#ادم_يحكي
خرجت من تحت التاكسي بعد مازدت تفقدتها للاخر مرة.. سكرت الكبوط ودخلت للورشة هزيت المنديل مسحت يدي وغزرتلو ك يفطر.. هز راسو معايا وتبسم على جنب يحكي
عيسى :" تاكسي غلبتك ؟"
قحرتلو نحكي
انا :" شوف انت ابعدني هالنهار "
ضيقت عينيا فيه نغزرلو كيفاه يفطر ويتبسم يحكي
عيسى :" مافهمتش شبيك على عصابك هكا ؟ شنوة فيهااا ك توصلهالو انت التاكسي.. الراجل كبير احسبو بوك "
رسيت على سنيا بالقوي نحكي
انا :" علاش ماتحسبوش انت بوك وتهزهالو مالا "
عيسى :" هو كلمك انت.. ماكملنيش اناا "
عديت بيديا الزوز على وجهي نحكي
انا :" هو نهار ازڤح باين من أولو "
ضحك يحكي
عيسى :" هذا لكل خاطر فطوم قتلك رمضن وحدك؟ مافيباليش بيك ترضع ف صبعك ماتعرفش تتصرف وحدك"
نفخت بالقوي وهزيت المفك الصغير ضربتو بيه نحكي
انا :" ياخي جاي تفرك فيهم علياا انت هالنهاار.. ابعدني "
قحرلي يحكي
عيسى :" كان جبتو ف راسي راني وريتك حسابك "
انا :" خوفتني "
مسح يديه ووقف من بلاصتو.. قرب ناحيتي وحط يديه على كتفي يحكي
عيسى :" باهي يزي ماك قالب وجهك.. ياخويا رمضان بش تعديه معاياا.. خلاهاا فطوم على راحتها.. جمعة وتتعدا وتو ترجع حذاك تدللك يا ڤنوشو "
قحرتلو نحكي
انا :"ابعد من قدامي ابعد.. وزيد انا مانيش متغشش على امي خلاها تبقى قد تحب غادي "
عقد بحواجبو يحكي
عيسى :" مالا شبييك ؟"
نفخت بالشوي وجبدت الكرسي.. قعدت وتكيت بظهري لتالي نحكي
انا :" ليوم صباح للا أميرة اختي طلبتي "
جبد الكرسي وقعد قدامي يحكي
عيسى :" شبيها ؟"
انا :" قال شنوة تحبني نمشي نرمضن حذاها انا زادة نبقى الجمعة لولى.. قتلهاا لا راو عندي خدمة وانت بعيدة.. ف بالي لحكاية وفات غادي.. تقوم فطوم تكلمني بعدها قال شنوة لااا بش تجي عالاقل ليلتين لوالى متاع رمضان "
هز بحاجبو يحكي
عيسى :" وعلاش هذا لكل.. خايفين عليك وحدك؟"
نفخت بالشوي وعديت بيديا على شعري نحكي
انا :" لااا.. طلعوا الزوز متفاهمين مع اخت محمد راجل أميرة.. هي تجي وانا نجي بش نشوفو بعضنا "
دمي فور مني ك ريتو شادد الضحكه بالسيف يحكي
عيسى :" وعلاش بش تشوفو بعضكم ؟"
ضربتو ببونية على كتفو نحكي
انا :" حسب رايك انت ؟ قال شنوة هي عاقلة ومتربية ومانيش بش نلقى ماخير منهاا.. مالا امي تحب تلصقهاا فياا وأميرة اختي تحبني نسمع كلامهاا بش ترضي راجلها واختو "
حك على جبينو يحكي
عيسى :" اي هاي فرصة جاتك.. مش قتلي اكا ليلة نويت تعرس.. برا شوفهاا "
قمت من بلاصتي نحكي
انا :" برا صلي عالنبي ياولدي.. ماعندي مانشوف انا لحكايات هاذم نكرز منهم.. مانحب حد يحطني تحت الأمر الواقع حتى يا لو كان امي "
هز راسو معايا وغزرلي يحكي
عيسى :" باهي انت برا شوفها شعندك تخسر.. خوذ بخاطر امك "
حليت عينيا على وسعهم نحكي
انا :" شعندي نشوووف.. قلتلها امي الموضوع هذاا تنسيه.. واميرة وصيتهاا بش تتلهى ف روحهااا.. هذا لي مازال نمشي نعرس قطوس ف شكارة.. نشوفها مرة ونقول الله بالك "
ضحك يحكي
عيسى :" اهيكا فطوم شافتهااا.. وانا نعرف فطوم ذوقها باهي "
هزيت يدي ف وجهو بش نضربو من لعصب لي زاد هو ركبهولي بدمو لبارد ليوم...نحكي
انا :" شرايك نقول لفطوم تو يجي عيسى يشوفهاااا.. خوذها انت خير مني "
تكا بظهرو لتالي وتبسم يحكي
عيسى :" هههه انا القرعة الجاية انشالله "
انا :" تعرف انا الطحان لي نحكيلك "
عيسى :" باهي هاني سكتت.. اما من رأيي بلحق تمشي تشوفها هكا ماتخليش اختك ف الحشمة وزيد عيب ترجع امك "
حكيت على لحيتي نحكي
انا :" تي شفتها انا قبل ونعرفهاا.. طفلة هاااااو طولهااا قول محمد خوهاا قدامي من كثر ماهي طويلة.. وزيد ضعيفة ك عبود لبسيسة.. كان نحط علاها يدي ماتتقسم ك كعبة الكاكي.. وزيد ماهيش جوي ياخويااا.. الطفلة عاقلة ياااسر ونهار وطولو وهي ساكتة "
عدا بعينيه عليا وغزرلي مستغرب يحكي
عيسى:" وانت ماتحبش طفلة عاقلة ؟ "
انا :" لاا انا لي نحب ناخذها نحبها عزري مسيب.. نحبها محرحرة ولسانها طويل هكا انا نطمن علاهاا.. تي هاذي كان نطلعها ورايا ف الموتور ماتموتلي عالبلاصة من الفجعة.. وزيد نخاف انا نهار اخر تقلي نحب نسكن حذا امي غادي.. وقتها قسما بالله مانشد نغفصهاا هي واميرة اختي ومعاهم محمد راجلها مانعجنهم ف بعضهم ونبدا نهز فيهم وننفض بش نوريهم العرس على اصولو "
ضحك يحكي
عيسى :" هههه كان تسمعك فطوم ماتشد هي تعجنك تو وفمك ساكت "
نفخت بالقوي نحكي
انا :" بلاهي اخطاني خوك واحل وحلة كلبة.. خليني نمشي نهز التاكسي ناقص عمك طبالة انا تو "
هزلي براسو باهي وقف من بلاصتو يحكي
عيسى :" برا برا واهوكا ف الثنية خمم.. كان هكاا خليني نبدأ نعربنلك عالفرقة "
كبست عالبونية متاعي وهزيتها فوجهو نحكي
انا :" ريتها البونية هاذي.. رد بالك منهاا "
ضحك يحكي
عيسى:" باهي هاني سكتت "
قحرتلو وهزيت المفتاح وخرجت فيسع.. طلعت فالتاكسي خدمتها وخرجت بيها للحومة.. وقفتها على جنب بش تسخن شوي وهبطت للحماص شريت باكو دخان ورجعت للتاكسي.. اول ماطلعت تلفتت على صوت الباب لي تحل وين شفت طفلة ركبت.. عديت بعينيا عليها مستغرب الوجه الجديد لي عمري ماريتو ف الحومة...
VOUS LISEZ
#مُتمردة_العيسى ❤️🔥 (الستاتي الثاني)
Romantizm#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
