#غالية_تحكي
حطيت الكانون بعد ماشعلت لبخور ودخلت فيسع للكوجينة.. من وقت لي قريت ميساج عيسى وانا حاسة روحي بش نطير من الفرحة.. مانيش مصدقة انهم راجعين ليوم وبش ترجع معاهم الضحكة والفرحة..الدار من غيرهم كانت موحشة ومخيبها..رغم اني كنت كل يوم نحكي معاهم اما مش كيف..تعودت بيهم قدام عينيا مانجمتش نتحمل بعدهم اكثر من هكا.. جبدت الخضرة واللحم حطيتهم ف القفة وخرجت حطيتها قدام الباب ودخلت فيسع للبيت لبست جبتي وهزيت لفاتح وخرجت.. هزيت القفة وهبطت اللوطة بش نحضر لعشا مع سميحة وفرد وقت نخبر سيدي خوياا ب الخبر هذاا.. حليت الباب لي كان مردود ودخلت نحكي
انا :" وينكم يا مّالي الدار "
ريت سميحة كيف خرجت من لكوجينة تحكي
سميحة :" هاني ف الكوجينة نحضر ف الفطور.. إيجي غالية "
دخلت حذاها وحطيت القفة.. قعدت عالكرسي قدامها نحكي
انا :" ياخي وحدك؟ وينو سيدي خويا ؟"
سميحة :" سيدك خوك خرج يتفقد فالخدمة..ماك تعرف من جرة سفر سي ولدك صار هو يهبط كل يوم يشوف الخدمة..تعب الراجل وولدك مش ناوي يروح يرتحو شوي "
قحرتلها نحكي
انا :" خليني نفكرك انو حتى ك كان عيسى موجود سيدي خوياا كان يهبط يتفقد خدمتو ورزقو زادة "
عوجت شفايفها تحكي
سميحة :" مش كيف.. قبل كان مرة ف الجمعة تو صار كل يوم.. وزيد هاو على عينك جابر ماحبش عزيز يشد الخدمة كيما عيسى مش فاهمة علاش ؟ شناقصو عزيز مسيكن "
قمت من بلاصتي وقربتلها نحكي
انا :" علاش مسيكن؟؟ اهوكا بخدمتو ولباس عليه.. وزيد خليني نفكرك انو عزيز ولد حزامي انا كيفو كيف عيسى.. مش بش يسخفك حالو اكثر مني "
قعدت عالطاولة تفصص ف الجلبانة تحكي
سميحة :" نعرف أنو الزوز ولادك.. وانا مانقصد شي.. لي قصدتو انو حتى عزيز جا وقتو بش يتلهى برزق خالو كيف عيسى.. سايي كبر الطفل فات 25سنة ندادو بصغراهم وانتوما مازلت حاسبينو صغير "
نحيت الفولاة من فوق شعري وقعدت مقابلتها نحكي
انا :" شوفي سميحة.. انا لي نقرر كان ولدي مازال صغير ولا كبر.. انت تلهي ف بنتك.. وبالنسبة لياا انا كلمة سيدي خوياا سيف تمشي على رقبتي انا وولادي.. وقت يقول عزيز يتلهى انا نقلو الله بالك.. مفهوم "
قربتلي الطبق تحكي
سميحة :" مفهوم.. شدي فصصي معايا "
انا :" لاا كمل وحدك.. انا جيت نبش نطيب كسكسي بالعلوش للعشا "
سميحة :" لواه ؟"
ضحكت وقمت من بلاصتي.. هزيت القفة حطيتها عالرخامة نحكي
انا :" عيسى ولدي ورينو بنتي مروحين ليوم "
حلت عيناها فيا ووقفت من بلاصتها تحكي
سميحة :" تحكي بلحق؟؟ وجابر ف علمو ؟"
انا :" مانعرفش.. انا تو عيسى بعثلي ميساج خبرني.. ربي يوصلهم سالمين غانمين "
سميحة :" ايا الحمدلله علاهم.. انا قلت هاذم سايي نساو بلادهم وبش يوطنو غادي "
قحرتلها نحكي
انا :" يافرحة ماتمتلك "
سميحة :" فاش قام نفرح.. هاني كنت نقلك خلي ولدك يروح بش يشد الخدمة "
حطيت السكينة وتلفتتلها نحكي
انا :" اي حكيتي على ولدي.. مش على لارين.. شوفي سميحة رينو بش ترجع ردي بالك تقلقيهاا.. هاني نوصي فيك "
نفخت بالشوي تحكي
سميحة :" تو انا درت بيهاا بنت نور.. راس الهم دادة سميحة.. وقتاه قلقتهاا انا "
انا :" انا نبهت عليك وكهو.. خاطر المرة هاذي ماهيش وحدها معاها صحبتها "
رجعت قعدت وحطت الطبق قدامها تحكي
سميحة :" يافرحتي.. طفلة غريبة تدور ف داري ولازمني نسكر فمي "
انا :" دار الناس لكل هاذي.. بما فيهم لارين وأهلها "
قحرتلي وطبست راسها تفصص ف الجلبانة.. جبجت الخضرة نحكي
انا :" بش نعمل سلاطة مشوية.. كملي لي ف يديك بش تقشري معايا الخضرة "
سميحة :" باهي "
تلفتت على صوت الباب لي تحل.. تبسمت ك شفت سيدي خوياا دخل نحكي
انا :" الله عينك سيدي خوياا "
جابر :" الله يسلمك غاليتي.. شدي شدي "
قريت فيسع خذيت الساشيات من يديه نحكي
انا :" شنوة هذا لكل ؟"
حط عكازو وقعد يحكي
جابر :" لارين وعيسى مروحين.. كلموني بكري عاد تعديت شريت غلة وحلو "
ضحكت نحكي
انا :" يسلم يديك.. تعيش وتشري يابابا "
سميحة :" مع انا وقت يوصلو؟"
جابر :" 18 هكاكا "
انا :" شكون بش يمشي يجيبهم ؟"
جابر:" ادم بش يمشي "
هزيتلو براسي باهي نحكي
انا :" خليني مالا نكمل نحضر لعشا الوقت لف لف "
وقف من بلاصتو وقربلي يحكي
جابر :" غالية عيش أختي حضري طاجين جبن لارين تحبو زادة "
هزيتلو براسي باهي نحكي
انا :" من عينيا سيدي خوياا "
مسح على شعري وخرج.. قربت للرخامة وبقيت نحضر ف العشا ونستنى ف الوقت يتعدا بش نتلمو كلناا..مانعرفش قداه تعدا وقت وانا غاطسة ف الكسكسي..تلفتت عالصوت ورايا تحكي
رانية :" ريحة كسكسيك ياعمتي واصل لراس النهج "
ضحكت نحكي
انا :" اا مالا فبالك كسكسي امك لي منغير ريحة "
سميحة :" يا حسرة عليك.. انايعيطولي بالذمة للعروسات بش نطيبلهم "
ضحكت وتلفت لرانية تحكي
رانية :" عمتي امان اغرفلي شوي كان حضر "
انا :" مازال يا ماما يتفور.. برا اغسل حالتك وارتاح.. اختك وعيسى ف الثنية م يوصلو تو نتعشاو جميع"
عدات بعيناها علياا وغزرتلي درا كيفاه تحكي
رانية:" بلحق ؟"
انا :" اي بلحق.. ايا برا نحي حوايج المكتب "
رانية :" ليسي ياعمتي ليسي "
ضحكت نحكي
انا :" كيفكيف..المهم امشي فيسع "
هزتلي براسها باهي ودخلت تجري.. رجعت تلفتت لرخامة وبقيت نشوي ف خضرة السلاطة.. اول مرة من فترة طويلة نحس روحي نطيب وانا عاملة كيف.. رجوع عيسى ولارين حسيتو فرحني خاطر الدنياا بلحق من غيرهم مخيبهاا.. بلاصتهم الزوز مانجم يملاهاا حد..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
