#لارين_تحكي
لبست جبة طويلة بعد ماريقلت أموري لكل وتوضيت..
لميت شعري لفوق وقربت للبلكونة حليتها وخرجت.. عديت بعينيا عالحومة كيفاه كانت فارغة وساكتة كان الرجال ماشين يصليو وصوت القران جاي من الجامع.. حطيت يدي على كرشي لي جاعت أكثر من روايح الماكلة لي تفحفح ف الحومة.. رجعت للبيت هزيت تاليفوني وخرجت طول وين قابلتني عمتي فالصالة تزيد ف صوت القرآن لي بدأ يقرأ.. حطت الكوموند وغزرتلي تحكي
غالية :" صحة النوم رينو "
تبسمت نحكي
انا :" يعطيك الصحة عمتي "
غالية:" هياا ايجا معايا للكوجينة كمل حضر الطاولة مع مايا "
هزيتلها براسي باهي وخرجت معاها.. عديت بلساني على شفايفي اول ماغزرت للطاولة كيفاه كانت مليانة بالماكلة لي تشهي.. دخلت معاها للكوجينة وين لقيتهم مازالو حايسين ف لقضية.. غزرت لمايا لي تقص ف الخبز نحكي
انا :" مايا هات نكمل نقص انا "
نفخت بالشوي ك سمعتها ورايا تحكي
سميحة :" لا يعطيك الصحة.. وحلنا ف الخبز احناا حتى تقصيه انت "
قحرتلها نحكي
انا :" ياخي حكيت معاك انا؟ علاش تنڤزيلي عالكلمة "
غزرت لعمتي ك عطاتني صحن التمر تحكي
غالية :" رينو انت هز هذا للطاولة وارجع هز لبسيسة "
خذيتو من يداها نحكي
انا :" باهي عمتي "
خرجت حطيت الصحن عالطاولة وعديت بعينيا نغزر شنوة طيبو.. رجعت للكوجينة نحكي
انا :" يعطيك الصحة عمتي.. مشالله طيبتو لخير والبركة "
غالية :" انشالله يعجبوك ياماما.. المهم كول وشبع كرشك "
عديت بعينيا عليها وين تفكرت نور ك كانت تقلي هكاا.. خذيت نفس طويل وخذيت من يداها لبسيسة هزيت حطيتها فوق الطاولة ورجعت حذاهم.. قربت وين مايا نحكي
انا :" اعطيني انا نهز الخبز "
ضحكت وعطاتني السلة تحكي
مايا :" شد وارجع بش تهز الشربة هاي سخنت "
هزيتلها براسي باهي وغزرت لعمتي نحكي
انا :" شنوة مازال آخر نهزو ؟"
غالية :" كهو يا ماما كملنا.. هز هاذم وهانا خالطين عليك بش نصليو "
انا :" باهي "
خرجت حطيت الخبز ورجعت هزيت صحفة الشربة لكبيرة وخرجت حطيتها فنص الطاولة لي حضرت من جميعو.. هزيت راسي مع التلفزة على صوت الأذان لي اذن.. تلفتت على صوت عمتي تحكي
غالية :" رينو برا البس عبايتك وجيب سجادتك "
هزيتلها براسي باهي ودخلت للبيت لبست العباية وغطيت شعري هزيت السجادة وخرجت وين لقيتهم لكل حضرو رواحهم.. فرشت السجادة بجنب عمتي وبدينا صلاة بعد ماالأذن كمل.. اول ماكملنا صلاة ودعاء نحيت الفولارة وغزرت لعمتي نحكي
انا :" تقبل الله عمتي "
مسحت على راسي تحكي
غالية :" منا ومنك صالح الاعمال ياروح عمتك "
قمت معاها وخرجنا وين شفتهم قعدو عالطاولة.. على خرجتي غزرت لرانية ك قربت باست امها تحكي
رانية :" عيش سموحتي.. ريحة امك حورية تشهي "
سميحة :" حتى انا حضرتها لبنتي بالذمة.. كولها لكل "
عديت بعينيا عليهم وين حسيت دموعي لي شادتهم نهار كامل بالجهد على شوي ويهبطو..خذيت نفس طويل وقربت بش ناخذ كاسة ماء نبل بيه ريقي.. وقفت على صوت عمتي تحكي
غالية :" رينو لا..اشرب كاس لبسيسة قبل و كول كعبة تمر.. ماتشربش الماء هكاكا على معدة فارغة "
هزيتلها براسي باهي وخذيت من يداها الكأس.. عملت يادوب رشفة صغيرة نحكي
انا :" خليني نمشي نحي العباية بش مانوسخهاش"
خليتهم ودخلت طول للبيت.. سكرت الباب وراياا ومسحت دمعتي لي نزلت.. حسيت روحي مانيش منجمة نبقى معاهم أكثر.. كل شي وكل حركة منهم تفكرني بنور..خاصة شوفتها هي مع امها هكاكا حسيتها وجعتني برشة..اصلا ليوم عديتو نوم بش نهرب من هذا لكل خاطرني لتو مش مصدقة اني معدية رمضان وهي مش معايا.. مانيش مصدقة اني ف دار اخرى غير دار نور وكوجينة اخرى غير كوجينتها.. مسحت دموعي فيسع على صوت جابر لي سمعتو سأل علياا.. خذيت نفس طويل وخرجت.. وياريتني ماخرجت..حسيت قلبي وجعني وقت ريتهم كلهم عالطاولة ملومين يضحكو..عديت بعينيا عليهم واحد واحد وين تمنيت كان نهرب من هناا خاطر مش متحملة نبقى معاهم فرد طاولة من غير نور..فقت من سرحتي على صوت جابر يحكي
جابر :" رينو بنتي شبيك واقفة هيا ايجا "
شديت دمعتي بالسيف وقربت حذاهم بالسيف.. جبدت الكرسي وقعدت ساكتة.. غصة شدتني وقت حط يديه فوق يدي يحكي
جابر :" شبي بنتي ساكتة ؟"
انا :" مابياا شي "
جابر :" باهي تعشى "
هزيتلو براسي وغزرت لعمتي ك حطت صحفة الشربة قدامي تحكي
غالية :" شد ماما اهيكا بالحوت كيما تحبها انت "
هزيتلها براسي باهي من غير حتى كلمة.. هزيت لمغرفة بقيت نحرك فيها من غير ماناكل.. رغم اني قاعدة بيناتهم كنت حاسة روحي وحدي كان خيال نور وصوتها قدامي ف اخر رمضان عديناه مع بعضنا.. رغم انو أنواع الماكلة لكل قدامي تو حسيت روحي ماعيني فشي كان ف اخر حاجة حضرتها نور.. حسيت قلبي تقسم وقت عرفت اني خسرت هذا لكل ومعادش بش نلقاه وقت عرفت اني بش نكمل حياتي من غيرها بين ناس اخرين.. للحظة حسيت كأني تو وين عرفت لحقيقة هاذي.. كل مرة نزيد نحسها أصعب من المرة لي قبلهاا.. غمضت عينيا بالقوي على صوتها هي وبنتها كيفاه يفدلكو..رجعت حليت عينيا وهزيت راسي عديت بعينيا عليهم لكل وين حسيت اني كرهت روحي والظروف لي لزتني نسلم فدار نور ونجي لهنا ونرضى نبقى معاهم فرد طاولة بالرغم اني عارفة هوما شنوة عملو ف نور..كيفاه دمرولها حياتها وكانو السبب ف بكاها وحزنهاا.. استندت بمرفقي عالطاولة وحطيت يدي على جبيني نخبي ف عينيا لي زغللو على قد ماشديت دموعي مانجمت حسيتهم تمردو علياا وبش يهبطو قدام كلمة وحدة...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
