#عزيز_يحكي
شعلت السيقارو وتكيت بظهري لتالي.. عليت ف صوت التلفزة وحطيت نتفرج ف المسلسل.. هزيت راسي على صوتو يحكي
تينڤا :" شد كاس التاي هذا "
خذيتو من يديه نحكي
انا :" ابعد من قدامي خليني نتفرج "
تلفتت على صوتو بجنبي وين شفتو مازال ياكل ويحكي
بلبل :" يعطيك الصحة يامعلم عالعشاء هذاا.. حتى انا معدتي مشات من العجة لي يحضر فيها تينڤا "
تينڤا :" لقيت وتتشرط.. يزيني متحملك عندي قداه "
نفخت بالشوي وسكرت التلفزة نحكي
انا :" شوفو مانبقاوش ف نفس الموضوع.. خلي امو متخبى حذاكا حتى نلقى حل.. عيسى رجع فكوني من المشاكل.. لي فياا ماكفيني تو "
بلبل :" باهي معلم.. اما لوقتاه بش نبقى هكا متخبي.. خوك ظاهرلي مش بش ينسى الموضوع.. ماالا بش نبقى حياتي لكل انا هناا "
نفثت دخان السيقارو نحكي
انا :" قتلك تو نلقى حل.. ماتكسرليش راسي واحد نهار كامل صايم نزيد نلقاك انت تو.. هذا لكل صار من بهامتك.. عيسى كان ينجم ينسى حكاية الساك فيسع ياخي سيادتك ماشي تهلك ف الباسبور.. جبتها لروحك مالا "
عدا بعينيه عليا يحكي
بلبل :" شمعناها جبتها لروحي.. معلم انت ناوي تسلم فيااا.. كان نسيت خليني نفكرك اني انا عملت هذا لكل بطلب منك انت.. يعني كان تسلم فياا راني بش نسلم فيك "
حليت عينيا على وسعهم ورميت السيقارو من يدي.. هديت عليه وشديتو من مريولو.. قربتو لياا نحكي
انا :" *** امك انت تهدد فيا.. ف بالك بش نخاف من جربوع طحان كيفك.. حبلك ربي تنطق ب اسمي كان مانقصلكش لسانك هذاا انا مانيش راجل "
حسيت بيد تينڤا ك جبدتني بالقوي يحكي
تينڤا :" ياخي لباس انتومااا.. شبيكم الزوز بش تدورو على بعضكم.. وانت ناوي تموت الراجل "
عليت ف صوتي بالقوي نحكي
انا :" مااااكش تسمع فيه كيفااااه يهدد فيااا.. مااا خليييه يمشي يقووول كلمة كاان مانحااسبوووش انااا قبل عيسى مانتسماااش "
بلبل :" معلم انا ماهددتكش.. انا فكرتك اني عملت هذا لكل على خاطرك انت.... "
قصيت عليه نحكي
انا :" وخلصت.. خذيت حقك كامل على داير مليم وفوقهم السخط لي تتكيف فيه وفوقها راقد ماكل شارب.. مااانيش مسؤول عليك اناا.. ماك خذيت حقك برااا شووف ثنيتتتك.. اما انا خليتك متخبي هنااا مالاا تسكر فممك حتى نلقى حل "
عدا بعينيه عليا وغزرلي درا كيفاه ورجع قعد يحكي
بلبل :" باهي معلم كيما تحب "
تلفتت لتينڤا ك شدني من مرفقي يحكي
تينڤا:" انجم نفهم شبيك على عصابك.. عندك ايامات لي يكلمك تشعل فيه شبيك زادة؟"
عديت بيديا الزوز على وجهي نحكي
انا :" مابيااا شي فك *** انت تو "
خليتو واقف وخرجت للبلكونة.. خذيت نفس طويل من النسمة وجبدت سيقارو آخر..شعلتو وبقيت نتكيف وفرد وقت نخمم ف الحالة لي انا فيهاا.. كيفاه وحلت روحي مع طحان كيف بلبل.. حكاية عملتهاا على اساس تفدليكة نهار وحلت فيهاا اكثر من 3 شهور تو وعارف عيسى مش بش يفك ولايبعد حتى يلقاه.. ولي خايف منو كان الطحان بلبل يجبدني وقتهاا بش نخسر كل شي كانو مايكفينيش تو كيفاه رماوني ف الورشة هذيكاا حتى النفس معادش نتنفس ولي مكرزني اكثر كيفاه خالي مسلم ف كل شي لعيسى قد مانعمل انا مايعجبش كاني جاي من الشارع مانيش ولد اختو انا زادة..اما حسابهم لكل مازال معايا كان مانصيرش انا لكل فالكل نهار من نهارات مانتسماش.. مستحيل نرضى نكمل حياتي هكاا ف ورشة كلها صديد وناخذ مصروفي من عيسى وخالي.. اصلا انا أحق واحد بهذا لكل غير هاني ساكت وصابر نستنى ف الفرصة لي تخليني نقدم اول خطوة.. فقت من سرحتي على صوت حمزة ورايا يحكي
حمزة :" معلم صحة شريبتك "
انا :" يعطيك الصحة "
قرب ناحيتي ووقف بجنبي يحكي
حمزة :" شبيك معلم فما حد قلقك ؟"
رميت السيقارو من يدي نحكي
انا :" مابياا شي.. انت شتعمل هناا ماتخدمش ؟"
حك على جبينو يحكي
حمزة :" لا نخدم اما بعد صلاة العشاء "
هزيتلو براسي باهي من غير حتى كلمة وقدمت بش ندخل.. وقفت على صوتو يحكي
حمزة :" معلم ميسالش ناخذ من وقتك دقيقة "
هزيت بحاجبي نحكي
انا :" شتحب ؟"
حمزة :" معلم انا جيت قاصدك ف قضية وانشالله ماتخيبنيش "
انا :" انطق "
حمزة :" معلم نحبك تسلفني 3 ملايين "
عقدت بحواجبي نحكي
انا :" شنوة ؟ تحكي بجدك انت ولا جاي تفرك فيهم ؟"
حمزة :" لا بجدي والله ومستعد نكتبلك فيهم شيكات.. المهم سلفني خاطرني مستحقهم "
انا :" وفاش مستحقهم ؟"
عدا بعينيه عليا يحكي
حمزة :" اختي الصغيره بش تزهز و.... "
قصيت عليه نحكي
انا :" تكذب.. ياخي ف بالك مانيش شالق بيك كيفاه قاعد تدور مع ولد سعاد الحراق.. ناوي تحرق بفلوسي ؟"
حمزة :" معلم انا..."
قصيت عليه مرة اخرى نحكي
انا :" شوف مش خاطر حكيت معاك كلمتين يمشي ف بالك انك صاحبي بش تجي تطلب مني هكاا.. ماتنساش روحك حمزة.. وفلوس ماعنديش.. واضح "
عدا بعينيه عليا وغزرلي درا كيفاه..هزلي براسو باهي ودخل.. حليت عينيا على وسعهم اول ماقربت وين الدربوز وريت عيسى وادم.. دخلت نجري نحكي
انا :" بلبل قوووم.. عيسى جاااي اهررررب "
تنطر من بلاصتي وعدا بعينيه علينا يحكي
بلبل :" كيفاه نهرب ؟"
تينڤا:" من السطح.. امشي نڤز من شباك البيت فيسع واطلع "
عليت ف صوتي نحكي
انا :" تحرررررك "
هزلي براسو باهي ومشى يجري ومعاه تينڤا.. قلبي ضرب بالقوي مع صوت الباب لي دق.. قربت فيسع وغزرت لبلبل ك نڤز وهرب.. لحظتهاا خذيت نفس طويل وقربت وين الباب بش نحل ونشوف علاش جاي لهناا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
