#عيسى_يحكي
تكيت بظهري لتالي نغزر لخالي وادم لي يحكيو ويفدلكو وانا مش معاهم جملا.. تفكيري لكل فيها و فحالتهاا بكري عالطاولة.. من اول ماقعدنا وانا نتبع فيها بعينيا نغزرلها كيفاه متقلقة وعيناها مزغللين بالدموع.. رغم انها حاولت ماتظهرش قدامنا اما انا حسيت بيهاا خاطرني صرت نعرفها مليح كيما عرفت سبب لي خلاها هكاكا من قبل حتى ماتقول وين لقيت كان نجمت نحكي معاها بكري ونخفف علاها حتى شوي.. كيما حسيت روحي غزلت من سميحة لي مش حابة تحشم على روحهاا وتبعدهاا كل مرة وهي مغزلتهاا وليوم كثرت على ماوصاوها.. تنهدت بالشوي وقت تفكرت صوتها بكري كيفاه تحكي بالغصة شادة دموعها قدامنا غير رعشة يداهاا وقت تشد الحاجة كيما حسيت روحي بلحق تحيرت علاها وقت ريتها ماكلات شي وخاصة وقت قامت ودخلت للبيت.. لحظتها كان لقيت راني انا قمت وشفتها رغم اني عارف انها مش بش تحكي معايا اما كنت بش نحاول نخفف علاها شوي.. من لي قعدت ماحسيتش روحي ارتحت كان وقت ريتها رجعت وبدأت تاكل معاناا وتحكي شوي..ضغطت على يدي بالقوي ك تفكرت حكاية لخروج لي طلعت بيها مانعرفش علاش ماصدقتش حكاية المعرض.. خاطرني كيما نعرفها وقت تتقلق صرت نعرفها وقت تخبي زادة وتكذب.. فقت من سرحتي على صوتها ك دخلت حذانا للصالة وف يداها طبق التاي.. بقيت نتبع فيها بعينيا كيفاه تفرق ف الكاسات حتى وصلتلي.. استويت ف قعدتي وعديت بعينيا عليهاا نغزر لوجهها لي مازال ظاهر عليه لقلق.. خذيت كاسة التاي من عندها نحكي
انا :" يعطيك الصحة "
عدات بعيناها علياا وهزتلي براسها اي من غير حتى كلمة.. خذيت رشفة من الكاسة ومازلت نتبع فيها بعينيا حتى ريتها قعدت بجنب صاحبتها ساكتة.. هكاكا وغزرت للامي كيف دخلت وف يداها طبق آخر فيه بوزة والبسبوسة لي شريتهالها انا.. دوب تبسمت ك ريتها ضحكت تحكي
لارين :" يااا عمتي عملت بسبوسة ؟"
ريتها ك هزت طرف حطتها ف صحن صغير وبدأت تاكل فيهاا.. للحظة حسيت روحي بلحق شايخ علاهاا كيفاه تاكل فيها وفرحانة.. تلفتت للامي كيف غزرتلها تحكي
غالية :" لا ياروحي كنت بش نعملك والله اما غلبني الوقت.. عاد قلت لعيسى يشريلك "
شديت تبسميتي بالسيف وقت ريتهاا ركحت فمها لي يتحرك وحلت عيناها ف الصحن.. كحت بالشوي تحكي
لارين :" اا اوكي.. حتى انا عرفتها مش متاع دار خاطرها مش بنينة "
حطت الصحن عالطاولة وغزرتلي.. هزيت بحاجبي معاها وغزرت لصحنهاا لي كملتو وكان فارغ.. قحرتلي ودورت وجهها علياا.. غزرت لادم لي كان غاطس ف صحفة البوزة يحكي
ادم :" بصراحة هاذي ابن بوزة كليتها.. عندها لحق لارين ماكلتك ابن من ماكلت الشارع "
غالية :" صحة وبالشفاء لولدي.. ك هكا علاش شريت بكري لحلو هذاكا لكل راني انا طيبتلك "
ضيقت عينيا فيه نحكي
انا :" مالا انت لي شريت لحلو ؟؟"
قحرلي يحكي
ادم :" حبلك ربي تفضحني "
ضحكت وهزيتلو براسي باهي.. قحرت لسميحة لي نطقت تحكي
سميحة :" ياخي حد فيكم يطلب عزيز.. علاش اول ليلة ف رمضان مش ملموم معانا "
حطيت الكاسة عالطاولة وغزرت للامي تحكي
غالية:" عيسى بابا ك تخرج شوف خوك..طلبتو بكري قلي بش يشق فطرو حذا صحابو.. قتلو شكون صحابك قلي ماتعرفيهمش.. راو بلحق تعبني "
نفخت بالشوي نحكي
انا :" باهي امي تو نمشي نشوفو "
جابر :" ك تلقى سيادتو.. قلو قلك خالك جرب غدوة ماتروحش تو تشوف حسابك معاياا "
هزيتلو براسي باهي نحكي
انا :" باهي خالي "
سمحية :" قلو يروح وقت السحور زادة.. تو نحضرلو انا لكريمة لي يحبها "
قحرتلهاا وتلفتت نغزر لرانية بجنبهاا كيفاه مطبسة راسها مع التاليفون ساكتة.. ماركزتش معاها ياسر وغزرت للادم نحكي
انا :" هياا نهبطو ؟"
هزلي براسو اي يحكي
ادم :" اي هياا وقيت صلاة لعشاء قريب "
قمت من بلاصتي بعدو وغزرت لخالي يحكي
جابر :" تو نتقابلو ف الجامع "
انا :" باهي خالي "
غزر للادم ك قرب لأمي يحكي
ادم :" ايا تصبحو على خير ويعطيك الصحه يا غاليوتة عالماكلة لبنينة "
غالية :" صحة وبالشفاء لولدي..وكان اشتهيت حاجة قلي رد بالك تحشم.. انت كيما عيسى وعزيز هناا "
باسها من راسها يحكي
ادم :" ربي يخليك لينا "
تبسمت وعديت بعينيا عليهم لكل نحكي
انا :" اياا نخليكم تو "
ريتها ك هزت راسها معاياا وطبستو فيسع.. خرجت مع ادم ونزلناا فيسع.. تلفت على صوتو يحكي
ادم :" نمشيو ناخذو كابوسان من القهوة وبعد نحلو الورشة "
انا :" قبل كل شي خلينا نمشيو لسي عزيز "
عقد بحواجبو يحكي
ادم :" وانت تعرف عليه وينو تو ؟؟"
انا :" حسب رايك انت..راو محشي حذا تينڤا كالعادة"
ادم :" ولد شيحة حطيتو يعس على تينڤا كيما وصيتني.. قلي راو ايامات يرا فيه مع حمزة.. مش عارف خوك كيفاه مطيح روحو ويتبع فيهم "
نفخت بالشوي نحكي
انا :" هاني مازلت صابر عليه.. نستنالو ف غلطة وحدة هو ولا هوما لكلاب..وقتها ورب الكعبة مانحاسبهم الثلاثة.. خليه يعمل كيما يحب تو "
ادم :" من رأيي بلحق شوف معاه صرفة وخليه يجبد روحو منهم.. انا نعرفهم ولاد حرام يلقاو عبد نظيف مايرتاحو كان مايدخلوه لخمجهم "
انا :" هاني نشوف اما خوياا ساقط.. ك نجي ننصحو يراني نسب فيه "
ادم :" خوك صغير.. ايجاه بالسياسة تكسبو "
هزيتلو براسي باهي وشدينا الثنية سوق سيدي عبد السلام.. طريق كامل عديتو وانا نخمم كيفاه بش نخليه يبعد علاهم.. خاطرني بلحق مانيش مرتاح لا لتينڤا وخاصة اكا حمزة ومتاكد بش تجي من تحت راسو مصايب خاصة كان يطلع شكي صحيح ويكون ليهم يد ف حكاية بلبل.. وقتها مانشعل فيهم النار الثلاثة..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
