#لارين_تحكي
مانعرفش قداه تعدا وقت واحنا ف الشط هكاا.. غمضت عينيا بالقوي و رجعت حليتهم حسيت روحي دخت من الشمس لقوية.. غزرت لعيسى نحكي
انا :" عيسى خلينا امان نرجعو للشاليه والله دخت "
هز روحو بالوقت ونحى اللينات.. غزرلي يحكي
عيسى :" شبيك؟"
انا :" تقلقت من الشمس.. وزيد فقت بكري حسيت روحي تعبت "
هزلي براسو باهي ووقف.. ريتو ك قرب للشط وعلا ف صوتو يحكي
عيسى :" خالد انا راجع للشاليه "
اشرلو بيديه يحكي
خالد :" براا تو نخلط عليك ونجيب لفطور معاياا "
هزلو براسو باهي ورجعلي.. وقف قدامي يحكي
عيسى :" هياا "
هزيت صندالي وقمت معاه.. شديت ف مرفقو وبقيت نمشي معاه حتى وصلناا للشاليه.. غزرلي يحكي
عيسى :" اطلع دوش وارتاح شوي.. اول مايجي خالد تو نعيطلك "
انا :" انت ماكش خارج مش هكا ؟"
هزلي براسو لا يحكي
عيسى :" لا هاني حذاك "
تبسمت وطلعت لبيتي.. سكرت الباب وراياا ودخلت لسالدوبان نحيت روبتي حطيتها على جنب ودخلت تحت الماء عملت دوش خفيف ورجعت فيسع للبيت.. لبست بيجاما خفيفة سروالها طويل وتسطحت.. رغم اني مش حابة نرقد اما النعاس بدأ يغلبني خاطر مم بارح لليوم مانيش راقدة مليح.. غمضت عينيا وحشيت راسي ف المخدة.. رجعت حليت عينيا فيسع اول ماشفت تصويرتو وهو ف الماء قدامي.. غزرت للسقف وبقيت نخمم انا علاش نفكر فيه هكا.. تصويرتو قدامي ماحبتش تبعد حتى وعينيا محلولة.. حطيت يدي فوق قلبي وبقيت أنظم ف انفاسي لي قوات.. حسيت روحي تقلقت ك رجعت تفكرتها.. مش عارفة علاش ماحبيتش تركيزهاا معاه لهدرجة.. غزرتهاا ليه متاع بكري حسيتها خنقتني عمري لاحسيت حاجة كيما هاذي اصلا مانيش فاهمة انا علاش متقلقة منهاا هكاا اما كل لي عارفتو اني مانحبش عيسى يحكي معاها ولايقربلها ولاحتى يغزرلهاا خاصة كيما يعمل معايا انا.. هزيت المخدة حطيتهاا فوق راسي وغمضت عينيا.. بقيت هكاكا نتقلب لين غفيت بلا مانحس..
رجعت حليت عينيا على صوت الباب لي دق.. تكسلت وهزيت روحي.. غزرت للوقت وين لقيتها 16.. تقعدت مليح وعديت بعينيا عالبيت.. مش عارفة كيفاه رقدت للوقت هذا.. قمت من بلاصتي فيسع ك رجعت سمعت صوت الباب.. تبسمت اول ما فتحتو وشفت عيسى قدامي.. عدا بعينيه علياا وغزرلي درا كيفاه يحكي
عيسى :" صحة النوم "
رجعت شعري لتالي نحكي
انا :' يعطيك الصحة "
عيسى :" هياا اهبط افطر "
انا :" باهي.. قلي انت فطرت ؟"
هزلي براسو لا يحكي
عيسى :" لاا كنت راقد انا زادة.. فقت ك طلبني خالد "
انا :" باهي نبدل حوايجي ونجي "
هزلي براسو باهي ومشى.. سكرت الباب ودخلت لسالدوبان غسلت حالتي وريقلت أموري ورجعت للبيت خذيت روبة خفيفة ولميت شعري لفوق.. هزيت تاليفوني ونزلت فيسع.. وين شفت عيسى خالد على طاولة لفطور.. قدمت بخطواتي ناحيتهم نحكي
انا :" salut "
هز راسو معاياا وضحك يحكي
خالد:" صحة النوم.. هذا تعملي لبارح مش ناوية تعدي الايامات نوم "
جبدت الكرسي قعدت وغزرتلو نحكي
انا :" فقت بكري ليوم والبارح مارقدتش مليح على هذاكا "
خالد :" ميسالش اما رد بالك ترجع ترقد "
انا :" لا سايي قمت مانرجعش "
غزرت لعيسى ك حط الصحن قدامي ساكت.. تبسمتلو نحكي
انا :" عيشك "
هزلي براسو اي من غير حتى كلمة.. طبست راسي وبقيت ناكل ساكتة نسمع فيهم يحكيو
خالد :" اهوكا حضرو رواحكم خاطر الليلة فما سهرة ف الريستو "
عضيت على شفايفي وهزيت راسي غزرت لخالد نحكي
انا :" احنا لازم نمشيو ؟"
عقد بحواجبو يحكي
خالد :' اي اكيد.. انا اصلا حضرت كل شي على خاطركم انتوما الزوز "
غزرت لعيسى ك قربلي يحكي
عيسى :" كان ماتحبش تو نبقاو.. عادي عندي "
عديت بعينيا عليه وغزرت لخالد وين حسيت روحي حشمت متو خاصة بعد ماقال انو كل شي على خاطرناا.. رجعت غزرت لعيسى نحكي
انا :" لا تو نمشيو ميسالش "
عدا بعينيه عليا يحكي
عيسى :" باهي ووقت ماتحب نروحو قلي "
هزيتلو براسي باهي ورجعت ناكل.. كبست عالشوكة ك سمعت خالد ضحك يحكي
خالد :" هههه حكاتلي جيهان شعملتي ف شعرهاا.. طلعتي تخوفي والله "
هزيت راسي وغزرتلو نحكي
انا :" وحكاتلك هي كيفاه قلقتني ؟"
خالد :" حكاتلي.. وبصراحة عندك حق انا ف بلاصتك راني خليتها صلعة "
ضحكت نحكي
انا :" هههه المرة جاية نعملها "
خالد :" اما بلحق الدنياا صغيرة.. هي بالعادة تهبط ف ليون اما المرة هاذي هبطت ف باريس بش تعمل شوبينغ.. محلاها الصدفة والله "
طبست راسي نحكي
انا :" صدفة كلبة "
عضيت على شفايفي ك حسيت بساقيه ضربتني من تحت الطاوله.. غزرتلو وين شفتو قحرلي.. قحرتلو انا زادة ورجعت ناكل حتى شبعت.. مسحت يدي وعديت بعينيا عليهم نحكي
انا :" خارجين انتوما؟"
عيسى :" علاش ؟"
انا :" سألت؟"
خالد :" اي ممكن نمشي انا وعيسى لريستو نشوفو التحضيرات.. انت حضر روحك خاطر 19 نخرجو "
قمت من بلاصتي وهزيتلو براسي باهي نحكي
انا:" باهي مالا نخليكم "
هز راسو معاياا وغزرلي يحكي
عيسى :" رد بالك تخرج.. كان قلقت كلمني وانا تو نجي "
انا :" لا مانيش خارجة.. اما ماتبطاوش مانحبش نبقى وحدي "
هزلي براسو باهي من غير حتى كلمة.. خليتهم قاعدين ورجعت لبيتي.. سكرت الباب وراياا وقعدت عالفوتاي.. للحظة حبيت نقلو ماتخرجش اما حشمت قدام خالد وزيد كات بش يقلي علاش شنوة بش نقلو نخاف لخرى تعرفك.. كيما حسيت روحي تقلقت للسهرة هاذي خاطر متأكدة هي بش تكون حاضرة وتمد وجهها.. تكيت براسي لتالي وبقيت نغزر للسقف حسيت روحي طارتلي وماحبيتش حتى نقوم بش نلبس..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
