#لارين_تحكي
كملت نظمت الفرش وقربت للشباك حليتو شوي بش البيت تتهوى.. لحظتهاا عديت بعينيا عالبلكونة لي كانت مزينة بمحابس الورد غير كراسي الدرجيحة لي كانو على جنب.. رغم انها تو صارت احلى اما لقيت روحي مانحبش نعفسها.. مانحبش لانشوف ورشتو لي تقابلني ولانحس بخطوتو فوقي.. حاسة روحي نحب نمحي كل شي يخصو ونبعد على كل حاجة تنجم تفكرني بيه.. رغم اني حاسة انو هذا صعيب كأني قاعدة نحارب ف حاجة أقوى مني اما بش نحاول.. مهما كان قوة الشي لي نحس فيه انا قادرة بش نمحيه ونعفس عليه ونتعدا.. رجعت شوي الريدو وقربت للخزانة بش نبدل حوايجي قبل ماتجي مايا.. تبسمت اول ماحليتها وغزرت لجبايب لي شرتهملي عمتي بذمة لياا.. لحظتهاا حسيت روحي ارتحت شوي ك تفكرت انو عمتي موجودة معاياا هي زادة.. هي الوحيدة لي بقيت مرتاحتلهاا رغم لي صار ومانجمتش نتبدل معاها ولا نتجنبهاا خاطرني بلحق نحبها ونحب حنيتها وكلامها معايا.. اصلا هي ماتستاهلش يكفي لي عملتو معايا ومازالت تعمل فيه تو خاصة مع ماياا لي قبلتها كيفي وحسبتها كيف بنتها زادة.. قلبي ارتاح شوي وقت تفكرتها هي وJoseph وحتي جابر وين حسيت انو ممكن انجم نتقبل وجودي هناا اكثر مع الوقت بوجودهم هوما معاياا غير مايا بالطبيعة.. تنهدت بالشوي وجبدت جبة ف الاورونج والباج.. عديت بعينيا عليها اول ماحليتها وين شفت الطريزة لي كانت منقوشة فيهاا.. سكرت لخزانة وقربت وين لمرايا نحيت حوايجي ولبستها.. تبسمت اول ماغزرت لروحي وين شفتها كيفاه جاتني قد قد.. كانت نص يد وتوصل لركبة بالضبط ومسنترة على بدني.. فردت شعري لتالي وربطتو بفولارة نور لحرير لي كانت فنفس لون الجبة وخليت قصتي مفرودة.. رشيت شوي برفان وعملت مكياج خفيف وخرجت بش نحضر فطور مايا.. اول مادخلت للكوجينة عديت بلساني على شفايفي نحكي
انا :" اممم ياعمتي.. ريحة المقرونة تهبلل "
ضحكت وغزرتلي تحكي
غالية :" هياا شوي ونحطو لفطور نكمل نقلي كعبات الكفتة برك "
انا :" انا جيت بش نعمل قهوة ماياا "
غالية :" نحي القهوة تو.. خلاها تفطر معانا خير "
تبسمت نحكي
انا :" ماياا لازم تشرب قهوتها بش تفيق.. وبعد تفطر "
غالية :" اه منكم جيل تو.. 13 تشربو ف قهوتكم "
ضحكت وحطيت الززوة عالغاز نحكي
انا :" ليوم برك خاطر صبحنا راقدين اما من غدوة نشربوها بكري معاكم "
غالية :" اي ك هكا ميسالش "
عدات بعيناها علياا وضحكت تحكي
غالية :" ساعة شنوة الزين هذا لكل.. الجبة جاتك تهبل "
تبسمت نحكي
انا :" حتى انا حبيتها عاللخر.. عيشك عمتي ربي يخليك ليا.. فرحت بيهم الجبايب عاللخر "
غالية :" صحة وفرحة لبنتي.. تو نزيد نشريلك غير البسو وشيخو "
ضحكت نحكي
انا :" والله مانقولش لا.. مدام معايا مايا لازمنا برشة جبايب "
تلفتت على صوتها تحكي
مايا :" صباح الخير عمتي "
غالية :" صباح النور ياروحي.. ادخلي ماما شبيكي واقفة "
طفيت عالززوة نحكي
انا :" مايا هاني حضرتلك قهوتك كيما تحبها "
قربت باستني من خدي تحكي
مايا :" عيش أختي "
تبسمت وسكبتها ف فنجان حطيتو عالطاولة وقربت حطيت كعبات حلو نلقى جابر شراهم لبارح نحكي
انا :" ماياا لازمك تذوق لحلو هذا.. بنين عاللخر "
خذات الصحن من يدي تحكي
مايا :" اي هات "
قعدت بجنبها وخذيت كعبة معاها ناكل.. ريتها كيف هزت راسها تحكي
مايا :" تهبل ريحة ماكلتك ياعمتي ومفوحهاا "
غزرتلها وضحكت ورجعت غزرت للمقلة تحكي
غالية:"عيشلي بنتي.. راني حبيتك ماتاكل شي بش ماتفسدش فطورك.. اما رينو قالت مايا لازم تشرب قهوتها "
مايا :" اي عمتي الله غالب تعودت قبل كل شي قهوتي لولى.. اما تو ماناكلش حلو بش مانفسدش فطوري خاطرني مانيش ناوية نفلت فطورك "
غالية :" صحيتي ياماما.. واصلا لفطور هاو حضر "
عديت بعينيا عليهم وين حسيت روحي بلحق فرحت ك لقيت مايا مرتاحة وتعودت بعمتي وعمتي تتصرف معاها كأني تعرفها من قبل..كنت خايفة كان ماياا تتقلق ولا حد يقلقهاا وقتها كنت بش نهزها ونمشي خاطر هي اهم من اي حد هناا خاطر هي زادة ماعندها حد من غيري وانا مانيش ناوية نسلم فيهاا.. فقت من سرحتي على صوت سميحة ك دخلت تحكي
سميحة :" الصابون لا يوفى.. لبارح غسلت وليوم رجعت نغسل.. حسيت روحي تهديت "
قحرتلها وبقينا ساكتين حد ماجاوبها.. ريتها ك غزرت لمايا تحكي
سميحة :" صحة النوم مايا.. هكا ماتصبحيش علياا "
ضغطت على يدي بالقوي وغزرت لمايا لي جاوبتها تحكي
مايا :" نو كنت بش نصبح اما.... "
قصيت علاهاا نحكي
انا :" اما هي قاعدة تحكي معايا ماكانتش مركزة معاك"
قحرتلي تحكي
سميحة :" اي شبيه يصير "
غزرت لعمتي لي قحرت لسميحة وغزرتلي تحكي
غالية :" رينو ماما ايجا هز الاصحنة "
قمت من بلاصتي وقربت هزيتهم هوما والمغارف.. خرجت بيهم لبيت لفطور وبقيت أنظم فيهم.. هكاكا وريت ماياا ك خلطت علياا وف يداها سلة الخبز.. حطتها وغزرتلي تحكي
مايا :" سبحان لي مصبرهم على سميحة "
ضحكت نحكي
انا :" ريت فاش يعانيو "
مايا :" والله توتر لعصاب"
انا :" ماتركزش معاها مايا ورد بالك تتغشش من كلامهاا.. احسبها كالحيط مانحبكش تتقلق منها امان "
عدات بعيناها علياا وضحكت تحكي
مايا :" تهنى هكاكا.. مانيش حاسبتها اصلا يكفي عمتو غالية باهية.. المهم انت ماتتغشش وماتعاركهاش.. فك علينا منها "
هزيتلها براسي باهي نحكي
انا :" باهي ياروحي تهني "
قلبي ضرب بقوة اول ماتلفتت وشفت لعمتي لي خرجت و فيداها القفة وين عرفتها بش تبعثني نهز لفطور.. للحظة حبيت نقلها مانحبش نهبط اما حسيت روحي حشمت...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
