#لارين_تحكي
حليت عينيا على ضو الشمس لي ضرب فياا.. تململت عالفرش وغزرت للوقت.. هزيت روحي فيسع اول مالقيت 10 فاتت.. نفخت بالشوي وقمت بالوقت على قد ماحبيت نقوم بكري مانجمتش..لبارح بقيت نتقلب ف الفرش مانجمتش نرقد طول.. عديتها قريب ساعة وانا نخمم.. دخلت فيسع لسالدوبان غسلت حالتي وريقلت أموري ورجعت للبيت.. قربت بعدت الريدو اكثر وين البيت ضوات.. حليت الشباك وخذيت نفس من النسمة لي حسيتها نعوشتني وفيقتني.. قلبي ضرب بقوة اول مالمحتو من بعيد..خرجت فيسع للبلكونة.. تبسمت وانا نشوف فيه يعمل ف سبور.. قربت وين الدربوز تكيت بيدي عليه وبقيت نغزرلو كيفاه يجري.. عضيت على شفايفي ورجعت فيسع للبيت.. قربت وين الفاليز حليتها..جبدت شورط ومريول لبستهم وخرجت نجري لبرا.. تبسمت ك ريتو مازال يجري وقاعد يقرب للشط لي وين الدار.. رجعت شعري لتالي وقربتلو فيسع..اشرتلو بيدي اول ماهز راسو معايا وغزرلي.. شوي ووقف قدامي يلهث ويحكي
عيسى :" صباح الخير "
عديت بعينيا عليه نغزر لوجهو العارق نحكي
انا :" صباح النور.. ياخي شتعمل ؟"
عيسى :" حسب رايك ؟ فاش قاعدة تشوف ؟"
ضحكت نحكي
انا :" لا ف بالي تعمل ف سبور.. اما نقصد اول مرة نشوفك هكا "
مسح على جبينو ورجع شعرو لتالي يحكي
عيسى :'عندي برشة من لي وقفت عالسبور.. حبيت ليوم نجري شوي "
قربتلو شوي نحكي
انا :" مازلت بش تجري ولاكملت ؟؟"
عيسى:" اي مازالتلي دورة أخرى.. علاش ؟"
انا :" ميسالش نجري معاك ؟"
ضيق عينيه فيا يحكي
عيسى :" وكان تتعب ؟"
انا :" مانتعبش.. جربني امان "
تبسم درا كيفاه يحكي
عيسى :" باهي نجربك.. هياا قدامي "
طبس راسو ورجع غزرلي يحكي
عيسى :" ساعة شبيك حفيانة ؟"
حركت ساقياا عالرمل وضحكت نحكي
انا :" خاطر نحب نعفس عالرمل ونحس بيه "
نفخ بالشوي يحكي
عيسى :" لارين.. بش تجري لازمك تلبس باسكات.. برا البس هاني نستنى فيك "
انا :" لا لا حتى هكا انجم.. تو تشوفني "
هز بحاجبو يحكي
عيسى:" باهي تو نشوفك.. قدامي "
هزيتلو براسي باهي وغزرتلو ك جرا فلحظة من قدامي.. خلطت عليه وبقيت نجري بجنبو.. نحكي
انا :"محلاها النسمة..حقك فيقتني نجري معاك من بكري "
عيسى :" مافيباليش بيك عندك جهد وتنجمي تجري "
حليت عينيا على وسعهم نحكي
انا :" علاش مانجمش؟لي قدامك هاذي كانت تجي لولى فالليسي فالسبور "
تبسم على جنب يحكي
عيسى :" بلحق ؟ وانا لي قاعد نجري بالشوى على خاطرك.. مالا نقوي فالجري ؟"
بلعت ريقي نحكي
انا :" اه..اي قوي على روحك "
هزلي براسو باهي وجرا اكثر.. حليت عينيا على وسعهم ك ريتو بعد عليا فلحظة..عضيت على شفايفي وخلطت عليه.. بقيت نجري على قوة جهدي حتى وصلتلو وين حسيت بنفس تسكر عليا وصدري بدأ يتهز ويتحط.. عديت بعينيا عليه كيفاه يجري عادي وماتعبش.. مسحت لعرق من جبيني وعديت بلساني على شفايفي حتى لفطور مافطرتش وين حسيت روحي جعت.. وقفت نلهث نحكي
انا :" عيسى أقف..اقففف "
غزرلي وتبسم يحكي
عيسى :" كانك تعبت ؟"
حطيت يدي على صدري وبقيت ننهج ونحكي
انا :" علاش انت ماتعبتش ؟"
عيسى :" لاا "
انا :" حرام عليك.. نحس فروحي دخت.. أقف نرتاحو شوي ونكملوو "
عدا بعينيه عليا يحكي
عيسى :" لا انت اقعد ارتاح... "
قصيت عليه نحكي
انا :" وانت علاش ماترتاحش ؟ يزيك لا تموتلي هناا "
قحرلي يحكي
عيسى :" مانحبش نرتاح..ك نجي نشكيلك انصحيني "
قربتلو وحليت عينيا فيه نحكي
انا :" لا ماتجريش وحدك "
عيسى :" يالارين علاش مارجتني فكل شي.. كنت نجري مرتاح جيتي وترتيني "
انا :" امان عيسى اصبر شوي برك نرد النفس وانت زادة ارتاح شوي لا تتخنق شوف وجهك كيفاه عارق واحمر "
عيسى :" يابنتي شدخلك فياا.. تو ك نتعب نرتاح وحدي "
هزيت بحاجبي نحكي
انا :" يعني انت ماتعبتش ؟ ومازلت تنجم تجري مش هكا ؟"
عض على شفايفو وقحرلي يحكي
عيسى:" يعني كان انت خليتيني "
تبسمت نحكي
انا :" بش نخليك.. دقيقة وحدة "
دورت وراء ظهرو فيسع وقربتلو.. نقزت على ظهرو وتشعلقت ف رقبتو.. دور وجهو لوجهي يحكي
عيسى :" شتعمل؟ اهبط "
كبست على رقبتو ودورت ساقياا عليه نحكي
انا :" تؤ مانيش هابطة.. بش تجري بياا "
عيسى :" لارين قتلك اهبط..."
قصيت عليه نحكي
انا :" مانيش هابطة..حتى تجري بياا وتتعب كيفي"
تبسمت ك سمعتو تنهد يحكي
عيسى :" ياربي شعملت فحياتي انا "
كبست عليه اكثر نحكي
انا :" ماتقليش انا رزينة عليك؟ مالا عضلاتك هاذم شنوة ؟"
دور بيديه علياا وطلعني اكثر..شدني يحكي
عيسى :" مدام حبيت هكاا..حبلك ربي نسمع صوتك "
شهقت بالقوي اول مابدا يجري..كبست على رقبتو وبقيت نغزر قدامي مستحلية لنسمة.. حطيت راسي على كتفو نحكي
انا :" تصدق هكا احلى.. نجري مرتاحة "
عيسى :" ارخف يدك من رقبتي "
رخفت يدي وتكيت بدقنونتي على كتفو نحكي
انا :" عيسى ماتعبتش ؟"
عيسى :" لا تعبت وهاني بش نرتاح ونرتحك معاياا "
بلعت ريقي ودورت وجهي ليه.. عديت بعينيا عليه نحكي
انا :" كيفاه بش تريحني؟ ناوي تموتني عيسى ؟"
دور وجهو لياا وغزرلي درا كيفاه يحكي
عيسى :" حاجة هكاا.. بش نوريك شمعناها تعمل هكا "
حليت عينيا على وسعهم اول ماشفتو داخل للبحر.. لحظتهاا كبست عليه اكثر نحكي
انا :" لا لا برحمة بوك ياعيسى ماتعملهاش..والله لاعاد نعاودهاا..سامحني تونهبط"
عيسى :" وراس سامحني متاعك ماتهبط كان فالماء "
حشيت راسي ف رقبتو اول ماحسيت الماء طشني وين حسيت روحي خفت وتفكرت لي صار آخر مرة.. كبست بيدي على صدرو ونزلت على مريولو نحكي
انا :" عيسى امان خرجني.. تو نرجع نتخنق كيف اخر مرة "
غمضت عينيا بالقوي من الخوف لي حسيتو ك تخيلت روحي ف وسط الماء..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
