليه حاجة مطلبتوهاش؟!
ياسمين : خلاص يا لؤي شوف طلباتهم ايه.
خطيب هند : تمام عداكي العيب يا ست الكل شوف
يا ابني هاتلنا.....