#لارين_تحكي
حليت عينيا بالسيف على صوت ال alarme لي نوقزت.. تململت شوي ورجعت حشيت راسي ف المخدة.. اول مابديت نغفى رجعت قمت على صوت مايا تحكي
مايا :" رينو هياا قوم تسحر وسكت المنڤالة امان "
نفخت بالشوي وقمت.. سكتت المنڤالة نحكي
انا :" ياخي انت مش بش تقوم معايا؟"
دوب حلت عيناها تحكي
ماياا :" كان تحبني نقوم تو نقوم "
عديت بعينيا عليها نغزرلها كيفاه ناعسة وتحكي بالسيف.. مسحت على شعرها نحكي
انا :" لا ياروحي ارقد ميسالش "
هزتلي براسها باهي وغمضت عيناها وين غفات بالوقت.. تنهدت بالشوي قمت بالسيف لميت شعري لفوق وخرجت طول نكركر ف ساقيا.. تعديت لتوالات غسلت حالتي وريقلت أموري وتوضيت للفجر وخرجت وعينيا باقي مغمضة من النوم.. اول ماقربت لطاولة ريت عمتي خرجت من الكوجينة وتبسمت تحكي
غالية :" تو كنت جاية بش نفيقك "
ترميت عالكرسي وتكيت براسي عالطاولة نحكي
انا :" عمتي بش نموت بالنوم "
ضحكت تحكي
غالية :" ميسالش ياماما شد روحك شوي.. تسحر وصلي وادخل ارقد "
هزيتلها براسي باهي وغمضت عينيا..رجعت حليتهم على صوت الجماعة كيف خلطو..مسح على شعري يحكي
جابر :" رينو اياا فيق وهز روحك "
هزيت روحي وتكيت بظهري لتالي.. غزرت لعمتي كيف حطت صحن مسفوف وكأس حليب قدامي تحكي
غالية :" نحبك تكملهم لكل "
عديت بعينيا عليهم وين حسيت روحي تسقمت من وراء الغصة لي شدتني ك تفكرت نور وقت كانت تحضرلي المسفوف هي زادة.. شديت دمعتي بالسيف وغمضت عينيا على يد جابر لي تحطت فوق كتفي يحكي
جابر :" رينو تسحر قبل مايغلبك الوقت "
حليت عينيا وهزيتلو براسي باهي.. شديت لمغرفة بالسيف وبقيت ناكل بالسيف مغصبة على روحي.. هزيت راسي وعديت بعينيا عليهم واحد واحد كاني نلوج على نور بيناتهم اما مالقيتهاش.. كل يوم وقدام كل موقف نزيد نتأكد أكثر اني خسرتهاا وأنها مش بش ترجع وانو مابقالي تو كان ذكرياتي معاها لي يوجعوني أكثر من لي يخففو عليا.. حطيت كاسة الماء بعد ماكملت وقمت نحكي
انا :" صحة ليكم "
غزرت لعمتي ك وقفت زادة تحكي
غالية :"رينو برا البس عبايتك وايجا الفجر بش يأذن "
هزيتلها براسي باهي وعطيتها بظهري دخلت لتوالات ريقلت أموري ورجعت للبيت لبست العباية لي جابهالي جابر بكري غطيت شعري ووهزيت السجادة وخرجت وين شفت جابر ك خرج من بيتو زادة لابس جبة.. قرب ناحيتي وعدا بعينيه عليا.. مسح على راسي يحكي
جابر :" مشالله على بنتي.. بدر منور ياضي جابر "
تبسمت بالسيف نحكي
انا:" عيشك جابر "
جابر :" برا صلي واقرا شوي قرآن قبل ماترقد.. ماتخليش النوم يغلبك رينو "
انا :" اي تهنى جابر.. انت ماشي لجامع ؟"
جابر :" اي عيسى وادم اللوطة يستناو فياا.. هاني هابط تو "
تبسمت نحكي
انا :" ربي يتقبل "
طبس باسني من راسي يحكي
جابر :" منا ومنك صالح الاعمال "
تبسمت وغزرتلو ك خرج.. خذيت نفس طويل ومشيت للصالة وين شفت عمتي لابسة عباية زادة.. غزرتلي وضحكت تحكي
غالية :" مشالله على بنتي.. ربي يحميك من العين ياماما "
انا :" عيشك عمتي "
غالية :" رينو القبلة هكا..افرش سجادتك بجنبي "
هزيتلها براسي باهي وفرشت سجادتي بجنبها.. ريت سميحة ورانية ك خلطو عليناا زادة وفرشو سجادتهم بجنبي.. تلفتت لعمتي ك عطاتني كاسة الماء تحكي
غالية :" شد رينو اشرب وانوي صيامك "
عديت بعينيا عليها وخذيت الكاسة من يداها وين تفكرت نور.. اصلا من بكري قاعدة ندور وخيالها يدور معاياا.. للحظة هاذي مانيش مصدقة اني قاعدة نعيش ف التفاصيل هاذم من غيرها.. ضميت على شفايفي وخذيت نفس طويل وشربت شوي ماء ونويت صيامي.. حطيت الكاسة وقت سمعت صوت الأذان..اول ماكمل قربت للسجادة ووقفت بجنب عمتي وبدينا صلاة.. اول ماكملت هزيت يدي دعيت لنور بش ربي يرحمها وربي يعطيني القوة بش نتحمل فراقها علياا.. خذيت السبحة وبقيت نسبح مع عمتي لي مازالت قاعدة بجنبي تسبح هي زادة وين حسيت روحي ارتحت شوي وقلبي اطمن.. اول ماكملنا غزرت لعمتي نحكي
انا :" تقبل الله عمتي "
مسحت على راسي تحكي
غالية :" منا ومنك صالح الاعمال ياروح عمتك.. ايا برا لبيت اقرا شوي قرآن وارقد ارتاح "
هزيتلها براسي باهي وقمت.. عديت بعينيا عليهم لكل نحكي
انا :" تصبحو على خير "
كلهم :" وانت بخير "
هزيت سجادتي طويتهاا ودخلت للبيت حطيتها على جنب وقربت خذيت كتاب القرآن لي شراهولي جابر وقربت للفرش وين شفت ماايا ف سابع نومة.. طبست بستها من خدها واستويتلها مخدتهاا وقعدت بجنبهاا.. حليت كتاب القرآن وقريت اول ورد.. غمضت عينيا بالقوي و رجعت حليتهم على دمعتي لي طاحت من غير مانشعر.. مسحتها فيسع وبقيت نقرأ حتى كملت اول 5 صفحات.. سكرت الكتاب حطيتو بجنبي عالتابل دونوي وقمت نحيت العباية والفولاة حطيتهم على جنب وتسطحت.. اول ماحطيت راسي عالمخدة دمعة أخرى نزلت مني وقت استرجعت صوت نور وهي ترتل ف القرآن وقت كانت تعلم فياا.. غمضت عينيا بالقوي وين دموعي نزلو اكثر ضميت على شفايفي وبقيت نبكي على تصويرتها وصوتها لي بقاو قدامي وين حسيت قلبي وجعني من كثر ماتوحشتهاا وتوحشت وصوتهاا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
