#لارين_تحكي
حطيت فنجان قهوتي عالتابل دونوي وتكيت بظهري لتالي..غمضت عينيا بالقوي من وجيعة راسي لي حسيتها ضربتني.. تنهدت بالشوي ك تفكرت ليلة لبارح لي عديتها فايقة للفجر نخمم ف لي صار معاه.. حتى عمتي ومايا لي خلطو علياا وسهرو معايا ماركزتش معاهم من وراء تصويرتو وصوتو لي بقاو قدامي.. ليلة كاملة عديتها نتخبط وحدي شادة دموعي بالسيف قدامهم..قد ماحاولت ننساه وننسى قربو مني وريحتو مانجمتش.. كل مانحاول نلقى قلبي يتمرد على عقلي وهو لي يربح.. حليت عينيا وسرحت مع ضو الشمس لي كان ضارب فياا نخمم كيفاه بش نخرج ليوم من البيت.. كيفاه بش نرجع نراه ونسمعو.. مسحت دمعتي لي طاحت وهزيت روحي شوي.. مستحيل نبقى هاربة هكاا لازمني نخرج ونتحمل.. بالوقت تو نتعود ونرتاح.. اكيد بش يجي وقت وتصير شوفتو عادية قدامي.. اكيد بش نتعداه ونبدأ من جديد.. هذا لكلام لي بقيت نحاول نقنع بيه روحي كل يوم وكل صباح اما من اقل حاجة منو نلقى روحي نرجع لنقطة الصفر.. خذيت نفس طويل وقمت من بلاصتي هزيت لبياس الفوقانية متاع البيجاما لبستها فوق خلعتي وخليتها محلولة.. هزيت فنجان القهوة وخرجت بش نشوف عمتي ومايا شيعملو.. اول ماخرجت تبسمت وانا نغزر لمايا فوق الطاولة تقص ف النواصر.. هزت راسها معاياا وتبسمت تحكي
مايا :" enfin خرجت شوي.. ايجا اقعد حذايا "
قربتلهاا حطيت الفنجان فوق الطاولة نحكي
انا :" عمتي ويني ؟"
تلفتت على صوتها جاي من الصالة تحكي
غالية :" هاني ياماما "
قلبي ضرب بقوة اول ماتلفتت وغزرتلو هو بجنب عمتي.. عديت بعينيا عليه وين شفتو كيفاه طالع فوق السلوم يركب ف ريدوات الصالة وعمتي بجنبو شادتو.. اول ماغزرلي دورت وجهي فيسع وغزرت لعمتي نحكي
انا :" عمتي سامحني خليتكم وحدكم صباح كامل "
غالية :" ميسالش ياماما.. ارتاح مدامك تاعبة "
انا :" لا لباس تو.. قلي شنوة نعمل معاكم"
غالية :" مدام هكاا ايجا شد الريدوات هاذم وشد عيسى خليني انا نمشي نركب لفطور.. سميحة مشات للمرشي رقدت "
رمشت عينيا برشة مرات نحكي
انا:" ت..تحب انا نركب لفطور ؟"
ضحكت تحكي
غالية :" كان تعرف تطيب كمونية مانقولش لا "
عضيت على شفايفي نحكي
انا :" مانعرفش "
غالية:" هههه ايجا مالا انت هناا "
غزرت لمايا لي هزتلي براسها اي ورجعت غزرت قدامي.. نفخت بالشوي وقدمت بخطوات رزينة ناحيتو للحظة حسيت روحي ندمت خاطر خرجت مش كنت شادة البيت خير.. اول ماوصلت خذيت من يد عمتي الريدوات وشديت بيه السلوم.. سمعت عمتي تحكي
غالية :" رينو عينك عليه بش الريدو مايجيش معوج.. و ك يكمل اعطيه هذاا الأبيض يركبوا "
هزيتلها براسي باهي وبقيت شادة بيه وانا مغزلة.. نفخت بالشوي ك سمعتو يحكي
عيسى :" ركح يدك شبيك ترعش ؟"
هزيت راسي معاه وقحرتلو نحكي
انا :" شرايك كان نوريك كيفاه نرعش بلحق ونطيحك"
تبسم على جنب يحكي
عيسى :" شبيك على عصابك ؟"
رسيت على سنيا بالقوي نحكي
انا :" تلهى ف خدمتك مانيش بش نبقى واقفة ياسر نستنى ف سيادتك "
عيسى :" نكمل ف عقل عقلي.. وانت تبقى واقفة و فمك ساكت "
هزيت بحاجبي نحكي
انا :" بالله ؟"
عيسى :" والله "
عالكلمة كبست عالسلوم ورعشتو بالقوي.. شديت ضحكتي بالسيف ك ريتو شد ف الحيط.. قحرلي يحكي
عيسى:" تي اركح "
انا :" ابعدني تو نرررركح "
عدا بعينيه عليا وغزرلي درا كيفاه يحكي
عيسى :" هات الريدو الابيض"
اول ماهزيت يدي بش نعطيه.. جبدني منهاا وطبس راسو.. غزرلي ف عينيا يحكي
عيسى :" وانا مانيش باعدك "
حليت عينيا على وسعهم فيه نحكي
انا :" مش على كيفك "
عدا بعينيه عليا وهبط عينيه لخلعتي يحكي
عيسى:" سكر سوريتك "
شهقت بالشوي ورميت الريدو على وجهو نحكي
انا :" لم عينيك يا ساقط.. وزيد شيهمكك "
خذا الريدو واستواء روحو يحكي
عيسى :" باهي اعمل كيما تحب "
عوجت شفايفي نحكي
انا :" خفت برشة "
قحرلي وطلع يركب ف الريدو الثاني.. نفخت بالشوي ك حسيت ساقياا وجعتني نحكي
انا :" امشي راني تعبت "
رسيت على سنيا بالقوي ك ريتو طفاني.. قحرتلو وطبست راسي جبدت تاليفوني لي نوقز من جيب بيجامتي.. قلبي ضرب بقوة ك ريت خالد يطلب وين حسيت اطرافي رعشت من التوتر.. تبسمت وبقيت نغزر لرقمو نستنى وقتاه نكمل بش نكلمو ونشوف شعمل.. تهزيت وتحطيت على صوتو لفوق يحكي
عيسى:" شكوون يكلم فيك لي خلاك تكشخ هكا ؟"
قحرتلو نحكي
انا :" شيهمممك "
وخرت بخطواتي لتالي اول ماريتو نڤز ووقف قدامي و ف لحظة وحدة خطف من يدي التاليفون.. حل عينيه على وسعهم وغزرلي يحكي
عيسى :" خالد علاش يطلب فيك ؟"
ضغطت على يدي بالقوي وقربتلو فيسع.. مديت يدي حاولت نفك تاليفوني نحكي
انا :" اعطيني تاليفوني "
هز يديه لفوق وعلا ف صوتو شوي يحكي
عيسى :" خاالد علاااش مازال يكلم فيييك "
عليت ف صوتي كيفو نحكي
انا :" قتللللك هاات تاليفوني "
عيسى:" ماااكش بش تاخذوا حتى تجاوبني "
انا :" وانا مانيش بش نجاوبك.. خاطر مايدخلكش "
هد علياا وقربلي.. طبس راسو شوي وين حسيت بانفاسو ضربتني يحكي
عيسى :" يدخلني.. بالسيف عليك يدخلنننني "
عديت بعينيا عليه مستغربة وجهو لي تقلب فجأة.. لحظتهاا طلعت فيسع على طراطيش صوابعي خطفتو من يديه وجريت للبيت بش نبعد عليه.. سكرت الباب وراياا وبقيت ننهج على بلاصتي من لعصب لي ركبهولي الساقط.. حليت عينيا على وسعهم اول ما تلفتت وغزرت للباب لي تحل وين شفتو واقف قدامي.. قلبي ضرب بقوة ك ريتو سكر الباب وراه وقربلي.. لحظتهاا حسيت روحي بلحق غزلت وفرد وقت تربثت ودخلت بعضي من غزرة عينيه وخطوتو لي عمال تقربلي أكثر..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
