#لارين_تحكي
خذيت نفس طويل ووخرت بخطواتي لتالي شوي.. هزيت بحاجبي وغزرتلو كيفاه باقي واقف ف بلاصتو يغزرلي ماتحركش.. نحكي
انا :" نحكي معاك راني.. ابعد خليني نتعدا "
ربع يديه وضيق عينيه فيا..غزرلي درا كيفاه يحكي
عيسى :" من وقتاه تعلمت تكذب انت ؟"
عديت بعينيا عليه وعقدت بحواجبي نحكي
انا :" شنوة ؟"
عيسى :" شنوة لي شنوة ؟ مفهمتش سؤالي ؟"
قحرتلو وقدمت بش نطلع لفوق نحكي
انا :" مافهمتش ومانيش نجاوب.... "
قص علياا وقت شدني من مرفقي ووقفني..رسيت على سنيا بالقوي وهزيت راسي معاه نحكي
انا :" سيبني خليني نتعداا "
هز بحاجبو يحكي
عيسى :" مالا بش تولي تخدم ؟"
انا :"اي بش نولي نخدم..انشالله مايكونش عندك مانع ؟"
بعد علياا وهز يديه الزوز لفوق يحكي
عيسى:" لااا ماعندي حتى مانع.. وانت شكون مازال ينجم يحكي معاك.. اعمل لي تحب "
ضغطت على يدي بالقوي من لعصب لي حسيتو من نبرة صوتو لي كانت باستهزاء.. مانعرفش كيفاه قربتلو وحطيت عينيا ف عينيه نحكي
انا :" ايي بالضبط انا بش نعمل لي نحب عليه.. ورد بالك تحاول تدخل فيااا خاطر حياتي ما تخصكش "
قربلي شوي وطبس راسو قدامي.. عدا بعينيه علياا يحكي
عيسى :" من غير ماتتقوى على رواحك.. خليني معدي لحكاية بكيفي وساكت.. اما كان بش تعاندني ورحمة بابا ف قبرو يالارين لا نخليك تعفسهاا لخدمة ك تتقلب الدنياا سافيهاا على عاليهاا "
رسيت على سنيا بالقوي نحكي
انا :" ماتنجم تعمل شي.. انت ماعندكش حكم علياا..."
هز بحاجبو وقحرلي يحكي
عيسى :" هذاا تو.. اما بعد فما كلام اخر.. ووقتها تو تشوف انا عندي حكم عليك ولا ماعنديش "
حليت عينيا فيه نحكي
انا :" احنا معادش بيناتنا حتى كلااام لا تو ولا مبعد.. ابعدني وخليني مرتاااحة.. شمازلت تحب مني... "
شهقت بالقوي ك خطفني من مرفقي وقربني ليه.. عديت بعينيا على وجهو لي تقلب ف لحظة وركزت مع عينيه لي ڤدحت.. علا ف صوتو شوي يحكي
عيسى :" نحبببك تعممممل عقل كييف النااااس.. ماااشية ك البوهااالية تخدمي مع واااحد عرفتيييه ف طياارة ماتعرررفي على جد واالديه شي.. لاااا فوق من هذااا مش مخبرة حد فينااا.. يعني كااان مشيييتي ولقيييتي لبلاصة خااالية وصااارتلك مصيييبة مانعرفوووش عليييك وين... "
ضربني بصبعو على راسي ورجع يحكي
عيسى :" فهمنننني هذاااا كيفاااه يخممم.... "
ضغطت على يدي بالقوي من لعصب لي حسيتو من كلامو لياا غير صوتو لي عمال يعلى عليااا لحظتهاا
عليت ف صوتي اكثر منو وقصيت عليه نحكي
انا :" شييييهمك انت.... "
تهزيت وتحطيت على صوتو ك صاح يحكي
عيسى :" يهمنننني.. قتلك الف مرة بكلك تهمنننني.. ك نراااك ماااشية تصدقلي ف وااااحد مش عااارفين الرااااسة متاع والدين والديه وقتهااا يهمني.. ك نرااااك ك البوهالليييية تعطي ثقة ف لي يجيييي وقتها يهمننني "
عديت بعينيا عليه وين حسيت بغصة شدتني من كلامو لياا..شديت دمعتي بالسيف نحكي
انا :" صحيح انا كنت بوهالية خاطرني وثقت ف واااحد كيفك انت.. ومهمااا بش ناثق تو مستحيل نلقى حد يضرني كيما ضريتني انت.. ابعدني وانا بش نكون مليحة "
رخف يديه من مرفقي وعدا بعينيه عليا.. غزرلي درا كيفاه وهزلي براسو باهي يحكي
عيسى :" عارف لكلام معاك زايد.. تحب تخدم اخدم.. اما بش نبعد عليك هاذي تفسخهاا من مخك... "
قصيت عليه نحكي
انا :" شمعناهاا نفسخهاا من مخي.. ياخي ف بالك الدنياا تمشي على كيفك انت.. تبعدني وقت ماتحب وماتبعدنيش وقت ماتحب "
عدا بيديه الزوز على وجهو يحكي
عيسى :" مانيش بش نجاوبك تو.. اما بش يجيك وقت وتسمعني وعلى قريب..... "
رجعت قصيت عليه نحكي
انا :" مانيش بش نسمعك.. ماعندي مانسمع منك.. يكفي انك تبعدني كيما انا بعدت عليييك.. مش هذاا لي حبيت عليييه انت مالا نفذووو "
عدا بعينيه عليا وغزرلي درا كيفاه يحكي
عيسى :" وهذا لي بش نعملو.. بش انفذ لي نحب عليه اما غير هذاا.. مالا خليك حاضرة "
كمل كلامو وعطاني بظهرو هبط بالوقت.. عديت بعينيا عليه مش فاهمة شي من كلامو وشنوة يقصد بيه.. شمازال ناوي يعمل اكثر من هكاا مافهمتش.. عديت بيديا الزوز على وجهي محاولة مني بش نهدي روحي ونبرد عصابي لي شعلت منو..كل مرة وهو هكاا مخليني متوترة مش عارفة شمازال يحب مني.. كل مرة يزيد يدخلني بعضي اكثر بتصرفاتو وكلامو لي مش مقابل بعضو.. ساعات نبقى مستغربة غزرتو لياا كيفاه تبدلت فيسع ورجعت نفسها متاع قبل كانو ماصار شي وين ساعات نشك ف لي صار نقول بالك انا كنت نحلم وقتهاا.. فقت من سرحتي على صوت ماياا وينو شفتها طلعت و ف يداها الطبق تحكي
مايا :" ياخي كنت مع عيسى ؟"
هزيتلها براسي اي.. قربتلي شوي تحكي
مايا :" شصار بيناتكم ؟ ريتو كيفاه هابط متغشش سألني على عمتي ومشى "
عديت بيديا على شعري نحكي
انا :" ماصار شي.. كالعادة يدخل فروحو "
مايا :" عالخدمة مش هكا ؟"
انا :" امم "
مايا :" شيهمك فيه رينو ماتغشش روحك.. خلي يحكي كيما يحب..يحكي يحكي ويسكت ماعندو مايعمل "
تنهدت بالشوي نحكي
انا :" اي نعرف.. هياا خلينا نطلعو "
هزتلي براسها باهي وطلعنا.. شعلت لضو وقربت لطاولة لي كانت وين حرف السطح لي يطل عالحومة.. حيطت الرسومات من يدي وقعدت بجنب ماياا لي حلت البيسي.. تبسمت كريتها عطاتني شكلاطة تحكي
ماياا :" شد كول وماتخمم فشي كان ف خدمتك "
خذيتهاا من يداها نحكي
انا :" هذا لي بش يصير "
حليت الشكلاطة كليتها وحطيت الورقة قدامي.. تبسمت على صوت ام كلثوم لي حطتو ماياا فالبيسي وشديت لقلم وين حاولت مانركز فشي كان خدمتي لي قدامي بش ننساه..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
