#ادم_يحكي
راكيت الموتور قدام ورشة عم جابر ونحيت الكاسك.. خذيت نفس طويل ونزلت بالوقت بش نعطي خبر للصناع الزوز انو شحنة لقطايع وصلت بش يمشيو ينظموهاا مع جبران وحمزة وفرد وقت نشوف لحسابات هنااا.. حطيت الكاسك فوق كرسي الموتور ودخلت وين قابلوني الزوز قدمت حذاهم وبقيت نفهم فيهم شنوة بش يعملوا..اول ماكلمت معاهم وخرجوا الاثنين.. جبدت تاليفوني وخرجت قدام الورشة بش نكلم عيسى يهبط نخليه هو هناا وانا نمشي نروح نرتاح خاطر حسيت روحي سايي معادش أنجم من صباح ربي وانا فالميناء ماكلمت الخدمة كان ماوجهي صار فقفايااا معادش أنجم نبقى اكثر.. كيما حسيت روحي بديت نفد بلحق من تاليفونات امي من صباح وهي تطلب وعارفها بش تجبدلي نفس الموضوع كانو مايكفيش مخليتني فسيدي رمضان وحدي فعوض تبقى حذايا مشات وخلاتني.. نفخت بالشوي وطلبتو.. شوي ورد علياا يحكي
عيسى :" اا ادم "
انا :" وينك ؟ هاني فورشة عم جابر كيما تفاهمنا اهبط فيسع راني راقد بالواقفة "
عيسى :" باهي ربع ساعة ونكون حذاك "
علقت عليه وجبدت الكرسي قعدت لبرا.. اول ماهزيت راسي تبسمت على جنب ك ريتها جاية من ثنية المرشي.. عديت بعينيا عليها نغزرلها كيفاه حاطة الحطة كاني كانت فعرس مش مرشي..اصلا مافهمتش شتعمل وحدهاا تدور فالحومة كاني تعرفها وتعرف ناسها..عقدت بحواجبي مستغرب اول ماقربت شوي وريتها كيفاه قابلة خليقتها ووجهها كان احمر غير انها تمشي مش متلفتة لحد لحظتهاا قمت من بلاصتي فيسع هبطت الڤراج ومشيت ناحيتها.. غزرتلي اول مازفرت ورجعت دورت وجهها.. قدمت بخطواتي فيسع ناحيتها ووقفت قدامها نحكي
انا :" طرشتي ؟"
قحرتلي تحكي
مايا :" شوف مانيش ناقصتك تو.. ابعد من قدامي خليني نروح "
عديت بعينيا عليها نحكي
انا :" شبيك متغششة ؟"
مايا :" مانيش متغششة.... "
انا :" يزي بلا كذب وجاوبي.. شبيكي قالبة وجهك فما حد تبولد عليك هنا ؟"
حليت عينيا على وسعهم ك ريت عيناها زغللو بالدموع.. قربتلها شوي نحكي
انا :"ياا بنتي انطقي شبيكي؟؟ "
عدات بصوابعها على عيناها تحكي
مايا :" عمتي بعثتني بش نشري شوي ڤوتة وجبن.. ياخي مشيت لراجل لي يبيع غادي فالمرشي هذاكاا عرفتو؟ "
انا :" عمك صالح اللبان شبيه ؟"
ماايا :" نلقاه معبي اول مرة..بقيت نستنى حتى يعدي النساء لي قبلي..ياخي بعد لقيتو طفاني وعدا لي جاو بعدي ك تكلمت قتلو راني من بكري نستنى قلي ماعندكش صبر..قتلو راني من بكري واقفة عاد تلفتتلي مرا تعملي ماتحشمش احنا نساء كبار فعوض تعدينا وانت شكون مانعرفوكش.. ك قتلها انا نقرب لعمتي غالية قتلي تكذبي تقولي هكا بش يعديك وشعلت فياا قدام الناس لكل وشطر كلامها والله لا فهمتو بش نجاوبها وهو قلي برا امشي معناش ڤوتة "
عديت بعينيا عليها نغزرلها كيفاه شعلت وتحكي بيداها.. تنهدت بالشوي وقت ريت عيناها رجعو زغللو وين حسيت روحي غزلت من عمك صالح خاطرو ديما هكاا والصنعة هاذي فيه يبجل حد على حد.. نحكي
انا :" باهي إيجي معاياا "
مايا :" وين عندي نجي معاك.. ابعدني انت خليني نمشي لعمتي والله مانشكي بيهم والمرا انا متفكرتهاا اهيكا قصيرة وبطية وخايبة "
ضحكت نحكي
انا :" نساء الحومة شطرهم هكاا "
حلت عيناها فيا تحكي
مايا :" ياخي تفدلك ؟"
عديت بيديا الزوز على وجهي نحكي
انا :" مانيش نفدلك.. إيجي معايا ووريني شكون لمرا تو نوريك فيهاا هي وعمك صالح "
عدات بعيناها علياا تحكي
مايا :" بلحق؟"
انا :" اي "
هزتلي براسها باهي ومشات معايا من ثنية المرشي.. اول ماقربنا وين لمحل ريتها ك أشرتلي بيداها تحكي
مايا :" اهيكا لمرا مازالت واقفة عندو تحكي معاه..الي لابسة جبة rouge "
ضيقت عينيا نغزر للمرا وين لقيتها خاتك رقية.. نفخت بالشوي وهزيتلها براسي باهي نحكي
انا :" باهي إيجي اما تبقى ساكتة ردي بالك تتكلمي "
عوجت شفايفها وطفاتني.. قحرتلهاا وقدمت وين لمحل.. تعديت الناس لي واقفة بش تشري ووقفت قدام الكنتوار.. عديت بعينيا على عمك صالح ورقية نحكي
انا :" عم صاالح..شبيك عالطفلة؟ جات تشري تقوم تصيح علاهاا ماو لباس ؟"
رسيت على سنيا بالقوي وتلفت على صوتها تحكي
رقية :" وانت شدخلك ولد فطوم ؟ حطوك محامي هناا ؟"
كبست عالبونية متاعي بالقوي نحكي
انا :" يدخلني وكان عجبك.. شوفي هاني انبه عليك هاذي آخر مرة تعيطي علاهاا.... "
قصت علياا ك غزرتلها تحكي
رقية :" عرفتك لفعة بسبعة ريوس.. ماشية تشكي لولد فطوم.. عرفتي وين تحطي ساقيك ربي يسترنا راناا ف شهر فضيل "
مايا :" فاش تحكي انت.... "
قصيت علاهاا ك شديتها من مرفقهاا وحطيتها وراياا.. قربتلهاا وحليت عينيا فيها نحكي
انا :" فاش تخرفي ياااشيبة النار ياعزوزة الستوت انت.. شوفي ماتخلينيش نهبل هالنهار..انا جيت نحكي بالقدر اما كان تحبي تشوفي وجهي لآخر زيدي معاياا كلمة برك "
رقية :" كهو انت وصاحبك باندية هناا.... "
قص علاها عمك صالح يحكي
صالح :" ادم ولدي انا مافيبالش الطفلة تابعتك "
انا :" مالا هاو ولا ف بالك..وخليني نقلك انها تابعة عم جابر مالااا والحوت.. واحمد ربي طحت معاياا "
صالح :" والله لا كنا نعرف..لمعلم جابر قدرو كبير عندي وانا زاده كيف ولدي.. وياسيدي هاني بش نرضيك ونرضيهاا... "
غزرلها يحكي
صالح :" قلي شتحب بنتي "
هزت راسها معاياا وغزرتلي ساكتة.. تلفتت على صوتها تحكي
رقية :" اما انتوما عقاركم كبير..شمازالت تلم الحومة"
رسيت على سنيا من لعصب لي مكني منهاا ومن لسانها.. اول ماهديت علاهاا وقفت على يداها لي شدتني لحظتهاا تلفتت وشفتها كيفاه كانت خايفة وين حاولت نهدي روحي على خاطرهاا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
