#عيسى_يحكي
سكرت الباب وبقيت واقف فبلاصتي ننهج من الغش لي حسيتو.. شوفتها بالمنظر هذاكا خلاني مانتحكمش فعصابي..مانيش عارف وقتاه بش تفهم انو الشي هذاا مايجيش.. ف بالي من أخر مرة فهمتني اما عالظاهر كنت غالط.. قد مانقول بش نسايسهاا ونوسع بالي معاها نلقاهاا عمال تزيد على قدام.. عديت بيديا على وجهي حاولت نهدي روحي اما شي مانجمتش.. فكرة انهاا خارجة معاناا تو مانيش منجم نتقبلهاا.. للحظة حسيت روحي ندمت اني قبلت نجي ونكمل الخدمة وهي معاياا.. نفخت بالقوي ونزلت فيسع وين شفتهم قاعدين يفطرو.. قربت ناحيتهم نحكي
انا :" صباح الخير "
هزو رؤوسهم معاياا يحكيو
" صباح الخير "
جبدت الكرسي وقعدت معاهم.. غزرت لخالد يحكي
خالد :" وينك سي الحوت..تهبط كان ك نطلبك"
انا :" لا وقتها كنت هابط غير انت مزروب "
ضحك يحكي
خالد :" الله غالب متوحشك ياغالي "
انا :" هاني جيت اسكت برك "
غزرت لجمال يحكي
جمال :" اياا افطرو فيسع خارجين معادش وقت "
هزيتلو براسي باهي وخذيت فنجان القهوة.. تلفت بجنبي وين شفت انجيلا حطت الكرواسون تحكي
آنجيلا :" بونجور إيسى "
انا :" بونجور "
قعدت مقابلتني وغزرتلي تحكي
آنجيلا :" ياخي لاغين ويني ؟ مازالت راكدة؟"
هزيتلها براسي لا نحكي
انا :" لا هاي هابطة "
انجيلا :" ايا باهي خلاها تبكا معايا شوي "
غزرت لخالد لي سبقني يحكي
خالد :" نو آنجيلا لاغين مش بش تبكا حذاك خاطرها ماسية معانا "
انجيلا :" بلحق ؟"
خذيت كاسة الماء عملت رشفة نحكي
انا :" اي بلحق "
تلفتت على صوتها وراياا تحكي
لارين:" بونجور "
عديت بعينيا عليها وين شفتها غيرت حوايجها.. ريتها ك قحرتلي وقربت قعدت حذا آنجيلا تحكي
لارين:" سامحوني هبطت مخر "
خالد:" لا عادي خوذ راحتك "
تبسملتو وطبست راسهاا تاكل..بقيت نتبع فيهاا بعينيا كيفاه ساكتة وماغزرت لحد فينا..رغم غشي منها حسيت روحي تقلقت وانا نغزرلها هكاا.. خذيت نفس حاولت ننسى كل شي..المهم عندي انها غيرت حوايجها وكان عالخروج هاي معايا.. فقت من سرحتي على صوت جمال يحكي
جمال :" انا بش نسبقكم انتوما اخطلو فيسع "
هزيت راسي معاه وغزرتلو ك وقف نحكي
انا :" هانا وراك "
ريت انجيلا ك وقفت زادة وقربتلو بش تخرج معاه توصلو.. حطيت الفنجان وغزرت لخالد ك تلفتلها يحكي
خالد :" شبيك لارين ؟ كانك مقلقة ؟"
غزرتلي ورجعت غزرتلو تحكي
لارين:" لا مانيش مقلقة اما ناقصة نوم "
ضحك يحكي
خالد :"انا زادة قمت بالسيف..حتى احنا لبارح خمجناها بالسهرية "
عقدت بحواجبي مستغرب كلامو.. عديت بعينيا عليهم نحكي
انا :" سهرية شنوة ؟"
خالد :" لبارح بعد مارقدتو انتوما..سهرت اناولارين ف الجنينة.. بقينا قريب ساعتين نحكيو "
كبست عالبونية متاعي بالقوي وغزرتلها وين شفتها عضت على شفايفها وطبست راسهاا.. للحظة حسيت دمي رجع فور بعد مابرد.. مانعرفش كيفاه شديت روحي بش مانعملش حاجة تغششها.. هزيتلو براسي باهي ومسحت يدي..قمت من بلاصتي نحكي
انا :" قوم خلينا نمشيو "
هزلي براسو باهي ووقف.. غزرلها يحكي
خالد :" هياا لارين "
خليتهم واقفين وسبقتهم لبرا خاطر مانيش متحمل نشوفهاا اكثر..خذيت نفس طويل مالنسمة الباردة لي ضربتني بش نبرد دمي اما شي حاسس روحي مازالت شاعل ونغلي.. قد ماحاولت نقنع روحي انو لي صار عادي مانجمتش.. شي أقوى مني مش مخليني نتقبل انهاا ساهرة لبارح معاه ودرا فاش يحكيو.. كاني تعرفو عندها سنين وهي عرفتو لبارح.. تلفتت ورايا وين شفتهم خارجين.. عليت فصوتي نحكي
انا :" ساااعة خااارجين ؟"
ضحك يحكي
خالد :" شبيك على عصابك سي الحوت.. هانا وراك "
عديت بيديا على شعري نحكي
انا :" خوك سبقنا عندو ساعة.. تحرك خلينا نمشيو "
هزلي براسو باهي واشرلي بيديه يحكي
خالد :" هياا اطلعوا "
ريتها ك كبست على ساكها وقربت للكرهبة معاياا.. قحرتلها وطلعت من غير مانزيد نغزرلها.. غمضت عينيا بالقوي اول ماطلعت ورايا وين حسيت ريحتها تغلغلت فياا وملات الكرهبة..خذيت نفس منهاا ورجعت حليت عينيا عالكرهبة لي خدمت.. حليت شباك بجنبي وبقيت نغزر للثنية.. تبسمت من غير مانشعر اول ماغزرت للمرايا وشفتها كيفاه متكية عالبلار وشعرها يتطاير وراهاا.. مانعرفش علاش حاس اني معادش فاهم روحي.. مرة نكون شاعل من جرتها ومش حامل نشوفها ومرة نسرح فيهاا وين نحس روحي نهدى من غير مانحس.. ساعات نفد من كلامهاونحبهاا تسكت وساعات يقلقني سكوتهاا..كبست بيديا على ركبتي ك سمعتو يحكي
خالد :" شبيكم ساكتين ؟"
غزرتلو على جنب نحكي
انا :" شتحبنا نحكيو ؟"
خالد :" اي حاجة.. علاش هبطتو الكبي هكاا "
نفخت بالشوي نحكي
انا :" احكي انت هانا نسمعو فيك "
خالد :"بلاهي فكني انا كنبدا ماشي للخدمة هكا نبدأ فادد "
دوب تبسمت نحكي
انا :" زايد هامل ماكش تاع خدمة "
غزرلي وضحك يحكي
خالد:" يا ظالم ياقاسي..ساعة خوك صار صاحب مشاريع "
عقدت بحواجبي نحكي
أنا :" مشاريع شنوة ؟"
ضربني ببونية على كتفي يحكي
خالد :" خلينا نكملو وتو نحكيلك"
هزيتلو براسي باهي وغزرتلو ك غزر من لمرايا يحكي
خالد :" لارين وينو صوتك "
دوب تلفتت على صوتها تحكي
لارين :" هاني نسمع فيكم "
ضحك يحكي
خالد:" هاني بش نحطلك تسمع خوليو كيما لبارح خير مناا "
نفخت بالشوي وتكيت براسي لتالي.. غزرت للثنية وسرحت مع لغناية..
" Je vis dans l'ombre des que je n'ai plus tes yeux, dans le silence des que je n'ai plus ton rire "
رجعت غزرتلها وين شفتها متكية براسها عالبلار ومغمضة عيناها.. مانعرفش علاش رغم كل شي مش منجم نبعد عينيا من علاها..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
