أنت قلبي الجزء الثالث

الحلقة ١٣٥

#انت_قلبي٣
__________
الحلقة ١٣٥

بعد مرور اسبوع من الأحداث.
في الجامعة.
دكتور شاب كان بيدرس لمليكة في الكلية : بجد أنا حزين جدًا يا مليكة انتي اتأخرتي كتير عن زمايلك مع إنك كنتي من الاوائل على دفعتك زمايلك بيحضروا الدكتوراه دلوقت وانتي لسه في رسالة الماجستير وكمان جايه تأجلي.
مليكة : معلش يا دكتور ظروف بقى.
الدكتور : متزعليش مني بس أنا بكلمك كده لإني خايف على مصلحتك وكنت متوسم فيكي مستقبل غير دا خالص.
مليكة : كل واحد بياخد نصيبه.
الدكتور : حاولي تعوضي بقى.
مليكة : حاضر.
الدكتور : اتفضلي واضح إنك مستعجله.
مليكة : بعد اذنك.

وتركته مليكة وهي مضايقه.
شذى : ايه يا بنتي عماله أشاور لك ايه مش شايفاني؟
مين اللي كنتي واقفه معاه ده دكتور أحمد؟
مليكة : اه وياريتني طنشته ومشيت على طول أنا عارفه ايه خلاني التفت لما نادى عليه!
شذى : ايه قال لك حاجه ضايقتك؟
مليكة : خلاني مش طايقه نفسي وخلاني عندي طاقة سلبيه تكفي إن أولع في الدنيا بحالها.
شذى : طب اهدي بس وتعالي نشرب حاجه.

في الكافتيريا.
شذى : ها تشربي ايه؟
مليكة : ما انتي عارفه.
شذى : عصير برتقان فريش يا شذى وتقوليها كده وانتي متعصبه من كتر ما كل يوم أسألك وهي نفس الإجابة بتاعتك ههههههههههههه كانت أيام جميلة.
مليكة : فعلا كانت.
شذى : لا بقولك ايه أنا هروح اجيب الحاجه ارجع الاقيكي فكتي كده امال.
وقامت شذى.
التليفون.. يرن📞
مليكة : ايوه يا مامي الولاد كويسين؟
سهر : يوسف مبطلش عياط كلميه علشان يهدا.
مليكة : مالك يا سوفه بتعيط ليه يا حبيبي؟
يوسف : انتي فين تعالي بقى سيبتيني نايم وقومتي مشيتي صح؟
مليكة : مش أنت عند أنه وبتلعب بالعجله في الجنينه وفرحان؟
يوسف : لأ مش فرحان أنا عاوزك تيجي دلوقت.
شذى : حاضر يا حبيبي جايه.
يوسف : أمتى؟
مليكة : شويه كده.
يوسف : خمس دقايق يعني؟
مليكة : ها!
بص هما نص ساعة.
يوسف : يعني كام دقيقة؟
مليكة : تلاتين.
يوسف : إيه!
لا كتير تعالي في سبعه.
مليكة : طيب اديني أنه.
سهر : ايوه يا مليكة.
مليكة : معلش يا مامي استحملي يوسف بس نص ساعة وهكون عندك.
سهر : يا بنتي ما أنا مستحمله بس يبطل عياط.
مليكة : معلش علشان خاطري.
سهر : حاضر يا مليكة هلهيه بأي حاجه عقبال ما تيجي.
مليكة : حلا صحيت؟
سهر : لأ نايمه من ساعة ما خرجتي.
مليكة : اه يا خوفي تكون بتحضرلي لسهرة الليله.
شذى : البرتقان بتاعك.
سهر : شذى دي؟
شذى : ازيك يا طنط؟
مليكة تعطيها التليفون.
سهر : حبيبتي تسلمي أنا بخير انتي اللي اخبارك ايه؟
شذى : تمام عمو والعيله عندك أخبارهم ايه؟
سهر : كلنا كويسين ما تجيبي مليكة معاكي وتيجي.
شذى : بنتك بخيله قالت تعزمني هنا في الجامعة علشان مجيش عندك  ههههههههههههه
تخبطها مليكة في كتفها.
سهر : هههههههههههه
مليكة! مش ممكن دي كريمة جدًا هاتيها وتعالي.
شذى : هستأذن زوجي العزيز بقى الأول.
سهر : خلاص وأنا قاعدة اهو مستنيه.
مليكة : هاتي التليفون بقى يا رغايه.
شذى : سامعه يا طنط؟!
سهر : سامعه هههههههه معلش مليكة بتحب تهزر.
مليكة : ايوه يا مامي
خلي بالك من يوسف وحلا ولما تصحى الببرونه عندك نصها بس مش عاوزاها تشبع لحد ما اجي.
سهر : حاضر.
مليكة : هشرب البرتقان اللي هتذلني بيه ده واجي.
شذى : لا يا حبيبتي دا على حسابك.
سهر : هههههههههههه مع السلامة خُدي بالك وانتي جايه وهاتي شذى معاكي.
مليكة : حاضر اهي قامت تكلم جوزها أما نشوف هيوافق ولا لأ.
سهر : تمام مع السلامة.
وقفلت سهر.
مليكة بتلتفت تشوف شذى راحت فين تلمح الدكتور اللي كان بيكلمها من شويه.
تشرب العصير وتقوم.
شذى تقابلها : ايه رايحه فين؟
مليكة : اشربي العصير بتاعك وحصليني هروح اشغل العربية عقبال ما تخلصي.
شذى : دفعت الحساب على فكرة.
مليكة بابتسامة : ما أنا عارفه جايه معايا؟
شذى : اه كلمت محمود وقال لي روحي.
مليكة : طب كويس ابقي حصليني بقى.
شذى : طب استني.
مليكة : لأ اشربي براحتك وتعالي.
يلمحها الدكتور وهو قاعد بيشرب القهوة تعدي من أمامه وتعمل نفسها مش واخده بالها.
__________
في المستشفى.
وائل : هنادي بتتكلم صح يا أمه.
سعدية : يا ابني ما تريحوا نفسكو وتسيبوني براحتي.
وائل : مش هنكون مطمنين بعد اللي حصل يا أمه.
سعدية : عايزيني اسيب بيتي علشان يتقال إنه طفشنا من البلد يا وائل؟!
وائل : مين دا اللي يطفشنا من البلد انتي لو عاوزه بيت جديد اجيبلك أحسن بيت في البلد لأ اشتريلك أرض وابنيلك بيت كبير بس أنا من رأيي بلاش قعاد في البلد لوحدك انتي محتاجه اللي يخدمك وهنادي سداده.
سعدية : جربت ومرتحتش هناك.
وائل : طب ما تحاولي تتأقلمي كده وانتي هتلاقي الحياه هناك حلوة.
سعدية : لأ بكون محبوسه هناك ومش باخد حريتي في بيتي بعمل اللي أنا عاوزاه أختك لو فتحت باب الشقة تجري تدور عليه.
وائل : ما هو يا أمه مينفعش انتي مش عارفه المكان هناك.
سعدية : يبقى خليني في بلدي اللي حافظاه شبر شبر.
وائل : يعني مفيش فايدة؟
سعدية : ايوه
اني مش هسيب بلدي واروح أسكن في مصر.
__________
في بيت العمدة.
صباح : هي حصلت يا نرمين حتة المفعوصه بنت هنادي تروح تبلغ المركز في ابن اخوكي؟!
نرمين : أما أمرك عجيب يا صباح بنت هنادي وابن اخوكي!
طب متعرفيش إن بنت هنادي تبقى بنت اخوكي برضو ولا ايه ولا هنادي خلفتها كده لوحدها؟!
كوثر : لا خلفها اخوكي من جوازة الندامه الواحد بس ايده تطول هنادي دي كان قطعها.
حامد يدخل : ليه يا عمتي عملت ايه مرات عمي طارق البلد كلها بتقول إن محمود ابن عمي هو اللي ورا الحريقة اللي حصلت في بيت عمي كامل وانتقلت للبيوت اللي جارها مش مريم بس
وهي اتهمته بناء على تهديدات كتير قبل كده
يعني هو اللي بدأ من الأول وهما بيدافعوا عن نفسهم زي كل السنين اللي فاتت ما كانوا بيعملوا يتهاجموا ويتعدى عليهم
ولما يصرخوا نقولهم أنتو السبب ما الواحد يفكر الأول.
صباح : تقصد ايه يا حامد احنا مبنفكرش ولا عندنا عقل؟!
حامد : اني مقولتش كده يا عمتي.
كوثر : ايه يا نرمين دلوقت بتدافعي عن هنادي وولادها بعد ما رجعتي لـ أخوها ايه خايفه على عمة ابنك؟
نرمين : خايفه عليها ولا مش خايفه ده يزعلك في ايه محمود لو معملش حاجه يظهر نفسه واحنا هندافع عنه لكن هو هربان يبقى ده معناه ايه؟
صباح : معناه إنه خايف يا نرمين مش لازم يكون عامل مصيبه.
حامد : خلاص يا عمتي يظهر نفسه واحنا هنوقف جنبه لو مظلوم.
سعيد يخرج من اوضته : بتزعقي ليه صباح انتي وكوثر؟
كوثر : أنت صاحي يا سعيد؟
سألت مرات ابنك قالت عمي نايم.
سعيد : كنت مريح شويه جوه مالكو حصل ايه؟
صباح : ليه هو أنت متعرفش إن الحكومة بتدور على محمود ابن أخوك؟!
سعيد : عندي خبر بالموضوع ده بس احنا في ايدنا ايه نعمله هو اللي مش عاوز يبطل مشاكل مع مرات اخوكي وأولاده.
كوثر : قومي يا صباح نمشي من هنا دول كلكم اتكاتروا على الواد علشان المصلحه.
سعيد : مصلحتنا إننا أهل يا كوثر وميصحش اللي بيحصل بينا ده أهل البلد بيتكلموا في حقنا دلوقت وبيقولوا إننا بنستقوى على أرملة هي وولادها
وأولادها دول يبقوا مين؟!
يبقوا ولاد اخونا ابن العمدة.
كوثر : ولاد هنادي مش ولاد العمدة يا سعيد.
نرمين : هههههههههههه امال ولاد مين يا كوثر قولي الكلام ده لـ أي واحد في البلد هيضحك علينا مش عليكي انتي بس
ولاد العمدة مبيتبروش من ولادهم يا كوثر انتي وصباح.
صباح : ولاد العمدة كبار وصغيرين من أصل وحسب ونسب مش من ولاد كامل الفقير الكحيان.
نرمين : فقير مغلطتيش بس اخوكي حب بنته
واتجوزها وخلف منها دكتور عقبال ما تشوفي ولاد ولادك زيه وبنت بكرة تبقى مدرسة تعلم عيال عيالك برضو.
كوثر : وماله هيفضلوا ولاد كامل برضو يلا يا صباح.
تاخد كوثر بـ ايد صباح
اللي كان حد من ولادها مستني بره.
حامد : إني مش قادر افهم عماتي بيعملوا كده ليه؟
سعيد : ادعيلهم يا ابني نفوسهم تهدا علشان هما الخسرانين.
__________
في فيلا كريم.
فريدة وهي تعبانه : سكري كام يا كريم؟
كريم : نازل شويه بس متقلقيش هتاخدي الدوا ويتظبط دلوقت.
فريدة بتاخد الدوا وتبدأ أكل.
فريدة : هو أنا هفُك الجبس دا امتى؟
كريم : الاسبوع الجاي.
فريدة : السبت؟
كريم : لا الخميس.
فريدة بتنهيده : ناولني المياه دي.
كريم : اتفضلي.
فريدة : أنت بتعمل ايه
مالك مشغول بالتليفون قوي كده؟
كريم : مستني مكالمة مهمه.
فريدة : هي سارة عامله ايه؟
التفت لها كريم : سارة مين؟
فريدة : الدكتورة سارة ايه نسيتها؟
كريم : وانتي ايه اللي فكرك بيها؟
فريدة : يعني جات على بالي كده.
كريم : معرفش عنها حاجه من زمان.
فريدة : طب ما تكلمها معكش رقمها؟
كريم : لأ ولو معايا مش هكلمها يا فريدة.
فريدة : ليه مش تطمن عليها؟
كريم : واطمن عليها ليه هي مش عايشه مع جوزها وابنها؟!
لما تكون محتاجه مساعدة تبقى تتصل.
فريدة : ولو اتصلت؟
كريم : هرد يا فريدة واشوفها عاوزه ايه
ها في حاجه تانية؟
فريدة : لا متردش.
كريم : وبعدين معاكي بقى؟!
كملي أكلك يا حبيبتي علشان تنامي.
فريدة : كريم.
كريم : نعم.
فريدة : قرب عاوزه أقول لك حاجه.
كريم : حاضر.. اديني قربت اهوه عاوزه ايه بقى؟
فريدة : احضني.
كريم اتفاجئ من طلبها.
كريم : بس كده حاضر.
ويحضنها ويطبطب عليها.
كريم : حبيبتي مفيش في قلبي غيرك بلاش الأفكار الغريبه بتاعتك دي.
فريدة : يعني وأنت قاعد كده مجاش في دماغك واحدة كلمتها النهاردا؟
كريم : انتي عاوزه تدخلي في عقلي كمان؟!
ثم واحدة مين يعني كل اللي في المستشفى اما زمايلي أو مرضى.. بطلي بقى.
فريدة : بخاف عليك.
كريم : من ايه بقى؟!
فريدة : من نفسك يا حبيبي.
كريم : طب ممكن تخليكي في نفسك وتاخدي بالك من صحتك.
فريدة : بقيت بتقولها كتير اليومين دول.
كريم : هي ايه؟
فريدة : خلي بالك من صحتك.. كأنك عاوز تقول لي اتلهي في نفسك انتي عيانه.
وبتبكي فريدة.
نظر لها بدهشه : ايه اللي بتقوليه ده هو أنا لما انصحك تاخدي بالك من صحتك يبقى بقولك الكلام اللي بتقوليه ده؟!
فريدة : اه.
كريم : فريدة بلاش يا حبيبتي سوء الظن ده علشان هتتعبي.
فريدة : وكمان بقيت سيئة الظن؟!
كريم : في ايه يا فريدة انتي قالباها نكد ليه يا حبيبتي هرمونات برضو؟!
فريدة : اه اتريق على مشاعري براحتك.
كريم : لا بجد انتي معرفش مالك كل كلمة اقولها تعملي عليها حوار.
فريدة : وكمان بقيت بتاعت حوارات يا كريم؟!
كريم : طب استأذن بقى واسيبك تقعدي مع نفسك كده يمكن تهدي.
فريدة : اه تقصد أقعد أكل في نفسي صح؟!
ماشي يا كريم اتفضل سيبني لوحدي.
كريم قعد ونظر لها : ايه ساكته ليه ما تكملي
تقصد ايه يا كريم أنا رغايه؟!
ومش هنخلص بقى كل كلمة ليها رد غريب معرفش بتجبيه منين؟
فريدة لسه هتتكلم يقاطعها كريم.
كريم : وكمان بتتهمني بالجنون! هو ايه اللي ردودي دي بجيبها منين؟!
كملي انتي بقى.
فريدة : أنا ساكته اهو أنت اللي عمال تتكلم.
كريم : ما هو بسببك
مالك يا حبيبتي حصل لك ايه؟
فريدة : عايزة افُك الجبس دا بقى وانزل من السرير وأخرج من البيت ده خلاص اكتئبت.
كريم : ما قولت لك هتفُكي الجبس الاسبوع الجاي.
فريدة : كده يعتبر باقي اسبوعين احنا لسه في أول الاسبوع ودا هيتفك أخر الاسبوع الجاي.
كريم : بس يتفك على خير و الدكتور ميقولش يتجبس تاني اصبري بقى.
فريدة : شيل الأكل ده شبعت.
كريم : بالهنا والشفا.
فريدة : متشكره.
كريم : فُكيها بقى.
فريدة تبتسم : اهو.. كده كويس؟
كريم يقوم ياخد صنية الأكل وينزل يحطها في المطبخ.
________
في شركة مراد.
هشام (الأب) : خلاص كده استريحت عرفت اللي ليك واللي عليك زي ما كنت عاوز؟
هشام (الابن) : تمام بس ليه طلب كمان.
هشام (الأب) : اتفضل قول عاوز ايه تاني يا هشام طلباتك كترت.
هشام (الابن) : كنت عاوز حضرتك تخصم المبلغ ده من نصيبي في الشركة.
هشام (الأب) : معلش يعني أنت مالك بقى أخصم ولا مخصمش أنا حر اللي كنت طالبه حصل خلصنا بقى على كده.
هشام (الابن) : بس احنا كده معملناش حاجه يا بابي الهدف من اني أعرف ليه ايه وعليه ايه إن الجزء اللي عليه ده يتخصم من اللي ليه.
هشام (الأب) : بقولك ايه يا هشام أنا عندي شغل ممكن تتفضل كده بقى من غير طرود أنت معطلني.
هشام (الابن) : بابي علشان خاطري ريحني بقى.
هشام (الأب) : يا ابني وأنت تعبان في ايه هو أنت واخد حاجه مني غصب عني ولا أنت اخدتها بطيب خاطر مني؟
هشام (الابن) : يعني مفيش فايده؟
هشام (الأب) : هشام أنا عندي شغل.
هشام (الابن) : اوك.. بعد اذنك.
هشام (الأب) : استنى يا هشام.
هشام (الابن) وقف عند باب المكتب وهشام الأب راحله بيخبط على كتفه وياخده في حضنه : مش عاوز اسمع الكلام دا منك تاني الموضوع ده خلاص اتقفل.
هشام (الابن) : بس يا بابي أنا كنت...
يقاطعه هشام (الأب) : ولا كنت ولا مكونتش اتهينا.
هشام (الابن) : حاضر يا بابي.
هشام (الأب) : سلملي بقى على ريتاج ويمان وياسمين وابقوا تعالوا نتغدا مع بعض يوم الجُمعة.
هشام (الابن) بابتسامة : حاضر.
هشام (الأب) بمزح : طب يلا وريني عرض اكتافك.
هشام (الابن) : حاضر.. سلام عليكم.
هشام (الأب) : وعليكم السلام.
_______
في محل نادين.
هدى : لسه الباب ده متنضفش كويس.
اللي جايه تساعد هدى في تنضيف المحل :
حاضر يا مدام.
هدى بتقعد على المكتب.
هدى : ها يا فيروز كنا بنقول ايه؟
فيروز : كنتي بتقولي عاوزه تشتري نصيبي أنا وياسمين في المحل.
هدى : اه افتكرت بصي يا فيروز أنا هدفع المبلغ اللي تمنه الأستاذ إياد ولو شايفينه قليل خلاص ازود شويه.
فيروز : ايه اللي بتقوليه دا يا هدى احنا أخوات في الأول والأخر لا فلوس ولا أي حاجه هتفرق معانا
بس أنا ليه وجهة نظر بدل ما تزنقي نفسك ولا تطلبي فلوس من جوزك زي ما قولتي لأ أنا مش هبيع نصيبي انتي تديري المحل عادي ونصيبك ومقابل تعبك تاخديه.
هدى : أنا بتهزأ بقى.
فيروز : يا حبيبتي دا حقك ليه الحساسيه دي بقى؟
هدى : طب وياسمين رأيها ايه؟
فيروز : بصراحه أنا وياسمين متكلمناش في الموضوع ده فمش عارفه هي ناويه تعمل ايه بالظبط.
هدى : بصي يا فيروز أنا مش هزنق نفسي ولا حاجه لما قولت لك طلبت فلوس من معتز كنت بس بفضفض معاكي لكن أنا لما فكرت قررت إني أبيع حتة الأرض اللي طلعت لي ميراث من ماما هي مش كبيرة بس هتنفع والباقي هسدده لما المحل يتحرك شويه.
فيروز : تبيعي ايه لا طبعاً المحل هيفضل موجود مش هيتباع وانتي اللي هتديريه لا تبيعي بقى ولا تشتري خلي كل حاجه زي ما هي بس الأول نشوف ياسمين رأيها ايه.
هدى : خلاص ماشي.
_______
في شقة علاء.
علاء : وانتي ايه دخلك في الحوار ده ثم تعالي هنا قولي لي عرفتي منين اصلا إن معتز اخوكي طالب مني فلوس؟
شهد : عرفت وخلاص.
علاء : خلاص ملكيش فيه بقى.
شهد : عارف يا علاء لو عرفت إنك سلفت معتز المبلغ اللي هو عاوزه مش هقولك بقى هيحصل ايه.
علاء : هي حصلت كمان يا شهد تهدديني!
طب ايه رأيك بقى إن لو مش معايا المبلغ ده هروح استلفه واديه لمعتز بالعند فيكي بقى.
شهد : خلاص وقتها ابقى شوف هيحصل ايه يا علاء.
_______.
في فيلا آسر.
سهر : كتير كده يا مليكة ملك متسمعيش كلامها.
مليكة : ملك قصي زي ما قولتلك لحد هنا.
سهر : يا بنتي دا أكتر من نص شعرك والقصه دي مش هتليق على وشك.
ملك : اعمل ايه دلوقت حيرتوني؟!
مليكة : معلش يا مامي أنا مش هستريح بجد غير لما أقص شعري.
سهر : خلاص انتي حره.
وخرجت سهر من الغرفة.
ملك : ها أعمل إيه أكمل ولا غيرتي رأيك؟
مليكة : لا كملي.
ملك : أوك.
__________
في فيلا كريم.
فريدة : اعملي فاصل بين الفراخ واللحمه يا نبيله.
نبيله : حاضر يا مدام.
فريدة : ولا أقولك خلي دي في رف لوحدها ودي
في رف تاني.
نبيله : حاضر.
فريدة : ايوه الخضار خليه لوحده جيبتي كل اللي قولتلك عليه؟
نبيله : اه كل حاجه كتبتيها جيبتها.
فريدة : خلاص سيبي اللي في ايدك وشوفي مين على الباب.
تخرج نبيله من المطبخ تفتح الباب.
أمجد : سلام عليكم.
نبيله : وعليكم السلام.
أمجد : طنط فريدة موجودة؟
نبيله : أقول لها مين؟ معلش مش واخده بالي.
فريدة خارجه من المطبخ على مهلها علشان متدوسش على رجلها جامد.
فريدة : خير يا أمجد جاي ليه؟
أمجد : ازيك يا طنط اخبارك ايه؟
فريدة : زي ما أنت شايف كده.
أمجد : أنا آسف جدًا للي حصل وجاي اعتذر لحضرتك.
فريدة : تشرب ايه؟
أمجد : ولا أي حاجه أنا جاي لحضرتك في كلمتين وهمشي على طول.
فريدة : اعملي اتنين شاي بس كوبايتي نص معلقة سكر ولا أقولك خليه سكر بره علشان الأستاذ أمجد يحط براحته على فكرة زين فوق.
أمجد : اه ما أنا عارف شوفت عربيته راكنه بره.
فريدة : اطلعي قولي لزين إن صاحبه تحت.
نبيله : حاضر يا مدام.
فريدة : اتفضل استريح.
أمجد : أنا جاي أقول لحضرتك إن الصلح خير ياريت لو تقدري تسامحي مامي في اللي عملته أنا عارف إن دا هيكون صعب على حضرتك بس يعني...
تقاطعه فريدة : اسامح مامتك ازاي يعني هي كانت شتمتني دي بعتت بلطجيه كسروا عضمي كان ممكن اموت فيها.
أمجد : بعد الشر على حضرتك.
نبيله : قال نازل يا مدام.
فريدة : طيب اعملي الشاي وهاتي كيك.
نبيله : حاضر.
أمجد : أنا قولت لحضرتك إنه صعب بس حاولي علشان خاطر سمر  نفسيتها تعبانه جدًا من وقتها حضرتك قلبك كبير وهتسامحي.
زين نازل من فوق : تسامح مين يا حبيبي؟!
أمجد : زين لو سمحت أنا كلامي مع مامتك وبعدين ما أنا سامحتك لما ضربتني واتخانقت معايا وكل دا علشان خاطر باباك بس.
زين : أنت بتسمي دا ضرب امال اللي حصل لمامي دا تسميه ايه؟!
أمجد : مامي لما ترجع البيت بالسلامة هتبقى تيجي تعتذر لمامتك معلش دا كان شيطان ودخل ما بينهم.
فريدة : أمجد اشرب الشاي بتاعك.
كانت نبيله جايه بالشاي وبتقدمه.
وقامت فريدة : معلش هطلع اوضتي بس استريح أنت شايف قاعدة بالعافية زين هيقعد معاك.
زين بيقوم ويساعد مامته.
فريدة : لا خليك مع أمجد نبيله هتساعدني.
بتسندها نبيله وتطلع معاها فوق.
زين : عاوز مامي تسامح مامتك بعد اللي شوفته ده
دا ايه البجاحه دي يا أخي؟!
أمجد : زين من غير غلط لو سمحت وهقوم امشي علشان اريحك.
زين : براحتك.
وقام أمجد فتح باب الفيلا وخرج.
_________
في المستشفى.
خارجة هنادي ووائل ومعاهم والدتهم.
وائل : اركبي يا أمه.
سعدية : واخدني على فين؟
هنادي : هتقعدي معايا كام يوم.
سعدية : لأ اني مش سايبه هنا وجايه معاكي يا هنادي.
وائل :"طب امال عاوزه تروحي فين يا أمه؟
سعديه : هرجع داري يا ابني.
هنادي : يا أمه الدار مبقتش تنقع تعيشي فيها تعالي معايا بس ولو معجبكيش الوضع هرجعك البلد بس بعد ما نصلح البيت.
سعديه : لا ماتشغلوش بالكم بيه اني هصلح البيت وبرضو هقعد فيه على وضعه ده والعمال شغالين فيه.
وائل : خلاص يا هنادي سيبي أمك على راحتها.
هنادي : ازاي بس يا وائل
البيت ميصلحش اصلا للعيشه فيه هتقعدي فيه ازاي يا أمه قوليلي؟
سعديه : انتي مالك هعيش فيه كده وخلاص روحي بس شوفي عيالك مش بتقولي عندهم امتحانات خُدي بالك منهم
وصلني يا وائل لحد الدار وابقى شوف مصالحك.
وائل : حاضر يا أمه هاتي ايدك يلا اركبي.
____________
في المساء... في شقة سيف.
سيف : حلو قوي الكرتون ده كنت بحب اتفرج عليه وأنا صغير ابقى خلي يوسف يتابعه
ماما كانت حافظه المواعيد بتاعته تقولي خلص مذاكرة علشان تتفرج على الكرتون اللي بتحبه هههههههه
كنت أكتب بسرعة واحفظ الكلمتين اللي هسمعهم تاني يوم وطيران اقعد قدام التليفزيون مستني الكرتون يبدأ.. مليكة
مليكة انتي روحتي فين؟
مليكة : ها يا سيف بتقول حاجه؟
سيف : بقول حاجه!
دا أنا عمال اتكلم من زمان مسمعتش أي تعقيب منك على كلامي كأني كنت بكلم نفسي.
مليكة : أنا معاك اهو.
سيف مسك شعرها : ايه ده؟!
مليكة : شعري.
سيف : ما أنا عارف إنه شعرك أنا بسأل راح فين؟
مليكة : ما هو يا سيف موجود.
سيف : موجود ايه! انتي قصيتي شعرك؟
مليكة : اه.
سيف : اه ايه.. ازاي تعملي كده من غير ما تقوليلي؟
مليكة : قولت اعملها مفاجأة.
سيف : هي فعلا مفاجأة بس مش لطيفه خالص دي مفاجأة مهببه.
مليكة : ايه يا سيف اللي بتقوله ده؟!
سيف : انتي بجد بتسألي
ولا مش عارفه إني مبحبش الشعر القصير.
مليكة : وهو كان شعري بقى ولا شعرك ما أنت حر في دماغك احلقها خالص براحتك.
سيف : لأ ايه رأيك تحلقيها خالص وتريحي نفسك؟!
مليكة : لا يا حبيبي مش معنى إني قصيت شعري شويه خلاص احلقه خالص!
سيف : شويه!
كل دا وشويه؟!
قومي كده بصي في المرايا وانتي تعرفي الكارثه اللي عملتيها هو دا طول شعرك ولا حتى نصه؟!
مليكة : هيطلع تاني متقلقش.
سيف : يبقى بتحلمي.
مليكة : ما هو اعمل ايه شعري باظ من الحمل والرضاعه وبقى بيوقع وخف خالص كده احسن.
قام سيف وهو مضايق : طالما انتي شايفه كده يبقى براحتك.
مليكة : رايح فين؟
سيف : داخل أنام تصبحي على خير.
مليكة : وأنت من أهله.
__________
في فيلا كريم.
فريدة : مش قادرة يا كريم اسامحها مش قادرة.
كريم : يا حبيبتي هو أنا قولت لك تسامحي ولا متسامحيش ما انتي حره يا فريدة.
فريدة : معرفش بس حسيت من كلامك إنك عاوزني اسامحها أنا اه ممكن اسامح بس بعد ما تاخد جزاءها ويتحكم عليها.
كريم : ست شهور على فكرة.
فريدة : مش مشكلة ويوم واحد في السجن صعب عليها برضو بس هي غلطت ولازم تاخد جزاءها أمجد واخته صعبانين عليه رغم اللي حصل بس أنا مستحيل اسامح كل أما افتكر جميلة والرعب اللي كانت فيه لما شافت الستات دي قلبي يجمد أكتر وأقول لأ لازم تتعاقب
دي بعتت ستات كسرت عضمي كان ممكن أموت لا لا مش مسامحه.
كريم : خلاص يا حبيبتي براحتك.
__________
في البلد..
ابن خال محمود وصل لبيت في منطقة شبه مهجوره وبيخبط.
محمود :"مين؟
سامح : اني يا محمود افتح.
محمود : حد معاك؟
سامح : لأ إني لوحدي افتح بقى.
محمود بيفتح الباب.
سامح : ايه ساعة عقبال ما تفتح الباب!
محمود : معلش كنت بطمن.
سامح : واطمنت؟
محمود : ايه اللي معاك ده؟
سامح : دا أكل أمي بعتاه معايا.
محمود : عمتي صباح طول عمرها حنينه اقعد يا سامح.
سامح : اقعد فين بس يا محمود هو أنت هنفضل قاعد هنا؟
محمود : لأ إني بعد بكره همشي.
سامح : هتروح فين؟
محمود : هروح أي حته بعيد عن هنا الحكومة عينها مفتحه دلوقت الخوف يكون في حد مراقبك ويوصلولي هنا.
سامح : لا متخافش إني متأكد مفيش حد كان ماشي ورايا ولا بيراقبني
أهل البلد كلهم واقفين على رجل عايزنك.
محمود : ودول عاوزني في ايه؟!
سامح : مش الحريقه وصلت لكام بيت جار بيت مرات عمك.
محمود : مولعتش ليه هي وبنتها؟
سامح : بيقولوا طلعوا فوق السطوح وقتها علشان كده النار مقربتش منهم الوليه الكبيرة بس اللي كانت تعبانه في المستشفى بس بيقولوا خرجت النهاردا ورجعت دارها.
محمود : ايه الدوشة اللي بره دي؟!
سامح : استنى كده أما أشوف.
بيفتح سامح الباب يلاقي الضابط في وشه والبيت متحاصر بالعساكر.
الضابط : اهلااا ازيك يا سامح؟
مش أنت برضو سامح ابن خال وابن عمة محمود في نفس الوقت؟
ازيك يا محمود؟
محمود لسه بيحاول يهرب.
الضابط : متحاولش مش هتعرف تخرج من هنا غير معايا.. اتفضل قدامي وأنت كمان اتفضل علشان عاوزينك في كلمتين.
سامح : اني معملتش حاجه يا باشا اني كنت معدي من جنب البيت ده لاقيت محمود في وشي.
محمود : ندل وجبان.
الضابط : معلش ابن خالك باعك تعيش وتاخد غيرها قدامي يلا.
___________
نكمل الحلقة الجايه.. كل عام وأنتم بخير النهاردا اجازة ودي حلقة امبارح.