#عيسى_يحكي
غزرتلها كيفاه تكات براسها على كتفي وغفات.. ماحبيتش نفيقهاا ولانحركهاا..خليتها ترتاح خاطر ظاهر على وجهها التعب.. لبارح بقيت نسمع فيها ليلة كاملة كيفاه تدور ف الدار وتبكي..غير تعبها بكري من قلة الماكلة..تنهدت بالشوي ومديت يدي بعدتلها خصلات شعرها لي غطاتلها وجهها وعديت بعينيا عليهاا..لبارح وليوم حسيتها بلحق سخفتني اكثر.. كيما حسيت روحي مافهمتهاش علاش مصرة تمشي من هناا وتبعد حتى فكرة انها ترجع كل فترة كاني رافضتهاا.. ماحبيتش نضغط علاهاا بش نعرف اما بش نكون عند وعدي اني نرجعها وقت ماتحب هي.. تكيت براسي لتالي وغمضت عينيا حتى تعدا الوقت والسيارة نزلت.. لحظتهاا استويت ف قعدتي وغزرتلها نحكي
انا :" لارين.. لارين اياا فيق "
فركت عيناها بصوابعها تحكي
لارين :" اممم نزيد شوي برك "
دوب تبسمت نحكي
انا :" يابنتي شعندك تزيد.. وصلناا "
بعدت عليا وتكسلت تحكي
لارين :" وين وصلنا ؟"
فكيت لحزام مني ونفخت نحكي
انا :" فيق تو تعرف "
وقفت من بلاصتي وبقيت نجبد ف السيكان.. ريتها ك فكت حزامهاا..عدات بعيناها عالطيارة وغزرتلي تحكي
لارين :" حاسة روحي مازلت ناقصة نوم "
انا :" قوم ك نوصلو للوتيل ارقد "
هزتلي براسها باهي وهزت ساكها ووقفت.. نزلنا مع بعضنا وقربنا كملنا إجراءات لخروج.. ريتها ك غزرتلي تحكي
لارين :" كلمت صاحبك ؟"
انا :" اي "
لارين:" بش يجي يهزنا هو؟"
انا :" اي "
تبسمت تحكي
لارين :" ايا باهي عالاقل ب انقص تعب"
وقفت قدامها نحكي
انا :" شوفي بش نبداو متفاهمين من تو ومانغشوش بعضنا..قدام الراجل نحبك ساكتة والتفركيح لا "
قحرتلي تحكي
لارين :" ترا فياا طفلة صغيرة توصي فياا هكا.. تهنى نعرف كيفاه نتصرف "
هزيت بحاجبي نحكي
انا :" باهي تو نشوفو.. برا جيت الفاليز متاعك خلينا نخرجو "
هزتلي براسها باهي ومشات.. بقيت نستنى فيهاا حتى رجعت وف يداها الفاليز تكركر فيها.. قربتلي تحكي
لارين :" هياا "
اشرتلها بيدي وخرجنا مع بعضنا.. تبسمت اول ماريت خالد واقف واشرلي بيديه.. غزرتلها تحكي
لارين :" هذاكا صاحبك ؟"
هزيتلها براسي اي من غير حتى كلمة.. تبسم اول ماقربتلو يحكي
خالد:" عم الحوووت "
قربت عنقتو نحكي
انا :" خالود.. ليك وحشة صاحبي "
خالد :" والله انت اكثر ياحوت"
بعدت عليه نحكي
انا :" هي هي وتعبت روحك وجيت "
خالد :" يزي من لكلام هذا رانا خوات وعشرة "
تبسمت وربطت على كتفو نحكي
انا :" عيشو خالود "
ريتو ك غزر للارين لي واقفة حذانا ورجع غزرلي.. تبسم يحكي
خالد :" هاذي المدام ؟"
غزرتلها وين شفتها عدات بعيناها علياا وتبسمت.. رجعت غزرتلو نحكي
انا ": لا..هاذي لارين بنت خالي "
ضحك وغزرلها يحكي
خالد:" عادي بيك اسمك رانية وصغيرة.. ممكن نكون تلخبطت"
ضحكت تحكي
لارين:"ههه لا رانية وحدها وانا وحدي.. انا لارين اكبر منها "
عقد بحواجبو مستغرب يحكي
خالد :" ياخي عم جابر عندو زوز بنات ؟"
نفخت بالشوي نحكي
انا :" اي "
غزرلي يحكي
خالد:" شبيني مافيباليش ؟"
ريتها ك قربت شوي تحكي
لارين:" خاطر حتى هو مكانش ف بالو.. تو وين عرف"
رجع غزرلها وضحك يحكي
خالد :" لازمك تحكيلي بش نفهم الليلة هاذي لكل "
كبست عالبونية متاعي بالقوي نحكي
انا :" انشالله نمشيو.. بش نبقاو واقفين هكاا "
ضحك يحكي
خالد:" والله حتى غشك توحشتو.. هات هات نهز معاك "
عطيتو الساك وغزرتلها كيف شدتني من مرفقي تحكي
لارين:" شبيك متغشش "
قحرتلها نحكي
انا :" شنوة وصيتك انا ؟"
لارين :" تو تكلمت انا..تحبني نخلي الراجل داخل بعضو مش عارف من لارين من رانية "
نفخت بالشوي وبقيت نمشي حتى خرجنا.. ريتو ك حل كرهبتو وحط ساكي فيها يحكي
خالد:" اياا اطلعوا "
خذيت من يداها الفاليز وحطيتها هي والساك من تالي.. حليتلها بالباب الكرهبة نحكي
انا :" اطلع "
تبسمت وطلعت.. سكرت الباب وطلعت بجنب خالد.. ريتو ك خدم الكرهبة وتبسم يحكي
خالد:" جمال فرح ك قتلو الحوت جاي ليوم.. من بكري وهو معايا بالتاليفون "
تبسمت وغزرت لثنية نحكي
انا :" انشالله لعشية تو نجي نعمل عليه طلة "
غزرلي ورجع غزر لثنية يحكي
خالد:" عشية شنوة ؟ ياولدي راك ماشي معايا من تو وبش تبقى حذاياا زادة.. خاطرني محضر برنامج خليناا نرجعو بيه ايامات زمان"
حكيت على جبيني نحكي
انا :" ميسالش خلي المرة هاذي نمشي نبقى ف اوتيل خير.. وانشالله كل يوم تو نجيك ونتقابلو "
غزرلي يحكي
خالد:" ورحمة بابا وبوك مفماش منو لكلام هذا.. انت وبنت عم جابر بش تشرفو حذاناا.. دار خوك محلولة وانت تبقى ف وتيل.. شبيك ياحوت "
عديت بيديا الزوز على وجهي نحكي
انا:" يا خالد علاش تحلف.. قتلك تو نجيك كل يوم ونعديو وقت ك قبل.. خليني نمشي لوتيل خير "
خالد:" لااا.. خير ما والله نتغشش.. تحب عم جابر ياخو ف خاطرو مني.. وزيد جمال يستنى فيك وحضرلك بيتك من بارح "
نفخت بالشوي وغزرتلها من لمراياا كيفاه قاعدة ف النص وتعدي ف عيناها عليناا.. نحكي
انا :"باهي الليلة تو نمشيو حذاك وغدوة يامن حيا "
خالد:" حتى غدوة بش تبقى حذاياا.. وساي الموضوع وفى خير مانطلب جمال نخليه هو يتصرف "
تبسمت نحكي
انا :" لا لا اخطاني منو.. انت ارحم "
ضحك وضرب على ركبتي يحكي
خالد :" نورت ليون صاحبي "
تبسمت نحكي
انا :" منورة بيك "
تكيت براسي لتالي وبقيت نخمم ف النهارين هاذم لازمني نكمل الخدمة فيسع بش نرجعو لتونس.. خاطرني مانحبش القعدة ف الديار هكاا خاصة انو المرة هاذي مانيش وحدي..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
