#لارين_تحكي
دخلت نجري للبيت وسكرت الباب ورايا.. بقيت نرد ف النفس وراء بعضو من التوتر لي حسيتو قدامو.. رغم اني ماكنتش نغزرلو اما حسيت بغزرتو لياا لي بقات تتبع فياا وين مايدور.. للحظة حسيت روحي بلحق استغربت شنوة مازال يحب مني.. كانو نسى شنوة قال كيفاه طلب مني نبعد عليه اما مش هذا لي قاعدة نرا فيه منو..على قد مانبعد انا على قد مانحسو هو العكس..غزرتو ليا وكلامو وتركيزو معاياا خلاوني معادش فاهمة شي.. فقت من سرحتي على صوت مايا تحكي
مايا :" لقيت الكيت ؟"
قدمت بخطواتي ناحيتها وحطيت الكيت يتشرجي نحكي
انا :" اي.. كان على طاولة لفطور نسيتو بكري "
طلعت حذاها عالفرش نحكي
انا :" بعد لعشا نطلعو لسطح ونكلمو خالد "
ماايا :" باهي رينو..خليني انا نقوم نغسل حالتي ونبدل حوايجي "
هزيتلها براسي باهي وغزرتلها كِقامت جبدت حوايجها وخرجت..احظتها قمت هزيت ساكي ورجعت للفرش.. ربعت ساقياا وحطيتو قدامي وجبدت الكارط متاع نزار.. عديت بعينيا عليه وركزتهم مع اسمو
" نزار عبد الهادي ".. تنهدت بالشوي ورجعت نخمم مرة اخرى ف لي صار لبارح فالطيارة وين حسيت انو واحد محترم ويحب خدمتو رغم اني ماحسيتش بقلق من ناحيتو اما مانيش بش نتسرع وناخذ حتى قرار تو حتى نشوف كان خالد ينجم يعاوني..غزرت للباب لي تحل وين شفت مايا دخلت.. تبسمت نحكي
انا :" صحة ياروحي "
مايا :" يعطيك الصحة رينو "
عدات بعيناها علياا ورجعت تحكي
مايا :" فاش تعمل ؟"
انا :" هاذي كارط نزار "
حطت المنشفة وتروسها على جنب وقربتلي.. خذاتها من يدي وقعدت قدامي.. عدات بعيناها عليهاا تحكي
مايا :" انشالله يطلع صادق "
انا :" انشالله.. احنا تو نشوفو وكان صادق مرحبا كان لا مش خاسرين شي "
حطت الكارط على جنب وطلعت عالفرش.. ربعت ساقيها تحكي
مايا :" باهي تصور خالد قلك راو صادق ولي قالهولك صحيح.. بش تكلمو طول ؟"
مطيت شفايفي نحكي
انا :" اي بش نكلمو ونشوف إذا مازال العرض قائم ولا لا "
هزت بحاجبها تحكي
مايا :" وكان مازال قائم.. بش تقبل طول ؟"
انا :" اي بالطبيعة.. ساعة قبلها نشوف كيفاه الخدمة والاوقات.. هو فالطيارة قلي تنجم تخدم حتى فداركم و مانعرفش "
مايا :" هذا لكل ساهل.. تنجم تتفاهم معاه وهو اكيد بش يقبل بكل شروطك خاطر مستحيل يلقى وحدة كيفك "
تبسمت نحكي
انا :" انشالله "
ريتها ك عوجت شفايفها تحكي
مايا :" تو بقيت انا.. زعمة شنوة الخدمة لي نشوفهاا ؟ ووين نلوجو ؟"
عقدت بحواجبي نحكي
انا :" وين عندك تلوج ؟ انا كان تفاهمت مع نزار ناوية يقلو هو يشوفلك خدمة معانا "
حلت عيناها فيا تحكي
ماايا :" شنوة ؟ يابنتي ناوية تهرب الراجل انت ؟"
قحرتلها نحكي
انا :" اسكت وخليني انا نتصرف "
مايا :" ربي يستر "
ضحكت وغزرت للباب لي تحل.. تبسمت ك ريت عمتي دخلت تحكي
غالية :" علاش ساهرين هنا وحدكم؟ ايجاو للصالة "
انا :" عمتي جابر روح ؟؟"
هزتلي براسها اي تحكي
غالية :" اي مازال ك روح تو.. اخرجو حذاه شوي "
انا :" باهي هاني جاية "
غزرت لمايا تحكي
مايا :" رينو انت اسبقني.. انا بش نطلب الطفلة لي شادة محل الفخار وبعد لي شادة المعرض.. مستانسة كل يوم نتفقدهم.. لبارح ماطلبتهمش جملا "
انا :" باهي كمل واخلط.. ماتبطاش "
هزتلي براسها باهي وخذات تاليفونها.. قمت من بلاصتي لميت ساكي فيسع حطيتو على جنب وخرجت مع عمتي نحكي
انا :" عمتي مازال لعشا؟ جعت "
ضحكت ومسحت على شعري تحكي
غالية:" نص ساعة ويحضر ياروحي "
هزيتلها براسي باهي وغزرت لجابر لي قاعد فالصالة.. دخلت حذاه نحكي
انا:" الله عينك جابر "
هز راسو معايا وتبسم يحكي
جابر :" الله يهنيك عيش بنتي.. ايجا حذايا "
قدمت بخطواتي ناحيتو وقعدت بجنبو.. شدني من يدي يحكي
جابر :" كيفاه عديت ن هارك ليوم لباس ؟"
عديت بعينيا عليه وتبسمت نحكي
انا :" اي لباس.. ليوم بقيت نعاون ف عمتي انا ومايا"
جابر :" صحيت اما ماتعبش روحك برشة مازلتي ك رجعتي من السفر.. ارتاحي شوي "
انا :" لا مانيش تاعبة والله بالعكس هاني عاملة جو مع عمتي "
مسح على شعري وضحك يحكي
جابر :" مالا لعشا الليلة من يد رينو "
ضحكت نحكي
انا :" ههه لا لحق عمتي طيبت لعشا.. حتى لفطور متاع بكري عمتي حضرتو.. انا غسلت الماعون وحضرت التاي "
جابر :" هاو جاي رمضان.. نحبك انت تصنف لبوك "
عديت بعينيا عليه وفركت يديا ف بعضهم نحكي
انا :" اما انا مانعرفش انت شنوة تاكل وشنوة تحب جابر "
حط يديه فوق يدي وغزرلي درا كيفاه يحكي
جابر :" حتى انا مانعرفش انت شنوة تحب.. شرايك كان تخلينا نعرفو بعضنا..اسألني على اي حاجة تحب تعرفها علياا وانا تو نجاوبك.. المهم ماتبقاش ساكتة وجابدة روحك مني "
انا :" انا مانيش جابدة روحي... "
جابر :" اما ساكتة.. احنا مش تفاهمنا قبل ماتسافر انك بش ترجع وبش نتقربو من بعضنا.. شصار رينو ؟"
عضيت على شفايفي نحكي
انا :" ماصار شي.. اما انا لبارح كنت تاعبة جابر وليوم انت لبرا نهار كامل.. اول ماقتلي عمتي انك روحت انا جيت طول حذاك "
تبسم وطبس باسني من جبيني يحكي
جابر :" ياريتني روحت بكري مالا..اما هاني ليوم صفيت خدمتي لكل بش نبقى حذا بنتي "
انا :" يعني معادش بش تهبط ؟"
جابر :" لا بش نهبط اما ساعة ولا ساعتين ونرجع.. يعني اغلب الوقت بش نعديه ف الدار حذاك "
عضيت على شفايفي وبقيت نغزرلو نخمم كيفاه بش نجبدلو حكاية الخدمة كان صحت وقتلي هو عمل هكاا على خاطري..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
