#عيسى_يحكي
عديت بيديا الزوز على وجهي وقربت نجري وين الشباك حليتو وخرجت فيسع للبلكونة بش نتنفس.. خذيت نفس طويل وحاولت نهدي روحي شوي من لعصب لي زاد ركبهولي خالد..نزلت بيديا عالدربوز اول ماتلفتت ولمحتهاا ساهرة مع خالد.. عديت بعينيا عليها وغزرت لوجهها لي كان ظاهر مع ضو القمرة لحظتها استرجعت كل كلمة خرجت من فمي وتقالتلها..رغم اني كنت عارف روحي بش نوجعهاا اما لقيت هذاكا أنسب حل بش تبعدني.. للحظة بكري كذبت جيهان اما كلام جاك لي زاد اكدلي هي شنوة قالت وف شنوة تخمم خلاني نتصرف هكاا بش نخلاهاا تمحي الأفكار هاذم من مخهاا وتبعد من ثنيتي خاطر معايا انا ماعندها لوين بش توصل خاطر انا مستحيل نخمم ف حاجة كيما هاذي..عديت بعينيا عليها للاخر مرة ودخلت فيسع للبيت.. ترميت عالفرش وبقيت ننهج بكلي وين حسيت روحي ندمت عالايامات هاذم وندمت اني خليتها تتقرب مني حتى توصل تخمم انو عندها لحق بش تحاسبني وتدور وتحكي حاجات كيما هكاكا..مانعرفش انا كيفاه ماخممتش وكيفاه غلطت هكاا اما سايي لحق الوقت لي بش نصلح فيه غلطتي.. من ليوم هي ف طريق وانا ف طريق.. خلاهاا تعرف حدودها معاياا بش ماترجعش تتجاوزهم.. نحيت مريولي رميتو على جنب وقمت دخلت طول لسالدوبان عملت دوش بارد بش نطفي بيه النار لي بقات تاكل فياا من داخل كل مانتفكر لي صار ليوم من اول حاجة للاخر حاجة.. سكرت السبالة وخرجت لفيت نصي بالمنشفة ورجعت للبيت.. بقيت نحضر ف ساكي متاع السفر.. حطيتها على جنب وبدلت حوايجي.. اول ماكملت ترميت عالفرش وتكيت بظهري لتالي وبقيت نغزر قدامي مانعرفش علاش قد ماحاولت ننسى نلقى تصورتها قدامي خاصة غزرتهاا لياا بكري وين لقيت تفكيري تمرد علياا وخلاني نخمم فيهاا و فشنوة تكون حاسة تو كيما تفكرت وعودي ليها لي بش نخلفهم كيما كل مرة اما ماعندي حتى حل آخر.. ماهيش بش تضيع من غيري تنجم تكمل حياتها وحدهاا كيما انا لازمني ننساها ونرجعهاا كيف ماكانت.. فقت من سرحتي على صوت الميساج لي وصلني.. مديت يدي هزيتو وفتحت بش نشوف من شكون الوقت هذا.. نفخت بالقوي اول ماعديت بعينيا عليه..رميتو على طول يدي من الغزول كانو هذا لي ناقصني تو.. تسطحت وغمضت عينيا حاولت نرقد بش نخلي نهار ليوم يتعدا ونمشي من هنااا.. بقيت نتقلب فالفرش مش منجم نغفى من وجيعة راسي لحظتها قمت من بلاصتي لبست مريولي وخرجت بش نعمل قهوة ونشوف حربوشة نشربها.. اول ماخرجت لمحت ضو بيتها لي كان يشعل قربت شوي ووقفت بجنب الباب اما ماسمعت شي.. للحظة استغربت روحي انا علاش واقف هناا كاني نستنى فيها تحل الباب بش نشوفها كيما بقيت نخمم زعمة فاش تعمل تو.. عديت بيديا الزوز على وجهي حاولت ننفض الأفكار هاذم من مخي وقدمت فيسع للكوجينة شربت حربوشة وعملت قهوة ورجعت للبيت.. سكرت الباب وراياا وتعديت طول للبلكونة.. قعدت عالكرسي وحطيت الفنجان عالطاولة بعد ماعملت رشفة منو.. تكيت بظهري لتالي نغزر للشط مقابلني.. بقيت هكاا لين طلع النهار من غير مانغفى ولا نرقد دقيقة وحدة.. قمت من بلاصتي ورجعت للبيت دخلت لسالدوبان غسلت حالتي وريقلت أموري ورجعت للبيت بدلت حوايجي وهزيت تاليفوني.. بعثت ميساج للامي وادم خبرتهم اني ليوم راجع.. خبيت التاليفون وقربت هزيت ساكي وخرجت من البيت بش نشوف خالد.. اول ماخرجت تلفتت على باب بيتو لي تحل وين شفتو خرج..هز راسو معايا وغزرلي يحكي
خالد:" صباح الخير.. تو كنت جاي بش نشوفك فقت ولا لا "
عديت بيديا على وجهي نحكي
انا :" فقت.. وقتاه خارجين؟"
خالد:" نورمالمون تو.. مانعرفش على لارين إذا فاقت ولا مازالت.. قلي انت حاضر؟"
هزيتلو براسي اي نحكي
انا :" اي حاضر "
خالد :" باهي دقيقة مالا نجيب ساكي ونجي نشوف لارين "
عديت بعينيا عليه من غير حتى كلمة.. ريتو ك دخل لبيتو جاب ساكو وخرج يحكي
خالد:" عيسى تعمل مزيا انت سكر الشبابك مدام انا شفت لارين "
بقيت واقف ف بلاصتي نغزرلو كيف قرب لباب بيتها.. دق عليه يحكي
خالد :" لارين ؟؟ لارين فقت ؟"
قربت شوي ك ماسمعتش صوتهاا وين حسيت روحي تحيرت.. وقفت على بلاصتي ك سمعتها تحكي
لارين :" دقيقة ونجي خالد استناني "
خالد:" باهي ف عقلك "
رسيت على سنيا بالقوي ورميت ساكي.. بقيت ندور ف الدار نسكر ف الشبابك والبيبان وين لقيت روحي نسترجع ف كل لحظة عديتها هناا معاهاا للحظة حسيت روحي ندمت كيفاه وجعتها هكاكا وسلبت منها فرحتها اما رغم الندم لي حسيتو لقيت روحي لازمني نكمل ف لي بديتو مستحيل نكلمهاا ولا نخلاهاا ترجع تكلمني.. تلفتت على صوت خالد من بعيد يحكي
خالد :" اب اب اب شنوة هذا لارين.. ماعقلتكش "
عقدت بحواجبي مستغرب كلامو غير ضحكتها تحكي
لارين:"Merci pour le compliment mr khaled " اول ماقربت ناحيتهم حليت عينيا على وسعهم وانا نشوف فيهاا قدامي.. عديت بعينيا علاها نغزر للي عاملتو ف روحهاا وين حسيت دمي فور مني لحظتهاا كبست عالبونية متاعي نخمم كيفاه بش نشد عصابي وانا نغزرلهاا هكاا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
