#لارين_تحكي
فقت من سرحتي على يديه لي مسحت على شعري.. عدا بعينيه علياا وتبسم يحكي
جابر :" شبي بنتي سارحة؟"
هزيت يدي مترددة وحطيتها فوق يديه.. ريتو ك غزر ليدي ورجع غزرلي.. تبسمت نحكي
انا :" عيشك جابر خاطر تعمل ف هذا لكل خاطري "
حط يديه لخرى فوق يدي وحاوطهاا يحكي
جابر :" مش مزية ياضي جابر.. انا كان نلقى نهبطلك نجمة من السماء ونحطها بين يديك لمهم انت تكون فرحانة ومرتاحة حذاياا "
عديت بعينيا عليه نحكي
انا :" ربي يخليك جابر.. وصدقني انا فرحانة حذاك انت وعمتي ومرتاحة زادة "
جابر :" فرحتي مانعطيها لحد ك نسمع منك لكلام هذاا.. ماعندكش فكرة قداه كنت متوحشك.. بقيت نحسب ف الايامات بش ترجع حذايا..رغم اني كنت مطمن بعيسى معاك اما بقيت كل ليلة نخمم فيك ونستنى وقتاه نشوفك قدام عينيا بش نطمن اكثر "
تبسمت بالسيف نحكي
انا :" هاني رجعت وناوية نبقى هناا حذاك "
جابر:" ك هكا علاش لبارح وقت لعشا قلت ممكن ترجع لفرنسا؟"
خذيت نفس طويل نحكي
انا :" انا نحكي فالمستقبل.. يعني لازمني نمشي بش نتفقد المعرض والدار.. مانجمش نسلم فيهم حياتي لكل "
جابر :" اي مدام هكا ميسالش.. امشي وارجع المهم خليك عايشة بيناتناا "
هزيتلو براسي باهي نحكي
انا :" باهي جابر "
تبسم يحكي
جابر :" اي احكيلي بدلت الجو ك سافرت؟ تعرفت عمك جمال وخالد ؟"
ضحكت نحكي
انا :" اي عرفتهم.. خاصة خالد ولينا صحاب انا وهو "
عدا بعينيه عليا وغزرلي درا كيفاه يحكي
جابر :" ايا باهي.. خالد ناس ملاح ومتربي "
انا :" اي بلحق.. اي واحكيلي انت شعملت ف غيابي جابر ؟"
ضحك يحكي
جابر :" ماعملت شي انا.. هاني من الدار للخدمة "
انا :" انت عاقل برشة جابر "
ضحك بالقوي يحكي
جابر :" ههههه انت ترا فيا هكا ؟"
هزيتلو براسي اي برشة مرات نحكي
انا :" اي من وقت لي جيت ماريتكش قاعد ف قهوة ولا ف الشارع.. كيما باقي الرجال "
جابر :" لا كنت نقعد قبل أما لي كنت نقعد معاهم وقرابلي برشة هوما راجل عمتك عمك عز الدين وصاحبي سالم وزوز توفاو..من وقتها ماعاد حاليلي شي "
عديت بعينيا عليه نحكي
انا :" الله يرحمهم "
تنهد بالشوي يحكي
جابر :" الله يرحمهم..الدنيا هزت أكثر ناس انا حبيتهم.. انشالله يكونو مسامحيني "
عديت بعينيا عليه نغزرلو كيفاه سرح للحظة حسيت روحي فهمتو شوي شيقصد.. كبست على يديه نحكي
انا :" انشالله.. وانشالله ربي يطول ف عمرك جابر "
دور بيديه علياا وجبدني عندو.. باسني من راسي يحكي
جابر :" عيشلي بنتي.. ربي يطولي فعمري حتى نفرح بيك "
حطيت راسي فوق صدرو وتبسمت من غير حتى كلمة.. سمعتو يحكي
جابر :" ياخي لعشا شبيه لتو ؟ مش كان طيبت انت خير رحمتي بوك بقى لجوع "
ضحكت نحكي
انا :" اللطف عليك جابر..تو من غدوة انا نطيبلك "
جابر :" اي هكا نتفاهمو.. ساعة مايا ويني؟"
هزيت راسي وغزرتلو نحكي
انا :" مايا ف البيت بش تكلم لبنات لي شادين المعرض والمحل متاعهاا "
عقد بحواجبو يحكي
جابر :" محل شنوة ؟"
هزيت روحي واستويت ف قعدتي نحكي
انا :" مايا عندها محل متاع فخار.. هي تصنع فيه وتبيع.. مالا خلات طفلة لاهية بيه خاطر ماحبتش تسكرو "
ضيق عينيه فيا وغزرلي درا كيفاه يحكي
جابر :" اي وكيفاه تخلصو فيهم لبنات الزوز ؟"
عضيت على شفايفي نحكي
انا :" احم.. الطفلة لي فمحل مايا تخلص من لي تبيعو وتخدمو.. مايا قالتلها ماتبعثلي شي يكفي انك تخلي لمحل مفتوح خاطرو متاع امهاا تاتا مادلين الله يرحمها ماحبتش تسكرو..والطفلة لي فالمعرض خلصتها 3 شهور بالمسبق وبعد بش نولي نبعثلها "
هزلي براسو باهي يحكي
جابر :" باهي فهمتك "
تبسمت وغزرت لمايا لي دخلت تحكي
مايا :" سلام عم جابر "
هز راسو معاها وغزرلها يحكي
جابر :" سلام بنتي.. شحالك مايا ؟"
قعدت بجنبي وتبسمت تحكي
ماايا :" الحمدالله عيشك وانت لباس ؟"
جابر :" نحمدوه عيش بنتي "
درتلها بكلي وغزرتلها نحكي
انا :" كلمتهم؟"
مايا :" اي.. كلمتهم الزوز والأمور لكل مريڤلة ماتخافش وكلمت هيلينا زادة سألتها كان قاعدة تتفقد فالدار والمعرض ولا لا.. قتلي قاعدة تمشي كل يوم "
هزيتلها براسي باهي من غير حتى كلمة.. للحظة هاذي مازالت مانيش مصدقة اني سكرت كل شي يخص نور وحد غيري يتفقد فيه.. قد ماحاولت نتقبل لحكاية اما باقي صعيبة علياا..هروبي بالطريقة هاذي واني سلمت ف كل شي خلاني نكره " إلياس" أكثر خاطرو هو السبب ولا راني رجعت راني ماخليتش نور وحدها غادي وانا هناا.. شديت دمعتي بالسيف وغزرت لعمتي لي دخلت تحكي
غالية :" هياا قومو الطاولة حضرت "
غزرت لجابر لي وقف وعدا بعينيه عليا يحكي
جابر :" هياا رينو "
هزيتلو براسي باهي وخرجناا كلنا.. شدينا الطاولة بعد ماغسلنا يدينا وقعدنا.. غزرت لرانية لي خرجت من بيتهاا وقربت باست جابر تحكي
رانية :" حمدلله على سلامتك باباتي"
تبسملها وشدها من يداها يحكي
جابر :" الله يسلمك رنوش.. ايجا اقعد بجنبي "
هزتلو براسها باهي وقعدت قدامي.. ريتها ك غزرتلي ورجعت غزرتلو تحكي
رانية :" بابا ليوم رجعولناا دفوار الماط.. جبت نوط باهية "
مسح على شعرها يحكي
جابر :" صحيت رنوشتي.. نعرف بنتي ذكية.. كمل هكاا "
هزتلو براسها باهي ورجعت غزرتلي.. عدات بعيناها عليا انا ومايا وطبست راسها.. غزرت لمايا وين شفتها مستغربة هي زادة أكثر مني.. هزيتلها براسي بمعني شيهمك فيهاا ورجعت غزرت للرانية مش فاهمة شبيها المرة هاذي..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
