#لارين_تحكي
حطيت الكاسة من يدي ومسحت يدي..خذيت صحن سلاطة الروز من يد عمتي وبديت ناكل فيها ونسمع فيهم يحكيو.. تلفتت على صوت رانية تحكي
رانية :" بابا بش نطلب منك حاجة ؟"
جابر :" اي قلي رنوش ؟"
عدات بعيناها علينا وغزرتلو تحكي
رانية :" بابا ميسالش نخرج بعد شقان الفطر.. نمشي حذا رنيم صاحبتي تو امي توصلني وتجي تروح بياا "
ريتو ك عدا بعينيه علاها وتنهد يحكي
جابر :" رنوش تعرفتي مشي الديار مانحبوش.. قلها هي تجي حذاك.. ولا اخرجو كلكم اعملو دورة ف المدينه العربي مش خير ؟"
تبسمت تحكي
رانية :" وميسالش رنيم تمشي معاناا ؟"
جابر :" اي بالطبيعة "
رجع غزرلي وتبسم يحكي
جابر :" اخرج انت زادة رينو بدل الجو وانت زادة ماياا بنتي "
بلعت ريقي وحطيت لمغرفة من يدي نحكي
انا :" نو جابر انا مانجمش نخرج الليلة "
عقد بحواجبو يحكي
جابر :" علاش ؟"
انا :" خاطر عندي مانعمل "
حط لمغرفة من يديه وتلفتلي شوي يحكي
جابر :" شعندك تعمل "
خذيت كاسة الماء عملت رشفة ورجعتهاا.. عديت بعينيا علاهم لكل نحكي
انا :" بصراحة انا عندي مانحكي "
ريتهم ك هزو ريوسهم لكل وغزرولي بالوقت.. ضغطت على يدي محاولة مني نهدي روحي..رجعت غزرت لجابر نحكي
انا :" جابر انا ليوم مامشيتش للمعرض "
عدا بعينيه عليا وهز بحاجبو يحكي
جابر :" مالا وين مشيت ؟"
بلعت ريقي وخذيت نفس طويل بش مانتوترش خاصة قدام عينين لآخر لي ماهبطتش من علياا.. نحكي
انا :" جابر انا مشيت عملت مقابلة متاع خدمة وتقبلت "
حل عينيه فيا يحكي
جابر :" شنوة ؟ خدمة شنوة زادة ؟؟"
رجعت شعري لتالي نحكي
انا :" مصممة ازياء ف شركة ازياء واعلانات "
تلفتت على صوت عمتي تحكي
غالية :" وعلاش ماقلتلناش رينو ؟"
انا :" سامحني عمتي اما ماحبيتش نقول قبل مانتاكد منهاا ونعرف روحي إذا بش نتقبل ولا لا ؟"
جابر :" يعني انت تقبلت وجاية تخبر فيناا.. مش تشاور فيناا ؟"
عديت بلساني على شفايفي نحكي
انا :" شنوة الفرق جابر ؟ ياخي انا ك بش نشاورك كنت بش تقلي لا ؟"
هز بحاجبو يحكي
جابر :" حسب رايك انت ؟"
انا :"مانعرفش.. اما اكيد مش بش تقلي لا خاطر هذا مستقبلي وانا مصيري نخدم شي نهار مانيش بش نعدي عمري لكل ف الدار "
قلبي ضرب بقوة ك ريت لآخر كبس عالمغرفة لي كانت ف يديه وقحرلي يحكي
عيسى :" قبل كل شي قلنا وين الخدمة ومنين عرفتها الشركة هاذي ؟"
رسيت على سنيا بالقوي من لعصب لي حسيتو منو خاطر دخل روحو هو زادة و فعوض يهدي جابر زاد وترني.. تلفتت على صوت جابر يحكي
جابر :" شبيك سكتت ؟"
هزيتلو براسي لا نحكي
انا :" لا ماسكتتش.. الخدمة ف lac2 "
هزيت راسي مع لاخر وحطيت عينيا ف عينيه لي كانت محلولة فياا نحكي
انا :" والشركة انا نعرف صاحبها.. عرفتو نهار لي جينا من فرنساا.. هو قعد بجنبي فالطيارة وحكينا وتعرفنا على بعضناا.. شاف خدمتي وعجبتو واقترح علياا الخدمة هاذي وانا وافقت "
ضغطت على يدي وقت ريت عينيه كيفاه حمارت وشوي وتخرج فياا.. تلفتت فيسع على صوت جابر يحكي
جابر:" لارين بنتي انت كيفاه تخدم مع حد عرفتو ف الطيارة ؟"
انا :" ماتخافش جابر انا سالت عليه.. وزيد نزار مش خايب والله.. راجل متربي وخدام وهو قدملي فرصة انا كنت نستنى فيهاا عمري لكل.. جابر انا بش نخدم مع ماركات معروفة امان ماتقولش لا وافرحلي.. خدمتي بش تتعرف ف تونس وانجم نصير مشهورة "
تلفتت على صوت عمتي تحكي
غالية :" باهي والخدمة هاذي كيفاه وشنوة الخدمة فهمناا لارين ؟"
هزيتلها براسي باهي نحكي
انا :"' عمتي الخدمة بش تكون ف الدار نمشي للشركة كان نهارين فالجمعة.. وخدمتي لولى بش تكون مع شركة عطور "
ضحكت وعديت بعينيا علاهم لكل نحكي
انا :" انا بش نحضرلهم فكرة الإعلان وتصميم فستان العارضة لي بش تصور الإعلان انا بش نحضرو زادة "
ريتو كيف تنهد بالقوي يحكي
جابر :" لارين ياريتك كان حكيت معانا قبل بنتي.. ماتوقعتش هذا منك والله.. كيفاه تكذب علياا هكاا وتمشي لبلاصة اخرى.. ياخي انا كنت بش نمنعك؟"
عضيت على شفايفي وشديتو من يديه نحكي
انا :" سامحني جابر والله لا قصدت نكذب.. اما بلحق انا خفت تمنعني وزيد والله حبيت نشوف الخدمة قبل ماحبيتش نحكي قبل مانتاكد اكثر "
عدا بعينيه عليا يحكي
جابر :" باهي اما قبل ماتخدم بش نمشي معاك نشوف لبلاصة ونسأل عالشركة هاذي "
خذيت نفس طويل نحكي
انا :" جابر انا سالت.. وسألت عبد انت تعرفو مليح.. نزار كان يخدم ف فرنساا 10سنين لتالي وتو جا لتونس حل الشركة هاذي.. مالا انا طلبت من خالد يسالي عليه ف فرنساا قبل وهو قلي نزار باهي.. خالد سأل وعرف ماضيه وحاضرو لكل وقلي برا اخدم معاه راو مفماش كيفو وانو هاذي فرصتي "
عقد بحواجبو يحكي
جابر :" خالد خو جمال ؟"
انا :" اي هو "
عدا بيديه على وجهو يحكي
جابر :" مانيش عارف شنوة بش نقول.. لارين انت تعرف مليح انك مش بحاجة خدمة... "
قصيت عليه ك كبست على يديه نحكي
انا :" نعرف جابر.. اما انا نحب نخدم مش عالفلوس كهو.. انا نحب نعمل الحاجة لي علمتهالي نور..نحب نخدم على خاطر روحي وعلى خاطرهاا.. امان حاول تفهمني.. انا نحب اسم نور يتعرف ف تونس زادة كيما خليتو يتعرف ف فرنساا.. "
عدا بعينيه عليا وغزرلي درا كيفاه ساكت.. عضيت على شفايفي وبقيت نستنى فيه شنوة بش يقول وفرد وقت غزرت لآخر لي قحرلي وهزلي براسو باهي وين حسيت روحي بلحق خفت منو
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
