#عيسى_يحكي
كبست علاها اكثر وطبست راسي نغزرلها كيفاه باقي تبكي وترعش بكلهاا..نحكي
انا :" لارين هاني حذاك.. اهدا وماتخافش.. هذا الطبيب بش يشوفك وكهو "
تلفتت لخالد ك قرب ناحيتي يحكي
خالد:" لارين خلي الطبيب يشوفك..بش يطمناا عليك"
هزت راسها شوي وغزرتلي تحكي
لارين :" خليه يمشي..انا لباس... "
قصيت علاهاا نحكي
انا :" لارين يهديك ربي خليه يشوفك.. ك يقول هو لباس وقتها انا نطمن "
عدات بعيناها علياا تحكي
لارين :" مالا خليك هناا امان "
حطيت يدي على خدها ومسحتلها دموعها نحكي
انا :" هاني قاعد بجنبك مانيش بش نتحرك.. غير اسمع لكلام "
هزتلي براسها باهي من غير حتى كلمة.. استويتلهاا مخدتهاا وغزرت لطبيب لي قربلها بعد ماحكى مع خالد.. بقيت نتبع فيه بعينيا كيفاه يفحص فيهاا وهي تجاوب على اسالتو.. وقفت من بلاصتي ك ريتو كمل وبعد علاهاا.. قربتلو نحكي
انا:" شحالها؟ هي مليحة مش هكاا ؟"
الطبيب :" oui elle va bien.. معدل ضربات القلب والتنفس متاعها ملاح "
تلفتت لخالد ك سألو..يحكي
خالد :" يعني ماتستحقش نهزوها للسبيطار ؟"
الطبيب :" لا.. هي لباس اما ظاهر انهاا مازالت خايفة من لي صار.. بش نعطيها تو حقنة مهدئ.. من هناا لليل ترجع مليحة "
تنفست براحة ورجعت حذاهاا وين شفتها حاشية راسها ف المخدة..قعدت بجنبهاا ومسحت على شعرها.. غزرت لطبيب ك رجع قربلهاا وعطاها ابراة وهي ساكتة ماقالت شي.. تلفتت لطبيب يحكي
الطبيب :" هي تو بش ترقد شوي.. ك تقوم اعطوها حاجة دافية.. وكان صارت اي حاجة كلموني تو نرجع"
هزيتلو براسي باهي نحكي
انا :" مرسي دكتور "
تبسملي وقرب لخالد لي غزرلي يحكي
خالد:" نوصل الطبيب ونرجع "
هزيتلو براسي باهي من غير حتى كلمة ورجعت غزرتلها.. غطيتها مليح نحكي
انا :" تحب نزيدك غطا ؟"
هزت راسها معاياا وغزرتلي تحكي
لارين :" لا "
انا :" باهي قلي شبيك ساكتة من بكري ؟قلي كان فما حاجة مقلقتك مدام الطبيب هنا ؟"
ريتها ك بدأت تغمض ف عينياهاا تحكي
لارين:" لا.. اما...خليك حذايا خاطرني بش نرقد "
مسحت على شعرها وقربتلهاا اكثر نحكي
انا :" هاني حذاك لين تفيق.. ارقد "
هزتلي براسها باهي وغمضت عيناها وين غفات بالوقت.. تنهدت بالشوي ودورت بيديا علاهاا بقيت نمسح على ظهرها وانا مانيش مصدق لتو انو ممكن كانت بش تصيرلهاا حاجة..فكرة اني لو كان مخطلتش علاهاا ف الوقت المناسب خلاتني نخاف رغم انها قدام عينيا تو.. عمري ف حياتي ماخفت لدرجة هاذي.. اصلا كلمة خوف كانت قليلة قدام الشي لي حسيتو.. كل مانتفكر اني كنت بش نخسرهاا نحس قلبي بش يخرج من بلاصتو..للحظة حسيت روحي انا سبب هذا لكل..من لبارح قتلي انهاا ماتحبش تبقى هناا.. طلبت مني نهزهاا اما انا رفضت وخليتهاا حتر وصلت هكاا..حطيت يدي على خدها وعديت عليه بكف صوابعي كاني نحب نطمن روحي انهاا بجنبي تو وبخير ولي صار بكري كابوس ووفا اماشي مانجمتش حاسس روحي مانطمن كان مانشوفها حلت عيناها ونسمع صوتهاا وهي تضحك وتفدلك كالعادة.. لحظتهاا رجعت تفكرت كلامها متاع لبارح مرة اخرى اذا بش نتوحش هذا لكل ولا لا.. لقيت روحي بلحق توحشت كلامهاا وتفدليكهاا حتى لي يقلقني.. لقيت روحي مش متحمل سكوتهاا ولاحالتها هاذي وين حسيت ببلاصتهاا اكثر فحياتي وانو فكرة خسارتها مستحيل نتحملهاا ولا نتقبلهاا.. فقت من سرحتي على صوت خالد ك دخل يحكي
خالد :" عيسى قوم بدل حوايجك.. قاعد حذاها وانت مبلول هكاكاا "
طبست راسي وغزرت للحوايجي وقتها وين حسيت انهم مبلولين فوقي.. بعدت علاها بالسياسة وقمت نحكي
انا :" هاني قمت "
حط الطبق لي كان ف يديه عالطاولة وغزرلي يحكي
خالد :" وهذا فطورك.. كول حاجة لتو مافطرتش "
عديت بيديا على وجهي نحكي
انا :" ماعينيش تو "
خالد :" ميسالش غصب على روحك.. هاني جبتلك قهوتك "
انا :" عيش خوياا "
غزرلها ورجع غزرلي يحكي
خالد :" شحالها لارين ؟ خير شوي ؟"
غزرتلها نحكي
انا :" اهيكا رقدت.. الابراة خلاتها تهدى "
خالد :" غريبة والله مافهمتش علاش خافت من الطبيب هكاكا "
عديت بعينيا عليها مستغرب انا زادة مش فاهم علاش عملت هكاكا.. رجعت غزرتلو نحكي
انا :" والله مانعرف..ممكن بقات خايفة من لي صار.. تو ك تفيق نحكي معاها "
هزلي براسو باهي يحكي
خالد :" باهي برا بدل حوايحك لا تمرض.. انا هاني لبرا.. كان استحقيت اي حاجة عيطلي "
انا :" عيشو خالد "
ريتو ك عطاني بظهرو وخرج.. اول ماسكر الباب قربت فيسع خذيت حوايجي ودخلت لسالدوبان.. نحيت لي لابسهم وقربت غسلت حالتي ولبست حوايجي النظاف.. ريقلت أموري لكل رجعت حذاها.. خذيت فنجان القهوة خاطر حسيت راسي وجعني وقعدت بجنبهاا.. عملت رشفة منو وحطيتو عالتابل وبقيت نغزرلها كيفاه مازالت راقدة.. حطيت يدي على جبينهاا حبيت نشوف اذا مازالت باردة ك بكري ولا طلعلتهاا سخانة ولالا..تنفست براحة ك لقيتها دافية.. تكيت براسي لتالي وعينيا باقي علاهاا مانجمتش لانقوم ولا نبعد علاهاا خفت كان تفيق وماتلقانيش ترجع تخاف.. مانعرفش قداه تعدا علياا وقت وانا بجنبهاا هكاا نستنى فيهاا تفيق خاطر مانطمن كان مانسمع صوتهاا ونعرف شنوة صار بكري..
VOUS LISEZ
#مُتمردة_العيسى ❤️🔥 (الستاتي الثاني)
Romantik#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
