#عيسى_يحكي
لطخت الباب ووقفت على بلاصتي ننهج..كل مانراها واقفة بجنبو ولاتحكي معاه نحس عصابي تلفت مني ونصير مانتحكمش ف تصرفاتي..مانعرفش علاش ماتحبش تسمع لكلام وتبعد عليه.. عديت بيديا الزوز على وجهي وترميت عالفوتاي..لحظتها استرجعت سؤالها لي حسيتو صدمني.. خاطر ولامرة فكرت فتصرفاتي على انها غيرة..اصلا علاش حتى نغير علاهامن خالد..مانيش فاهمها كيفاه خممت هكا ولامنين جابت لحكاية هاذي..نفخت بالقوي من التخمام لي بقى ساكن فياا وقمت من بلاصتي..خرجت للبلكونة خذيت نفس طويل حاولت نهدي روحي بش انجم نخرج ونشوفها خاطر حاسس روحي مازالت مابردتش خاصةكل مانتفكر ليلة لبارح لي مانسيتهاش ولانسيت الطحان لي غزرلها هكاكا وكملت هي الصباح مع خالد وحديثهم عالعومان غير حكاية انو ممكن نزيدو ايامات وقتلي انا تهنيت لبارح على اساس مروحين غدوة.. مانعرفش قداه تعدا وقت واناواقف حتى حسيت روحي هديت شوي لحظتهاا خممت نمشي نشوفها شتعمل خاطر حسها بات..رجعت للبيت وخرجت بالوقت.. قربت وين باب بيتها ودقيت اماماجاوبتنيش.. رسيت على سنيا كعرفتها رجعت نزلت الفر/خة..نزلت فيسع وين قابلني خالد وصحابو.. عديت بعينيا عليهم وين مالقيتهاش معاهم.. قربتلو شوي نحكي
انا :" خالد.. لارين ويني ؟"
وقف من بلاصتو وقربلي يحكي
خالد:" ريتها ف التيراس التلاني قاعدة وحدها "
هزيتلو براسي باهي وعطيتو بظهري بش نمشي نشوفهاا.. عقدت بحواجبي مستغرب اول ماوصلت ومالقيتهاش.. قدمت شوي وعديت بعينيا عالتيراس لكل نحكي
انا :" لااارين.. لارين وينك "
تلفتت وراياا على صوتو يحكي
خالد:" عيسى شفما؟"
غزرتلو نحكي
انا :" مش قتلي ريتها هناا ؟؟؟ "
قربلي اكثر وعدا بعينيه عالتيراس يحكي
خالد:" اي حتى اني طليت علاهاا "
نفخت بالقوي وحليت باب التيراس وخرجت..صحت بالقوي نحكي
انا :" لااااريييين "
عديت بيديا الزوز على وجهي وغزرت لخالد نحكي
انا :" خليني نرجع نشوفها ف بيتهاا..ممكن طلعت "
هزلي براسو باهي من غير حتى كلمة..اول ماقدمت الخطوة بش نرجع حسيت قلبي ضرب بقوة على صوتهاا لي صاح من بعيد ب اسمي..تلفتت بالوقت وجريت نحكي
انا :" لاااارييين ويييينك "
سمعت خالد وراياا يحكي
خالد :" عيسى الصوت جاي من الشط من غادي "
خليتو وجريت ساقياا أعلى من راسي.. للحظة حسيت روحي خفت ودخلت بعضي مش عارف منين نلوج ولا من وين نبدا..كان صوتهاا بقى يتعاود فوذنياا كيفاه صاحت هكاكا وهي مفماش غير انها سكتت فجاة ومارجعتش نادتلي الشي لي خلاني نخاف اكثر.. قربت للشط ودخلت شوي ف الماء..عديت بعينيا عليه ورجعت صحت نحكي
انا :" لاريييين وييينك.. تسمممع فيااا لارين "
تلفت على صوت خالد من بعيد يحكي
خالد :" لاااارين..لاارييين "
حليت عينيا على وسعهم اول ماشفت خالد جرا ناحية الممر الخشبي.. لحظتهاا جريت ناحيتو وطلعت بالوقت..اول ماقربت عالحرف متاع الممر حسيت قلبي ضرب بقوة ك طبست راسي وغزرتلهاا قدامي كيفاه كانت فوسط الماء وعيناها مغمضة.. للحظة حسيت الدنياا دارت بياا وساقياا رزنو معادش هازيني.. بقيت نغزرلها مصدوم مش منجم نصدق انو تكون صارتلها حاجة.. للحظة حسيت الفكرة خنقتني وكبست على صدري.. فقت من سرحتي اول ماحسيت الماء طشني وقت خالد نڤز.. لحظتهاا نڤزت ومديت يدي نعوم
حتى قربتلهاا.. صحت بالقوي على خالد لي كان بش يهزها نحكي
انا :" سيييبهاا.. ماتمسهااش "
دورت بيديا عليهاا وين حسيت ببدنها كيفاه كان باارد ويرعش.. هزيتهاا لفوق بش تتنفس وكبست علاهاا بيد وبقيت نعوم بيدي لخرى.. ريت خالد ك سبقني للممر وطلع.. مد يديه يحكي
خالد:" هات خليني نهزهاا معاك "
قلبي خض بالقوي اول ماهزيتهاا وريت يداهاا كيفاه ترخفت وراسها مال وين حسيت بخوف كبير سيطر عليااا خلاني نتشتت.. اول ماشدهاا خالد طلعت نجري وقربتلهاا.. طبست علاهاا ونزلتلها روبتها لي طلعت وخلات ساقيهاا تبان..هزيتها فحملتي ووقفت..كبست علاهاا وجريت للشط وعينيا على وجهها لي كان اصفر..حطيتهاا فوق الرمل وطبست على ركايبي بجبنها.. طبطبت على وجهها ونطقت بالسيف..نحكي
انا :" لارين..لارين حل عينيك"
مديت يدي لي كانت ترعش وحطيتها على رقبتهاا وين حسيت بنبضهاا كيفاه كان ضعيف.. بعدتلها خصلات شعرها لي لصقو فخدهاا وطبست علاها اكثر.. حطيت يدي على صدرها وبقيت نضغط علاهاا بش تخرج الماء لي بلعتو.. للحظة حسيت الهواء نقص علياا انا زادة والدنيا كاني ضياقت بياا.. بقيت نضغط ومع كل ضغطة هي ماتحلش عيناها فيهاا نترعب اكثر.. فكرة انو تصيرلهاا حاجة خلاتني نتخنق.. فقت من سرحتي على صوت خالد بجنبي يحكي
خالد:" عيسى خلينا نكلمو الإسعاف "
هزيتلو براسي لا وعينيا باقي علاها نحكي
انا :" مانيش بش نستنى... "
طبست علاهاا اكثر وحطيت يدي على دقنونتهاا هزيتلهاا راسهاا شوي وخذيت نفس طويل ومن غير لحظة تفكير وحدة سكرتلها خشمهاا وحطيت شفايفي على شفايفها وعطيتهاا نفس على مرتين..هزيت راسي مرة اخرى ورجعت نضغط على صدرها بالقوي وعينيا تغزر لعيناها نستنى فيهم يتحلو بش نطمن علاها لحظتهاا صوتهاا هد علياا وين تفكرت آخر كلام قالتو لبارح انها بش تبعد علياا جملاا وين حسيت بوجيعة قوية وغريبة ف قلبي لحظتهاا ضغطت علاهاا بقوة اكثر..شهقت بالقوي مع صوت شهقتهاا لي خرجت.. رخفت بدني لي فشل وبقيت نغزرلها كيفاه تكح فالماء.. بقيت نرد فنفس برشة مرات كاني انا لي كنت غارق مش هي.. فكرة اني كنت بش نخسرهاا خلاتني نترعب ونحس قلبي كانو تقسم..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
