#لارين_تحكي
خرجت نجري من حذاه ودخلت طول لبيتي..سكرت الباب وراياا وغزرت للساك.. تبسمت من غير مانشعر ك ريتهاا محلولة..مانعرفش علاش أقل حاجة منو نحسها حاجة كبيرة..خذيت نفس وقربت وين الفرش.. حليت الساك وبقيت نشوف شنوة بش نلبس.. تبسمت اول مالمحت روبتي الحمراء..جبدتها بالوقت وحطيت الساك على جنب.. قمت من بلاصتي وحليتها.. عديت بعينيا علاهاا نخمم كان نلبسها هي ولا لا.. حطيتها عالفرش ونحيت حوايجي لبستها وقربت وين لمرايا بش نشوف كيفاه طلعت علياا.. تبسمت اول ماعديت بعينيا على روحي.. قربت اكثر للمراياا وعديت بيديا عالروبة لي كانت مستنرة عليا من فوق وواسعة شوي من تحت..كانت طويلة وفيهاا فونت لبعد الركبة بشوي..يداها كانو بومبي وصدرها مكبوس شوي.. قعدت قدام لمرايا وخذيت تروسي فرت المكياج وخذيت المسكارا عملتو بعد ماعملت الأيلاينر لي خلا عينيا تبان اكثر..حطيتو وخذيتو قلم الروج..حليتو وعديتو على شفايفي..اول ماكملت حليت شعري وفردتو لتالي.. خذيت سلسلة نور لي كانت سامبل وفيها موتيف عبارة على نجمة بحر.. لبستها هي والبراسلي لي تابعتهاا..رشيت شوي من برفان نور وقمت.. حليت عينيا على وسعهم اول ماغزرت لروحي كيفاه طلعت.. هاذي اول مرة نعمل مكياج ظاهر هكاا.. عضيت على شفايفي وبقيت نخمم انا علاش عملت هكاا مش عارفة اما حبيت الليلة هاذي نطلع محلاني.. ضغطت على يدي ك خممت اني نطلع محلاني قدام عيسى.. عديت بعينيا على روحي مستغربة تفكيري..انا علاش نحبو يراني محلاني مش عارفة..عمري فحياتي مالبست ولاحضرت روحي على خاطر حد ولاخممت كان بش يراوني مزيانة ولا لا..خذيت نفس طويل وقربت للفرش لبست صندال ف الأبيض وهزيت ساكي حطيت فيه تاليفوني وتلفتت على صوت الباب لي دق ولي خلاني ندخل بعضي اكثر..للحظة بقيت نخمم زعمة شنوة بش يقلي.. زعمة بش يخليني نخرج هكا ولابش يقلي بدل..اصلا حسيت روحي حشمت وندمت عالمكياج لي عملتو..بلعت ريقي وقربت..اول ماحليت الباب ريتو ك غزرلي وعدا بعينيه عليا.. دقات قلبي قوات من غزرتو لي كانت مركزة معاايا بكلي.. كبست على بواني الباب من الربثة لي حسيتها قدامو ولي خلاتني مانجمش حتى ننطق.. خذيت نفس من ريحتو لي صرت نحبهاا.. وعديت بعينيا عليه وين شفتو كيفاه طلع محلاه ف اللون الأزرق لي انا نحبو.. فقت من سرحتي فيه ك ريتو طبس راسو وعدا بيديه على وجهو..رجع غزرلي يحكي
عيسى :" نمشيو ؟
هزيتلو براسي اي نحكي
انا :" اي هياا "
خرجت معاه وسكرت الباب.. قربتلو وبقيت نمشي بجنبو ساكتة دوب نخطف غزرة منو..للحظة استغربت كيفاه ماقلي شي وماعلقش على روبتي.. غزرتلو كيفاه سارح وحدو حتى نزلنا..تلفتتو نحكي
أنا :" عيسى شبيك ؟"
خذا نفس يحكي
عيسى :" شي "
تبسمت وحبيت نبدل الجو نحكي
انا :" شرايك فياا ؟ مزيانة روبتي ؟"
عدا بعينيه عليا وغزرلي درا كيفاه يحكي
عيسى :" اي صحة "
عقدت بحواجبي مستغربتو..حسيتو مش كالعادة.. قربتلو شوي نحكي
انا :" متأكد مابيك شي "
عدا بيديه على شعرو يحكي
عيسى :" اي لارين مابياا شي"
هزيتلو براسي باهي وغزرت لخالد ك هبط.. عدا بعينيه علينا وغزرلي يحكي
خالد :" ويوااا على لارين.. صحة "
تبسمت نحكي
انا :" عيشك "
خالد :" اياا نمشيو ؟"
عيسى:" اي هياا "
طبست راسي على يديه لي شدتني من مرفقي يحكي
عيسى :" تمشي بجنبي "
هزيتلو براسي باهي وبقيت نمشي بجنبو حتى وصلناا لريستو.. تبسمت ك شفتو كيفاه مليان وصوت لغناء عالي اكثر من بارح.. الضو لي كان شاعل فكل بلاصة خلا الدنيا تظهر كانو مازلنا ف الصباح.. شديت فيد عيسى ودخلت معاه.. غزرت لخالد ك اشرلناا بيديه عالطاولة لي كانت مقابلة لبحر يحكي
خالد :" هاذي طاولتناا "
تبسمت ك شفت عيسى جبدلي الكرسي وغزرلي يحكي
عيسى:" اقعد "
هزيتلو براسي باهي وقعدت وين قعد هو بجنبي وخالد بجنبو من الشيرة لخرى.. ريتهم ك بقاو يحكيو مع بعضهم.. شوي وشفت خالد ك وقف يحكي
خالد :" الجماعة جاو...خليني نستقبلهم"
عيسى :" برا "
رسيت على سنيا بالقوي ك ريت لخرى جات مع الجماعة لي يحكي علاهم خالد.. ريتو ك سلم علاهم واشرلهم على طاولتناا.. قربت لعيسى نحكي
انا :" عيسى شوف..هاذي بش تبقى معانا "
عيسى :" شيهمك فيهاا "
رجعت غزرتلها وين شفتها كيف قدمت ناحيتنا تحكي
جيهان:" bonsoir "
قحرتلها نحكي
انا :" اهلا "
حليت عينيا على وسعهم ك شفتها جبدت الكرسي لي قدام عيسى وقعدت.. عدات بعيناها عليه تحكي
جيهان :" سافا مسيو عيسى؟"
عيسى :" اي "
غزرتلي ورجعت تحكي
جيهان:" محلاك صغرونة.. ماعقلتكش "
غزرتلها على جنب نحكي
انا :" اما انا عقلتك مليح خاطرك ماتتبدلش نفس لخليقة "
ضحكت تحكي
جيهان :" ههههه انا ديما لاهية بروحي خاطر "
انا :" امم واضح "
غزرتلي على جنب ورجعت غزرت لعيسى.. لحظتهاا حطيت يدي فوق يديه وقربتلو نحكي
انا :" عيسى شرايك بعد السهرة نتمشاو شوي عالشط"
عدا بعينيه عليا وغزرلي درا كيفاه يحكي
عيسى :' باهي "
تبسمت ورجعت غزرتلها وين شفتها مركزة معاناا.. هزيت بحاجبي وتبسمت ك ريتها قحرتلي وتلفتت تحكي مع صاحبتها لي كانت بجنبهاا.. خذيت نفس طويل محاولة مني بش نهدي روحي خاطر الليلة مازالت ف اولها.. وانا متأكدة انها مازالت بش توترني كان مش بكلامها راي بغزرتهاا خاصة لي تغزر بيهاا لعيسى..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
