ساري الجبل واخوان ساري

39

نزلت على الأرض وضمته من جديد شدت وجهه الأحمر ومسحت ملامحه بنعومة يديها : اليوم بنروح قرية ساري وهناك بنواجه سر ويمكن حياة جديدة أنت بطلي اللي بستمد من نظرته هذي القوة ولو ركضت ولو تغيرت الأماكن هنا مكانك الحقيقي هنا أشارت لصدرها لتكمل برجاء: طيب ماما؟
ابتلع عبرة وغصة لاذعة ابتلع الموقف الغريب وصدمته وهو يجاري كل تحركاتها رجع معها للبيت وساعدها وهي تجمع اشيائهم بحقيبة واحدة خرج لإمام مسجدهم واللي قرر يوصلهم لقرية ساري وحسناء بداخلها تدعي الأمور تنتهي على خير !
.
.
البتول وهي تمتر حوش البيت وقلقها لم يتوقف سهم غايب وقايد من أمس لم تسمع عنه شيء بالرغم من بيوتهم المتلاصقة
هتون وهي جالسة على كرسي قديم تسمع اغنية بجوالها تحت حبات المطر الخفيفة
هتون : بتول بس بس صوت شبشبك غطى على صوت الأغنية
بتول : مو مرتاحة قلبي مو متطمن سهم ما اعرف وين يختفي وقايد من أمس ماجانا
هتون وهي تتجاهل ثرثرتها المعتادة قلقها الدائم وخوفها على عائلتها لايفارقها
البتول تنرفزت من تجاهلها نزلت للأرض والتقطت حصى صغيرة لتصرخ الأخرى بعد ماضربت كتفها
هتون اقفلت صوت الأغنية واعتدلت بجلستها : مادري متى تحسين على نفسك وتستوعبين ان سهم كبير وعنده عقل وقايد اكبر منه متى تبطلين حركات الأمومة خلاص
البتول وهي تعاندها بخطواتها ليظهر صوت شبشبها أكثر : مالك شغل ولا تتدخلين بقلبي وبعدين قولي الحمدلله في واحدة صاحية في البيت هذا وعندها قلب يهتم
لوت هتون فمها وهي ترفع كوبها لفمها لكن سقط منها بعد مارمته البتول بحذائها
ضحكت من قلبها وهي تهرب وهتون خلفها : من يروق بالبيت المجنون هذا فرحانة ان عندك قلب بس ماعندك عقل
لفت البتول وجهها ناحيتها وهي تضحك بإستفزاز بعد ماشعرت انها انتقمت لنفسها وانسكبت قهوتها بالكامل : الحمدلله عشت اللحظة هذي ولا نمت وفوتها
تخصرت هتون بعد ماملت من الركض خلفها : والله حرام نفسي فيها
البتول وهي تقترب منها : خلاص انبسطنا اسوي لك كوب ثاني اصلاً داخلة اجهز فطور سهم وبطلع ادور عليه
هتون وهي يائسة من اختها ومن محاولاتها معها : بالمطر والجو ذا بتطلعين !
بتول : عادي مطر خفيف خلاص ادخلي لاتبردين وتتعبين انتي الثانية
ابتسمت هتون وهي تراقب أثر اختها لتعود للكرسي ولطربها ..

البتول ملتفة بعبائتها وبيدها شنطة أنيقة بداخلها اصناف متنوعة رفعت جوالها على أمل يرد سهم وبالفعل رد !
اخبرها انه بمكانه المعتاد مكانه السري
وصلت له بعد مسافة

بتول : وأخيراً شفتك انقطع قلبي وانا ادور عليك
سهم : سلامة قلبك
قبل رأسها ونطق : ليه دايم تتعبين نفسك وعشان مين سهم اللي مايسوى
ضربته بيدها وبحدة : ولد ! كم مرة قلت لك لاتصغر نفسك
رمت البساط على الأرض وصارت ترتب الفطور وبصوت مرح :عادي انزل طرحتي ؟
غمز بعينه وهي ماحسبت حررت شعرها البني بلونه الملفت وضعت طرحتها بجانبها وقالت : جهزت كل شيء تحبه
كشرت وهي تشاهد عبوس ملامحه : من جديد ؟ ماخلصنا من التعاسة ؟ ما انتهينا من جلد الذات ؟
فز من مكانه مثل الملسوع هرب بوجهه وبعبوسه عنها لتنهض مسكت وجهه رفعته ناحيتها وبثبات : بسبب كلمة يتزعزع كل شيء بنيناه مع بعض ومن فترة طويلة وبسبب شخص غريب ! هو كمان قاعد يهرب بوجهه ومتخفي ورى سر وعايش غربة ومتأكدة الغريب هذا عيونه قالت نفس الكلام اللي قالته عيونك قبل سنوات
ناظرها بعيون مكسورة : وبكل مرة نحس فيها اننا وصلنا ونرفع راية الفوز يجي اللي يكسر الراية وترجع الغربة
بتول : ليه سهم ليه ؟ خالة راوية تحبك أكثر ولد قريب من روحها هو أنت وأنا أنا البتول ماتعني لك شي؟
افلتت وجهه وناظرته للحظات واكملت : بس انت روحها وكل حاجة بالنسبة لها انت مو غريب ولا شخص منبوذ انت اخترت تبقى كذا
عض شفته يقاوم عبرة شاهدتها انتفضت وفزت لتقترب أكثر مسكت وجهه اللي يقاوم لحظة انهيار قاتلة دمعت عينها هي : لاتبكي لاتسمح لهذي الدمعة تثبت الجرح اللي بنيته من نفسك وعشته
هزته بثبات بالرغم من انسكاب الدمع : انت حاربت عشان تعيش انتصار لذاتك لا تسمح له طالع وجهي انت سهم سهم اللي حاربت كل حاجة عشانه واثبت لهم انك سهم اللي قدرت تثبت مكانتك بقلوبهم بسهمك اللي شفته أنا وعشت معاه
ميل رأسه وكلامها زاد من وقع اللحظة ومن لهيب المشاعر وقبل ينفجر دست وجهه بحضنها وهي تنطق بمرح فاشل : تتذكر قبل كم سنة وش قلت لك ؟ نضحك واللي يصير يصير ..